Gʼuˇ suhˍ peuˍ ve te tuˬ dawˇ teh taˍ sheˍ

Yaˬhoˉvaˬ ve kanˉ te tuˬ dawˇ teh taˍ ve kʼo, ngaˬ hui ve awˬ gʼaˇ htaꞈ cuˇ yiˍ cawˬ ve hkʼaw yehˇ chehˇ ve yoˬ. (1 Kawˇ 9:26) Awˬ leh meuˇ ve awˬ yanˇ maˇ gaˬ la sheˍ htaˇ, ngaˬ hui dawˇ teh taˍ ve cawˬ ve kʼo, leuˉ taˍ ve awˬ yanˇ htaꞈ ngaˬ hui awˬ bon cawˬ ve hkʼaw hkʼa dehꞈ yehˇ gʼa ve yoˬ. (Efs 5:15, 16) Yehˬ kʼa hkʼaw oˉ kʼoˍ pui htaˇ, awˬ gʼuˇ suhˍ teˇ hkʼawꞈ hkʼaw gʼuˇ suhˍ peuˍ ve te tuˬ dawˇ teh taˍ sheˍ. Nawˬ chi hkʼe te gʼa tuˬ, hpawnˬ daꞈ ve te jawˬ tuˬ liꞈ kʼoˆ chi ve teˇ kʼoˆ hkʼaw, nawˬ awˬ tehˬ te gʼa tuˬ ga laˇ gʼa ve awˬ hkʼaˇ cawˬ ve yoˬ. Leh awˬ lawn chi htaꞈ caˉ daꞈ ve bon kaꞈ lawˬ cawˇ ve yoˬ.—Yaˍ 1:5.

Tawˇ pa haˉ te kʼo, nawˬ ve yehˬ kʼa hkʼaw ve chaw ga daꞈ leh teˇ gʼaˇ htaꞈ gʼuˇ suhˍ peuˍ ve chaw te tcuh gʼa˗aw laˇ? Dawˇ teh taˍ ve chi htaꞈ te gʼa tuˬ yehˬ kʼa hkʼaw ve chaw gʼa ga daꞈ ve yoˬ. Awˬ naˍ liˍ te maˇ gʼa ve tehꞈ dawˇ ve kʼo, nawˬ hkʼa shuˍ gʼa hpuˇ jaw ve gʼuˇ suhˍ peuˍ ve chaw teˇ gʼaˇ htaꞈ na nyi sheˍ. (Tawˇ 15:22) Yehˬ kʼa hkʼaw oˉ kʼoˍ pui ve te htaˇ, gʼuˇ suhˍ peuˍ ve chaw teˇ gʼaˇ htaꞈ na nyi piˇ kaꞈ gʼa ve yoˬ. Peuˬ hkʼawꞈ nawˉ te gʼa ve awˬ yanˇ bvuhꞈ nyi sheˍ. Nawˬ gʼuˇ suhˍ peuˍ ve te jaw ve kʼo, chi teˇ hkui nawˬ gʼuˇ suhˍ peuˍ ve chaw kʼawꞈ te gʼa˗aw laˇ tehꞈ dawˇ nyi sheˍ.

Teˇ tcuhˉ teˇ yanˇ gʼuˇ suhˍ peuˍ ve teˇ ha pa te tuˬ, maˇ heˆ leh chi aꞈ kehˉ maw ve te tuˬ, nawˬ ve yehˬ kʼa hkʼaw ve chaw cawˬ˗aw laˇ? Nawˬ kanˉ maˇ jaˇ ve htawˇ teˇ tcuhˉ teˇ yanˇ gʼuˇ suhˍ peuˍ ve te gʼa sheˍ ve yoˬ. Teˇ nyi le le awˬ yanˇ a ciˉ yehˇ leh Gʼuiˬ sha ve kanˉ te gʼa ve yoˬ. Kanˉ awˬ yanˇ hkʼa biˇ te ve, maˇ heˆ leh liꞈ gʼa henˇ˗e ve pa taw, awˬ yanˇ hkʼa dehꞈ maˇ cawˬ ve htawˇ, teˇ ha pa ve hkʼaw nawˬ jehˇ ve awˬ nyi cawˬ maˇ ve, maˇ heˆ leh 5 shinˉ cawˬ ve teˇ ha pa htaˇ, nawˬ gʼuˇ suhˍ peuˍ ve te gʼa ve yoˬ. Nawˬ teˇ tcuhˉ teˇ yanˇ gʼuˇ suhˍ peuˍ ve hkʼaˬ nyiˇ ha pa te tuˬ ha pa liꞈ hkʼaw bvuhꞈ nyi leh, nawˬ te gʼa ve awˬ yanˇ kaꞈ bvuhꞈ nyi sheˍ.—Tawˇ 21:5.

Nawˬ hui hkʼaˬ hkʼe te haꞈ hanˉ gʼa tuˬ le?—Gʼuˇ suhˍ peuˍ ve chaw VDO nyi leh na hkawˇ chi teˇ hpaˍ htaꞈ hkʼawꞈ laˇ sheˍ:

• Gʼuˇ suhˍ peuˍ ve te tuˬ yuˬ tanˇ ve chaw htaꞈ Yaˬhoˉvaˬ haꞈ ve tehꞈ, awˬ viˉ awˬ nyi E˗maˇ ve awˬ lawn ngaˬ hui htaꞈ hkʼaˬ hkʼe maˍ laˇ ve le?