Hpawnˬ daꞈ tuˬ ngaˬ hui hkʼaˬ hkʼe gu hehnˇ cawˇ ve le?

Yaˬhoˉvaˬ ve Shaˉhkiˆhkanˍ ve chaw geh nawˬ Liꞈ hpu henˇ chehˇ ve kʼo, henˇ ve teˇ pawˆ le le nawˬ awˉ lawˉ gʼaw leh gu ve yoˬ hehˉ. Nawˬ awˬ bon hkʼa dehꞈ gʼa tuˬ, Hkriꞈ yaˇ awˬ moˍ geh hpawnˬ daꞈ htaˇ kaꞈ oˇ hkʼe te cawˇ ve yoˬ. Ngaˬ hui coˇ caˇ leh hkʼaˬ htaˆ kaꞈ gu ve kʼo, awˬ bon gʼa tuˬ yoˬ.

Keunˍ ve awˬ yanˇ leh awˬ ti htaꞈ gʼa leuˆ yuˬ cawˇ ve yoˬ. Nawˬ hkʼa dehꞈ dawˇ nyi gʼa tuˬ, hkʼaˬ ve teˇ yanˇ daꞈ ve le? Mvuhˇ shawˉ teˇ naꞈ kanˉ maˇ te sheˍ htaˇ, maˇ heˆ leh mvuhˇ hpeuꞈ yaˇ zuhꞈ peuˬ hkʼawꞈ nawˉ laˇ? Nawˬ henˇ tuˬ awˬ yanˇ a ciˉ ceh tiˉ cawˬ ve htawˇ, awˬ yanˇ hkʼaˬ maw yehˇ tuˬ dawˇ cheˆ leh, teˇ ceuˬ kaꞈ maˇ gʼa shoꞈ shaꞈ laˇ tuˬ coˇ caˇ cawˇ ve yoˬ. Gawˬ lehˍ ve awˬ ti hkʼaw ri˗di˗o, awˬ han tawˆ kuiˬ (TV), leh tawˇ yaw tuˬ awˬ hkʼeun hoˆ leh gu cawˇ ve yoˬ. Ngaˬ hui gu˗a te htaˇ bon lawˬ ve kʼo, ngaˬ hui maˇ dawˇ haˍ leh Gʼuiˬ sha ve tawˇ hkawˇ htaꞈ hkʼa dehꞈ dawˇ nyi gʼa ve yoˬ. —Hpiˇliˇpiˆ 4:6, 7.

Henˇ tuˬ ve liꞈ kʼoˆ htaꞈ maiˉ taˍ leh hkʼawꞈ tuˬ gu cawˇ ve yoˬ. Awˉ lawˉ htaˇ, henˇ tuˬ ve awˬ lawn htaꞈ na gʼa tuˬ awˬ lawn lonˉ ma htaꞈ dawˇ nyi sheˍ. Awˬ lawn ehˉ, awˬ han, kʼawꞈ hpfuhˆ dawˇ nyi ve na nyi hkawˇ teˇ hpaˍ awˬ lawn lonˉ ma htaꞈ hkʼaˬ hkʼe te caˉ daꞈ ve kaꞈ dawˇ nyi sheˍ. Peuˬ leh, teˇ tawn peuˬ teˇ tawn gʼaw leh oˇ teˇ tawn hkʼaw ve hkʼawꞈ tuˬ ca sheˍ. Liꞈ hpu awˬ tawn htaꞈ hpeuꞈ nyi leh henˇ chehˇ ve awˬ lawn htaꞈ hkʼaˬ hkʼe te caˉ daꞈ ve kaꞈ dawˇ nyi sheˍ. (Tcuh yaˇ 17:11) Hkʼawꞈ tuˬ htaꞈ ca mawˬ htaˇ, nawˬ tawnˇ gʼa tuˬ a yeˇ uiˍ ve awˬ tawn htaꞈ chi suhˉ˗ehˍ maiˉ taˍ sheˍ. Chi hkʼe te ve kʼo, hpawnˬ daꞈ˗e htaˇ nawˬ laꞈ sheh chiˇ leh nyi ma hkʼaw tawˆ la ve chi suhˉ˗ehˍ hkʼawꞈ piˇ gʼa ve yoˬ.

Teˇ shinˉ le le hpawnˬ daꞈ ve awˬ lawn hkʼa dehꞈ dawˇ nyi ve kʼo, Liꞈ hpu hkʼaw ve cuˇ yiˍ nawˬ ve nyi ma hkʼaw maˇ maˇ keu gʼa ve yoˬ. —Maꞈhtehˍ 13:51, 52.

• Nawˬ hpawnˬ daꞈ˗e tuˬ hkʼaˬ htaˆ kaꞈ gu gaˇ ve kʼo, hkʼaˬ hkʼe te cawˇ ve le?

• Hpawnˬ daꞈ htaˇ nawˬ hkʼawꞈ gaˇ ve kʼo, hkʼaˬ hkʼe te cawˇ ve le?