Yaˬhoˉvaˬ Yoˇnaˆ htaꞈ yeunˇ hkanˍ ve

Aˍsuˇriˆ mvuhˇ miˬ Niˇnaˍveˍ venˇ hkʼaw chehˇ ve chaw haiˬ jaˇ. Yawˇ hui haiˬ ve maˇ kʼawꞈ te tuˬ, Yaˬhoˉvaˬ tcuh kaˍ paˍ Yoˇnaˆ htaꞈ shaˍ tiꞈ ca piˇ tcuh ve yoˬ. Yaꞈ hkʼaˇ, Yoˇnaˆ Niˇnaˍveˍ venˇ lo maˇ kʼai. Haw loꞈ kʼoˍ ciˇ leh Saˍpenˍ venˇ hpawˇ lo hpaw˗e ve yoˬ.

Haw loꞈ kʼoˍ ciˇ leh laˇ tsuhˇ gʼuiˬ awˬ kʼaw ji lo gaˬ htaˇ, mvuhˇ haw lonˉ meuˆ laˬ ve yoˬ. Haw loꞈ kʼoˍ hkʼaw chehˇ taˍ ve chaw kawˆ jaˇ leh yawˇ hui a shu yawˇ ve gʼuiˬ sha geh bon lawˬ leh kʼoˆ ve, ‘aˬ ma hpehꞈ la ve lehˉ?’ Hkʼe te leh, Yoˇnaˆ yawˇ hui htaꞈ kʼoˆ piˇ ve, ‘ngaˬ hui mvuhˇ haw lonˉ gʼa hpuˇ ve lehˬ ngaˬ htaꞈ pa taw yoˬ. Yaˬhoˉvaˬ kʼai tcuh laˇ kuiˬ lo ngaˬ maˇ kʼai ve pa taw, ngaˬ htaꞈ laˇ tsuhˇ gʼuiˬ hkʼaw baˬ keu laˇ˗oˆ. Oˇ hkʼe te ve kʼo, laˇ tsuhˇ guiˬ gawˬ kʼai tuˬ yoˬ.’ Haw loꞈ kʼoˍ hkʼaw chehˇ ve chaw Yoˇnaˆ kʼoˆ ve hkʼe maˇ te gaˇ ve htawˇ, yawˇ oˇ hkʼe kʼoˆ tcuhˉ taˍ ve pa taw, yawˇ hui Yoˇnaˆ htaꞈ laˇ tsuhˇ gʼuiˬ hkʼaw baˬ keu piˇ leh mvuhˇ haw lonˉ gawˬ la ve yoˬ.

Yoˇnaˆ Laˇ tsuhˇ gʼuiˬ hkʼaw ce loꞈ˗e chehˇ htaˇ, yawˇ gʼa suh tuˬ yoˬ tehꞈ dawˇ leh Yaˬhoˉvaˬ geh bon lawˬ ve yoˬ. Hkʼe te leh, Yaˬhoˉvaˬ ngaˇ lonˉ teˇ hkeh peu laˇ leh Yoˇnaˆ htaꞈ hehˆ dawˬ tcuh ve yoˬ. Yaꞈ hkʼaˇ, Yoˇnaˆ maˇ suh. Yawˇ ngaˇ lonˉ gʼoˇ peˬ hkʼaw chehˇ htaˇ bon lawˬ ve, ‘ngaˬ nawˬ ve hkawˇ hkʼaˬ htaˆ kaꞈ na yuˬ tuˬ yoˬ tehꞈ ka tiꞈ te ve yoˬ.’ Yaˬhoˉvaˬ Yoˇnaˆ htaꞈ ngaˇ lonˉ gʼoˇ peˬ hkʼaw 3 nyi hkʼa gaˬ haꞈ shaˉ piˇ ve yoˬ. Oˇ htaˇ, Gʼuiˬ sha lehˬ ngaˇ lonˉ oˇ ve htaꞈ tawˇ yaw piˇ leh Yoˇnaˆ htaꞈ laˇ tsuhˇ gʼuiˬ pfuhˍ lo ca hpeꞈ baˬ tcuh ve yoˬ.

Yaˬhoˉvaˬ Yoˇnaˆ htaꞈ ga piˇ ve lehˬ, Yoˇnaˆ Niˇnaˍveˍ venˇ lo maˇ gʼa kʼai˗o tehꞈ kʼoˆ gaˇ ve laˇ? Maˇ heˆ. Yaˬhoˉvaˬ Yoˇnaˆ htaꞈ venˇ oˇ ve hkʼaw kʼawꞈ kʼai tcuh ve yoˬ. Chi teˇ pawˆ, yawˇ Gʼuiˬ sha hkawˇ na yuˬ leh Niˇnaˍveˍ venˇ lo kʼai ve yoˬ. Haiˬ jaˇ ve venˇ yaˇ hui htaꞈ shaˍ tiꞈ piˇ ve, ‘40 nyi hkʼawꞈ nawˉ kʼo, Niˇnaˍveˍ venˇ htaꞈ te luˬ tuˬ yoˬ.’ Yoˇnaˆ dawˇ taˍ ve hkʼe maˇ hpehꞈ. Niˇnaˍveˍ venˇ yaˇ hui yawˇ hkawˇ na yuˬ leh venˇ baˆ dawˇ hpfuhˆ ve yoˬ. Niˇnaˍveˍ venˇ ve jawˇ mawˇ mvuhˇ miˬ yaˇ htaꞈ kʼoˆ piˇ ve, ‘haiˬ ve awˬ ceuˬ maˇ kʼawꞈ te leh Gʼuiˬ sha geh lawˬ hkawˉ˗oˆ. Gʼuiˬ sha nyi ma pa leh ngaˬ hui htaꞈ maˇ te luˬ laˇ naˍ maˇ shiˍ.’ Niˇnaˍveˍ venˇ yaˇ haiˬ ve awˬ ceuˬ maˇ te ve htaꞈ Yaˬhoˉvaˬ mawˬ ve teˇ yanˇ, yawˇ hui htaꞈ maˇ te luˬ piˇ.

Niˇnaˍveˍ venˇ chi htaꞈ Yaˬhoˉvaˬ maˇ te luˬ ve pa taw Yoˇnaˆ beuꞈ jaˇ. Yaˬhoˉvaˬ yawˇ htaꞈ ha kʼaˉ leh yeunˇ hkanˍ piˇ ve htawˇ, Yoˇnaˆ Niˇnaˍveˍ venˇ yaˇ hui htaꞈ maˇ ha kʼaˉ piˇ. Yoˇnaˆ venˇ baˬ lo tawˆ˗e leh suhˆ cehˬ ehˉ awˬ hawˉ lo nyi ma zuhˆ jaˇ ve hkʼaw lo mui taˍ ve yoˬ. Suhˆ cehˬ ehˉ suh htaˇ, yawˇ kʼawꞈ beuꞈ jaˇ. Yaˬhoˉvaˬ yawˇ htaꞈ kʼoˆ piˇ ve, ‘ngaˬ Niˇnaˍveˍ venˇ yaˇ hui htaꞈ ha kʼaˉ leh ponˬ piˇ ve htawˇ, nawˬ maˇ sheˉ lai leh suhˆ cehˬ ehˉ suh ve htaꞈ nawˬ sheˉ lai ve law leˇ.’ Niˇnaˍveˍ venˇ hkʼaw chehˇ ve chaw suhˆ cehˬ ehˉ aꞈ kehˉ awˬ hpfuhˇ hkʼaˆ jaˇ ve yoˬ tehꞈ Yaˬhoˉvaˬ Yoˇnaˆ htaꞈ maˍ piˇ ve yoˬ.