AWˬ LAWN 50
Yonˍ ve leh te tawˆ la ve awˬ ceuˬ ngaˬ hui Gʼuiˬ sha haꞈ yuˬ laˇ ve chaw hpehꞈ tuˬ te laˇ ve
‘Aˍbraˍhanˍ yonˍ ve hkʼa shuˍ shuˍ, yawˇ hui htawˇ yonˍ leh yawˇ ve hkui ha awˬ hkʼaˇ suh gʼaꞈ kʼai ve chaw teˇ hpaˍ hpehꞈ ve yoˬ.’—ROˉMAꞈ 4:12.
KʼA MUIˬ HKAWˇ 119 Ngaˬ hui yonˍ ve gʼa cawˬ ve
HENˇ TUˬ VE TEˇ HPAˍa
1. Aˍbraˍhanˍ ve yonˍ hkʼaˇ htaꞈ kʼoˆ htaˇ ngaˬ hui a shu yawˇ awˬ to htaꞈ hkʼaˬ hkʼe na nyi cawˇ ve le?
Chaw laiˉ gʼaˇ Aˍbraˍhanˍ ve awˬ meh htaꞈ gʼa kaˇ jaw ve yoˬ. Yaꞈ hkʼaˇ, awˬ tehˬ kʼo yawˇ a shu hpehꞈ ve maˇ shiˍ. Nawˬ Aˍbraˍhanˍ htaꞈ caˉ daꞈ ve laiˉ ceuˬ shiˍ ve yoˬ. Tawˇ pa haˉ te kʼo, Liꞈ hpu hkʼaw yawˇ htaꞈ ‘yonˍ ve chaw hkʼa peu˗eˬ ve awˬ pa hpehꞈ ve yoˬ’ tehꞈ kʼoˆ ve yoˬ. (Roˉmaꞈ 4:11) Chi hkʼe hpehꞈ ve htawˇ nawˬ htawˇ dawˇ nawˬ dawˇ cawˬ ve, ‘ngaˬ Aˍbraˍhanˍ htaꞈ henˇ yuˬ leh yawˇ hkʼe leˇ yonˍ yeˬ ve cawˬ˗aw laˇ?’ Cawˬ gʼa ve yoˬ.
2. Aˍbraˍhanˍ ve awˬ lawn htaꞈ henˇ ve aˬ htoꞈ ma te a yeˇ uiˍ jaˇ ve le? (Yaˍkoˆ 2:22, 23)
2 Ngaˬ hui Aˍbraˍhanˍ hkʼa shuˍ yonˍ yeˬ ve cawˬ gʼa tuˬ ve teˇ hkʼaˇ lehˬ, yawˇ ve awˬ lawn htaꞈ henˇ ve yoˬ. Yaˬhoˉvaˬ Aˍbraˍhanˍ htaꞈ aˬ htoꞈ ma te tcuh ve kʼo, yawˇ te ve yoˬ. Tawˇ pa haˉ te kʼo, yawˇ ve chehˇ kuiˬ htaꞈ baˬ taˉ leh vuiˇ jaˇ kuiˬ lo gʼa hpaw˗e ve yoˬ. Yawˇ hui aˉ po kʼo hkʼaw laiˉ chi hkʼawꞈ gʼa chehˇ ve yoˬ. Yawˇ haꞈ jaˇ ve yaˇ paˍ Iˉcaˆ Yaˬhoˉvaˬ htaꞈ tuˉ tanˇ laˇ tuˬ kʼoˆ piˇ htaˇ yawˇ te ve yoˬ. Chi ve hkʼa peu˗eˬ Aˍbraˍhanˍ yonˍ ve tehꞈ hpeuꞈ maw piˇ leh, yawˇ yonˍ ve hkʼe gʼaꞈ te ve yoˬ. Chi ve yawˇ Yaˬhoˉvaˬ haꞈ yuˬ laˇ ve chaw hpehꞈ tuˬ te piˇ leh Gʼuiˬ sha yawˇ htaꞈ nyi hkʼaˇ suh jaˇ ve yoˬ. (Yaˍkoˆ 2:22, 23 gʼaw sheˍ.) Yaˬhoˉvaˬ lehˬ ngaˬ hui teˇ gʼaˇ le le leh nawˬ htaꞈ kaꞈ Aˍbraˍhanˍ hkʼa shuˍ, awˬ bon gʼa tcuh gaˇ ve yoˬ. Hkʼe te leh, Yaˬhoˉvaˬ Pawˇluꞈ leh Yaˍkoˆ htaꞈ dawˇ pawnˍ piˇ leh Roˉmaꞈ liꞈ kaˇ nanˉ uiˍ 4 leh Yaˍkoˆ liꞈ kaˇ nanˉ uiˍ 2 bvuhꞈ tcuh ve yoˬ. Chi ve 2 puꞈ hkʼaw Aˍbraˍhanˍ htaꞈ caˉ daꞈ ve nyi ma pfuhˇ lawꞈ lawꞈ ve awˬ lawn kʼoˆ taˍ ve yoˬ.
3. Pawˇluꞈ leh Yaˍkoˆ Liꞈ hpu hkʼaˬ ve teˇ tawn htaꞈ kʼoˆ ve le?
3 Pawˇluꞈ leh Yaˍkoˆ Awˬ hkuiˉ puiˍ liꞈ 15:6 hkʼaw ve awˬ lawn htaꞈ kʼoˆ ve yoˬ. Oˇ kaˬ lo kʼoˆ ve, ‘Aˍbraˍhanˍ Gʼuiˬ sha htaꞈ yonˍ ve yoˬ. Yawˇ yonˍ ve pa taw Gʼuiˬ sha yawˇ htaꞈ nyi ma cawˇ ve yoˬ.’ Gʼuiˬ sha haꞈ yuˬ˗oˬ ve chaw lehˬ Gʼuiˬ sha nyi ma cawˇ ve chaw htaꞈ ceh tiˉ maˇ heˆ. Yaꞈ hkʼaˇ, venˇ baˆ taˍ kuiˬ maˇ cawˬ ve chaw hpehꞈ ve tehꞈ shawˍ ve yoˬ. Ngaˬ hui venˇ baˆ yaˇ hpehꞈ ve htawˇ, Yaˬhoˉvaˬ ngaˬ hui htaꞈ venˇ baˆ taˍ kuiˬ maˇ cawˬ ve chaw tehꞈ shawˍ laˇ ve ha lehˬ jaˇ. Yaˬhoˉvaˬ nawˬ htaꞈ chi hkʼe shawˍ tcuh gaˇ˗aw laˇ? Leh Yaˬhoˉvaˬ nawˬ htaꞈ chi hkʼe shawˍ laˇ gʼa ve yoˬ. Chi ve hkʼaˬ hkʼe te hpehꞈ gʼa ve nawˬ shiˍ gaˇ ve kʼo, Aˍbraˍhanˍ Yaˬhoˉvaˬ haꞈ yuˬ˗oˬ ve chaw hpehꞈ tuˬ hkʼaˬ hkʼe te piˇ ve teˇ geh nyi sheˍ.
YONˍ VE LEHˬ NGAˬ HUI GʼUIˬ SHA HAꞈ YUˬ LAˇ VE CHAW HPEHꞈ TUˬ TE LAˇ VE
4. Chaw yaˇ Gʼuiˬ sha nyi ma cawˇ tuˬ te piˇ maˇ gʼa ve aˬ htoꞈ ma te laˇ ve le?
4 Pawˇluꞈ Roˉmaꞈ chaw Hkriꞈ yaˇ htaꞈ liꞈ bvuhꞈ piˇ ve hkʼaw yawˇ kʼoˆ ve, teˇ gʼaˇ le le venˇ baˆ te ve yoˬ. (Roˉmaꞈ 3:23) Venˇ baˆ yaˇ htaꞈ Gʼuiˬ sha haꞈ yuˬ leh venˇ baˆ taˍ kuiˬ maˇ cawˬ ve tehꞈ hkʼaˬ hkʼe te shawˍ laˇ gʼa tuˬ le? Chi ve htaꞈ hkʼawꞈ laˇ tuˬ Pawˇluꞈ kʼoˆ taˍ ve, Aˍbraˍhanˍ ve awˬ lawn htaꞈ teˇ geh nyi sheˍ.
5. Aˬ htoꞈ ma te Aˍbraˍhanˍ Gʼuiˬ sha nyi ma cawˇ ve chaw hpehꞈ ve le? (Roˉmaꞈ 4:2-4)
5 Aˍbraˍhanˍ Hkaˍnanˍ mvuhˇ miˬ lo chehˇ htaˇ kaꞈ Yaˬhoˉvaˬ haꞈ yuˬ ve chaw hpehꞈ˗oˬ ve yoˬ. Chi hkʼe te ve lehˬ yawˇ Moˉseˍ ve awˬ liˇ tawˇ hkawˇ hkʼa peu˗eˬ htaꞈ gʼaꞈ te ve laˇ? Maˇ heˆ. (Roˉmaꞈ 4:13) Aˍbraˍhanˍ a shaꞈ teꞈ chehˇ sheˍ htaˇ, Moˉseˍ ve awˬ liˇ tawˇ hkawˇ maˇ cawˬ sheˍ. Awˬ liˇ tawˇ hkawˇ chi ve lehˬ yawˇ suh ve 400 hkʼawꞈ peuˬ hkʼawꞈ nawˉ htaˇ cawˬ la ve yoˬ. Aˍbraˍhanˍ Gʼuiˬ sha nyi ma cawˇ ve chaw hpehꞈ leh yawˇ yonˍ ve htaꞈ pa taw Gʼuiˬ sha yawˇ htaꞈ haꞈ ve yoˬ.—Roˉmaꞈ 4:2-4 gʼaw sheˍ.
6. Venˇ baˆ yaˇ htaꞈ Yaˬhoˉvaˬ haꞈ yuˬ tuˬ aˬ htoꞈ ma te piˇ ve le?
6 Pawˇluꞈ kʼoˆ ve, chaw yaˇ Gʼuiˬ sha htaꞈ yonˍ ve kʼo, “hteˇ ve cawˇ ve chaw hpehꞈ la piˇ shehˍ hpaˇ htaꞈ yawˇ yonˍ ve pa taw yoˬ.” (Roˉmaꞈ 4:5) Pawˇluꞈ kʼawꞈ kʼoˆ sheˍ ve, “Gʼuiˬ sha lehˬ kanˉ htaꞈ maˇ nyi leh, hteˇ ve cawˇ ve tehꞈ shawˍ taˍ ve chaw teˇ gʼaˇ lehˬ, awˬ bon uiˍ ve yoˬ tehꞈ Daˍviˆ kʼoˆ taˍ ve yoˬ. Yawˇ kʼoˆ ve, yaꞈ kuiˬ jiˆ kuiˬ teˇ hpaˍ htaꞈ hpehˇ piˇ peuˬ leh, venˇ baˆ htaꞈ beh taˍ peuˬ ve chaw teˇ hpaˍ lehˬ, awˬ bon uiˍ ve yoˬ. Jawˇ mawˇ Gʼuiˬ sha venˇ baˆ maˇ taˍ ve chaw lehˬ, awˬ bon uiˍ ve yoˬ.” (Roˉmaꞈ 4:6-8; Chiˇ mvuh ve 32:1, 2) A shu teˇ gʼaˇ Yaˬhoˉvaˬ htaꞈ yonˍ ve kʼo, Yaˬhoˉvaˬ yawˇ htaꞈ venˇ baˆ hpehˇ piˇ leh venˇ baˆ htaꞈ beh hoˆ piˇ taˍ ve yoˬ. Gʼuiˬ sha yawˇ htaꞈ awˬ tehˬ awˬ na venˇ baˆ hpehˇ piˇ leh yawˇ te yaꞈ ve tehꞈ maˇ kʼawꞈ shawˍ˗o. Yawˇ yonˍ ve htaꞈ pa taw Gʼuiˬ sha haꞈ yuˬ piˇ leh yawˇ venˇ baˆ taˍ kuiˬ maˇ cawˬ ve tehꞈ shawˍ piˇ tuˬ yoˬ.
7. Yaˬhoˉvaˬ ve kanˉ te ve ka tiꞈ yeˬ ve chaw yawˇ haꞈ yuˬ ve chaw hpehꞈ tuˬ aˬ htoꞈ ma te piˇ ve le?
7 Aˍbraˍhanˍ, Daˍviˆ, leh Yaˬhoˉvaˬ ve kanˉ te ve awˬ nu ve chaw htaꞈ, Gʼuiˬ sha nyi ma cawˇ ve chaw hpehꞈ ve tehꞈ kʼoˆ ve yoˬ. Yaꞈ hkʼaˇ, yawˇ hui venˇ baˆ yaˇ hpehꞈ leh maˇ biˇ ve chaw hpehꞈ ve yoˬ. Chi hkʼe hpehꞈ ve htawˇ, yonˍ ve maˇ cawˬ ve awˬ nu ve chaw htaꞈ yawˇ hui tehˆ daꞈ ve kʼo, yawˇ hui yonˍ ve cawˬ jaˇ ve yoˬ. Chi ve lehˬ yawˇ hui venˇ baˆ taˍ kuiˬ maˇ cawˬ ve chaw hpehꞈ ve tehꞈ, Gʼuiˬ sha shawˍ tuˬ te piˇ ve yoˬ. (Eˇfeˇsuꞈ 2:12) Pawˇluꞈ ve liꞈ hkʼaw gʼa mawˬ ve hkʼe, ngaˬ hui Gʼuiˬ sha geh meuˆ daꞈ tuˬ yonˍ ve awˬ ceuˬ lehˬ a yeˇ uiˍ jaˇ. Aˍbraˍhanˍ leh Daˍviˆ Gʼuiˬ sha htaꞈ yonˍ ve pa taw, yawˇ hui Gʼuiˬ sha geh awˬ chawˇ te gʼa ve yoˬ. Ngaˬ hui kaꞈ yonˍ ve cawˬ ve kʼo, Gʼuiˬ sha geh awˬ chawˇ te gʼa ve yoˬ.
YONˍ VE LEH TE TAWˆ LA VE AWˬ CEUˬ HKʼAˬ HKʼE TE CAˉ DAꞈ VE LE?
8-9. Pawˇluꞈ leh Yaˍkoˆ ve tawˇ hkawˇ htaꞈ caˉ daꞈ ve chaw teˇ hpaˍ maˇ heˆ heˆ hkʼaˬ hkʼe kʼoˆ ve le? Leh aˬ htoꞈ ma pa taw le?
8 Yonˍ ve leh te tawˆ la ve awˬ ceuˬ htaꞈ bon awˬ hoˉ teˇ hpaˍ gʼawˬ daꞈ ve laiˉ ha hkʼawꞈ gaˬ˗oˬ ve yoˬ. Caˬbuˉ awˬ hoˉ teˇ hpaˍ kʼoˆ ve, ponˬ gaˇ ve kʼo Yeˍsuˆ Hkriꞈ htaꞈ ceh tiˉ yonˍ ve kaꞈ lawꞈ˗oˬ. Yawˇ hui Pawˇluꞈ ve tawˇ hkawˇ htaꞈ kʼoˆ ve, ‘hteˇ ve cawˇ ve htaꞈ maˇ gʼaꞈ te ve htawˇ’ Gʼuiˬ sha haꞈ yuˬ laˇ tuˬ yoˬ. (Roˉmaꞈ 4:6) Caˬbuˉ awˬ hoˉ teˇ hpaˍ gʼawˬ daꞈ ve, ponˬ ve htaꞈ gʼa gaˇ ve kʼo, daꞈ kehˬ ve awˬ ti lo kʼai leh awˬ bon htaꞈ te ve yoˬ. Yawˇ hui Yaˍkoˆ liꞈ 2:24 hkʼaw ve htaꞈ kʼoˆ ve, “chaw teˇ gʼaˇ yonˍ ve htaꞈ pa taw ceh tiˉ hteˇ ve cawˇ ve chaw hpehꞈ la ve maˇ heˆ. Kanˉ kaꞈ te ve htaꞈ pa taw hteˇ ve cawˇ ve chaw hpehꞈ la” ve tehꞈ Gʼuiˬ sha shawˍ ve yoˬ.
9 Chi ve htaꞈ bon awˬ hoˉ teˇ hpaˍ kʼoˆ ve, yonˍ ve leh te tawˆ laˇ ve awˬ ceuˬ Pawˇluꞈ leh Yaˍkoˆ dawˇ hkʼaˇ maˇ hawˍ daꞈ ve yoˬ. Bon awˬ hoˉ teˇ hpaˍ yonˍ ve, Gʼuiˬ sha nyi ma cawˇ ve chaw hpehꞈ gaˇ ve kʼo yonˍ ve ceh tiˉ cawˬ ve kaꞈ lawꞈ˗oˬ tehꞈ Pawˇluꞈ kʼoˆ ve yoˬ. Yaꞈ hkʼaˇ, Yaˍkoˆ kʼoˆ ve, te tawˆ la ve kaꞈ gʼa cawˬ ve yoˬ. Chaˬ nyi tehˆ nyi paˍ teˇ gʼaˇ kʼoˆ ve, “Pawˇluꞈ kʼoˆ ve Gʼuiˬ sha nyi ma cawˇ ve chaw hpehꞈ gaˇ ve kʼo yonˍ ve ceh tiˉ kaꞈ lawꞈ˗oˬ. Gʼaꞈ te tuˬ maˇ loˍ. Chi ve htaꞈ Yaˍkoˆ maˇ na gʼa ve yoˬ.” Yaꞈ hkʼaˇ, Pawˇluꞈ leh Yaˍkoˆ htaꞈ kaꞈ Liꞈ hpu awˬ tawn chi teˇ hpaˍ bvuhꞈ tuˬ, Yaˬhoˉvaˬ dawˇ pawnˍ piˇ ve tehꞈ ngaˬ hui shiˍ ve yoˬ. (2 Tiˆmoˉseˍ 3:16) Aˬ htoꞈ ma te yawˇ huiˉ maˬ chi hkʼe bvuhꞈ ve ngaˬ hui na gʼa tuˬ teˇ ceuˬ ceuˬ hpeuꞈ maw laˇ ve yoˬ. Ngaˬ hui htaꞈ ga laˇ gʼa ve lehˬ awˬ lawn awˬ tanˇ htaꞈ gʼa nyi ve yoˬ.
Pawˇluꞈ Roˉmaꞈ chaw Hkriꞈ yaˇ htaꞈ kʼoˆ piˇ ve yonˍ ve cawˬ ve lehˬ a yeˇ uiˍ jaˇ leh Moˉseˍ ve awˬ liˇ tawˇ hkawˇ htaꞈ gʼaꞈ te tuˬ maˇ loˍ˗o (Awˬ tawn 10 nyi sheˍ)b
10. Pawˇluꞈ lehˬ “te ve” awˬ ceuˬ hkʼaˬ hkʼe ve htaꞈ kʼoˆ sheˍ ve le? (Roˉmaꞈ 3:21, 28) (Awˬ han htaꞈ nyi sheˍ.)
10 Roˉmaꞈ liꞈ kaˇ nanˉ uiˍ 3 leh kaˇ nanˉ uiˍ 4 hkʼaw Pawˇluꞈ kʼoˆ taˍ ve, “te ve” awˬ ceuˬ hkʼaˬ hkʼe ve le? Gʼuiˬ sha Iˉsaˍreˍlaˆ chaw htaꞈ piˇ taˍ ve “awˬ liˇ tawˇ hkawˇ” htaꞈ yawˇ kʼoˆ chehˇ ve yoˬ. (Roˉmaꞈ 3:21, 28 gʼaw sheˍ.) Oˇ ve teˇ co˗e Yuˇdaꞈ chaw Hkriꞈ yaˇ teˇ hpaˍ hpaˍ, yawˇ hui Moˉseˍ ve awˬ liˇ tawˇ hkawˇ htaꞈ gʼa gʼaꞈ te cawˇ sheˍ ve tehꞈ kʼoˆ ve yoˬ. Gʼuiˬ sha nyi ma cawˇ ve chaw hpehꞈ tuˬ, chaw yaˇ Moˉseˍ ve “awˬ liˇ tawˇ hkawˇ” htaꞈ gʼaꞈ te tuˬ maˇ loˍ tehꞈ Pawˇluꞈ Aˍbraˍhanˍ ve awˬ lawn htaꞈ tehˆ maˍ laˇ ve yoˬ. Yaꞈ hkʼaˇ, a yeˇ uiˍ jaˇ ve lehˬ, yonˍ ve gʼa cawˬ ve yoˬ. Awˬ lawn chi ve, chi beuꞈ teˇ co˗e ngaˬ hui htaꞈ kaꞈ awˬ gʼaˇ peꞈ laˇ ve yoˬ. Ngaˬ hui Yaˬhoˉvaˬ leh Yeˍsuˆ htaꞈ yonˍ ve kʼo, ngaˬ hui kaꞈ Gʼuiˬ sha nyi hkʼaˇ suh ve chaw hpehꞈ gʼa ve yoˬ.
Yaˍkoˆ lehˬ Hkriꞈ yaˇ yonˍ ve ‘te tawˆ la tuˬ’ awˬ gʼaˇ piˇ ve. Tawˇ pa haˉ te kʼo, chaw mehˆ hpfuhˇ htaꞈ maˇ nyi leh teˇ gʼaˇ le le htaꞈ daꞈ ve te piˇ ve (Awˬ tawn 11-12 nyi sheˍ)c
11. Yaˍkoˆ lehˬ “te ve” awˬ ceuˬ hkʼaˬ hkʼe ve htaꞈ kʼoˆ sheˍ ve le?
11 Yaꞈ hkʼaˇ, Yaˍkoˆ liꞈ kaˇ nanˉ uiˍ 2 hkʼaw “te ve” awˬ ceuˬ Moˉseˍ ve “awˬ liˇ tawˇ hkawˇ” gʼaꞈ te ve htaꞈ kʼoˆ gaˇ ve maˇ heˆ. Chi hkʼoˆ kaꞈ, Hkriꞈ yaˇ te cawˇ ve awˬ nu ve awˬ ceuˬ htaꞈ kʼoˆ gaˇ ve yoˬ. Chi ve lehˬ, yawˇ yonˍ ve cawˬ ve tehꞈ hpeuꞈ maw laˇ ve yoˬ. Yaˍkoˆ kʼoˆ taˍ ve 2 lawn htaꞈ teˇ geh nyi sheˍ.
12. Yonˍ ve leh te tawˆ la ve awˬ ceuˬ htaꞈ caˉ daꞈ ve Yaˍkoˆ hkʼaˬ hkʼe kʼoˆ maˍ laˇ ve le? (Awˬ han htaꞈ nyi sheˍ.)
12 Awˉ lawˉ teˇ lawn Yaˍkoˆ kʼoˆ ve Hkriꞈ yaˇ lehˬ, chaw mehˆ hpfuhˇ htaꞈ maˇ nyi. Hawˉ hkʼaˆ teˇ gʼaˇ paw sha ve chaw htaꞈ a yeˇ yuˬ piˇ leh haˍ gʼawˇ ve chaw htaꞈ nyi cha ve awˬ lawn yawˇ kʼoˆ ve yoˬ. Chaw chi teˇ gʼaˇ yawˇ yonˍ ve cawˬ ve tehꞈ kʼoˆ ve htawˇ, maˇ te tawˆ la ve tehꞈ Yaˍkoˆ beˆ maˍ laˇ ve yoˬ. (Yaˍkoˆ 2:1-5, 9) 2 lawn teˇ lawn Yaˍkoˆ kʼoˆ ve lehˬ, awˬ viˉ awˬ nyi veuꞈ kʼaˇ veuꞈ tuˬ maˇ cawˬ leh caˇ tuˬ maˇ gʼa caˇ ve mawˬ ve chaw htaꞈ yawˇ kʼoˆ ve yoˬ. Yaꞈ hkʼaˇ, yawˇ teꞈ chiˉ kaꞈ maˇ ga piˇ. Yawˇ yonˍ ve cawˬ ve tehꞈ kʼoˆ ve htawˇ, te tawˆ la ve maˇ cawˬ ve kʼo, teꞈ chiˉ awˬ bon maˇ cawˬ. Yaˍkoˆ kʼoˆ ve hkʼa shuˍ, “yonˍ ve teˇ ceuˬ lehˬ kanˉ maˇ te ve kʼo, yonˍ ve oˇ ve suh taˍ ve yoˬ.”—Yaˍkoˆ 2:14-17.
13. Yonˍ ve leh te tawˆ la ve awˬ ceuˬ gʼa cawˬ ve tehꞈ hpeuꞈ maw piˇ tuˬ, Yaˍkoˆ aˬ htoꞈ ma ve awˬ lawn htaꞈ kʼoˆ maˍ laˇ ve le? (Yaˍkoˆ 2:25, 26)
13 Raˍhaˆ lehˬ yonˍ ve htaꞈ pa taw te tawˆ la ve tehꞈ Yaˍkoˆ kʼoˆ ve yoˬ. (Yaˍkoˆ 2:25, 26 gʼaw sheˍ.) Raˍhaˆ Yaˬhoˉvaˬ ve awˬ lawn gʼa kaˇ jaw leh Yaˬhoˉvaˬ Iˉsaˍreˍlaˆ chaw htaꞈ ga piˇ chehˇ ve yawˇ shiˍ ve yoˬ. (Yawˇsuˆ 2:9-11) Yawˇ Yaˬhoˉvaˬ htaꞈ yonˍ ve pa taw Iˉsaˍreˍlaˆ chaw, chaw jaˆ 2 gʼaˇ kawˆ tuˬ cawˬ ve htaꞈ yawˇ ponˬ piˇ ve yoˬ. Aˍbraˍhanˍ hkʼa shuˍ, oˇ ve htaꞈ pa taw yawˇ “hteˇ ve cawˇ ve chaw hpehꞈ ve” tehꞈ Gʼuiˬ sha shawˍ ve yoˬ. Raˍhaˆ ve awˬ lawn yonˍ ve lehˬ gʼa te tawˆ la ve tehꞈ ngaˬ hui hkʼa tawˍ lehˆ gʼa mawˬ ve yoˬ.
14. Pawˇluꞈ leh Yaˍkoˆ ve tawˇ hkawˇ hawˍ daꞈ ve tehꞈ hkʼaˬ hkʼe kʼoˆ gʼa ve le?
14 Pawˇluꞈ leh Yaˍkoˆ lehˬ yonˍ ve leh te tawˆ la ve htaꞈ kʼoˆ ve maˇ shuˍ daꞈ ve yoˬ. Pawˇluꞈ Yuˇdaꞈ chaw Hkriꞈ yaˇ htaꞈ kʼoˆ piˇ ve, Moˉseˍ ve awˬ liˇ tawˇ hkawˇ htaꞈ ceh tiˉ gʼaꞈ te leh Gʼuiˬ sha nyi hkʼaˇ suh tuˬ yoˬ tehꞈ taˇ dawˇ. Yaꞈ hkʼaˇ, a yeˇ uiˍ jaˇ ve lehˬ, yawˇ hui yonˍ ve gʼa cawˬ ve yoˬ. Leh Yaˍkoˆ kʼoˆ ve, Hkriꞈ yaˇ teˇ gʼaˇ le le yonˍ ve tehꞈ hpeuꞈ maw piˇ ve lehˬ, awˬ nu ve chaw htaꞈ daꞈ ve awˬ ceuˬ gʼa te piˇ ve yoˬ.
Yonˍ ve nawˬ Yaˬhoˉvaˬ nyi hkʼaˇ suh ve awˬ ceuˬ te piˇ˗aw laˇ? (Awˬ tawn 15 nyi sheˍ)
15. Ngaˬ hui yonˍ ve cawˬ ve tehꞈ hpeuꞈ maw piˇ tuˬ aˬ htoꞈ ma te gʼa ve le? (Awˬ han htaꞈ nyi sheˍ.)
15 Aˍbraˍhanˍ te ve hkʼa shuˍ ngaˬ hui gʼa te cawˇ ve tehꞈ Yaˬhoˉvaˬ maˇ gʼa kʼoˆ laˇ taˍ. Ngaˬ hui Gʼuiˬ sha nyi ma cawˇ ve chaw hpehꞈ ve htawˇ, ngaˬ hui yonˍ ve tehꞈ hpeuꞈ maw piˇ gʼa tuˬ laiˉ ceuˬ te gʼa ve yoˬ. Tawˇ pa haˉ te kʼo, Hkriꞈ yaˇ awˬ moˍ hkʼaw hpawnˬ daꞈ la gehˇ sheˍ ve chaw htaꞈ haꞈ yuˬ piˇ ve, awˬ viˉ awˬ nyi ga laˇ tuˬ loˍ ve chaw htaꞈ ga piˇ ve, maˇ heˆ leh yehˬ kʼa hkʼaw ve chaw htaꞈ daꞈ ve awˬ ceuˬ te piˇ ve yoˬ. Chi ve teˇ hpaˍ Gʼuiˬ sha nyi hkʼaˇ suh tuˬ te piˇ ve pa taw, yawˇ ngaˬ hui htaꞈ awˬ bon naꞈ laˇ tuˬ yoˬ. (Roˉmaꞈ 15:7; 1 Tiˆmoˉseˍ 5:4, 8; 1 Yoˇhanˬ 3:18) Leh ngaˬ hui te gʼa ve awˬ nu ve awˬ ceuˬ kaꞈ cawˬ sheˍ ve yoˬ. Chi ve lehˬ awˬ nu ve chaw htaꞈ daꞈ ve awˬ lawn sha tanˇ hto maˍ piˇ ve yoˬ. (1 Tiˆmoˉseˍ 4:16) Ngaˬ hui teˇ gʼaˇ le le te tawˆ la gʼa ve awˬ ceuˬ lehˬ, Yaˬhoˉvaˬ ka tiꞈ te taˍ laˇ ve awˬ ceuˬ awˬ tehˬ hpehꞈ la tuˬ yoˬ tehꞈ, ngaˬ hui yonˍ gʼa leh yawˇ te ve awˬ hkʼaˇ daꞈ jaˇ ve htaꞈ kaꞈ yonˍ gʼa ve yoˬ. Ngaˬ hui chi hkʼe yonˍ ve kʼo, Yaˬhoˉvaˬ ngaˬ hui htaꞈ haꞈ yuˬ laˇ leh yawˇ ve awˬ chawˇ tehꞈ kuˬ laˇ tuˬ ve htaꞈ yonˍ gʼa ve yoˬ.
DAWˇ LAW KUIˬ LEHˬ NGAˬ HUI YONˍ VE CAWˬ TUˬ TE LAˇ VE
16. Aˍbraˍhanˍ dawˇ law kuiˬ hkʼaˬ hkʼe cawˬ ve le, leh yawˇ ve yonˍ hkʼaˇ hkʼaˬ hkʼe hpehꞈ ve le?
16 Aˍbraˍhanˍ ve awˬ lawn Roˉmaꞈ liꞈ kaˇ nanˉ uiˍ 4 hkʼaw teˇ ceuˬ kʼawꞈ kʼoˆ taˍ ve yoˬ. Chi ve lehˬ dawˇ law kuiˬ hpehꞈ ve yoˬ. Yaˬhoˉvaˬ ka tiꞈ te taˍ laˇ ve, Aˍbraˍhanˍ htaꞈ pa taw “chaw ceuˬ laiˉ ceuˬ” awˬ bon gʼa tuˬ yoˬ. Dawˇ law kuiˬ chi ve lehˬ, Aˍbraˍhanˍ hkʼaˬ hkʼe taw ha lehˬ ve cawˬ tuˬ te piˇ ve htaꞈ dawˇ nyi sheˍ. (Awˬ hkuiˉ puiˍ 12:3; 15:5; 17:4; Roˉmaꞈ 4:17) Chi hkʼe hpehꞈ ve htawˇ, Aˍbraˍhanˍ 100 hkʼawꞈ leh Saˍraˇ 90 hkʼawꞈ gaˬ˗oˬ ve htawˇ, yawˇ hui yaˇ maˇ cawˬ sheˍ. Chaw yaˇ ve dawˇ hkʼaˇ lehˬ a shaꞈ chi hkʼe taw gaˬ˗oˬ ve kʼo, yaˇ cawˬ maˇ gʼa˗o. Chi ve lehˬ, Aˍbraˍhanˍ ve yonˍ hkʼaˇ htaꞈ lawˇ nyi piˇ jaˇ ve yoˬ. Yaꞈ hkʼaˇ, “chaw ceuˬ laiˉ ceuˬ ve awˬ pa hpehꞈ la tuˬ, dawˇ law kuiˬ maˇ cawˬ ve htawˇ, yawˇ yonˍ leh dawˇ law chehˇ ve yoˬ.” (Roˉmaꞈ 4:18, 19) Peuˬ hkʼawꞈ nawˉ Aˍbraˍhanˍ ve dawˇ law kuiˬ awˬ tehˬ hpehꞈ la ve yoˬ. Yawˇ ve yaˇ paˍ cawˬ la leh Iˉcaˆ meh piˇ ve yoˬ.—Roˉmaꞈ 4:20-22.
17. Yaˬhoˉvaˬ ngaˬ hui htaꞈ haꞈ yuˬ leh yawˇ ve awˬ chawˇ tehꞈ shawˍ laˇ tuˬ, ngaˬ hui hkʼaˬ hkʼe te shiˍ gʼa ve le?
17 Yaˬhoˉvaˬ Aˍbraˍhanˍ htaꞈ nyi ma cawˇ ve hkʼe, yawˇ ngaˬ hui htaꞈ kaꞈ nyi ma cawˇ leh awˬ chawˇ te laˇ tuˬ yoˬ. Pawˇluꞈ kʼoˆ ve, “yawˇ htaꞈ chi hkʼe shawˍ taˍ ve tehꞈ bvuhꞈ taˍ ve tawˇ teˇ hkawˇ lehˬ, Aˍbraˍhanˍ awˬ pon ceh tiˉ maˇ heˆ. Ngaˬ hui awˬ pon htawˇ bvuhꞈ taˍ ve yoˬ. Ngaˬ hui ve Jawˇ mawˇ Yeˍsuˆ htaꞈ suh kuiˬ lo kʼawꞈ teꞈ tu la piˇ shehˍ hpaˇ htaꞈ ngaˬ hui yonˍ ve kʼo, ngaˬ hui htaꞈ htawˇ hteˇ ve cawˇ ve chaw hpehꞈ ve yoˬ tehꞈ shawˍ taˍ laˇ tuˬ yoˬ.” (Roˉmaꞈ 4:23, 24) Chi htaꞈ pa taw, Aˍbraˍhanˍ yonˍ ve cawˬ leh te tawˆ la ve hkʼa shuˍ, ngaˬ hui htawˇ gʼa cawˬ ve yoˬ. Roˉmaꞈ liꞈ kaˇ nanˉ uiˍ 5 hkʼaw ve dawˇ law kuiˬ htaꞈ Pawˇluꞈ kʼawꞈ kʼoˆ sheˍ leh, chi ve gʼuˇ suhˍ teˇ lawn hkʼaw teˇ geh henˇ tuˬ yoˬ.
KʼA MUIˬ HKAWˇ 28 Yaˬhoˉvaˬ ve awˬ chawˇ hpehꞈ ve
a Ngaˬ hui teˇ gʼaˇ le le Yaˬhoˉvaˬ haꞈ yuˬ laˇ leh nyi hkʼaˇ suh tuˬ te piˇ gaˇ ve yoˬ. Chi ve ngaˬ hui hkʼaˬ hkʼe te gʼa tuˬ le? Awˬ lawn chi ve hkʼaw Pawˇluꞈ leh Yaˍkoˆ ve tawˇ hkawˇ yonˍ ve leh te tawˆ la ve htaꞈ caˉ daꞈ ve teˇ geh henˇ tuˬ yoˬ. Chi ve 2 ceuˬ hkʼaˬ hkʼe te caˉ daꞈ ve, leh ngaˬ hui Yaˬhoˉvaˬ nyi ma cawˇ ve chaw hpehꞈ tuˬ hkʼaˬ hkʼe ga laˇ ve kaꞈ teˇ geh henˇ tuˬ yoˬ.
b AWˬ HAN HTAꞈ KʼOˆ MAˍ TAˍ VE Liꞈ: Yuˇdaꞈ chaw Hkriꞈ yaˇ yonˍ ve cawˬ tuˬ Pawˇluꞈ awˬ gʼaˇ piˇ ve yoˬ. “Awˬ liˇ tawˇ hkawˇ” gʼaꞈ te tuˬ htaꞈ awˬ gʼaˇ piˇ ve maˇ heˆ. Tawˇ pa haˉ te kʼo, chaw teˇ gʼaˇ aˉ hkeh caˆ nawˉ˗ehˍ ve yuˬ leh aˉ poꞈ awˬ leh meuˇ lo tawˉ keu chehˇ ve, Paˍsaˍhkaˍ pawehˇ te htaˇ awˬ liˇ cawˬ taˍ ve hkʼe awˬ to daꞈ kehˬ tuˬ te ve.
c AWˬ HAN HTAꞈ KʼOˆ MAˍ TAˍ VE Liꞈ: Yaˍkoˆ yonˍ ve te tawˆ la ve lehˬ awˬ viˉ awˬ nyi htaꞈ awˬ gʼaˇ piˇ ve. Tawˇ pa haˉ te kʼo, haˍ ve gʼawˇ ve chaw htaꞈ ga piˇ ve.