Nawˬ ve haꞈ pehnˇ ve taˇ i kʼai tcuh

1, 2. (a) Yeˍsuˆ ve tawˇ hkawˇ Maꞈhtehˍ 24:12 awˉ lawˉ peuˇ htaˇ, a shu htaꞈ caˉ daꞈ ve le? (b) Awˉ lawˉ peuˇ ve Hkriꞈ yaˇ haꞈ pehnˇ ve htaꞈ hkʼaˬ hkʼe te haꞈ shaˉ ve, Tcuh yaˇ ve liꞈ hkʼaw hkʼaˬ hkʼe kʼoˆ maˍ laˇ taˍ ve le? (Awˬ lawn tanˬ htaˇ ve awˬ han htaꞈ nyi sheˍ.)

Yeˍsuˆ miˬ guiˬ hkʼoˆ chehˇ htaˇ, “miˬ guiˬ chi awˬ yanˇ leh” tuˬ ve awˬ heˆ hkʼaˬ hkʼe hpehꞈ tawˆ la tuˬ ve yawˇ shu htaꞈ kʼoˆ maˍ piˇ ve yoˬ. Yawˇ kʼoˆ ve teˇ ceuˬ lehˬ “chaw maˇ maˇ haꞈ pehnˇ ve teˇ ceuˬ i kʼai yawnˇ kʼai tuˬ yoˬ.” (Maꞈhtehˍ 24:3, 12) Awˉ lawˉ peuˇ ve Yuˇdaꞈ chaw yawˇ hui Gʼuiˬ sha ve chaw tehꞈ kʼoˆ ve htawˇ, yawˇ hui Gʼuiˬ sha htaꞈ haꞈ ve i kʼai yawnˇ kʼai ve yoˬ.

² Oˇ htaˇ teˇ co˗e ve Hkriꞈ yaˇ ve dawˇ hkʼaˇ Yuˇdaꞈ chaw hui htaꞈ maˇ shuˍ daꞈ. ‘Yeˍsuˆ Hkriꞈ’ ve awˬ lawn yawˇ hui bon maˍ ve kaiˬ jaˇ ve yoˬ. Gʼuiˬ sha htaꞈ, yonˍ hkʼaˇ hkʼa shuˍ ve chaw, awˬ tehˬ ve htaꞈ maˇ shiˍ sheˍ ve chaw yawˇ hui hkʼa dehꞈ haꞈ ve yoˬ. Hkriꞈ yaˇ oˇ ve teˇ hpaˍ Gʼuiˬ sha htaꞈ haꞈ ve teˇ ceuˬ haꞈ shaˉ gʼa ve yoˬ. (Tcuh yaˇ 2:44-47; 5:42) Yaꞈ hkʼaˇ, awˉ lawˉ peuˇ ve Hkriꞈ yaˇ teˇ hpaˍ hpaˍ haꞈ pehnˇ ve htaꞈ i kʼai ve yoˬ. Ngaˬ hui hkʼaˬ hkʼe te shiˍ gʼa ve le?

3. Aˬ htoꞈ ma te Hkriꞈ yaˇ teˇ hpaˍ hpaˍ haꞈ pehnˇ ve i kʼai ve le?

³ Eˇfeˇsuꞈ venˇ hkʼaw chehˇ ve Hkriꞈ yaˇ htaꞈ Yeˍsuˆ kʼoˆ piˇ ve, “Awˉ lawˉ htaˇ nawˬ haꞈ puiˉ ve htawˇ, chi beuꞈ maˇ kʼawꞈ haꞈ” (Hpeuꞈ maˍ ve 2:4) Awˬ paˇ awˬ kui chehˇ ve a shu yawˇ awˬ pon ceh tiˉ dawˇ nyi ve pa taw, yawˇ hui chi hkʼe hpehꞈ gʼa ve yoˬ hehˉ. (Eˇfeˇsuꞈ 2:2, 3) Eˇfeˇsuꞈ venˇ paw sha jaˇ leh yawˇ hui hpehꞈ sha leh hpu shi mawˇ jeˬ cawˬ maˇ jaˇ ve htaꞈ dawˇ cawˇ jaˇ ve yoˬ. Oˇ kaˬ lo ve chaw laiˉ gʼaˇ pehꞈ ve tzuhˆ ve chaw hpehꞈ leh Gʼuiˬ sha ve awˬ liˇ tawˇ hkawˇ htaꞈ maˇ yawˆ yan. Gʼuiˬ sha leh awˬ nu ve chaw htaꞈ haꞈ ve aꞈ kehˉ yawˇ hui ha lehˬ tuˬ te ve dawˇ cawˇ jaˇ ve yoˬ.

4. (a) Ngaˬ hui ve awˬ co˗e haꞈ pehnˇ ve hkʼaˬ hkʼe te i kʼai ve le? (b) Aˬ htoꞈ ma ve 3 ceuˬ htaꞈ ngaˬ hui gʼa haꞈ shaˉ cawˇ ve le?

⁴ Yeˍsuˆ ve tawˇ hkawˇ haꞈ pehnˇ ve i kʼai yawnˇ kʼai ve chi beuꞈ teˇ co˗e kaꞈ yehˇ gʼa sheˍ ve yoˬ. Miˬ guiˬ yaˇ teˇ hpaˍ Gʼuiˬ sha htaꞈ haꞈ ve i kʼai ve yoˬ. Laiˉ lanˬ gʼaˇ chaw yaˇ ve awˬ moˍ miˬ guiˬ chi hkʼoˆ lo shoꞈ shaꞈ ve awˬ lawn gu laˇ tuˬ lawˬ ve yoˬ. Gʼuiˬ sha geh maˇ lawˬ. Eˇfeˇsuꞈ ve Hkriꞈ yaˇ awˬ moˍ hkʼa shuˍ, Yaˬhoˉvaˬ ve kanˉ te ve chaw htawˇ, haꞈ pehnˇ ve i kʼai la gʼa ve yoˬ. Hkʼe te leh, haꞈ pehnˇ ve teˇ hpaˍ ngaˬ hui gʼa haꞈ shaˉ cawˇ ve teˇ geh dawˇ nyi sheˍ: (1) Yaˬhoˉvaˬ htaꞈ haꞈ ve, (2) Liꞈ hpu hkʼaw awˬ tehˬ ve htaꞈ haꞈ ve, (3) awˬ viˉ awˬ nyi htaꞈ haꞈ ve, chi ve 3 ceuˬ yoˬ.

Yaˬhoˉvaˬ htaꞈ haꞈ ve

5. Aˬ htoꞈ ma te ngaˬ hui Gʼuiˬ sha htaꞈ gʼa haꞈ ve le?

⁵ Ngaˬ hui a shu htaꞈ haꞈ jaˇ cawˇ ve le? Yeˍsuˆ kʼoˆ ve, ‘Nawˬ ve nyi ma hkʼa peu˗eˬ, nawˬ ve co ha hkʼa peu˗eˬ leh nawˬ ve dawˇ hkʼaˇ hkʼa peu˗eˬ nawˬ ve Yaˬhoˉvaˬ Gʼuiˬ sha htaꞈ gʼa haꞈ ve yoˬ. Piˇ taˍ ve tawˇ chi teˇ hkawˇ lehˬ, hkʼa peu˗eˬ aꞈ kehˉ uiˍ leh awˉ lawˉ peuˇ ve teˇ hkawˇ hpehꞈ ve yoˬ.’ (Maꞈhtehˍ 22:37, 38) Ngaˬ hui Gʼuiˬ sha htaꞈ haꞈ ve pa taw, yawˇ ve awˬ liˇ tawˇ hkawˇ na yuˬ gaˇ ve, yeunˇ hkanˍ gaˇ ve, haiˬ ve awˬ ceuˬ htaꞈ canˇ gaˇ ve yoˬ. (Chiˇ mvuh ve 97:10 gʼaw ve.) Yaꞈ hkʼaˇ, Saˍtanˍ leh yawˇ ve miˬ guiˬ ngaˬ hui Gʼuiˬ sha htaꞈ haꞈ ve te i laˇ gaˇ leh te luˬ laˇ gaˇ ve yoˬ.

6. Chaw teˇ gʼaˇ Gʼuiˬ sha htaꞈ maˇ haꞈ˗o ve kʼo, hkʼaˬ hkʼe hpehꞈ la ve le?

⁶ Haꞈ pehnˇ ve chi miˬ guiˬ yaˇ dawˇ ve maˇ cawˇ. Yawˇ hui lehˬ “a shu yawˇ awˬ to htaꞈ haꞈ ve chaw” hpehꞈ leh, Gʼuiˬ sha htaꞈ maˇ haꞈ. (2 Tiˆmoˉseˍ 3:2) “Awˬ suhˍ awˬ shaˍ a loˍ te gaˇ ve maˇ kʼoˆ, mehˆ shiˍ mawˬ leh heuˆ gaˇ ve maˇ kʼoˆ, hpu shi mawˇ jeˬ htaꞈ pa taw nyi ma uiˍ ve maˇ kʼoˆ”, yawˇ hui hkʼaˬ htaˆ kaꞈ heuˆ gaˇ ve yoˬ. (1 Yoˇhanˬ 2:16) Tcuh yaˇ Pawˇluꞈ ngaˬ hui htaꞈ shaˍ tiꞈ piˇ laˇ ve yoˬ. Ngaˬ hui ha lehˬ tuˬ htaꞈ awˉ lawˉ teh ve kʼo, hkʼaˬ hkʼe hpehꞈ la ve le? Yawˇ kʼoˆ ve, “awˬ suhˍ awˬ shaˍ htaꞈ dawˇ nyi tcuhˉ taˍ ve nyi ma lehˬ, suh ve awˬ ceuˬ hpehꞈ ve yoˬ.” Aˬ htoꞈ ma pa taw le? Awˬ lawn kʼo, ngaˬ hui chi hkʼe te htaˇ Gʼuiˬ sha ve canˇ paˍ hpehꞈ la ve yoˬ. (Roˉmaꞈ 8:6, 7) Hpu ca ve, pehꞈ ve tzuhˆ ve awˬ hkʼaˇ suh te gaˇ ve chi hkʼe ve htaꞈ hkʼaˬ htaˆ kaꞈ dawˇ nyi chehˇ ve kʼo, nyi ma luˬ tuˬ yoˬ.—1 Kawˇrenˍhtuˆ 6:18; 1 Tiˆmoˉseˍ 6:9, 10.

7. Hkʼaˬ hkʼe ve dawˇ hkʼaˇ kawˆ tuˬ cawˬ ve chi beuꞈ teˇ co˗e Hkriꞈ yaˇ htaꞈ heuˆ la kuiˬ cawˬ la gʼa ve le?

⁷ Gʼuiˬ sha cawˬ ve tehꞈ maˇ yonˍ ve chaw, yawˇ hkʼaˇ yawˇ a shaꞈ teꞈ ve cawˬ la ve htaꞈ yonˍ ve chaw laiˉ gʼaˇ lehˬ awˬ nu ve chaw Gʼuiˬ sha htaꞈ haꞈ leh yonˍ ve maˇ cawˬ tcuh gaˇ ve yoˬ. Yawˇ awˬ nu ve chaw htaꞈ dawˇ tcuh gaˇ ve kʼaˍ jaˇ ve chaw, liꞈ maˇ henˇ mvuh ve chaw ceh hpanˍ shehˍ hpaˇ cawˬ ve tehꞈ yonˍ ve yoˬ. Laiˉ gʼaˇ hpanˍ shehˍ hpaˇ aꞈ kehˉ chaˬ nyi tehˆ nyi paˍ htaꞈ yawˆ yan ve yoˬ. (Roˉmaꞈ 1:25) Chi hkʼe dawˇ ve Hkriꞈ yaˇ htawˇ heuˆ la kuiˬ, cawˬ la gʼa ve yoˬ. Ngaˬ hui Yaˬhoˉvaˬ htaꞈ vuiˇ daꞈ kʼai la gʼa leh yawˇ htaꞈ haꞈ ve i kʼai gʼa ve yoˬ.—Heˍbrehˇ 3:12.

8. (a) Aˬ htoꞈ ma te Yaˬhoˉvaˬ ve chaw teˇ hpaˍ hpaˍ awˬ gʼaˇ nuˇ kʼai ve le? (b) Chiˇ mvuh ve liꞈ 136 ngaˬ hui htaꞈ awˬ gʼaˇ hkʼaˬ hkʼe peꞈ laˇ ve le?

⁸ Ngaˬ hui Saˍtanˍ ve miˬ guiˬ haiˬ ve hkʼaw chehˇ ve pa taw, Laiˉ pawˆ ngaˬ hui awˬ gʼaˇ nuˇ ve yoˬ. (1 Yoˇhanˬ 5:19) Yaꞈ hkʼaˇ, ngaˬ hui awˬ gʼaˇ nuˇ kʼai tcuh jaˇ ve kʼo, ngaˬ hui ve yonˍ hkʼaˇ leh Gʼuiˬ sha htaꞈ haꞈ ve i kʼai tuˬ yoˬ. Tawˇ pa haˉ te kʼo, ngaˬ hui a shaꞈ maˇ leh, maˇ chehˇ sha puiˉ ve, hpu yehˇ maˇ lawꞈ ve yoˬ hehˉ. Maˇ heˆ leh ngaˬ hui dawˇ taˍ ve hkʼe te maˇ gʼa leh nyi ma luˬ ve yoˬ. Ngaˬ hui aˬ htoꞈ ma beˬ ve lawˇ ve gʼa hpuˇ ve htawˇ, Yaˬhoˉvaˬ ngaˬ hui htaꞈ baˬ taˉ laˇ ve tehꞈ taˇ dawˇ. Chiˇ mvuh ve liꞈ 136:23 ngaˬ hui tawnˇ taˍ cawˇ ve, “ngaˬ hui shonˇ kʼai ve teˇ yanˇ, yawˇ ngaˬ hui htaꞈ maˇ leunˇ. Yawˇ haꞈ pehnˇ ve co co yeˬ chehˇ ve yoˬ.” Ngaˬ hui ve “bon lawˬ hkawˇ” htaꞈ Gʼuiˬ sha na yuˬ laˇ leh yawˇ awˬ tehˬ hkʼawꞈ laˇ tuˬ yoˬ.—Chiˇ mvuh ve 116:1; 136:24-26.

9. Aˬ htoꞈ ma pa taw Pawˇluꞈ Gʼuiˬ sha htaꞈ haꞈ ve haꞈ shaˉ gʼa ve le?

⁹ Gʼuiˬ sha ve kanˉ te ve chaw tcuh yaˇ Pawˇluꞈ Yaˬhoˉvaˬ awˬ gʼaˇ hkʼaˬ hkʼe piˇ ve yawˇ hkʼa dehꞈ dawˇ nyi ve pa taw, yawˇ awˬ gʼaˇ awˬ shaˉ kʼawꞈ cawˬ kʼai gʼa ve yoˬ. Yawˇ kʼoˆ ve, “Gʼuiˬ sha lehˬ, ngaˬ htaꞈ ga laˇ shehˍ hpaˇ hpehꞈ leh, ngaˬ teꞈ chiˉ kawˆ tuˬ maˇ cawˬ. Chaw yaˇ ngaˬ htaꞈ aˬ htoꞈ ma te laˇ hpehꞈ tuˬ le?” (Heˍbrehˇ 13:6) Pawˇluꞈ Yaˬhoˉvaˬ htaꞈ gʼaˇ va ve pa taw, yawˇ a shaꞈ teꞈ chehˇ ve hkʼaw beˬ ve lawˇ ve htaꞈ tawˍ daꞈ gʼa ve yoˬ. Pawˇluꞈ haˍ ve awˬ ceuˬ htaꞈ gʼa hpuˇ ve htawˇ, yawˇ Gʼuiˬ sha htaꞈ gʼaˇ va ve maˇ mehˉ kʼai jaw. Yawˇ htawnˍ hkʼaw chehˇ htaˇ, awˬ viˉ awˬ nyi htaꞈ ga piˇ leh Hkriꞈ yaˇ awˬ moˍ awˬ gʼaˇ gʼa tuˬ, liꞈ bvuhꞈ feu piˇ ve yoˬ. (Eˇfeˇsuꞈ 4:1; Hpiˇliˇpiˆ 1:7; Hpiˇleˍmonˍ 1) Pawˇluꞈ aˬ htoꞈ ma gʼa hpuˇ ve htawˇ, yawˇ Yaˬhoˉvaˬ htaꞈ haꞈ ve hkʼa dehꞈ haꞈ shaˉ ve yoˬ. Yawˇ kʼoˆ ve, Gʼuiˬ sha lehˬ “dawˇ sha gaˇ sha tuˬ hkʼa peu˗eˬ piˇ shehˍ hpaˇ Gʼuiˬ sha hpehꞈ ve yoˬ. Ngaˬ hui gʼa tuꞈ gʼa hkanˍ ve hkʼa peu˗eˬ awˬ hkʼaw lo yawˇ ngaˬ hui htaꞈ dawˇ sha la piˇ ve yoˬ.” (2 Kawˇrenˍhtuˆ 1:3, 4) Ngaˬ hui Pawˇluꞈ htaꞈ hkʼaˬ hkʼe te henˇ yuˬ gʼa ve le?

10. Yaˬhoˉvaˬ haꞈ pehnˇ ve ngaˬ hui hkʼaˬ hkʼe te haꞈ shaˉ gʼa tuˬ le?

¹⁰ Gʼuiˬ sha haꞈ pehnˇ ve htaꞈ ngaˬ hui haꞈ shaˉ tuˬ, Pawˇluꞈ awˬ hkʼaˇ teˇ hkʼaˇ kʼoˆ maˍ laˇ ve yoˬ. Yawˇ kʼoˆ ve, “hkʼaˬ htaˆ kaꞈ bon lawˬ tcuhˉ taˍ˗oꞈ.” (1 Hteˇsaˍlawˇniˆ 5:17; Roˉmaꞈ 12:12) Aˬ htoꞈ ma te ngaˬ hui bon lawˬ ve Gʼuiˬ sha awˬ paˇ lo meuˆ daꞈ tuˬ te laˇ ve le? Ngaˬ hui bon lawˬ htaˇ, Yaˬhoˉvaˬ geh tawˇ yaw daꞈ chehˇ ve yoˬ. Chi yawˇ geh awˬ chawˇ te daꞈ gʼa tuˬ ga laˇ ve yoˬ. (Chiˇ mvuh ve 86:3) Ngaˬ hui nyi ma hkʼaw cawˬ ve mvuhˇ naw ma hkʼoˆ chehˇ ve Awˬ pa htaꞈ hkʼa dehꞈ kʼoˆ maˍ piˇ htaˇ, ngaˬ hui yawˇ geh meuˆ daꞈ gʼa ve yoˬ. (Chiˇ mvuh ve 65:2) Ngaˬ hui Yaˬhoˉvaˬ geh bon lawˬ ve, yawˇ hkʼaˬ hkʼe hkʼawꞈ laˇ ve ngaˬ hui mawˬ htaˇ, ngaˬ hui yawˇ htaꞈ haꞈ maˇ la ve yoˬ. ‘Yaˬhoˉvaˬ htaꞈ kuˬ ve chaw hui awˬ paˇ lo yawˇ chehˇ taˍ ve yoˬ.’ tehꞈ ngaˬ hui hkʼa dehꞈ yonˍ ve yoˬ. (Chiˇ mvuh ve 145:18) Ngaˬ hui chi teˇ hkui leh awˬ gʼuˇ suhˍ hpawˇ aˬ htoꞈ ma gʼa hpuˇ ve htawˇ, Yaˬhoˉvaˬ ngaˬ hui htaꞈ haꞈ leh ga laˇ gaˇ ve ngaˬ hui hkʼa dehꞈ shiˍ ve yoˬ.

Liꞈ hpu hkʼaw awˬ tehˬ ve htaꞈ haꞈ ve

11, 12. Liꞈ hpu hkʼaw awˬ tehˬ ve htaꞈ ngaˬ hui hkʼaˬ hkʼe te haꞈ maˇ la ve le?

¹¹ Ngaˬ hui Hkriꞈ yaˇ hpehꞈ ve pa taw, awˬ tehˬ ve htaꞈ haꞈ ve yoˬ. Awˬ tehˬ ve chi Gʼuiˬ sha ve tawˇ hkawˇ hkʼaw cawˬ ve yoˬ. Yeˍsuˆ yawˇ ve Awˬ pa htaꞈ kʼoˆ piˇ ve, ‘Nawˬ ve tawˇ hkawˇ lehˬ awˬ tehˬ ve teˇ ceuˬ hpehꞈ ve yoˬ.’ (Yoˇhanˬ 17:17) Liꞈ hpu hkʼaw awˬ tehˬ ve htaꞈ ngaˬ hui haꞈ gaˇ ve kʼo, Liꞈ hpu hkʼaw aˬ htoꞈ ma cawˬ ve ngaˬ hui awˉ lawˉ shiˍ cawˇ ve yoˬ. (Kawˇlawˇsehˇ 1:10) Yaꞈ hkʼaˇ, chi hkʼe ceh tiˉ maˇ lawꞈ. Ngaˬ hui hkʼaˬ hkʼe te cawˇ ve Chiˇ mvuh ve liꞈ 119 bvuhꞈ paˍ kʼoˆ maˍ laˇ taˍ ve yoˬ. (Chiˇ mvuh ve 119:97-100 gʼaw ve.) Liꞈ hpu hkʼaw ngaˬ hui gʼaw ve teˇ nyi tanˇ vanˇ dawˇ nyi cawˇ ve yoˬ. Liꞈ hpu hkʼaw awˬ tehˬ ve ngaˬ hui a shaꞈ teꞈ chehˇ kuiˬ hkʼaw yuˬ yehˬ gʼa ve kʼo awˬ bon hkʼaˬ hkʼe cawˬ ve tehꞈ, hkʼa dehꞈ dawˇ nyi ve kʼo, ngaˬ hui Liꞈ hpu htaꞈ caˉ leh kʼawꞈ haꞈ maˇ la ve yoˬ.

¹² Chiˇ mvuh ve liꞈ bvuhꞈ paˍ kʼawꞈ kʼoˆ ve, “Nawˬ maˍ laˇ ve tawˇ teˇ hpaˍ lehˬ, hkʼaˬ ma mehˬ jaˇ ve le? Oˇ ve teˇ hpaˍ lehˬ, pehˇ gʼuiˬ aꞈ kehˉ mehˬ jaˇ ve yoˬ.” (Chiˇ mvuh ve 119:103) Gʼuiˬ sha ve kanˉ hkʼaˇ Liꞈ hpu htaꞈ cuˇ leh liꞈ kʼoˆ laiˉ ceuˬ htaꞈ te laˇ ve yoˬ. Chi mehˬ jaˇ ve caˇ tuˬ hkʼa shuˍ hpehꞈ ve yoˬ. Ngaˬ hui dawˇ cawˇ ve caˇ tuˬ htaꞈ caˇ htaˇ, ha lehˬ ve hkʼaw a yehˉ yehˉ caˇ gaˇ ve yoˬ. Ngaˬ hui Liꞈ hpu henˇ htaˇ kaꞈ hkʼa shuˍ yoˬ. Ngaˬ hui a yehˉ yehˉ henˇ ve kʼo, awˬ tehˬ ve “na sha ve tawˇ teˇ hpaˍ” ha lehˬ ve hkʼaw henˇ gʼa leh ngaˬ hui gʼaw ve hkʼa dehꞈ tawnˇ gʼa leh shu htaꞈ ga piˇ tuˬ, yehˇ gʼa ve yoˬ.—Cuˇ yiˍ piˇ ve 12:10.

13. Gʼuiˬ sha ve tawˇ hkawˇ htaꞈ haꞈ tuˬ, Yeˍraˍmiˆ hkʼaˬ hkʼe te ve le? Chi ve yawˇ htaꞈ heuˆ la kuiˬ hkʼaˬ hkʼe cawˬ ve le?

¹³ Gʼuiˬ sha ve tawˇ hkawˇ htaꞈ tcuh kaˍ paˍ Yeˍraˍmiˆ haꞈ ve yoˬ. Yawˇ kʼoˆ ve, “Nawˬ ngaˬ htaꞈ tawˇ yaw laˇ leh, ngaˬ lehˬ nawˬ ve tawˇ teˇ hkawˇ le le htaꞈ hkʼa dehꞈ na chehˇ ve yoˬ. Kanˇ paˆ uiˍ ve Jawˇmawˇ Gʼuiˬ sha˗oˬ, ngaˬ lehˬ nawˬ ve chaw hpehꞈ ve yoˬ. Chi htaꞈ pa taw, nawˬ ve tawˇ lehˬ ngaˬ ve nyi ma htaꞈ ha lehˬ dawˇ sha tuˬ piˇ laˇ chehˇ ve yoˬ.” (Yeˍraˍmiˆ 15:16) Gʼuiˬ sha ve tawˇ hkawˇ awˬ hpfuhˇ hkʼaˆ jaˇ ve Yeˍraˍmiˆ hkʼa dehꞈ dawˇ nyi leh haꞈ jaˇ ve yoˬ. Gʼuiˬ sha ve awˬ tan te leh yawˇ ve tawˇ hkawˇ kaˇ laˇ ve Yeˍraˍmiˆ ha lehˬ jaˇ. Liꞈ hpu hkʼaw awˬ tehˬ ve htaꞈ haꞈ ve kʼo, ngaˬ hui Yaˬhoˉvaˬ ve Shaˉhkiˆhkanˍ ve chaw hpehꞈ leh Gʼuiˬ sha ve mvuhˇ miˬ kaˇ laˇ gʼa ve ngaˬ hui kaꞈ ha lehˬ jaˇ ve yoˬ.

14. Liꞈ hpu hkʼaw awˬ tehˬ ve htaꞈ ngaˬ hui haꞈ maˇ la tuˬ, hkʼaˬ hkʼe te gʼa sheˍ ve le?

¹⁴ Liꞈ hpu hkʼaw awˬ tehˬ ve htaꞈ haꞈ maˇ la tuˬ, ngaˬ hui hkʼaˬ hkʼe kʼawꞈ te gʼa ve le? Yaˬhoˉvaˬ ngaˬ hui htaꞈ maˍ laˇ tuˬ, Hkriꞈ yaˇ awˬ moˍ hkʼaw ngaˬ hui hkʼaˬ htaˆ kaꞈ hpawnˬ daꞈ˗e cawˇ ve yoˬ. Shaw nyi kuiˬ taꞈ yehˬ yehˇ leh teˇ shinˉ le le Liꞈ hpu henˇ ve lehˬ Yaˬhoˉvaˬ ngaˬ hui htaꞈ maˍ laˇ ve a yeˇ uiˍ jaˇ ve teˇ ceuˬ hpehꞈ ve yoˬ. Ngaˬ hui awˬ bon hkʼa dehꞈ gʼa gaˇ ve kʼo, ngaˬ hui gʼa gu taˍ ve yoˬ. Tawˇ pa haˉ te kʼo, Liꞈ hpu teˇ tawn le le ngaˬ hui gʼaw gʼa ve yoˬ. Chi teˇ hkui awˬ hkʼeun hkʼaw Shaw nyi kuiˬ taꞈ yehˬ dao lonꞈ leh gʼaw gʼa ve yoˬ. Vehˆ saiˉ jw.org hkʼaw leh JW Library ehˆ hkʼaw liꞈ kʼoˆ chi laiˉ chaw ceuˬ tawˇ hkawˇ cawˬ ve yoˬ. Awˬ hkʼeun hkʼaw cawˬ ve kʼo, Liꞈ hpu hpaw sha ve yoˬ. Awˬ hkʼeun yehˇ ve maˇ kʼo liꞈ kʼoˆ yehˇ ve maˇ kʼo, awˬ lawn oˇ ve hkʼaw Liꞈ hpu awˬ tawn ngaˬ hui gʼaw leh hkʼa dehꞈ dawˇ nyi ve kʼo, ngaˬ hui Liꞈ hpu hkʼaw awˬ tehˬ ve htaꞈ haꞈ ve gʼaˇ hteꞈ maˇ la ve yoˬ.—Chiˇ mvuh ve 1:2 gʼaw ve.

Awˬ viˉ awˬ nyi htaꞈ haꞈ ve

15, 16. (a) Yoˇhanˬ 13:34, 35 hkʼaw Yeˍsuˆ ngaˬ hui htaꞈ aˬ htoꞈ ma tawˇ peꞈ laˇ ve le? (b) Gʼuiˬ sha leh Liꞈ hpu htaꞈ haꞈ ve leh awˬ viˉ awˬ nyi htaꞈ haꞈ ve hkʼaˬ hkʼe te caˉ daꞈ ve le?

¹⁵ Awˬ leh meuˇ teˇ haˉ Yeˍsuˆ awˬ laꞈ gʼawˇ htaꞈ kʼoˆ piˇ ve, “nawˬ hui teˇ gʼaˇ leh teˇ gʼaˇ haꞈ daꞈ˗oꞈ tehꞈ, ngaˬ nawˬ hui htaꞈ tawˇ awˬ suhˉ teˇ hkawˇ piˇ ve yoˬ. Ngaˬ nawˬ hui htaꞈ haꞈ ve hkʼe, nawˬ hui htawˇ teˇ gʼaˇ leh teˇ gʼaˇ haꞈ daꞈ˗oꞈ. Nawˬ hui teˇ gʼaˇ leh teˇ gʼaˇ haꞈ daꞈ ve kʼo, haꞈ daꞈ ve oˇ ve htaꞈ pa taw nawˬ hui ngaˬ ve awˬ laꞈ gʼawˇ hpehꞈ ve htaꞈ chaw hkʼa peu˗eˬ gʼa shiˍ tuˬ yoˬ.”—Yoˇhanˬ 13:34, 35.

¹⁶ Awˬ viˉ awˬ nyi htaꞈ haꞈ ve leh Yaˬhoˉvaˬ htaꞈ haꞈ ve chi caˉ daꞈ ve yoˬ. Ngaˬ hui Gʼuiˬ sha htaꞈ maˇ haꞈ ve kʼo, ngaˬ hui ve awˬ viˉ awˬ nyi htaꞈ haꞈ maˇ gʼa. Ngaˬ hui ve awˬ viˉ awˬ nyi htaꞈ maˇ haꞈ ve kʼo, Gʼuiˬ sha htaꞈ kaꞈ haꞈ maˇ gʼa. Tcuh yaˇ Yoˇhanˬ kʼoˆ ve, “a shu yawˇ mawˬ chehˇ ve awˬ viˉ awˬ nyi htaꞈ maˇ haꞈ ve chaw teˇ gʼaˇ lehˬ, maˇ mawˬ jaw ve Gʼuiˬ sha htaꞈ yawˇ hkʼaˬ hkʼe te haꞈ hpehꞈ tuˬ le?” (1 Yoˇhanˬ 4:20) Ngaˬ hui Yaˬhoˉvaˬ leh awˬ viˉ awˬ nyi htaꞈ haꞈ ve leh Liꞈ hpu htaꞈ haꞈ ve kaꞈ caˉ daꞈ ve yoˬ. Aˬ htoꞈ ma pa taw le? Liꞈ hpu ngaˬ hui htaꞈ maˍ laˇ ve ngaˬ hui haꞈ ve kʼo, Liꞈ hpu hkʼaw ve awˬ liˇ tawˇ hkawˇ Gʼuiˬ sha leh awˬ viˉ awˬ nyi htaꞈ haꞈ ve ngaˬ hui na yuˬ gaˇ tuˬ yoˬ.—1 Peˍtruˆ 1:22; 1 Yoˇhanˬ 4:21.

17. Awˬ viˉ awˬ nyi teˇ hpaˍ htaꞈ ngaˬ hui haꞈ ve kʼo, hkʼaˬ hkʼe te cawˇ ve le?

¹⁷ 1 Hteˇsaˍlawˇniˆ 4:9, 10 gʼaw ve. Hkriꞈ yaˇ awˬ moˍ hkʼaw awˬ viˉ awˬ nyi htaꞈ ngaˬ hui haꞈ ve kʼo, hkʼaˬ hkʼe te gʼa ve le? Awˬ viˉ awˬ nyi chaw mawˇ hpawnˬ daꞈ kuiˬ laˬ tuˬ, ngaˬ hui ga piˇ gʼa ve yoˬ. Mehˇ chawˇ ma yawˇ ve yehˬ hkʼaw teˇ ceuˬ ceuˬ loˍ ve kʼo, ngaˬ hui gu piˇ gʼa ve yoˬ. (Yaˍkoˆ 1:27) Awˬ viˉ awˬ nyi awˬ gʼaˇ nuˇ ve, nyi ma luˬ ve, shoꞈ shaꞈ ve awˬ lawn htaꞈ gʼa hpuˇ chehˇ ve awˬ gʼaˇ peꞈ laˇ tuˬ leh a yeˇ yuˬ laˇ tuˬ, yawˇ hui loˍ ve yoˬ. (Tawˇ naˉ ve 12:25; Kawˇlawˇsehˇ 4:11) “Yehˬ yaˇ kʼa yaˇ tehꞈ kʼoˆ ve yonˍ ve chaw teˇ hpaˍ” htaꞈ ngaˬ hui haꞈ ve kʼo, yaw ve leh te ve htaꞈ shiˍ gʼa ve yoˬ.—Gaˍlaˍtiˆ 6:10.

18. Awˬ viˉ awˬ nyi geh tawˇ gʼawˬ daꞈ htaˇ, aˬ htoꞈ ma teˇ ceuˬ gu laˇ gʼa ve le?

¹⁸ Liꞈ hpu hkʼaw kʼoˆ ve, haiˬ jaˇ ve “awˬ leh meuˇ ve awˬ nyi awˬ haˉ” hkʼaw laiˉ gʼaˇ a shu yawˇ awˬ pon ceh tiˉ dawˇ nyi leh lawˇ hpaꞈ uiˍ ve yoˬ. (2 Tiˆmoˉseˍ 3:1, 2) Gʼuiˬ sha, yawˇ ve tawˇ hkawˇ, awˬ viˉ awˬ nyi htaꞈ haꞈ maˇ la tuˬ, ngaˬ hui gʼa coˇ caˇ ve yoˬ. Ngaˬ hui maˇ biˇ ve pa taw, teˇ pawˆ pawˆ ngaˬ hui ve awˬ viˉ awˬ nyi geh tawˇ a ciˉ gʼawˬ daꞈ ve yoˬ. Yaꞈ hkʼaˇ, ngaˬ hui teˇ gʼaˇ leh teˇ gʼaˇ haꞈ daꞈ ve pa taw, ha kʼaˉ puiˉ ve hkʼaw awˬ lawn htaꞈ haˆ gu gaˇ ve yoˬ. (Eˇfeˇsuꞈ 4:32; Kawˇlawˇsehˇ 3:14) Ngaˬ hui ve haꞈ pehnˇ ve taˇ i kʼai tcuh! Yaˬhoˉvaˬ, yawˇ ve tawˇ hkawˇ, ngaˬ hui ve awˬ viˉ awˬ nyi htaꞈ caˉ leh haꞈ sheˍ.