Mvuhˇ yeˬ mvuhˇ haw lonˉ hpehꞈ la peuˬ hkʼawꞈ nawˉ awˬ viˉ awˬ nyi htaꞈ hkʼaˬ hkʼe ga piˇ ve le?

Awˬ lawn chi hkʼe ve hpehꞈ la htaˇ, awˬ viˉ awˬ nyi htaꞈ hkʼa dehꞈ ga piˇ gʼa tuˬ kanˉ hteˇ hteˇ shawˇ shawˇ lehˬ gu teh leh teˇ gʼaˇ leh teˇ gʼaˇ caˉ daꞈ tuˬ a yeˇ uiˍ jaˇ ve yoˬ. Chi htaꞈ pa taw awˬ viˉ awˬ nyi htaꞈ ga piˇ tuˬ Uˉ peunˍ ve Kawˍmiˍtiˍ lehˬ awˬ tcuhˆ puiˍ teˇ kaˬ le le htaꞈ Tuꞈ ve hkanˍ ve hpawˇ ga piˇ ve awˬ moˍ gu teh tcuh ve yoˬ.

Mvuhˇ yeˬ mvuhˇ haw lonˉ hkʼaˬ teˇ kaˬ hpehꞈ la ve awˬ viˉ awˬ nyi chi teˇ moˍ gʼa shiˍ htaˇ, ga laˇ tuˬ aˬ htoꞈ ma loˍ ve yawˇ hui oˇ kaˬ lo chehˇ ve nyi haꞈ shaˉ paˍ htaꞈ caˉ daꞈ piˇ tuˬ yoˬ. Mvuhˇ yeˬ mvuhˇ haw lonˉ hpehꞈ la hehnˇ jaˇ leh oˇ kaˬ lo chehˇ ve awˬ viˉ awˬ nyi gu maˇ gʼa ve kʼo, awˬ tcuhˆ puiˍ lehˬ tuꞈ ve hkanˍ ve hpawˇ ga piˇ ve kanˉ chi htaꞈ te tuˬ, awˬ viˉ awˬ nyi teˇ hpaˍ te tcuh ve yoˬ. Awˬ viˉ awˬ nyi chi teˇ hpaˍ lehˬ kanˉ ga laˇ tuˬ, maˇ heˆ leh loˍ ve mawˇ teˇ hpaˍ htaꞈ ga laˇ tuˬ lawˬ ve yoˬ hehˉ. Maˇ heˆ leh oˇ kaˬ lo cawˬ ve mawˇ teˇ hpaˍ veuˬ leh awˬ viˉ awˬ nyi htaꞈ pehˍ piˇ tuˬ yoˬ.

Awˬ hkʼaˇ chi teˇ hkʼaˇ lehˬ awˬ viˉ awˬ nyi teˇ gʼaˇ le le a shu yawˇ hkʼaˇ yawˇ dawˇ leh ga piˇ ve aꞈ kehˉ daꞈ ve yoˬ. Awˬ lawn kʼo, ngaˬ hui kanˉ nyiˇ pawˆ maˇ gʼa te, kanˉ te ve maˇ shoꞈ shaꞈ, leh hpu kaꞈ maˇ peuˬ jaˇ.

Awˬ tcuhˆ puiˍ leuˆ teh taˍ ve awˬ viˉ awˬ nyi lehˬ, yawˇ hui hpu hkʼaˬ hkʼe yehˇ leh chaw hkʼaˬ ma loˍ ve, yawˇ hui hkʼaˇ yawˇ hui dawˇ cheˆ gʼa ve yoˬ. Yawˇ hui oˇ kaˬ lo chehˇ ve mvuhˇ miˬ kanˉ te paˍ htaꞈ shiˍ daꞈ leh ngaˬ hui ve kanˉ htaꞈ hkʼa dehꞈ ga laˇ gʼa ve yoˬ. Chi htaꞈ pa taw, nawˬ ga laˇ tuˬ awˬ tcuhˆ puiˍ maˇ lawˬ ve kʼo, nawˬ hkʼaˇ nawˬ hpu tanˇ shaw hpoˆ leh mawˇ veuˬ feu piˇ ve maˇ te cawˇ. Maˇ heˆ leh mvuhˇ yeˬ mvuhˇ haw lonˉ gʼa hpuˇ kuiˬ lo nawˬ hkʼaˇ nawˬ kʼai ve kaꞈ maˇ te cawˇ.

Mvuhˇ yeˬ mvuhˇ haw lonˉ hpehꞈ la htaˇ, ngaˬ hui ve awˬ viˉ awˬ nyi htaꞈ ga piˇ gaˇ ve yoˬ. (Heˍ 13:16) Ngaˬ hui yawˇ hui htaꞈ haꞈ ve yoˬ. Yaꞈ hkʼaˇ, ngaˬ hui hkʼaˬ hkʼe te ga piˇ gʼa tuˬ le? Awˉ lawˉ teˇ ceuˬ lehˬ mvuhˇ yeˬ mvuhˇ haw lonˉ gʼa hpuˇ chehˇ ve leh tuꞈ ve hkanˍ ve hpawˇ ga piˇ chehˇ ve awˬ viˉ awˬ nyi awˬ pon ngaˬ hui bon lawˬ piˇ gʼa ve yoˬ. Leh miˬ guiˬ hkʼoˆ lo Gʼuiˬ sha ve kanˉ te ve hpu ta kʼoˍ hkʼaw ngaˬ hui hpu tanˇ piˇ gʼa ve yoˬ. Hpu tanˇ piˇ ve chi awˬ bon cawˬ ve hkʼaw yehˇ gʼa tuˬ, Uˉ peunˍ ve Kawˍmiˍtiˍ beˆ maˍ piˇ ve hkʼe awˬ tcuhˆ puiˍ ve kawˍmiˍtiˍ gʼaꞈ te tuˬ yoˬ. Leh ngaˬ hui hkʼaˇ ngaˬ hui ga piˇ gaˇ ve kʼo, awˬ tcuhˆ puiˍ htaꞈ kʼoˆ piˇ gʼa ve yoˬ. Chi hkʼe te tuˬ, Gʼuiˬ sha ve kanˉ hkʼaˇ awˬ pon yehˬ te ve liꞈ (DC-50) bvuhꞈ leh feu piˇ gʼa ve yoˬ.

Baˬraˬziˇ mvuhˇ miˬ lo iˉ kaˆ htonˍ ve VDO nyi leh na hkawˇ chi teˇ hpaˍ htaꞈ hkʼawꞈ laˇ sheˍ:

2020 Baˬraˬziˇ mvuhˇ miˬ lo iˉ kaˆ htonˍ htaˇ Yaˬhoˉvaˬ ve Shaˉhkiˆhkanˍ ve chaw tuꞈ ve hkanˍ ve hpawˇ ga piˇ ve kanˉ nawˬ gʼa mawˬ htaˇ aˬ htoꞈ ma dawˇ cawˇ ve le?