Hkriꞈ yaˇ ve a shaꞈ teꞈ hkʼaˇ
Ha pa 9 maˬ hkʼaw shu htaꞈ Liꞈ hpu tanˬ maˍ piˇ tuˬ te ve
Ha pa 9 maˬ hkʼaw Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ yehˇ leh ngaˬ hui coˇ caˇ leh shu htaꞈ Liꞈ hpu tanˬ maˍ piˇ tuˬ yoˬ. Hto toˇ ve chaw teˇ tcuhˉ teˇ yanˇ gʼuˇ suhˍ peuˍ ve te tuˬ, awˬ yanˇ 30 naˍ liˍ leuˆ te gʼa ve yoˬ. Awˬ yanˇ chi ve hkʼaw ngaˬ hui te gʼa ve aˬ htoꞈ ma cawˬ ve le?
Hto toˇ ve hkʼaw: Yehˬ shehˍ hpaˇ nyi ma pfuhˇ tuˬ te piˇ tuˬ, liꞈ kʼoˆ hkʼawꞈ nawˉ lo ve na hkawˇ htaꞈ yehˇ leh Liꞈ hpu henˇ tuˬ awˬ hkʼaˇ te maˍ piˇ sheˍ. Chi awˬ gʼuˇ suhˍ htaˇ ca kʼawꞈ guiˇ˗e ve chaw leh nyi ma pfuhˇ ve chaw htaꞈ dawˇ nyi sheˍ. Oˇ ve teˇ yanˇ yawˇ Liꞈ hpu maˇ henˇ gaˇ ve htawˇ, chi teˇ hkui yawˇ liꞈ kʼoˆ chi ve htaꞈ dawˇ cawˇ leh Liꞈ hpu henˇ ve awˬ hkʼaˇ awˬ suhˉ htaꞈ kaꞈ dawˇ cawˇ tuˬ yoˬ hehˉ. Chaw maˇ chehˇ ve yehˬ htaꞈ ngaˬ hui liꞈ kʼoˆ chi ve taˇ teh taˉ piˇ, maˇ heˆ leh nyi ma maˇ pfuhˇ ve chaw htaꞈ liꞈ kʼoˆ chi ve kaꞈ maˇ feu piˇ cawˇ. Hkriꞈ yaˇ awˬ moˍ hkʼaw Gʼuiˬ sha ve kanˉ te ve nyi haꞈ shaˉ paˍ, chi teˇ ha pa ve hkʼaw Hkriꞈ yaˇ awˬ moˍ maˇ maˇ hto toˇ gʼa tuˬ, gu teh laˇ ve yoˬ.
Awˬ nu ve teˇ yanˇ hkʼaw: Nawˬ chehˇ ve Hkriꞈ yaˇ awˬ moˍ hkʼaw liꞈ kʼoˆ keu leh caꞈ tuˬ yehˇ ve kʼo, Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ caꞈ tuˬ hkʼaw kaꞈ keu taˍ sheˍ. Liꞈ kʼoˆ chi ve hkʼe leˇ yuˬ gʼa leh hpu maˇ peuˬ tehꞈ, nyi ma pfuhˇ ve chaw htaꞈ kʼoˆ piˇ sheˍ. Te gʼa ve kʼo, oˇ ve teˇ hkui Liꞈ hpu henˇ ve awˬ hkʼaˇ chi suhˉ˗ehˍ te maˍ piˇ sheˍ. Maˇ heˆ leh awˬ nu ve awˬ yanˇ htaˇ Liꞈ hpu henˇ tuˬ awˬ yanˇ tinˍ daꞈ gʼa ve yoˬ. Gʼuiˬ sha ve kanˉ te ve nyi haꞈ shaˉ paˍ tanˇ kaˬ hkʼaˇ te kuiˬ lo, hto toˇ leh Liꞈ hpu maˍ tuˬ, hto toˇ ve chaw teˇ gʼaˇ gʼaˇ htaꞈ leuˆ yuˬ gʼa ve yoˬ. Nawˬ kanˉ te kuiˬ lo ve awˬ chawˇ htaꞈ Liꞈ hpu henˇ tuˬ jehˬ piˇ gʼa leh, nawˬ mawˬ daꞈ ve chaw htaꞈ Liꞈ hpu maˍ tuˬ jehˬ piˇ gʼa ve yoˬ.
Yeˍsuˆ ngaˬ hui htaꞈ kʼoˆ laˇ ve, “kʼai leh . . . awˬ laꞈ gʼawˇ hpehꞈ la tuˬ ca te˗o.” (Maꞈ 28:19, 20) Awˬ yanˇ chi ve hkʼaw, Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ yehˇ leh shu htaꞈ Liꞈ hpu maˍ piˇ htaˇ, ngaˬ hui Yeˍsuˆ ve tawˇ hkawˇ htaꞈ hkʼa dehꞈ gʼaꞈ te gʼa tuˬ ga laˇ ve yoˬ.