Heuˆ daꞈ ve—Co co taiˍ taiˍ

Heuˆ daꞈ ve htaꞈ ha lehˬ ve awˬ hpawˇ awˬ miˇ ma lehˬ Yaˬhoˉvaˬ htaꞈ chiˇ mvuh tuˬ te piˇ leh, teˇ gʼaˇ leh teˇ gʼaˇ kaꞈ ha lehˬ tuˬ te daꞈ ve yoˬ. (Mk 10:9) Yawˇ hui nyiˇ gʼaˇ ha lehˬ ve cawˬ leh shoꞈ shaꞈ ve htaꞈ tawˍ daꞈ gʼa tuˬ, yawˇ hui awˬ ca htaꞈ leuˆ htaˇ Liꞈ hpu hkʼaw ve awˬ liˇ awˬ hkʼaˇ htaꞈ gʼa gʼaꞈ te ve yoˬ.

“Chaw haˉ yaˇ miˇ haˉ te ve awˬ yanˇ ponˬ kʼai htaˇ˗ehꞈ,” chaw teˇ gʼaˇ geh maˆ daꞈ ve lehˬ daꞈ ve yoˬ. Awˬ lawn kʼo, chaw haˉ yaˇ miˇ haˉ te ve awˬ yanˇ htaˇ lehˬ teˇ geh zuhꞈ gaˇ ve nyi ma cawˬ jaˇ leh nawˬ dawˇ cheˆ ve awˬ ceuˬ htaꞈ heuˆ la kuiˬ cawˬ ve yoˬ. (1 Kawˇ 7:36, MGS) Nawˬ maˇ heuˆ daꞈ sheˍ ve awˬ yanˇ hkʼaw Gʼuiˬ sha htaꞈ meuˆ daꞈ maˇ la tuˬ te leh Hkriꞈ yaˇ ve te hkʼaˇ dawˇ hkʼaˇ cawˬ maˇ la tuˬ te sheˍ. Chi hkʼe te ve kʼo, nawˬ heuˆ daꞈ htaˇ ha lehˬ ve cawˬ tuˬ yoˬ.

Nawˬ chaw teˇ gʼaˇ htaꞈ maˇ heuˆ daꞈ sheˍ htaˇ, awˬ yanˇ hkʼa dehꞈ yehˇ leh yawˇ ve “awˬ hkʼaw hpawˇ” ve nyi ma htaꞈ hkʼa dehꞈ shiˍ tuˬ te sheˍ. (1 Peˍ 3:4) Nawˬ teˇ ceuˬ ceuˬ htaꞈ shiˍ gaˇ ve kʼo, yawˇ geh tawˇ yaw daꞈ sheˍ. Awˬ lawn kʼo, heuˆ daꞈ˗oˬ ve chaw lehˬ a shu yawˇ gʼa tuˬ awˬ pon ceh tiˉ maˇ gʼa dawˇ law. Yaꞈ hkʼaˇ, gʼa piˇ ve yoˬ. (Hpi 2:3, 4) Maˇ heuˆ daꞈ sheˍ htaˇ nawˬ Liꞈ hpu hkʼaw ve awˬ liˇ awˬ hkʼaˇ htaꞈ gʼaꞈ te ve kʼo, nawˬ heuˆ daꞈ tuˬ awˬ pon awˬ hkuiˉ puiˍ hkʼa dehꞈ kawˍ taˍ ve hkʼe hpehꞈ ve yoˬ.

Maˇ heuˆ daꞈ sheˍ htaˇ gu hehnˇ taˍ ve—Awˬ tawn 3: ‘Awˉ lawˉ shawˍ nyi ve’ VDO nyi leh na hkawˇ chi teˇ hpaˍ htaꞈ hkʼawꞈ laˇ sheˍ:

• Awˬ viˉ awˬ nyi yaˇ miˇ leh Che hkʼaˬ hkʼe taw taw meuˆ daꞈ˗oˬ ve le?

• Yawˇ hui teˇ tcuhˉ maˆ daꞈ ve awˬ yanˇ gaˬ htaˇ, awˬ viˉ awˬ nyi yaˇ miˇ aˬ htoꞈ ma gʼa mawˬ ve le?

• Awˬ viˉ awˬ nyi yaˇ miˇ ve awˬ pa awˬ e yawˇ htaꞈ hkʼaˬ hkʼe ga piˇ ve le? Leh yawˇ hkʼaˬ hkʼe dawˇ cheˆ ve le?