MILANYU YAPAMA ILEMBILE JUWAU

1 Voroma vatookala aitaniwa madhu. Madhu ali vambo-i na Nlungu thitho madhwao ali Nlungu. 2 Romela voroma liye ali vambo-i na Nlungu. 3 Vyongo vyothene vyatookalao dhela mwa liye thitho kavali yongo na imbo-ene yakanleo a-kala dhela mwa liye. 4 Ingumi yatookalavo dhela mwa liye thitho ingumiyo yali wala omoneela atu. 5 Walao unaamoneela isini mbwenye isiyo kitimi-idhe walao.

6 Watoodha mutu mwinango arumiwile na Nlungu, dhinalee ali Juwau. 7 Mutu wen’na atoodha dhairela umboni vyowalao, naifunelo yoi atu o-iyana-iyana taroromele dhela mwa liye. 8 Kai ira liye ali walao, mbwenye adhele dhairela umboni vyowalao.

9 Wala waimbarimbari unomoneela atu o-iyana-iyana, wali unga-adhi vang’ono ira udhe vailambo. 10 Liye ali vailambo thitho ilambo yatoophandhuchiwa dhela mwa liye, mbwenye ilamboyo kiyam’mwidhiwa. 11 Liye atoodha waniwa, mbwenye atu awaniwao katam’mwachenle. 12 Mbwenye atu othene am’mwachenle, liye atoava-a kopolo ira takale ana Nlungu namwasa oi tanoororomela dhinalee. 13 Aliwa katabaliwile dhela mwaatu venango namwasa ofuna wa mutu venango thitho namwasa ofuna wa anamabaliwa, mbwenye tabaliwile dhela wa Nlungu.

14 Ee-no aitaniwa madhuo atoobaliwa na tutu launyama thitho anookala vari vaatu. I-yo natoona titimi-olee, titimi-o ninga linova-iwa mwana obaliwa ekhene khumela wa babee. Nlungu anoom’riyela rima maningi nom’funji-a imbarimbari. 15 (Juwau anooirela umboni vya liye, moi anoonga mokhuwa ira: “Ula ngwam’monga miyule ira, ‘Unodha nduli mwangamu ngundimuwa kwaranya miyo, namwasa oi atookalavo miyo nda-anabaliwe.”’) 16 Namwasa oriya rima ulukhulu wana liye, hora dhothene nanoowachela riya rima ulukhuluo mokwakwanela. 17 Voi Ilamulo yatooveleliwa dhela mwa Mose, mbwenye dhela mwa Yesu Kristu nitooni-iwa riya rima na imbarimbari. 18 Romela walelene kavali mutu uonivo Nlungu, mbwenye obaliwa ekhene uli vakhundu va Babee, ngwaongile vya Nlungu.

19 Vahora yavelela Juwau umboni wen’na, Ayuda tatooruma asembe na Alevi khumela wu Yerusalemu dham’fuka ira: “N’nga we uli ani?” 20 Liye atoorumela ira khabe, “Kandili Kristu.” 21 Aliwa tatoom’fuka ira: “N’nga we uli ani? N’nga uli Eliya?” Liye atoowakhula ira: “Khabe.” “Venango uli Namaongela?” Liye atoowakhula ira: “Khabe!” 22 Ee-no aliwa tatoom’fuka ira: “N’nga we uli ani? Kaniwandele ira nimaode awakhula atu anirumile. N’nga we wamwinyaa unodhionga ira uli ani?” 23 Liye aongile ira: “Ndili madhu a mutu mwinangwee unokhuwa kokolani ira, ‘Mulinyali-e ndhila ya Yohova,’ ninga mwaongele namaongela Esaya.” 24 Atwao tarumiwile na Afarisi. 25 Moi e-no aliwa tatoom’fuka ira: “Akala ira khuli Kristu, Eliya venango Namaongela, n’nga mwasiwa ngwan’ni unobadiza atu?” 26 Juwau atoawakhula ira: “Miyo ndinobadiza ma-injeni. Mbwenye vari vinyu vatokala mutu mwinango oi nyo kamunom’mwidhiwa. 27 Liye ngunodha nduli mwangamu thitho miyo kandili ofwanelela thathula migo-i ya sapatodhee.” 28 Vyongo vyevi vyaireela wu Betaniya kombela la Yordani, wabadizela Juwau atu.

29 Dambo lo-arela Juwau atoona Yesu adhanga wa liye, moi e-no liye atoonga ira: “Kaing’anani Mwana libila wa Nlungu, unokhumi-a madawo vailambo! 30 Wen’na ngwam’mongecha miyule ira: ‘Unodha ndulimwangamu ngundimuwa kwaranya miyo, namwasa oi liye atookalao miyo nda-anabaliwe.’ 31 Miyo thitho kandam’mwidhiwa, mbwenye mwasa unondiiri-a miyo badiza atu ma-injeni ngoi liye aoneele wa Aisraeli.” 32 Juwau atoonga thitho umboni oi: “Ndatoona zimu uthithanga ninga kangaiwa khumela dhulu thitho watookalave va liye. 33 Miyo thitho kandam’mwidhiwa, mbwenye Nlungu andirumile dhabadiza ma-injeni atoondiwandela ira: ‘Wadhaona zimu uthithanga dhakaatheya va mutu mwinangwee, wenuo ngunobadiza na zimu ochena.’ 34 Miyo ndatoovionadi vyevyo thitho ndatoovelela umboni ira liye ndi Mwana Nlungu.”

35 Dambo lo-arela Juwau ali angaimenle vambo-i na anamafunjedhee ambili. 36 Thitho angaoni Yesu aviranga, atoonga ira: “Kaing’anani Mwana libila wa Nlungu!” 37 Anamafunjedha ambilao tangavwide vyevyo, tatoom’arela Yesu. 38 Adhamale Yesu atoodhimbinuwa thitho angaaoni tam’aranga, atoafuka ira: “N’nga munosakan’ni?” Aliwa tatoonga ira: “Rabi, (dhina loi Rabi linothapulela, “Namafunji-a”), n’nga munokala wani?” 39 Liye atoawandela ira: “Dhoweni mumaoneo.” Adhamale aliwa tatoodhowa maona wakala liye thitho tatookala vambo-i na liye dambo lelo. Yen’na yali 16 hora. 40 Andreya, oi ali balee Simoni Pedru ali mbo-i mwaatu ambilao, oi avwide vyaongile Juwau nom’arela Yesu. 41 Voroma liye atoom’gumanana balee Simoni nom’mwandela ira: “I-yo nitom’fwanya Mesiya” (dhina loi Mesiya linothapulela, “Kristu”), 42 Andreya atoom’dhowanee wa Yesu. Yesu angam’moni atoonga ira: “We uli Simoni mwana Juwau, unodha itaniwa thitho Kefa” (dhina leli linothapulela “Pedru”).

43 Bebe-inimwee, Yesu atoothuulela vyoi adhowe wu Galileya. Moi e-no atoogumanana Filipi nom’mwandela ira: “Ukale nama-arelanga.” 44 Filipi ali wau Betisaida, sidade lakhumela Andreya na Pedru. 45 Adhamale Filipi atoogumana na Natanieli nom’mwandela ira: “I-yo nitom’fwanya Yesu mwana Yosefi wau Nazareti, oi unoongiwa Muilamulo ya Mose na vyaongile anamaongela.” 46 Mbwenye Natanieli atoom’fuka ira: “N’nga mu Nazareti munooda khuma mutu uliwethene wapama?” Filipi atoom’ mwandela ira: “Dhowenga umam’mone” 47 Yesu angamoni Natanieli adhanga wa liye atoonga ira: “Kaing’anani Muisraeli waimbarimbari, oi mwa liye kamuli inyengo.” 48 Natanieli atoom’fuka ira: “N’nga mundiidhi a-vi?” Yesu atoom’mwakhula ira: “Filipi a-anauitane, miyo ndatouona ungali chindo mwa muri wa savule.” 49 Natanieli atoom’mwandela ira: “Rabi, nyo muli Mwana Nlungu, muli Mwene wa Israeli.” 50 Yesu atoom’fuka ira: “N’nga utondiroromela namwasa oi nditouwandela ira ndatouona ungali chindo mwa muri wa savule? Unodha ona vyongo vilukhulu kwaranya vyevi.” 51 Adhamale Yesu atoawandela ira: “Mwaimbarimbari ndinoowandelani ira, munodha ona dhulu ungadhuleile, angelo a Nlungu tagwelanga nothitha udha vali Mwana mutu.”

2 Vadambo laneraru wu Kana wau Galileya watookala pwando la kazameto thitho m’mee Yesu ali weo. 2 Yesu na anamafunjedhee tatooitaniwa thitho wu pwando la kazametolo.

3 Vinyu ungamadhi, m’mee Yesu atoom’mwandela ira: “Vinyu utoamalela.” 4 Mbwenye Yesu atoom’mwandela m’meeuo ira: “N’nga m’ma vinonikhuza a-vi, horanga kinafiye.” 5 M’meeuo atoawandela anamalaba takami-a vevo ira: “Muire yongo iliyothene inauwandeleni liye.” 6 Valimburonivo vatookala mino 6 mwa-eliwa ma-inje odhicheni-ana movwelana na malamulo a Ayuda. Muno uliwethene wavolowa malitru 44 venango 66. 7 Ee-no Yesu atoawandela ira: “Mudhali-e minwila na ma-inje.” Thitho aliwa tatooidhali-a. 8 Moi e-no atoawandela ira: “Murungemo vang’ono mumam’va-e namaing’anela pwandoli.” Aliwa tatooiradi vyevyo. 9 Namaing’anela pwandolo atoolawila ma-inje asanduchiwile vinyuao. Voi liye kaaidhiwa wakhumile vinyuo (angalive ira anamalaba tarungile ma-injale tatooidhiwa), namaing’anela pwandolo atooitana namathela 10 nom’mwandela ira: “Mutu uliwethene voroma unokhumi-a vinyu wapama mbwenye atu talezela, panokhumi-a liye vinyu o-oriya maningi. Mbwenye we utolokota vinyu wapama fiyedha e-ni.” 11 Yesu atooira vyevi wu Kana wau Galileya ninga imbo-i mwa vizindiyelovyee vyoroma. Liye atooni-a titimi-olee thitho anamafunjedhee tatooroma m’roromela.

12 Vyevi vingaireile, Yesu, m’mee, abalee na anamafunjedhee tatoodhowa wu Kafarnau, mbwenye katadimbenleo maningi.

13 Paskwa ya Ayuda yali ingakwivenle, ee-no Yesu atoovenyathi dhowa wu Yerusalemu. 14 Weo atoofwanya alimbo guli-a ng’ombe, mabila khangaiwa na alimbo chinja kobiri tangakaathidhe mipandoni mwiwa kachisinimo. 15 Ee-no atoosakanya chamu wa go-i noatamangi-ana atu othene tana mabila na ng’ombe kachisinimo. Atooboma kobiri dhaatu tachinja kobiri nondunya mameziwa. 16 Moi e-no atoawandela alimbo guli-a khangaiwa ira: “Mukhumi-e vyevi muno! Muvaeletu i-ya sanducha nyumba ya Babanga kala nyumba yoguli-edhamo malonda!” 17 Anamafunjedhee tatoothuulela malemba anoonga ira: “Dhivelela wanga vanyumbani vinyu unodhakala ninga mulo uno-inda rimani mwanga.”

18 Mbwenye Ayudao tatoonga ira: “N’nga unonioni-a izindiyelo yoi a-vi yothonyi-edha ira utokaana utongi oirela vyongo vyevi?” 19 Yesu atoawakhula ira: “Mugwi-e kachisula thitho miyo ndinodha umanga malambo mararu.” 20 Moi e-no Ayudao aongile ira: “Kachisula wamangiwile wa vyawa 46, n’nga we unoonga ira unodha umanga malambo mararu?” 21 Mbwenye liye aonga vya kachisi wa manungwee. 22 Ee-no angavenyathidhe muukwa, anamafunjedhee tatoothuulela ira liye aonga vyevi thitho tatoororomela malemba na madhu aonga Yesu.

23 Moi e-no angali va pwando la Paskwa wu Yerusalemu, atu anjinji tatoom’roromela tangaoni vizindiyelo vyaira liye. 24 Mbwenye Yesu kaaroromele maningi namwasa oi othene enao atoaidhiwa pama, 25 thitho liye kaafuneela mutu mwinango oi am’mwandelemo vya mathuleloni mwa mutu, namwasa oi liye anooidhiwa vili rimani mwamutu.

3 Vatookala Farisi mwinango dhinalee Nikodemu, liye ali namatonga wa Ayuda. 2 Liye atoodhowa wa Yesu nama-iyu mam’mwandela ira: “Rabi, nditoidhiwa ira nyo muli namafunji-a okhumela wa Nlungu, namwasa oi kavali mutu unaode irana vizindiyelo ninga vinoirecha nyo akonda a-kami-iwa na Nlungu.” 3 Yesu atoom’mwakhula ira: “Mwaimbarimbari ndinouwandela ira, mutu a-abaliwe okoka kanaode volowa mu Umwene wa Nlungu.” 4 Nikodemu atoom’fuka ira: “N’nga mutu unabaliwe a-vi okoka angali ndimuwa? N’nga mutu unooda volowa mbani mwa m’mee nobaliwa okoka?” 5 Yesu atoom’mwakhula ira: “Mwaimbarimbari ndinouwandela ira, mutu kanaode volowa mu Umwene wa Nlungu akonda a-baliwa mwa ma-inje na zimu. 6 Ibaliwile mu ututu chaunyama, thitho ibaliwile mu uzimu chauzimu. 7 Kudabwe namwasa oi nditouwandela ira: Munofwanela baliwa okoka. 8 Lipevo linodhowa unofuna aliwa thitho mutu unovwa wuumawee, mbwenye kanoidhiwa unokhumela aliwa na unodhowa aliwa. Saasawa na mutu uliwethene ubaliwile muuzimu.”

9 Nikodemu atoofuka ira: “N’nga vyevi vinaodeye a-vi?” 10 Yesu atoom’fuka ira: “We uli namafunji-a wa Israeli, n’nga vinoodeya a-vi ira wa-aviidhiwe vyevi? 11 Mwaimbarimbari ndinouwandelani ira, i-yo ninoonga viidhi i-yo, thitho ninoirela umboni vioni i-yo. Mbwenye nyo kamuno-arela umboni unovelela i-yo. 12 Miyo nditouwandelani vyongo vya vailambo yavathi mbwenye nyo kamunororomela, n’nga ndauwandelani vyongo vya dhulu munaviroromele a-vi? 13 Thitho kavali mutu uromile gwela dhulu mbwenye Mwana mutu baa-i, nguthithile khumela dhuluo. 14 Mofwanafwana na Mose athomeile nyowa vaimuri kokolani, Mwana mutu thitho unofwanela thomeiwa, 15 ira mutu uliwethene om’roromela akaena ingumi yo-omala.

16 Namwasa oi Nlungu atoodhiveliwana maningi ilambo moi atoovelela Mwanee obaliwa ekhene ira, mutu uliwethene om’roromela a-anongiwe mbwenye akaena ingumi yo-omala. 17 Nlungu kaarumile Mwanee vailambo ira adhatonge ilambo,* mbwenye ira ilambwiyo ivulumuchiwe dhela mwa liye. 18 Mutu uliwethene unom’roromela kanofwanela tongiwa. Mbwenye mutu uliwethene unokonda a-roromela utomala tongiwa wale, namwasa oi karoromele Mwana obaliwa ekhene wa Nlungu. 19 Atu anodha tongiwa namwasa ula: wala utofiya vailambo mbwenye malo modhiveliwana walao atu anodhiveliwana isi voi mabasiwa mbothakala. 20 Atu anoira vyongo vyothakala anoidanana wala thitho katinofiya vali walavo, ovala ira mabasiwa anooneela. 21 Mbwenye mutu uliwethene unoira vyongo vyapama unodha vali walavo, ira mabasa aira liye aoneye ira anoovwelana na ifunelo ya Nlungu.”

22 Vyevi vingamadhi Yesu na anamafunjedhee tatoodhowa tatamo lamamidhi la wu Yudeya. Liye atookala vambo-i na aliwa thitho anoobadiza atu. 23 Mbwenye Juwau naliyene thitho anobadiza atu wu Enoni duzi na Salimu, namwasa oi weo watookala ma-inje manjinji thitho atu tanoodhowecha mabadiziwa. 24 Vahora yen’na Juwau ali a-anafungeliwe perezo.

25 Moi e-no anamafunjedha a Juwau tatooroma kangana na Muyuda mwinango vamwasa okhuza kala ochena vamethoni va Nlungu. 26 Adhamale tatoodhowa wa Juwau mam’mwandela ira: “Rabi, mutu am’mwirele nyo umboni kombela wa Yordani ule, naliyene unabadiza thitho atu othene anaadhowa wa liye.” 27 Juwau atoowakhula ira: “Mutu kanawachele yongo iliyothene a-kala mova-iwa na Nlungu. 28 Nyo thitho muli amboni va vyaongile miyo ira, ‘Miyo kandili Kristu, Mbwenye ndarumiwile ira ndikale vasogolovee.’ 29 Mutu uli vambo-i na namatheliwa ndi namathela. Mbwenye fwee namathela akala vaduzi vuruwananga madhu anamathela, unosangalala maningi namwasa wa madhu anamatheluo. Ee-no miyo ndinosangalala maningi. 30 Basalee linofwanela dhowangave vasogolo, mbwenye langa linofwanela yevelanga.”

31 Mutu okhumela dhulu unokwaranya atu enango othene. Thitho wa vailambo yavathi unoonga vyongo vya vailambo yavathi. Mbwenye mutu okhumela dhulu unokwaranya atu enango othene. 32 Liye unovelela umboni va vyongo vyaoni liye na vyavwide liye, mbwenye kavali mutu unororomela umboni unovelela liye. 33 Mutu uroromenle vya umboneeuo utosimikizela ira Nlungu unoonga vya imbarimbari. 34 Mutu urumiwile na Nlungu unoonga madhu a Nlungu, namwasa oi liye afuna velela zimu kanauvelela moumeleliwa. 35 Baba unom’dhiveliwana Mwana thitho atoovelela vyongo vyothene mandhanimwee. 36 Mutu unororomela Mwanuo unodhakaana ingumi yo-omala. Thitho o-ovwela Mwanuo kanodhakaana ingumi yo-omala, mbwenye thakaleliwa wa Nlungu unodhadha va liye.

4 Mbwiye angavwide ira Afarisi atovwa ira liye unaafunji-a atu anjinji ira takale anamafunjedhee noabadiza kwaranya Juwau, 2 angalive ira asimbwa badiza kai Yesu mbwenye mbaanamafunjedhee, 3 liye atookhuma wu Yudeya nowelela okoka wu Galileya. 4 Mbwenye afwanela virana wu Samariya. 5 Ee-no atoofiya sidadi la Samariya loitaniwa Sikari, duzi na munda wa Yakobo wam’va-idhe liye mwanee Yosefi. 6 Weo watookala isime ya Yakobo. Moi e-no Yesu angachenyenle na ulenduo, atookaathi vaisimenivo. Hora yen’na yali 12 hora.

7 Moi e-no i-yana wamu Samariya atoofiya vaisimenivo dharunga ma-inje. Yesu angam’moni atoom’vepha ira: “Kandiva-enimo ma-inje ndimwe.” 8 (Hora yeniyo anamafunjedhee tali tangadhowile sidadi magula vyodya.) 9 Moi e-no i-yana wau Samariyao atoom’fuka Yesu ira: “N’nga vinoodeya a-vi nyo Muyuda ndivepha miyo i-yana wau Samariya ma-inje?” (Namwasa oi Ayuda na Asamariya katinovwelana.) 10 Voakhula Yesu atoom’mwandela i-yanauo ira: “Mwa-aidhiwe vya yotuva yapezi ya Nlungu na mutu unouwandelani ira, ‘mundiva-emo ma-inje ira ndimwe,’ mwangam’vephile liye thitho angauva-idheni ma-inje aingumi.” 11 I-yanuo atoom’mwandela ira: “Mbwiye, nyo kamuna kabungu orungana ma-inje thitho isimei chodi-a. N’nga ma-inje aingumiyo mwaarungile wani? 12 N’nga nyo muli ndimuwa kwaranya mbwii-u Yakobo aniva-idhe isimei, yamwecha liye, a-imee vambo-i na vifuwovyee?” 13 Vom’mwakhula Yesu aongile ira: “Mutu uliwethene umwide ma-injala unodha kaana okoka tona. 14 Mutu unofuna dhamwa ma-inje anofuna miyo dham’va-a kanodha kaana okoka tona navang’onovene. Ma-inje anofuna miyo dham’va-a anodha kala mwaliye ninga puno yama-inje anofuna dham’va-a ingumi yo-omala.” 15 I-yanuo atoom’wandela Yesu ira: “Mbwiye, mundiva-e ma-injao ira nda-akaenave okoka tona thitho ira nda-adheve okoka uno dharunga ma-inje.”

16 Liye atoom’mwandela i-yanuo ira: “Dhowa umam’mwandele man’naa adhe uno.” 17 I-yanuo atoom’mwakhula ira: “Kandina lombwana.” Yesu atoom’mwandela ira: “Mutoonga pama vowakhula ira, ‘Kandina lombwana.’ 18 Mutoongadi vyaimbarimbari, namwasa oi mwatootheliwavo na alombwana 5, thitho lombwana unanyo va-eni kai man’ninyu.” 19 I-yanuo atoom’mwandela ira: “Mbwiye, nditozindiyela ira nyo muli namaongela. 20 Anamabali-u talambelecha Nlungu mwangonimu, mbwenye nyo munoongecha ira limburo lolambelelao Nlungu nli wu Yerusalemu.” 21 Yesu atoom’mwandela i-yanuo ira: “Ndinouwandelani ira, inodha fiya hora yoi kamunodha lambela Baba mwangonimu venango wu Yerusalemu. 22 Nyo munolambela yongo inokonda nyo aiidhiwa. Mbwenye i-yo ninolambela yongo iidhi i-yo, namwasa oi ivulumucho inoromela wa Ayuda. 23 Mbwenye inodha fiya hora, thitho njen’na, yoi anamalambela aimbarimbari anodha lambela Baba mosogoleliwa na zimu na imbarimbari. Namwasa oi Baba unofuna ira atu ninga enala tam’lambelenga. 24 Nlungu ndi zimu, thitho atu anom’lambela anofwanela m’lambela mosogoleliwa na zimu thitho imbarimbari.” 25 I-yanuo atoonga ira: “Nditoidhiwa ira Mesiya oi unoidhiweya thitho ira ngu Kristu unodhadha. Liye adhadha unodha niwandela vyongo vyothene.” 26 Yesu atoom’mwandela ira: “Mutu wenuo ngumiyo unoongana we va e-ni.”

27 Vahoriyo anamafunjedhee tatoofiya, thitho tatoodabwa namwasa oi liye aonga na i-yana. Mbwenye kavali am’fukile ira: “N’nga munofunani wa liye?” Venango ira, “Mwasiwa ngwani munoongana i-yanula?” 28 Ee-no i-yanuo atoo-iya munwee wa ma-inje novolowa sidadimo mawandela atu ira: 29 “Dhoweni mumaone mutu undiwandele vyongo vyothene vyairecha miyo. N’nga wen’na kai Kristule?” 30 Aliwa tatookhuma sidadimo nodhowa wali Yesu.

31 Aliwa ta-anafiye, anamafunjedhee tanoom’kanyi-edha ira: “Rabi, kadyani.” 32 Mbwenye liye atoawandela ira: “Nditokaana yodya inokonda nyo aidhiwa.” 33 Moi e-no anamafunjedhao tatooroma fukana ira: “N’nga tokala um’dhelena yodya?” 34 Yesu atoawandela ira: “Yodya yanga kuirana vinofuna andirumile nomari-a basalee. 35 N’nga nyo kamunoongecha ira u-adhi myedi 4 ira nirome a-nda? Mbwenye ndinouwandelani ira: Muing’anecheche mindamo, munoona ira vyodya vitomala warala thitho vinofwanela a-ndiwa. Moi va e-ni 36 mulimbo a-nda unaapagaliwa thitho unaagumanyei-a vyova-a wu ingumi yo-omala, ira mulimbo dhala mbeu na o-anda tasangalalele vambo-i. 37 Ngumwasee madhu oi mutu mwinango ngodhala thitho mutu mwinango ngo-anda, mbaimbarimbari. 38 Miyo nditourumani ira muma-ande vikhondile nyo a-onela nyarwa. Atu enango anaalaba basa mwathindhi mbwenye nyo munaaganyali na basa lalabile aliwa.”

39 Asamariya anjinji okhumela sidadimo tatoom’roromela Yesu namwasa wa madhu aongile i-yanule. I-yanuo atooirela umboni ira: “Liye utondiwandela vyongo vyothene vyairecha miyo.” 40 Ee-no Asamariyao tatoofiya wa Yesu nom’vepha ira akaleve naaliwa. Thitho liye atookala weo malambo menli. 41 Vasogolovee, atu anjinji tatoom’roromela namwasa wa vyaongile liye. 42 Thitho tatoom’mwandela i-yanule ira: “Kai ira nitororomela namwasa wa madhwaa baa-i khabe, mbwenye namwasa oi nitodhivwela nokhene thitho nitoidhiwa ira mutula ngu namavulumucha wa ilambo.”

43 Malambo menlao tangamadhi, liye atookhumao weo nodhowa wu Galileya. 44 Yeswene wenuo atoirela umboni ira namaongela kanolemeziwa waniwa. 45 Ee-no angafiile wu Galileya, atu au Galileyao tatoom’mwachela pama namwasa oi tali tangaoni vyongo vyothene vyairile liye va pwando wu Yerusalamu, voi naaliwene thitho tatoodhowao pwandonio.

46 Adhamale atoowelela okoka wu Kana wau Galileya, wasanduchile liye ma-inje kala vinyu ule. Weo watookala mutu mwinango wau Kafarnau alabela mwene, oi mwanee aira bulela. 47 Mutuo angavwide ira Yesu utofiya wu Galileya khumela wu Yudeya, atoodhowa wa liye ma’mvepha ira adhowe wu Kafarnau ma’mwili-a mwaneuo, namwasa oi ali anga-adhi vang’ono ira akwe. 48 Mbwenye Yesu atoom’mwandela ira: “Nyo atu mwa-aone vizindiyelo venango vyodabwi-a kamunororomela navang’onovene.” 49 Namalaba wa mwenule atoom’mwandela ira: “Mbwiyeni, dhoweni mwananga a-anakwe.” 50 Yesu atoom’mwandela ira: “Dhowa, mwanaa utoila.” Mutuo atoororomela madhu am’mwandele Yeswao thitho atoodhowa. 51 Mbwenye awelelanga mudhi, adhaaree tatoo-arela dham’mwandela ira zombwee utoila. 52 Ee-no liye atoafuka vyahora yailile liye thitho aliwa tatoom’mwakhula ira: “Uilile dhilo 13 hora.” 53 Ee-no babeuo atoozindiyela ira yali hora yen’ne yam’mwandele Yesu ira: “Mwanaa utoila.” Ee-no liye na banjalee lothene tatoororomela. 54 Yei yali izindiyelo yanambili yairile Yesu angakhumile wu Yudeya dhowa wu Galileya.

5 Vyevi vingamadhi, watookala pwando la Ayuda thitho Yesu atoovenyathi nodhowa wu Yerusalemu. 2 Wu Yerusalemu valango wa mabila vatokala tanda loi Muiyeberi linoitaniwa Betisida. Khundu mwatandalo muli makonde 5. 3 Kondemo mwanoogonathi atu anjinji obulela, o-oona, orangala na okwa vyano. 4 —— 5 Vatookala lombwana mwinango oi akanle abulelanga wa vyawa 38. 6 Yesu angam’moni mutuo angali ogonathene thitho angaidhi ira ukanle abulelanga wahora yolapela, atoom’fuka ira: “N’nga unofuna uile?” 7 Mutu obuleluo atoom’mwakhula ira: “Mbwiye, kandina mutu ofuna ndibwini-a tandanimu ma-inje atekenyeyanga, thitho ndadhi ndibwine mutu mwinango unaandikwaranya dhowa mabwina.” 8 Yesu atoom’mwandela ira: “Venyathi, utukule kandalaula* noroma wenda.” 9 Hora yeniyene mutule atooila thitho atootukula kandaleuo noroma wenda.

Dambo leli lali la Sabudu. 10 Ee-no Ayuda tatooroma m’mwandela mutu aili-iwilule ira: “Penene ndi dambo la Sabudu, pyo-orumeli-iwa ira we utukule kandalaula.” 11 Liye atoawakhula ira: “Mutu undiili-idhuo undiwandenle ira, utukule kandalaula noroma wenda.” 12 Aliwa tatoom’fuka ira: “N’nga baani uwandenle ira, ‘Utukule kandalaula noroma wenda?” 13 Mbwenye mutuo kaaidhi ira am’mwili-idhe ali ani namwasa oi Yesu ali angavolowile vamwinji waatu wali vevo.

14 Adhamale Yesu atoom’gumanana mutule kachisini nom’mwandela ira: “Kaing’ana utoila. Kudawe okoka ira yongo inango yothakala kwaranya marenda ya-auireele.” 15 Mutule atoovenyathi dhowa wa Ayudale maawandela ira ndi Yesu um’mwili-idhe. 16 Ayudao tangavwide vyevi tatooroma m’ruchi-a Yesu, namwasa oi liye aira vyongo vyevi va dambo la Sabadu. 17 Mbwenye liye atoawandela ira: “Babanga unave laba basa fiyedha va e-ni, miyo thitho ndinofwanela labangave basa.” 18 Vamwasa wen’na Ayudao tatooroma sakasaka ndhila yoi tam’phele, namwasa oi vowenjedhela a-lokota Sabudu, anoonga thitho ira ndi Mwana Nlungu, dhifwanafwani-edhanga na Nlungu.

19 Ee-no voakhula Yesu atoawandela ira: “Mwaimbarimbari ndinouwandelani ira, Mwana kanaire iliyothene inothuulela liye vaekhene, mbwenye unoirana inoona liye Babee airangana. Namwasa oi vyongo vinoira Baba Mwana thitho unoira vimbo-ive ninga munoirela Babee. 20 Baba unom’dhiveliwana Mwanee thitho unom’moni-a mwanuo vyongo vyothene vinoira liye. Liye unodha m’moni-a mabasa malukhulu kwaranya enala ira nyo mudabwe. 21 Mofwanafwana na Baba oi unovenyathi-a alimbo wukwa noava-a ingumi, naliyene thitho Mwana unovelela ingumi waatu anoafuna liye. 22 Baba kanotonga mutu uliwethene, mbwenye izo yei uivelenle wa Mwanee, 23 ira atu othene talemeze Mwana ninga munolemezela aliwa Baba. Mutu uliwethene o-olemeza Mwana kanolemeza thitho Baba am’rumile Mwanuo. 24 Mwaimbarimbari ndinouwandelani ira, mutu uliwethene uvwide madhwanga nororomela Nlungu andirumile, unodha kaana ingumi yo-omala thitho kanodha tongiwa mbwenye unodha vulumuwa muukwa nodhakaana ingumi yo-omala.

25 Mwaimbarimbari ndinouwandelani ira, inodha fiya hora thitho njen’na, yoi alimbo wukwa anodhavwa madhu a Mwana Nlungu thitho anovwela anodha kaana ingumi. 26 Mofwanafwana na Baba oi utokaana kopolo dhovelela ingumi, utom’rumeli-a thitho Mwanee kaana kopolo dhovelela ingumi. 27 Utom’va-a thitho kopolo dhotongana, namwasa oi liye ndi Mwana mutu. 28 Kamudabwe na vyevi, namwasa oi inodha fiya hora yoi othene ali masiyeni aithuulelo anodhavwa madhwee 29 thitho anodha venyathi. Ale aira vyongo vyapama anodha venyathi ira takaena ingumi mbwenye aira vyongo vyothakala anodha venyathi ira tatongiwe. 30 Miyo kandinoirana iliyothene inothuulela miyo vandekhene. Ndinotonga movwelana na vivwide miyo, thitho ndinotonga molongomana, namwasa oi kandinoirana vinofuna miyo, mbwenye ndinoirana ifunelo ya ule andirumile.

31 “Akala ndinodhiirela umboni ndekhene kuongela ira umbonanguo kai waimbarimbari. 32 Nditoidhiwa ira utokalavo unondiirela umboni thitho umboni unondiirela liyeo ngwaimbarimbari. 33 Nyo mwatooruma atu dhowa wa Juwau, thitho liye atooirela umboni vyaimbarimbari. 34 Miyo kandinorumela umboni okhumela waatu, mbwenye ndinoonga vyevi ira muvulumuwe. 35 Mutu wenuo ali nyale yo-inda na yowala, thitho wahora yoyeva nyo mwali ofunechecha sangalala maningi nowalao. 36 Mbwenye miyo nditokaana umboni okwaranya wa Juwau, namwasa oi mabasa andiva-idhe Babanga ira ndaakwakwaneli-edhe, mabasa anolaba miyoala, anoirela umboni ira liye atoondirumadi. 37 Thitho Baba andirumile atoondiirela umboni. Nyo kamunavwevo madhwee venango ona tutulee. 38 Thitho madhwee katikaatheile mwanyo, namwasa oi nyo kamuroromenle mutu am’rumile Babuo.

39 “Nyo munosakasaka Malembani thuulelanga ira munodha kaana ingumi yo-omala dhela Malembanimo angalive ira malemba mambo-ive enao mbanoirela umboni vya miyo. 40 Mbwenye kamunofuna udha wa miyo ira mudhakaena ingumi yo-omala. 41 Kandinofuna titimi-iwa naatu, 42 mbwenye miyo nditoidhiwa pama ira mirimani mwinyu kamuli udhivela wa Nlungu. 43 Miyo ndidhidhe mu dhina la Babanga mbwenye kamundiwachenle. Mbwenye mutu mwinango a-adhe mu dhinalee, mwangam’mwachenle. 44 N’nga munaroromele a-vi voi munowachela titimi-o lokhumela waatu afwinyu, mbwenye a-dhilimbe-edha ira mukaena titimi-o lokhumela wa Nlungu? 45 Kamuthuulele ira miyo ndinousumelani wa Baba. Mbwenye Mose unom’nyindelechanyo, ngunousumelani wa Baba. 46 Aakale ira mwatoom’roromela Mose, mwangandiroromele thitho, namwasa oi liye ngwalembile vya miyo. 47 Akala kamunororomela vyalembile liyevyo, n’nga munaroromele a-vi madhwanga?”

6 Vyevi vingamadhi Yesu atoovandelela kombela n’nango la bara la Galileya, venango ira Tiberiya. 2 Thitho mwinji nlukhulu waatu wanom’arela namwasa oi wanoona vizindiyelo vyaira liye voili-a atu abulela. 3 Ee-no Yesu atoogwela mwangoni nokaathi mwemo vambo-i na anamafunjedhee. 4 Moi ee-no pwando la Paskwa la Ayuda lali lingakwivenle. 5 Yesu angaing’an’ne noona mwinji nlukhulu waatu udhanga wa liye, atoom’fuka Filipi ira: “N’nga mapau odyi-a atu othene enala ninamaagule wani?” 6 Mbwenye Yesu atoonga vyevi vofuna m’mwesedha namwasa oi liye anoidhiwa vyafuna liye irana. 7 Filipi atoom’mwakhula ira: “Mapau amadenariyo* okwakwana 200 katinokwakwana masiki ndigawedhe mutu uliwethene vang’ono.” 8 Namafunjedhee mwinango aitaniwa Andreya balee Simoni Pedru, atoonga ira: 9 “Vatokala zombwe una mapau 5 a sevada na visisomba vinli. N’nga vyevi vinokwakwana mwinji wethene wen’na?”

10 Yesu atoonga ira: “Mwaawandele atwala ira takaathi vathi.” Valimburonivo vatookala malachi manjinji. Ee-no alombwana 5.000 tatookaathi. 11 Moi e-no Yesu atootukula mapau ale. Angalobenle, atoogawedha atu othene takaathidhale. Atooira saasawa na visisomba vile thitho atwao atoodya ninga mwafunela aliwa. 12 Atu othene tangarumbanle, liye atoowandela anamafunjedhee ira: “Mugumanye vyo-ala vyothene, ira va-anongeye yongo.” 13 Ee-no tatoogumanya vya-adhi thitho tatoodhali-a migogoda 12 ya mapau 5 asevada ale ya-adhi atu tangamadhi udya.

14 Atwao tangaoni izindiyelo yairile Yesu, tatooroma onga ira: “Mo-okaikela wen’na ngunamaongela aongiwile ira unodhadha vailambo.” 15 Adhamale Yesu angaidhi ira atu anofuna udha dham’inda ira tam’ele kala mweniwa, atookhuma nowelela okoka mwangoni makala ekhene.

16 Vahora yavira dhuwa, anamafunjedhee tatoodhowa bara. 17 Aliwa tatoogwela mwadiya novandela bara dhowa wu Kafarnau. Vahora yen’na undhe wali ungali isi mbwenye Yesu ali a-anadheve wa aliwa. 18 Thitho bara mwatooroma kala mabimbi namwasa oi watookala liphevo lakopolo. 19 Mbwenye tangachapile mwadiyuo wa ulendo wa makilometru 5 venango 6, tatoona Yesu awendanga vabara kwivelanga wali mwadiyuo thitho aliwa tatoova. 20 Mbwenye Yesu atoawandela ira: “Kamuove, ngumiyo!” 21 Adhamale Yesu atoogwela mwadiyani mwali aliwamo, thitho hora yeniyene tatoofiya kombela wadhowa aliwa ule.

22 Bebeinimwee, atu tali kombela n’nango la bariyo katafwaidhevo mwadiya uliwethene valimburonivo. Namwasa oi anamafunjedha tatoutukula mwadiya ung’ono wali vevo, mbwenye Yesu kaagwenle vambo-i na aliwa vahora yadhowa aliwa. 23 Mbwenye myadiya yokhumela wu Tiberiya yatoofiya duzi na valimburo vadyela atu mapau ale Mbwiye angalobenle. 24 Ee-no mwinji waatuo wangaoni ira Yesu vambo-i na anamafunjedhee katilivo, watoogwela myadiiwa dhowa wu Kafarnau masaka Yesu.

25 Tangam’fwaidhe kombela n’nango la bariyo tatoom’fuka ira: “Rabi, mufiile hora yan’ni uno?” 26 Yesu atoawakhula ira: “Mwaimbarimbari ndinouwandelani ira, kai ira munondisakela namwasa oi mwatoona vizindiyelo khabe, mbwenye namwasa oi mwatoodya mapau norumbala. 27 Kamulabenga basa ira mufwanye yodya yoi inonongeya, mbwenye ira mufwanye yodya yodimbela yoi inodhi-a ingumi yo-omala. Mwana mutu unodha uva-ani yodya yei namwasa oi Baba Nlungu, uto-ela izindiyelo va liye yom’rumeli-a.”

28 Ee-no atwao tatoom’fuka ira: “N’nga niirenga n’ni ira niirengana vinofuna Nlungu?” 29 Yesu atoawakhula ira: “Vinofuna Nlungu ira muirengana pyoi muthonyi-edhenga iroromelo wa mutu um’rumile liye.” 30 Moi e-no aliwa tatoom’fuka ira: “N’nga nyo munoira izindiyelo yoi a-vi ira i-yo niione nouroromelani? N’nga munoira basa loi a-vi? 31 Anamabali-u tanoodya mana kokolani ninga munoongela malemba ira: ‘Atoava-a yodya khumela dhulu ira tadye.’” 32 Adhamale Yesu atoonga ira: “Mwaimbarimbari ndinouwandelani ira, Mose kauva-idheni yodya khumela dhulu, mbwenye Babanga unaauva-ani yodya yaimbarimbari khumela dhulu. 33 Namwasa oi yodya ivelenle Nlungu nguliye uthithile khumela dhulu novelela ingumiyee vailambo.” 34 Ee-no aliwa tatoom’mwandela ira: “Mbwiye muniva-enga yodya yei hora dhothene.”

35 Moi e-no Yesu atoawandela ira: “Miyo ndili yodya yova-a ingumi. Mutu uliwethene unodha wamiyo kanodhakaana ndhala navang’onovene, thitho unororomela miyo kanodhakaana tona. 36 Mbwenye vale ndatouwandelani ira, angalive ira mutondiona, kamunondiroromela. 37 Mutu uliwethene unofuna dhandiva-a Baba unodhadha wa miyo, thitho unofuna udha wamiyo kandinodha m’tamangi-a. 38 Namwasa oi ndadhidhe khumela dhulu, dhairana vinofuna andirumile a-kala vinofuna miyo. 39 Ifunelo ya wenuo andirumile choi, kandiluze na m’mbo-ene mwa atu othene andiva-idhe liye, mbwenye ira ndidhaavenyathi-e vadambo lomari-a. 40 Vinofuna Babanga pyoi, mutu uliwethene orumela Mwana nom’roromela akaena ingumi yo-omala, thitho miyo ndinodham’venyathi-a vadambo lomari-a.”

41 Adhaire e-no Ayudao tatooroma ng’ung’uza namwasa oi liye atoonga ira: “Miyo ndili yodya yokhumela dhulu.” 42 Aliwa tatooroma onga ira: “N’nga wen’na kai Yesu mwana Yosefi oi babee na m’mee mbaaidhi i-yo ale? N’nga mwasiwa ngwan’ni unoonga ira, ‘Ndikhumile dhulu’?” 43 Voakhula Yesu aongile ira: “Mu-iye ng’ung’uza. 44 Kavali mutu unodha wa miyo Baba akonda am’dhana thitho miyo ndinodham’venyathi-a vadambo lomari-a. 45 Anamaongela tatoolemba mabukhuni ira: ‘Atu othene anodha funji-iwa na Yohova.’* Ee-no mutu uliwethene unovuruwana vinofunji-a Baba unodha wa miyo. 46 Kavali mutu uromile onavo Baba, khumi-avo wenuo ukhumile wa Nlungu, wenuo ngwaoni Baba. 47 Mwaimbarimbari ndinouwandelani ira, mutu uliwethene unororomela unodhakaana ingumi yo-omala.

48 “Miyo ndili yodya yova-a ingumi. 49 Anamabalinyu tatoodya mana kokolani mbwenye tatookwa. 50 Ila chodya yokhumela dhulu, yoi mutu uliwethene adye ira a-akwe. 51 Miyo ndili yodya yova-a ingumi yokhumela dhulu. Mutu adya yodya yei unodhakaana ingumi yo-omala. Thitho yodya inofuna miyo va-a atu vailambwila ira tadhakaena ingumi ndinokwangula.”

52 Adhamale Ayudao tatooroma runi-ana okha okha ira: “N’nga mutu wen’na unaode a-vi niva-a nokwee ira nidye?” 53 Ee-no Yesu atoawandela ira: “Mwaimbarimbari ndinouwandelani ira, mwakonda udya nokhu wa Mwana mutu noumwa sangiree, kamunodha kaana ingumi yo-omala. 54 Mutu uliwethene unodya nokwanga noumwa sangiranga, unodhakaana ingumi yo-omala, thitho ndinodham’venyathi-a vadambo lomari-a. 55 Namwasa oi nokwanga ndi yodya ya imbarimbari thitho sangiranga ndi yomwa ya imbarimbari. 56 Mutu uliwethene unodya nokwanga noumwa sangiranga, unokala ovwelana na miyo. 57 Baba wa ingumi ngundirumile miyo thitho miyo nditokaana ingumi namwasa wa Baba. Mofwanafwana na vyevi, mutu unodya nokwanga unodhakaana ingumi namwasa wa miyo. 58 Yei chodya yakhumele dhulu. Thitho cho-iyana na yadyide anamabalinyu mbwenye aliwa wukwa. Mutu uliwethene unodya yodya yei unodhakaana ingumi yo-omala.” 59 Yesu atoonga vyongo vyevi vahora yafunji-a liye musinagoga wu Kafarnau.

60 Anamafunjedhee anjinji tangavwide vyevyo, tatoonga ira: “Madhu enala mborucha. N’nga mbaani unofuna avwechecha?” 61 Mbwenye Yesu angaidhi ira anamafunjedhee anaang’ung’uza namwasa wa vyaongile liyevyo, atoafuka ira: “N’nga mutosukwala na madhu enala? 62 N’nga vinodhakala a-vi mwadhaona Mwana mutu awelelanga dhulu wali liye? 63 Zimu ngunova-a ingumi mbwenye nokhu kuna basa. Madhu auwandenleni miyo ala ndi zimu na ingumi. 64 Mbwenye vatokala atu enango mwa nyo anokonda a-roromela.” Romela vamaromelo Yesu anoidhiwa mutu akonda a-roromela thitho afuna dham’velela. 65 Liye atoodhowanave onga ira: “Ngumwasiwa ndatouwandelani ira, kavali mutu unodha wa miyo a-arumeli-iwe na Baba.”

66 Namwasa wa vyevyo, anamafunjedhee anjinji tatoom’iya nowelela wu vyongo vya-iidhe aliwa nduli thitho katawendileve vambo-i na liye . 67 Moi e-no Yesu atoafuka anamafunjedhee 12 ale ira: “N’nga nyo thitho munofuna mudhowenga?” 68 Simoni Pedru atoowakhula ira: “Mbwiye, ninadhowe wani? Nyo nguna madhu okami-a mutu ira adhakaena ingumi yo-omala.” 69 I-yo nitororomela thitho nitoidhiwa ira nyo muli ochena arumiwile na Nlungu.” 70 Yesu atoawandela ira: “Miyo ndatousakulani 12, kai e-no? Mbwenye m’mbo-i wa nyo ngunoongela afwee vyothakala.” 71 Simbwasimbwa aonga vya Yudasi mwana Simoni Iskariyoti, namwasa oi nguliye afuna dham’dhimbinuwela, angalive ira ali m’mbo-i mwa anamafunjedha 12 ale.

7 Vyevi vingamadhi Yesu atoodhowanave laba basalee mu Galileya. Liye kaafuna irana vyevi wu Yudeya namwasa oi Ayuda tafuna m’pha. 2 Mbwenye pwando la misasa la Ayuda lali lingakwivenle. 3 Moi e-no abalee tatoom’mwandela ira: “Mudhowe wu Yudeya ira anamafunjedhinyu thitho tamaone vinoira nyo. 4 Namwasa oi kavali mutu unoira vyongo mwasegeredo angalive ira unofuna idhiweya waatu. Akala nyo munoirana vyongo vyevi, muvioneeli-edhe vakwecha muilamboi.” 5 Abaleao katam’roromela. 6 Yesu atoawandela ira: “Horanga kinafiye, mbwenye wanyo hora iliyothene inokala yofwanelela. 7 Kavali mwasa oi ilambo iidane nanyo, mbwenye inoidanana miyo, namwasa oi ndinoirela umboni ira mabasiwa mbothakala. 8 Nyo muvenyathi mudhowe pwandoniwo. Miyo kandinodhowao chineneeva, namwasa oi horanga kinafiye.” 9 Angamadhi awandela vyevi, liye atoo-alela wu Galileya.

10 Mbwenye abaleao tangavenyathidhe nodhowanga pwandonio, liye thitho atoovenyathi. Liye kaadhowile mooneela, mbwenye mwasegeredo. 11 Moi e-no Ayuda tatooroma m’saka pwandonio. Aliwa taonga ira: “N’nga mutule uli wani?” 12 Thitho atu enango vari vamwinjivo, tanoonga vyongo vinjinji vyokhuza liye. Enango taonga ira: “Wen’ne ngumutu wapama.” Mbwenye enango taonga ira: “Khabe kai mutu wapama tai. Liye unaadimeli-a atu anjinji.” 13 Mbwenye kavali mutu aonga vakwecha vyokhuza liye namwasa oi taova Ayuda.

14 Pwandolo lingali vari, Yesu atoovolowa kachisini noroma funji-a. 15 Ayudao tatoodabwa nofuka ira: “N’nga mutula Malemba enala uwaidhi a-vi, voi liye kafunjile xikola?”* 16 Yesu atoawakhula ira: “Vyongo vinofunji-a miyo kai vyanga, mbwenye pya ule andirumile. 17 Akala mutu unofuna irana vinofuna Nlungu, unodha idhiwa akala vinofunji-a miyo vinokhumela wa Nlungu, venango ndinoonga vya muruni mwanga. 18 Unoonga vya mathuuleloni mwee unofuna ira adhititimi-enga ekhene. Mbwenye unofuna ira am’rumile atitimi-iwenga, wenuo ngwaimbarimbari thitho kanoira vyongo vyo-olongomana. 19 N’nga Mose kauva-idheni Ilamulo? Mbwenye kavali na m’mbo-ene wa nyo unovwela Ilamuloyo. N’nga mwasiwa ngwan’ni munofuna ndipha?” 20 Mwinji waatuo watoom’mwakhula ira: “We utokaana iwanda. N’nga mbaani unofuna upha?” 21 Yesu atoawakhula ira: “Ndiirile yongo imbo-i baa-i mbwenye nyo mwethene munaadabwa. 22 Vamwasa wen’na Mose atouva-ani lamulo loi muineliwenga. Kaiira ineliwao wakhumele wa Mose khabe, mbwenye wakhumele wa anamabala awale. Thitho munoinela atu vadambo la sabudu. 23 Akala munoinela mutu vadambo la sabudu ira mwa-apwanye Ilamulo ya Mose, n’nga mwasiwa ngwani munondithakaleliwana maningi viili-idhe miyo mutu vadambo la sabudu? 24 Kamutongenga atu namaoneelo aundhe baa-i, mbwenye mutongenga molongomana.”

25 Moi e-no atu enango amu Yerusalemu tatooroma onga ira: “N’nga mutu unofuna phiule kai wen’na? 26 Mbwenye kaonani! Liye unaaonga vakwecha thitho aliwa katinom’mwandela iliyothene. N’nga anamatongala tatosimikiza ira liye ngu Kristu? 27 I-yo nitoidhiwa unokhumela mutula. Mbwenye Kristu adhadha, kavali mutu unofuna dhaidhiwa ukhumenle liye.” 28 Vahora yafunji-a Yesu kachisinimo, atoonga mogweli-a madhu ira: “Nyo mutondiidhiwa thitho munoidhiwa unokhumela miyo. Miyo kandidhidhe mofuna wanga, mbwenye andirumile utokalao thitho nyo kamunom’mwidhiwa. 29 Miyo nditom’mwidhiwa namwasa oi miyo ndili namaimelelee. Liye ngwandirumile.” 30 Ee-no aliwa tatooroma sakasaka ndhila yoi tam’inde, mbwenye kataodile m’inda namwasa oi horee yali ya-anafiye. 31 Mbwenye atu anjinji tali vamwinjinivo tatoom’roromela thitho tanoonga ira: “N’nga Kristu adhadha, unodhaira vizindiyelo vyoinjiva kwaranya viirile mutu wen’na?”

32 Afarisi tatoovwa mwinji waatuo unong’onedhangana vyokhuza Yesu. Moi e-no andimuwa asembe na Afarisi tatooruma anamaing’anela a kachisi ira tamam’inde.* 33 Adhamale Yesu atoonga ira: “Ndinokalave na nyo wahora yoyeva nda-anadhowe wa liye andirumile. 34 Munodha ndisakasaka mbwenye kamunodha ndifwanya, thitho unofuna miyo dhowa nyo kamunooda fiyao.” 35 Ayudao tatooroma fukana ira: “N’nga mutula unofuna adhowe wani, oi i-yo kaninooda fiyao? N’nga venango unofuna adhowe wa Ayuda abalaleile vari va Agiriki ira amafunji-enga Agirikao? 36 N’nga unothapulela n’ni vanoonga liye ira, ‘Munodha ndisakasaka mbwenye kamunodha ndifwanya, thitho unofuna miyo dhowa nyo kamunooda fiyao?”

37 Vadambo lomari-a loi ndi dambo nlukhulu maningi la pwando, Yesu atooimela noonga mokhuwa ira: “Akala mutu mwinango utokaana tona, adhe wa miyo ira adhamwe ma-inje. 38 Movwelana na vinoonga lemba, mutu uliwethene unondiroromela, ‘Rimanimwee munodha khuma ma-inje aingumi yo-omala.’” 39 Veva Yesu aonga vya zimu wafuna dhawachela atu ororomeleya. Vahora yen’na atu tali ta-anawachele zimu namwasa oi Yesu ali a-anawachele titimi-olee. 40 Atu enango tali vagulonivo tangavwide madhu enala, tatooroma onga ira: “Mwaimbarimbari mutu wen’na ngu namaongela.” 41 Enango taonga ira: “Kristule ngwen’na.” Mbwenye enango taonga ira: “N’nga mu Galileya munooda khuma Kristu? 42 N’nga malemba katinoonga ira Kristu unodha khumela muziza la Davide nawu Betelehemu, isa yakalecha Davide?” 43 Moi e-no mwinji waatuo watoo-iyana mathuulelo vamwasa okhuza Yesu. 44 Atu enango mwaaliwa tafuna m’inda, mbwenye kavali aodile m’inda.

45 Mbwenye anamaing’anela kachisale tangawenleo andimuwa asembe na Afarisi tatoafuka ira: “N’nga mwasiwa ngwan’ni kamum’dhidhenee?” 46 Anamaing’anela kachisao tatoowakhula ira: “Kavali mutu aromile ongavo ninga liye.” 47 Moi e-no Afarisao tatoonga ira: “N’nga nanyoene thitho mutodimeli-iwa? 48 N’nga vatokala mbo-i mwaanamatonga venango Afarisi anom’roromela? 49 Mbwenye mwinji wethene waatu o-oidhiwa Ilamulula ngotembeleliwa.” 50 Nikodemu oi ndulimu atoodhowa wa Yesu, oi ali mbo-i mwa Afarisi, atoafuka ira: 51 “N’nga Ilamulo yi-u inotonga mutu a-anarome onga mathuulelwee na vinoira liye?” 52 Mbwenye aliwa tatoom’mwakhula ira: “N’nga we thitho ukhumele wu Galileya tai? Usake thitho kunofwanya vanoonga ira mu Galileya munodhakhuma namaongela.”

8 12 Adhamale Yesu atoaongana okoka ira: “Miyo ndili wala wa ilambo. Mutu uliwethene unofuna ndi-arela kanodha wenda isini, mbwenye unodha kaana wala wa ingumi yo-omala.” 13 Ee-no Afarisi tatoom’mwandela Yesu ira: “We unodhiirela wekhene umboni mbwenye umbonauo kai waimbarimbari.” 14 Yesu atoawakhula ira: “Angalive ira ndinodhiirela umboni ndekhene, umbonanga ngwaimbarimbari, namwasa oi ndinoidhiwa unokhumela miyo na unodhowa miyo. Mbwenye nyo kamunoidhiwa unokhumela miyo na unodhowa miyo. 15 Nyo munotonga movwelana na munooneela mutu, mbwenye miyo kandinotonga mutu uliwethene. 16 Miyo ndatonganga, ndinotonga molongomana, namwasa oi kandinotonga ndekhene mbwenye ndinotonga vambo-i na Baba andirumile. 17 Thitho muilamulo inyui tatoolembamo ira: ‘Umboni waatu ambili ngwaimbarimbari.’ 18 Miyo vandekhene ndinodhiirela umboni thitho Babanga undirumile unondiirela umboni.” 19 Moi e-no aliwa tatoom’fuka ira: “N’nga Baba uli wani?” Yesu atoawukhula ira: “Nyo kamunondiidhiwa thitho kamunom’mwidhiwa Babanga. Aakale ira mutondiidhiwa, Babanga thitho mwangam’mwidhi.” 20 Liye aonga madhu enala vyafunji-a liye kachisini valimburo lafwanyeya makaxa a vyovelela. Mbwenye kavali am’indile, namwasa oi horee yali ya-anakwakwane.

21 Ee-no liye atoawandela okoka ira: “Miyo ndinaadhowa thitho munodha ndisakasaka, mbwenye munodhakwa mungalive odawa. Thitho unodhowa miyo, nyo kamunaode fiyao.” 22 Moi e-no Ayudao tatooroma fukana ira: “N’nga unofuna adhiphe? N’nga mwasiwa ngwani unoonga ira, ‘Unodhowa miyo nyo kamunaode fiyao?’” 23 Liye atoodhowanave awandela ira: “Nyo muli availambo yavathi vano mbwenye miyo ndili okhumela dhulu. Nyo muli avathivano mbwenye miyo kandili wamwilambwila. 24 Ngumwasee nditouwandelani ira: Nyo munodhakwa mungalive odawa. Namwasa oi akala kamunororomela ira wam’dedi-edha nyoule ngumiyo, munodhakwa mungalive odawa.” 25 Ee-no aliwa tatooroma onga ira: “N’nga we uli ani?” Yesu atoawakhula ira: “N’nga ndinodhioni-edhan’ni nyarwa onganga na nyo? 26 Miyo nditokaana vyongo vinjinji ira ndionge vyokhuza nyo na vyongo vinango ira nditonge. Thitho andirumile unoonga vyaimbarimbari, moi vyavwide miyo wa liye pinoonga miyo mwiilamboi.” 27 Aliwa katazindiyenle ira liye aaongana vyokhuza Baba. 28 Moi ee-no Yesu atoonga ira: “Mwadham’thomeya Mwana mutu vaimurini, vevo munodha idhiwa ira wam’dedi-edhela nyoule ngumiyo. Thitho ira kandinoirana yongo iliyothene mothuulela ndekhene. Mbwenye vinoonga miyo vinokala vyovwelana na vyandifunji-idhe Baba. 29 Undirumiluo uli vambo-i na miyo. Liye kandi-iidhe ndekhene namwasa oi hora dhothene ndinoira vyongo vyom’sangalali-a.” 30 Vahora yaonga liye vyevi, atu anjinji tatooroma m’roromela.

31 Moi e-no Yesu atoodhowanave awandela Ayuda tam’roromelao ira: “Mwadhowanave vwela madhwanga, kuongela ira muli anamafunjedhanga. 32 Munodha idhiwa imbarimbari thitho imbarimbari inodha uthathulani.” 33 Aliwa tatoom’mwakhula ira: “I-yo nili a-ima a Abrahamu thitho kaninakalevo adhaari a mutu. N’nga mwasiwa ngwani unoonga ira, ‘Munodha thathuliwa’?” 34 Yesu atoawakhula ira: “Mwaimbarimbari ndinouwandelani ira, mutu uliwethene unoira yodawa, ndi dhaari wa yodawayo. 35 Thitho dhaari kanokala vandhe va patrawee modhowa nodhowa mbwenye mwana wa vevo ngunokalavo modhowa nodhowa. 36 Ee-no akala Mwana utouthathulani, munodha kaladi othathuwa. 37 Nditoidhiwa ira nyo muli a ziza la Abrahamu. Mbwenye munofuna ndipha namwasa oi kamunorumela vinofunji-a miyo. 38 Miyo ndinoonga vyaoni miyo vyali miyo na Babanga, mbwenye nyo munoira vyavwide nyo wa babinyu.” 39 Aliwa tatoom’mwakhula ira: “Babi-u ndi Abrahamu.” Yesu atoawandela ira: “Mwaakale a-ima a Abrahamu, mwangairile mabasa a Abrahamu. 40 Mbwenye va ee-ni munofuna ndipha mutu oi nditouwandelani imbarimbari yavwide miyo wa Nlungu. Abrahamu kaairile vyevi. 41 Nyo munoira mabasa a babinyu.” Aliwa tatoonga ira: “I-yo kanibaliwile namwasa wa mararuwo, Babi-u ngu m’mbo-i baa-i, Nlungu.”

42 Yesu atoawandela ira: “Aakale ira Nlungu ndi Babinyu, mwangandidhiveliwilena, namwasa oi miyo ndikhumile wa Nlungu thitho ndili vano. Kandadhidhe mofuna wanga mbwenye liye ngwandirumile. 43 N’nga mwasiwa ngwan’ni kamunovivwechecha vinoonga miyo? Namwasa oi kamunofuna vuruwana madhwanga. 44 Nyo muli okhumela wa babinyu Namanami-a, thitho munofuna irana vinofuna babinyu. Liye ngopha atu khumela vamaromelo thitho kaadhowilenave kala muimbarimbari, namwasa oi mwa liye kamuli imbarimbari. Aonganga vyonama unothonyi-edha moda uli liye, namwasa oi liye ngonama babee thitho ngonama. 45 Mbwenye voi miyo ndinouwandelani imbarimbari, nyo kamunondiroromela. 46 N’nga baani wa nyo unavelele umboni othonyi-edha ira nditoira yodawa? N’nga akala miyo ndinoonga vyaimbarimbari, mwasiwa ngwani kamunondiroromela? 47 Okhumela wa Nlungu anovuruwana madhu okhumela wa Nlungu. Mbwenye nyo kamunovuruwana namwasa oi kamukhumele wa Nlungu.”

48 Ayudao tatoom’mwakhula ira: “N’nga naonganga ira uli wau Samariya thitho utokaana iwanda ninaanama? 49 Yesu atoawakhula ira: “Miyo kandina iwanda thitho ndinolemeza Babanga, mbwenye nyo munaandinyoza. 50 Mbwenye miyo kandinofuna ira ndidhititimi-e ndekhene. Nlungu ngunofuna ira ndititimi-iwe thitho liye ngunamatonga. 51 Mwaimbarimbari ndinouwandelani ira, akala mutu unovwela madhwanga kanodhakwa navang’onovene.” 52 Ayudao tatoonga ira: “Va ee-ni nitoidhiwa ira utokaana iwanda. Abrahamu vambo-i na anamaongela tatookwa. Mbwenye we unoonga ira: ‘Akala mutu unovwela madhwanga kanodhakwa navang’onovene.’ 53 N’nga we uli ndimuwa kwaranya babi-u Abrahamu akwide? Anamaongela thitho tatookwa. N’nga we unodhiona ninga ani?” 54 Yesu atoowakhula ira: “Akala miyo ndinodhilemeza ndekhene, kuongela ira titimi-o langa to-okaana basa. Babanga unom’monga nyo ira ndi Nlungwinyuo, ngunondilemeza. 55 Nyo kamunom’mwidhiwa, mbwenye miyo nditom’mwidhiwa. Ndaonga ira kandinom’mwidhiwa, ndinokala mulimbo nama ninga nyo. Mbwenye mwaimbarimbari ndinom’mwidhiwa thitho ndinovwela madhwee. 56 Babinyu Abrahamu anoosangalala maningi namwasa oi anoodedi-edhela ona dambo lafuna miyo udha, moi atoolionadi thitho atoosangalala.” 57 Adhamale Ayudao tatoonga ira: “We kunakwakwani-e vyawa 50, n’nga unoonga ira watoom’mona Abrahamu?” 58 Yesu atoawandela ira: “Mwaimbarimbari ndinouwandelani ira, Abrahamu a-anakaleo, miyo ndatokalao wale.” 59 Moi e-no aliwa tatoododa mabwe ira tam’mponyedhe, mbwenye Yesu atoovithala nokhumamo kachisinimo.

9 Yesu awendanga atoona mutu abaliwile o-oona. 2 Anamafunjedhee tatoom’fuka ira: “Rabi, n’nga adawile mbaani ira mutula abaliwe o-oona? Nguliye venango anamabalee?” 3 Yesu atoawakhula ira: “Mutula venango anamabalee katidawile. Mbwenye vyevi vitoireya ira mabasa a Nlungu aoneele dhela mwa liye. 4 Ninofwanela laba mabasa andirumille Nlungu ungali nathana. Namwasa oi ma-iyu afiya mutu kanaode laba basa. 5 Vili miyo vailamboi, ndili wala wa ilambo.” 6 Angaongile vyevi, atoothurela mare vathi nomunya marogodo, adhamale atoo-ela marogodwao muthoni mwa mutuo. 7 Moi e-no atoom’mwandela ira: “Udhowe umasusule vatanda la Silowe” (dhina leli ninothapulela “Orumiwa”). Moi e-no mutuo atoodhowa masusula thitho atoowelao aonanga.

8 Moi ee-no atu owandamana naatu enango oi ndulimu tanoom’monecha avepanga tatooroma onga ira: “N’nga wen’na kai akhaathecha vathi vepavepangule?” 9 Atu enango tanoonga ira: “Ee ngwen’na.” Enango thitho tanoongecha ira: “Khabe, utelandana baa-i.” Mbwenye mwinyauo anoawandela ira: “Ee ngumiyo.” 10 Moi e-no tatoom’fuka ira: “N’nga methwaala adhuleile a-vi?” 11 Liye atoowakhula ira: “Mutu mwinango dhinalee Yesu atoomunya marogodo noa-ela muthoni mwangamu. Adhamale atoondiwandela ira, ‘Udhowe umasusule wu Silowe.’ Moi ndatoodhowa masusula thitho nditoroma ona.” 12 Angaongile vyevyo atwao tatoom’fuka ira: “N’nga mutuo uli wan’ni?” Liye atoonga ira: “Kandiidhi uli liye.”

13 Aliwa tatoom’tukhula mutu wen’na oi voroma ali o-oona nom’dhowana wa Afarisi. 14 Dambo lamunyile Yesu marogodo nodhula metho a mutuo lali Sabudu. 15 Vahora yeniyo Afarisi naaliwene tatooroma m’fuka mutule vya mwemo mwaromele liye ona. Liye atoonga ira: “Atoo-ela marogodo muthoni mwanga, moi ndatoodhowa masusula, ndidhamale ndatooroma ona.” 16 Moi e-no enango mwa Afarisao tatooroma onga ira: “Mutu wen’na kai okhumela wa Nlungu, namwasa oi kanalokota Sabudu.” Enango tanoonga ira: “N’nga mutu odawa unaire a-vi vizindiyelo ninga vyevi?” Ee-no atwao tatoo-iyana mathuulelo. 17 Afarisao tatoom’fuka okoka mutu ali o-oonule ira: “Voi liye utoudhula metho, n’nga unothuulela ira liye mbaani?” Mutuo atoawakhula ira: “Liye ngunamaongela.”

18 Mbwenye Ayudao kataroromela ira mutuo alidi o-oona, moi tatooitana anamabalee, 19 noafuka ira: “N’nga wen’na ngumwaninyu unom’mongecha nyo ira ngo-oona? N’nga viodeile a-vi ira arome ona?” 20 Anamabalao tatoowakhula ira: “Ninoidhiwa ira wen’na ngumwani-u abaliwile o-oona. 21 Mbwenye kaninoidhiwa ira viodeile a-vi ira arome ona. Kanim’mwidhi um’dhunle metho. Mum’fuke mwinyaula ngundimuwene wen’na unoongamo ekhene.” 22 Anamabaleao tatoonga vyevyi namwasa oi taova anamasogolela amareligiau Aiyuda. Namwasa oi aliwa tatoomala vwelana ira mutu arumela ira Yesu ndi Kristu, unokhumi-iwa musinagoga. 23 Ngumwasiwa anamabaleao tatoonga ira: “Ngundimuwene wen’na, mum’fuke mwinyaula.”

24 Ee-no aliwa tatoom’mwitana okoka mutu ali o-oonule nom’mwandela ira: “Ulemeze Nlungu, i-yo nitoidhiwa ira mutu wen’na ngodawa.” 25 Liye atoawakhula ira: “Vyoi mutu wen’na ngodawa, miyo kandiidhi. Yongo imbo-i inoidhiwa miyo choi voroma ndali o-oona mbwenye va-eni ndinaaona.” 26 Moi e-no aliwa tatoom’fuka ira: “N’nga uuwirilena n’ni ira adhule methwaa?” 27 Liye atoawakhula ira: “Nditomala uwandelani mbwenye nyo kamwavuruwana. N’nga munofuna muvwe n’ni thitho venango nanyeene thitho munofuna mukale anamafunjedhee?” 28 Angaongile vyevi, aliwa tatoom’nyoza noonga ira: “We nguli namafunjedha wa mutu wen’ne, mbwenye i-yo nili anamafunjedha a Mose. 29 Ninoidhiwa ira Nlungu atoonga na Mose, mbwenye vyamutula kaniidhi ira unokhumela wani.” 30 Mutuo atoawakhula ira: “Vyevi pyodabwi-a maningi mwaonganga ira kamuidhi ukhumele liye, mbwenye liye utondidhula metho. 31 Nitoidhiwa ira Nlungu kanovuruwana mutu odawa, mbwenye akala mutu unoova Nlungu noirana vinofuna liye, liye unom’vuruwana. 32 Romela walelene, kaninavwevo ira mutu utodhula metho amutu abaliwile o-oona. 33 Aakale ira mutu wen’na kakhumele wa Nlungu, kaaode irana yongo iliyothene.” 34 Vowakhula tatoom’mwandela ira: “We obaliwa muvyodawa vyokoka. N’nga unofuna unifunji-e?” Adhamale tatoom’khumi-a sinagogani!

35 Yesu atoovwa ira mutule tatom’khumi-a sinagogani. Thitho angam’gumanenee, atoom’fuka ira: “N’nga unororomela Mwana mutu?” 36 Mutuo atoom’mwakhula ira: “N’nga Mwana mutuo mbaani? Kandiwandeleni Mbwiye ira ndim’roromele.” 37 Yesu atoom’mwandela ira: “Utom’mona wale, thitho ngwen’na unom’mongana weula.” 38 Liye atoonga ira: “Nditouroromelani Mbwiye.” Adhamale atoom’kokorela. 39 Moi ee-no Yesu atoonga ira: “Ndidhidhe vailambwila dhatonga ira atu o-oona tarome ona thitho atu oona takale o-oona.” 40 Afarisi enango ali vevo tangavwide vyaonga Yesu, tatoom’fuka ira: “N’nga i-yo thitho nili o-oona?” 41 Yesu atoawandela ira: “Mwa-akale o-oona, kamwakaena yodawa. Mbwenye voi munoonga ira ‘Ninoona,’ Yodawa inyu kinodha leveleliwa.”

10 “Mwaimbarimbari ndinouwandelani ira, mutu unovolowa tangani mwa mabila moira volowelana valimburo n’nango a-kala valango, wenuo ngu mbavwa thitho owaka vyongo vyaatu enango. 2 Mbwenye unovolowana valango ngunamakumbiza wa mabilao. 3 Namaing’anela wa valango unom’dhulela thitho mabilao anovuruwana madhwee. Namakumbizuo unoaitana madhina noasogolela. 4 Akhumi-a mabila othenene vandhe, unoasogolela thitho mabilao anom’ara, namwasa oi anovwa madhwee. 5 Aliwa katino-ara lendo mbwenye anom’tawa, namwasa oi katiidhi madhu aalendo.” 6 Yesu atoawandela ifwanafwani-o yei, mbwenye aliwa katavwechechile thapulelawee.

7 Ee-no Yesu atoawandela thitho ira: “Mwaimbarimbari ndinoowandelani ira, miyo ndili lango wa tanga la mabila. 8 Atu othene adhidhe dhanama ira mbaanamakumbiza aimbarimbari, ndi mabavwa na owaka atu vyongo thitho mabila kataavwele. 9 Miyo ndili lango. Mutu unovolowana vali miyo unodha vulumuwa thitho unodha volowa nokhuma ira amasake tongwe. 10 Mbavwa unodha naifunelo yofuna dhaba, upha nononga. Mbwenye miyo ndidhidhe ira mabila adhakaena ingumi yo-omala. 11 Miyo ndili namakumbiza wapama. Namakumbiza wapama unovelela ingumiyee namwasa wa mabila. 12 Namalaba oi kai namakumbiza thitho mabila kai yee, aona mbulu adhanga uno-iya mabilao notawa. Moi e-no mbuluo uno-inda mabila nobalalei-a enango. 13 Unoira vyevi namwasa oi liye ngunamalaba thitho kanobala mabila. 14 Miyo ndili namakumbiza wapama. Ndinoidhiwa mabilanga thitho aliwa anondiidhiwa, 15 ninga mwemo muli aliwa na Baba oi unondiidhiwa miyo thitho ndhinom’mwidhiwa Baba. Ee-no ndinovelela ingumi yanga namwasa wa mabilao.

16 Nditokaana mabila enango oi katili tanganimu. Enao thitho ndinodha adhana thitho anodha vuruwana madhwanga. Anodhakala kumbi umbo-i thitho namakumbiziwa unodhakala mbo-i. 17 Baba unondidhiveliwana namwasa oi ndinovelela ingumi yanga ira ndimaiwachele okoka. 18 Kavali mutu unondiwaka ingumi yanga, mbwenye ndinoivelela mofuna wanga. Nditokaana kopolo yoivelela na kopolo yodhaiwachela okoka. Babanga ngwanditongile ira ndiirena vyevi.”

19 Veva thitho Ayuda tatoo-iyana mathuulelo namwasa wa madhu enala. 20 Anjinji mwa aliwa tanoonga ira: “Wen’na utokaana iwanda thitho ngunami-ala. N’nga mwasiwa ngwan’ni munom’vuruwana?” 21 Enango tatoonga ira: “Enala kai madhu a mutu wa iwanda. N’nga iwanda inooda dhula metho a mutu o-oona?”

22 Vahora yeniyo mu Yerusalemu mwatooireya pwando lodhulela kachisi wa Nlungu. Hora yen’na yali yodidila maningi 23 thitho Yesu ali awendanga kachisinimo valimburo laitaniwa khonde la Solomu. 24 Adhamale Ayuda tatoom’rungunuwa noroma m’fuka ira: “N’nga unodhowanave niruchi-a mathuulelo fiyedha e-lini? Akala uli Kristu, uniwandele mo-ovira khundu.” 25 Yesu atoawakhula ira: “Nditomala uwandelani wale, mbwenye nyo kamunororomela. Mabasa anoira miyo mudhina la Babanga, anondiirela umboni. 26 Mbwenye nyo kamunororomela namwasa oi kamuli mabilanga. 27 Mabilanga anovuruwana madhwanga. Miyo ndinoaidhiwa thitho mabilao anondi-arela. 28 Ndinodha ava-a ingumi yo-omala, aliwa katinodha nongiwa thitho kavali unofuna dhandiwaka mandhani mwanga. 29 Mabila andiva-idhe Babanga mbofuneya maningi kwaranya yongo iliyothene, thitho kavali unofuna m’mwaki-a Baba. 30 Miyo na Babanga nili ambo-ive.”*

31 Veva thitho Ayuda tatoododa okoka mabwe ira tam’ponyedhe. 32 Yesu atoawandela ira: “Nditouoni-ani mabasa manjinji apama okhumela wa Baba. N’nga munofuna ndiponyedha mabwe namwasa wa basa livi?” 33 Ayudao tatoom’mwakhula ira: “Kaninofuna uponyedha mabwe namwasa wa basa lapama, mbwenye namwasa oi unaam’nyoza Nlungu. We uli mutwene vyaa mbwenye unaadhifwanafwani-edha na Nlungu.” 34 Yesu atoafuka ira: “N’nga Muilamulo inyu kamulembiwile ira: ‘Miyo ndiongile ira: “Nyo muli alungu”’? 35 Akala ira atu aruni-iwile na madhu a Nlungu atooromoliwa ira “alungu.” 36 N’nga nyo munondiwandela miyo oi ndatoocheni-iwa na Babanga norumiwa udha vailamboi ira, ‘Unonyoza Nlungu,’ namwasa wa viongile miyo ira, ‘Ndili Mwana Nlungu’? 37 Akala kandinolaba mabasa a Babanga, kamundiroromele. 38 Mbwenye akala ndinoalaba masiki mwa-andiroromele, muroromele mabasao ira mudhowenave idhiwa ira miyo na Babanga nili ovwelana.” 39 Ee-no tatoowesedha okoka ira tam’inde, mbwenye liye atoazemba.

40 Liye atoovandela okoka Yordani nodhowa ulimburo wabadizela Juwau voroma thitho atookala weo. 41 Atu anjinji tatoodha wa liye noroma onga ira: “Juwau kairile izindiyelo iliyothene, mbwenye vyothene vyaongile liye vyokhuza mutula vyali vyaimbarimbari.” 42 Ee-no atu anjinji a weo tatoom’roromela.

11 Moi ee-no vatookala mutu mwinango abulela, dhinalee ali Lazaro. Liye ali wa isa ya Betaniya, waniwa Mariya na balee Marta. 2 Mariya wen’na ngwakhutulele makhura onukhela muruni mwa Mbwiye nopuputa manyalwee na sisilee. Thitho Lazaro abulelula ali balee. 3 Ee-no arongolee Lazaruo tatootumiza milanyu wa Yesu yoonga ira: “Mbwiye! Xamwalinyu unom’dhiveliwana nyo unaabulela.” 4 Mbwenye Yesu angavwide vyevyo atoonga ira: “Ifunelo ya urenduwo kai wukwa tai, mbwenye ira Nlungu atitimi-iwe thitho ira Mwana Nlungu alemeziwe dhela mu urenduwo.”

5 Yesu anom’dhiveliwana Marta, Mariya na Lazaro. 6 Mbwenye angavwide ira Lazaro unaabulela, atoomala thitho malambo menli angali wali liyeo. 7 Malambo menlao angamadhi, Yesu atoawandela anamafunjedhee ira: “Dhoweni niwelele okoka wu Yudeya.” 8 Anamafunjedhao tatoom’mwandela ira: “Rabi, Ayuda tafuna uponyedhani mabwe chineneeva, n’nga munofuna mudhoweo okoka? 9 Yesu atoawakhula ira: “N’nga nathana kali na mahora 12? Mutu awendanga nathana kanogwegweduwa, namwasa oi unoona njeza ya ilamboi. 10 Mbwenye mutu awendanga nama-iyu unogwegweduwa, namwasa oi mwa liye kamuli njeza.”

11 Angaongile vyevi, atoawandela anamafunjedheao ira: “Xamwali-u Lazaro unaagona, mbwenye ndinaa weu mam’venyathi-a.” 12 Vevo anamafunjedhao tatoonga ira: “Mbwiye, akala unaagona unokala pama.” 13 Veva Yesu athapulela ira Lazaro wutokwa. Mbwenye aliwa tathuulela ira aonga vyogona wene. 14 Adhamale Yesu atoawandela mo-ovira khundu ira: “Lazaro wutokwa, 15 thitho miyo ndinosangalala ira kandali weo, ira nyo muroromele. Mbwenye dhoweni weo.” 16 Ee-no Tomasi, oi aidhiweya thitho ira Didimo, atoowandela anamafunjedha afwee ira: “Dhoweni vambo-i, ira nimakwe na Yesu.”

17 Yesu angafiile weo, atoofwanya Lazaro angali masiyeni wa malambo manai. 18 Isa ya Betaniya yali vaduzi na Yerusalemu ulendo wa makilometru mararu. 19 Ayuda anjinji tatoodha wa Marta na Mariya dhaadidili-a rima namwasa wa wukwa wa rongoliwa. 20 Ee-no Marta angavwide ira Yesu unaaudha, atoodhowa mam’gumananee, mbwenye Mariya a-adhi mudhi. 21 Marta atoom’mwandela Yesu ira: “Mbwiye, mwa-akale uno rongolanga kaakwe. 22 Mbwenye e-ni ndinoidhiwa ira yongo iliyothene inavephe nyo Nlungu, liye unodha uva-ani.” 23 Yesu atoom’mwandela ira: “Rongolaa unovenyathi.” 24 Marta atoonga ira: “Nditoidhiwa ira unodha venyathi vovenyathi-iwa walimbo wukwa dambo lomari-a.” 25 Yesu atoom’mwandela ira: “Miyo ndili venyathi na ingumi. Mutu uliwethene unondiroromela, masiki akwe, unodha kaana okoka ingumi. 26 Thitho mutu uliwethene una ingumi unondiroromela kanodhakwa. N’nga unororomela vyevi?” 27 Liye atoowakhula ira: “Ee Mbwiye. Ndinororomela ira muli Kristu Mwana Nlungu wam’dedi-edhela atu ira unodhadha vailamboi.” 28 Angaongile vyevi, atoodhowa mam’mwitana balee Mariya nom’mwandela mwasegeredo ira: “Namafunji-a utodha thitho unaauitana.” 29 Mariya angavwide vyevo, atoovenyathi mombaranya nodhowa wali Yesu.

30 Vahora yen’na Yesu ali a-anafiye mudhimo. Liye ali wu limburo laguman’ne liye na Marta. 31 Ayuda oi tali vambo-i na Mariya m’mbamo tadidili-anga rima, tangaoni akhumelanga vandhe mombaranya, tatoom’arela. Aliwa tathuulela ira unodhowa manlanga masiyeni. 32 Mariya angafiile ulimburo wali Yesu nom’mona, atookokora vamanyaloni va Yesu nofii-a kovee vathi. Adhamale atoom’mwandela ira: “Mbwiye, mwaakale uno balanga kwaakwe.” 33 Yesu angam’moni Mariya vambo-i na Ayuda adhidhe na liye tanlanga, atoorucheya rimani nosukwala maningi. 34 Yesu atoofuka ira: “N’nga mum’lokotidhe wani?” Aliwa tatoowakhula ira: “Mbwiyeni dhoweni mumaone.” 35 Yesu atooroma ula. 36 Moi e-no Ayudao tatooroma onga ira: “Kaing’anani, anoom’dhiveliwanadi maningi!” 37 Mbwenye enango mwaaliwa atooroma onga ira: “Mutu wen’na atooda dhula metho a mutu o-oona. N’nga kaaode ira iliyothene ira fweula a-akwe?

38 Moi e-no Yesu angarucheile okoka rimani, atoofiya masiyenio. Mbwenye masiye enala ali phao, thitho afungiwile na libwe. 39 Yesu atoonga ira: “Khumi-anivo libweli.” Marta, rongiliye marafuluo atoom’mwandela Yesu ira: “Mbwiye, va ee-ni vinooneya ira utoroma nuka, namwasa oi penene ndi dambo lanenai angali masiyeni.” 40 Yesu atoom’mwandela ira: “N’nga kandauwandenle ira waroromela unodhaona titimi-o la Nlungu?” 41 Ee-no tatookhumi-avo libwelo. Adhamale Yesu atoing’ana dhulu noonga ira: “Baba, ndinousimbani ira mutondivuruwana. 42 Mwaimbarimbari, nditoidhiwa ira munondivuruwanecha hora dhothene, mbwenye ndinoonga vyevi namwasa wa mwinji waatu uimenle vanula, ira uroromele ira ngunyo mwandirumile.” 43 Angaongile vyevi, atookhuwa ira: “Lazaro, kakhuma!” 44 Mutu akwidule atookhuma. Manyalo na mandhee thitho kovee vyali vyopotiwa na nguwo. Moi e-no Yesu atoawandela ira: “Kam’thathuleni ira aode wenda.”

45 Ee-no Ayuda anjinji tadhidhe waniwa Mariya noona vyairile Yesuvyo, tatoom’roromela. 46 Mbwenye enango mwaaliwa tatoodhowa wa Afarisi maawandela vyairile Yesu. 47 Vidhaire e-no andimuwa a sembe na Afarisi tatoogumanyei-a anamatonga a Tribunale nlukhulu la Ayuda noonga ira: “N’nga niire a-vi veva? Namwasa oi mutula unaaira vizindiyelo vinjinji. 48 Nam’iya liye dhowanganave iranga vyevi, atu othene anodha m’roromela thitho Aroma anodhadha dhatukula limburo li-u na mbumbi-u.” 49 Mbwenye m’mbo-i mwaaliwa aitaniwa Kayafa oi ali ndimuwa wa asembe yawa yeyo, atoonga ira: “Kavali inoidhiwa nyo 50 thitho kamunoona ira pyokami-a ira mutu mbo-i akwele atu othene malo moi atu othene tanongiwe.” 51 Vyaongile liyevi, kaavithuulele ekhene, mbwenye namwasa oi liye ali ndimuwa wa asembe yawa yeyo, atoolanyedha ira Yesu unodha kwela mbumbiyo. 52 Thitho a-kala kwela mbumba baa-i, mbwenye ira agumanyei-e vambo-i a-ima a Nlungu amwadheile. 53 Thitho khumela vadambo lelo tatoovwelana ira tam’phe.

54 Ee-no, Yesu kaawendave mooneela wa Ayuda. Mbwenye atookhuma weo nodhowa tatamo n’nango lali vakwikwi na kokola, mu sidadi laitaniwa Efraimu. Thitho atookala weo vambo-i na anamafunjedhee. 55 Ee-no Paskwa ya Ayuda yali ingakwivenle thitho atu anjinji okhumela mamidhi tatoodhowa wu Yerusalemu Paskwa ya-anafiye, ira tamaire mwambo odhicheni-a. 56 Aliwa tanoom’saka Yesu thitho tanooimela valimburo limbo-i kachisinimo notapanyanga ira: “N’nga munothuule a-vi? N’nga liye kanadhao pwandoni uno?” 57 Mbwenye andimuwa a sembe na Afarisi tatootonga ira mutu uliwethene unaidhiwe uli Yesu, aonge ira aliwa tamam’inde.

12 Unga-adhi malambo 6 ira Paskwa iromeye, Yesu atoofiya wu Betaniya weo wali Lazaro, wam’venyathi-idhe liye muukwa. 2 Ee-no tatoapiyela yodya ya namaulo weo thitho Marta anowalabela. Mbwenye Lazaro ali mbo-i mwaatu adya vambo-i na Yesu. 3 Moi ee-no Mariya atootukula makhura onukhela. Makhurao ali nado o-othangani-ana yongo, apereso yavadhulu maningi, okwakwana magarama 327. Mariya atookhutulela makhurao manyalo a Yesu noapuputa manyalwao na sisilee. M’mba mwenthene mwemo mwanoonukhela pama namwasa wa makhurao. 4 Mbwenye Yudasi Iskariyoti, oi ali m’mbo-i mwa namafunjedhee a-adhi vang’ono ira am’velele atoonga ira: 5 “Mwasiwa ngwani makhura onukhelala katiguli-iwile na madenariyo* 300 noveleliwa waatu osauwa?” 6 Kai ira liye aongile vyevi namwasa oi anookhumbanyedha atu osauwa khabe, mbwenye namwasa oi liye ali mbavwa. Liye anoolokota kaxa la vyovelela thitho anooba kobiri dhaponyedhiwa kaxanimo. 7 Moi e-no Yesu atoawandela ira: “Kam’iyeni aire vyevi, vokozeela dambo lo-eliwa wanga masiyeni. 8 Nyo muli naatu osauwa hora dhothene, mbwenye kamunodha kalanga na miyo hora dhothene.”

9 Ee-no mwinji nlukhulu wa Ayuda watooidhiwa ira Yesu uli wu Betaniya. Ee-no watoofiya a-kala dham’mona Yesu baa-i, mbwenye thitho dham’mona Lazaro, wam’venyathi-idhe liye muukwa. 10 Moi e-no andimuwa a sembe tatoovwelana vyoi tam’phe okoka Lazaro, 11 namwasa oi Ayuda anjinji tanoodhowa weo nom’roromela Yesu namwasa wa Lazaro.

12 Bebeinimwee, mwinji nlukhulu waatu wadhidhe pwandonio watoovwa ira Yesu unaaudha wu Yerusalemuo. 13 Ee-no tatootukula tambi dha kanjeza nokhuma magumananee. Thitho tatooroma khuwa ira: “M’vulumucheni! Oraeli-iwa ngunodha mu dhina la Yohova,* oi ngu Mwene wa Isaraeli!” 14 Yesu angafwaidhe mwana buru, atoom’gwela movwelana na vinoonga malemba ira: 15 “Kuove mwana wa i-yana wa Zioni. Kaing’ana! Mwenaa unaaudha angagwenle vamwana buru wa lombwana.” 16 Voroma anamafunjedheao katavivwechechile vyevyo. Mbwenye Yesu angava-iwile titimi-o, aliwa tatoothuulela ira vyam’mwirela atwao vyali vyofwanafwana na vyalembiwile vyokhuza liye.

17 Moi ee-no atu anjinji alivo vahora yaitana liye Lazaro ira akhume masiyeni nom’venyathi-a, tatoodhowanave m’mwirela umboni. 18 Ngumwasee thitho atu anjinji tatoodhowa mam’gumananee, namwasa oi tatoovwa ira Yesu atoira izindiyelo yei. 19 Ee-no Afarisi tatooroma tapanya ira: “Munodhionela mwekhene ira kavali inoiravo i-yo. Kaonani! Atu othene anam’arela.”

20 Vari vaatu adhidhe dhalambela vapwandonivo vatookala thitho atu enango a Igiriki. 21 Aliwa tatoodhowa wa Filipi oi ali wau Betisaida isa ya Galileya, thitho tatooroma m’vepha ira: “Mbwiye, i-yo ninofuna nim’mone Yesu.” 22 Filipi atoodhowa mwam’mwandela Andreya vyevyo thitho ambilene tatoodhowa mwa’mwandela Yesu.

23 Mbwenye Yesu atoawakhula ira: “Hora yoi Mwana mutu alemeziwe itofiya. 24 Mwaimbarimbari ndinouwandelani ira, isimbeu ya tirigu ya-agwele vathi aliwa wukwa, inokalave imbo-i. Mbwenye yagwela vathi aliwa wukwa inova-a vyova-a vinjinji. 25 Mutu uliwethene unodhiveliwana ingumiyee unaainonga, mbwenye mutu uliwethene unoidanana ingumiyee muilambwila, unaaibarela ira adhakaena ingumi yo-omala. 26 Akala mutu unofuna ndilabela andi-arele thitho unofuna miyo makala, rumiwanga unodha kala thitho weo. Mutu uliwethene unondilabela, unodha lemeziwa na Babanga. 27 Ingumi yanga inaarucheya, n’nga ndionge n’ni? Baba mundivulumuche vahora yoruchila. Mbwenye hora yen’na inofwanela ndifiyela voi ndadhele vyevi. 28 Baba mulemeze dhina linyu.” Angaongile vyevi vatoovweya madhu khumela dhulu ira: “Nditolilemeza thitho ndinodha lilemeza okoka.”

29 Ee-no mwinji waatu waimenle vevo wangavwide vyevyo watooroma onga ira utogudha ndhari. Enango tanoonga ira: “Ngelo utom’monganee.” 30 Yesu atoawandela ira: “Madhu enala kativweile na mwasa wa miyo, mbwenye namwasa wa nyo. 31 Va ee-ni ilamboi inaatongiwa, mbwenye namatonga wa ilambwila unoponyedhiwa undhe chineneeva. 32 Mbwenye ndadha thomeiwa vaimurini, atu a mitundu yo-iyana-iyana ndinodha adhi-a wa miyo.” 33 Liye aonga vyevi vofuna oni-a moda wafuna liye wukwa vadhavira hora yoyeva. 34 Moi e-no mwinji waatuo watoom’mwakhula ira: “I-yo Muilamulo navwide ira Kristu unodha kalao modhowa nodhowa. N’nga mwasiwa ngwan’ni munoonga ira Mwana mutu unofwanela thomeiya vaimurini? N’nga Mwana mutu wenuo mbaani?” 35 Yesu atoawandela ira: “Njeza inokalave vari vinyu wa hora yoyeva. Muwendenga njeziyo ingalivo, ira isi ya-aufiyedheleni. Namwasa oi mutu uliwethene unowenda mu isi kanoidhiwa unodhowa liye. 36 Vanowenda nyo ungali njeza, muthonyi-edhe ira munororomela njeziyo, ira mukale a-ima a njeza.”

Yesu angamadhi onga vyevi, atookhumavo nodhowa mavithala. 37 Angalive ira liye atooira vizindiyelo vinjinji vari viwa, aliwa kataroromela, 38 moi madhu a namaongela Esaya atookwakwaneli-edhiwa. Liye aongile ira: “Yohova, n’nga baani uroromele vyongo vyavwide liye wa i-yo? N’nga dhandha la Yohova lioni-iwile ani?” 39 Mwasa unango waairi-idhe ira ta-aroromele ngwaongile namaongela Esaya ira: 40 “Utofunga methwiwa thitho utoumi-a mirimiwa ira ta-aone na methwiwa, ira mirimiwa ya-avwecheche vyongo nodhimbinuwa ira miyo ndaaili-e.” 41 Esaya atoonga vyevi namwasa oi atoona titimi-o la Kristu. 42 Mbwenye vatookala atu anjinji tam’mroromenle, thangani-avo anamatonga anjinji. Mbwenye kataonga vakwecha, namwasa oi taova ira Afarisi anoakhumi-a mu sinagoga. 43 Aliwa tanoodhiveliwana maningi titimi-o laatu kwaranya titimi-o la Nlungu.

44 Mbwenye Yesu atookhuwa ira: “Mutu uliwethene unondiroromela kanororomela miyo baa-i, mbwenye unororomela thitho undirumile. 45 Mutu uliwethene undioni utom’mona thitho andirumile. 46 Ndidhidhe ninga njeza muilambo, ira mutu uliwethene unondiroromela a-adhowenave kala isini. 47 Akala mutu utovwa madhwanga mbwenye aavwela, miyo kandinom’tonga namwasa oi kandadhele dhatonga ilambo, mbwenye dhaivulumucha. 48 Mutu uliwethene unondipwaza thitho a-arela madhwanga, tokala unofuna m’tonga. Madhu aongile miyo mbanofuna dham’tonga vadambo lomari-a. 49 Namwasa oi kandinaongevo vyamuruni mwanga, mbwenye Baba andirumile ngwandiva-idhe lamulo va vinofwanela miyo onga na vinofwanela miyo funji-a. 50 Thitho ndinoidhiwa ira lamulolee tokami-a atu dhakaana ingumi yo-omala. Ee-no vinoonga miyo, ndinovionga movwelana na vyandiwandenle Baba.”

13 Pwando la Paskwa la-anafiye, Yesu atooidhiwelatu ira horee yokhuma muilamboi dhowa wa Baba itokwakwana. Voi anoadhiveliwana maningi anamafunjedhee oi tali vailamboi, atoodhowanave adhiveliwana fiyedha komoni wa ingumiyee. 2 Vahora yadya aliwa yodya ya namaulo, Namanami-a ali angamadhi e-la wale mathuulelo ofuna m’velela Yesu rimani mwa Yudasi Isikarioti, mwana Simoni. 3 Yesu atoidhiwa ira Baba atoovelela vyongo vyothene mandhanimwee thitho ira adhidhe khumela wa Nlungu noira unodhowa wa Nlungu. 4 Ee-no va yodya ya namauloyo liye atooimela noungula nguwee yaundhe. Adhamale atootukala towaliya nolimanga yununimwee. 5 Adhaire e-no atoo-ela ma-inje basiyani noroma u-wa manyalo aanamafunjedhao noapuputa na towaliya yamangile liye yununinle. 6 Adhamale atoofiya vali Simoni Pedru. Mbwenye Pedru atoom’fuka Yesu ira: “Mbwiye, n’nga munofuna mu-uwe manyalwanga?” 7 Yesu atoom’mwakhula ira: “Vinoira miyovi va ee-ni kunooda vivwechecha, mbwenye unodha vivwechecha sogolou.” 8 Pedru atoonga ira: “Mwaimbarimbari, kandinourumeli-ani ira mu-uwe manyalwanga.” Yesu atoom’mwakhula ira: “Ndakonda a-uwa manyalwaa, kudedi-edhele yongo wa miyo.” 9 Simoni Pedru atoonga ira: “Mbwiye, kamundi-uwe manyalo baa-i, mbwenye mundi-uwe mandha na murwene.” 10 Yesu atoom’mwandela ira: “Mutu umadhi a-mba manungwee othene anokala ochena, mbwenye unofwanela u-wa manyalo baa-i. Thitho nyo muli ochena, mbwenye a-kala mwethene.” 11 Liye anom’mwidhiwa mutu afuna m’velela. Ngumwasee atoonga ira: “Kai mwethene muli ochena.”

12 Moi e-no adhamale u-wa manyalwiwa atoowara okoka kamizee yaundhile, nokaathi okoka vamezani. Moi e-no atoafuka ira: “N’nga mutoidhiwa mwasee u-uwele miyo manyalwinyu? 13 Nyo munondiromolecha ira: ‘Namafunji-a’ na ‘Mbwiye,’ pyaimbarimbaridi, namwasa oi ndili Namafunji-a na Mbwiye. 14 Ee-no akala miyo Mbwiye na Namafunji-a, ndito-uwa manyalwinyu, nyo thitho munofwanela u-wana manyalo. 15 Namwasa oi nditouva-ani ifwanafwani-o ira ninga mwemo muirele miyo wanyo, nyo thitho muirenga vimbo-ive. 16 Mwaimbarimbari ndinouwandelani ira, dhaari kanokwaranya patrawee, thitho mutu orumiwa kanokwaranya wenuo um’rumile. 17 Akala vyevi munoviidhiwa, munodha kala osangalala mwaviirangana. 18 Kandinoongana nyo mwethene, namwasa oi nditoaidhiwa aasakunle miyo. Mbwenye vyevi vitoireya ira likwakwaneli-edhiwe lemba linoonga ira: ‘Mutu adya yodya yanga, utovenyathi-a izondoye nondidhimbinuwela.’ 19 Romela va ee-ni dhowa sogolo, ndinovaelatu uwandelani vya-anaireye, ira vyadha ireya mudharoromele ira wam’dedi-dhela nyoule ngumiyo. 20 Mwaimbarimbari ndinouwandelani ira, mutu uliwethene uwachenle um’rumile miyo, uwachenle thitho miyo. Thitho mutu undiwachenle, uwachenle thitho andirumile.”

21 Angaongile vyevi, Yesu atoorucheya maningi rimanimwee, thitho atoirela umboni ira: “Mwaimbarimbari ndinouwandelani ira, m’mbo-i wa nyo unondivelela.” 22 Anamafunjedhao tatooroma ing’anana namwasa oi kataidhi ira aongana ani. 23 M’mbo-i mwa anamafunjedhao, oi Yesu anoom’dhiveliwana maningi, atookaathi vaduzi na Yesu. 24 Ee-no Simoni Pedru atoom’mwing’anechecha mutuo nom’mwandela ira: “Kaniwandele unom’mongana liye.” 25 Namafunjedha mwinanguo atoosamela vamirimani va Yesu nom’fuka ira: “Mbwiye, munoongana ani? 26 Yesu atoom’mwakhula ira: “Ngunofuna miyo m’va-a pau inofuna miyo vodhana paratonimu.” Ee-no angavodhi-idhe pawiyo, atoom’va-a Yudasi, mwana Simoni Isikarioti. 27 Yudasi angawachenle pawiyo, Satana atoovolowa mwa liye. Moi e-no Yesu atoom’mwandela ira: “Vyongo vimadhiwe saka-edha, uviire mombaranya.” 28 Mbwenye atu tali vamezanivo, katazindiyele ira mwasiwa ngwani atoom’mwandela vyevyo. 29 Voi Yudasi alokota kaxa la vyovelela, enango tathuulela ira Yesu am’wandela ira, “Ugule vyongo vyothene vyofuneela va pwando,” venango ira avelele vyongo vinango waatu osauwa. 30 Ee-no Yudasi angawachenle pawiyo, hora yeniyene atookhuma vandhe thitho ali nama-iyu.

31 Yudasi angakhumile Yesu atoonga ira: “Va e-ni Mwana mutu utolemeziwa, thitho Nlungu utolemeziwa dhela mwa liye. 32 Nlungu unom’lemeza thitho unoirana vyevi mombaranya. 33 Afwanga avarimani, ndinokala na nyo wa hora yoyeva. Va ee-ni ndinowandela nyo ira munodha ndisakasaka movwelana na vyaawandenle miyo Ayudale ira, ‘Unofuna miyo dhowa nyo kamunaoda fiyao.’ 34 Ndinouva-ani lamulo lipya, ira mudhivelengana. Mofwanafwana na mwaudhiveliwenani miyo, nyo thitho mudhivelengana e-no. 35 Atu othene anodha idhiwa ira muli anamafunjedhanga mwadhivelangana.”

36 Simoni Pedru atoom’fuka ira: “Mbwiye, n’nga munaa wani?” Yesu atoowakhula ira: “Unodhowa miyo kunaode ndi-ara va-eni, mbwenye unodha ndi-ara sogolou.” 37 Pedru atoom’fuka okoka ira: “Mbwiye, n’nga mwasiwa ngwani kandinooda u-arani va-eni? Ndinodha velela ingumi yanga namwasa wa nyo.” 38 Yesu atoowakhula ira: “N’nga unodha velela ingumiyaa namwasa wa miyo? Mwaimbarimbari ndinouwandela ira, thumbi a-anale unodha ndikonda fendo taaru.”

14 “Miriminyu kirucheye. Mum’roromele Nlungu thitho mundiroromele miyo. 2 M’mba mwa Babanga mutokala limburo linjinji. A-kale ira kamuli limburo ndingauwandenleni, ngumwasiwa ndinaadhowa mausaka-edhelani limburo. 3 Miyo ndadhowa mausaka-edhelani limburo ndinowela okoka dhautukulani, ira weo unamakale miyo nyo thitho mumakalenga weo. 4 Thitho unodhowa miyo, ndhilee mutoiidhiwa.”

5 Tomasi atoofuka ira: “Mbwiye, i-yo kaninoidhiwa unodhowa nyo, n’nga ndhilee ninaiidhiwe a-vi?”

6 Yesu atoom’mwandela ira: “Miyo ndili ndhila, imbarimbari na ingumi. Kavali mutu unofiya wa Baba a-kala dhela mwa miyo. 7 Aakale ira mutondiidhiwa, mwangam’mwidhi thitho Babanga. Mbwenye romela va ee-ni nyo mutom’mwidhiwa thitho mutom’mona wale.”

8 Filipi atoonga ira: “Mbwiye, munioni-e Babuo mwaira e-no vinokwakwana.”

9 Yesu atoom’mwandela ira: “N’nga we Filipi kunandiidhiweve angalive ira vatovira hora yolapela ndingali nanyo? Mutu uoni miyo utom’mona thitho Baba. N’nga mwasiwa ngwan’ni unoonga ira, ‘Munioni-e Baba’? 10 N’nga kunororomela ira Baba na miyo nili ovwelana? Vyongo vinouwandela miyovi kai vyamuruni mwanga, mbwenye Baba oi ngovwelana na miyo ngunolaba mabasee dhela mwa miyo. 11 Uroromele viongile miyo ira miyo na Baba nili ovwelana, venango uroromele mabasala baa-i. 12 Mwaibarimbari ndinouwandelani ira, mutu uliwethene unondiroromela na liyene unodhaira mabasa anoira miyo thitho unodha ira mabasa malukhulu kwaranya enala, namwasa oi miyo ndinodhowa wa Baba. 13 Thitho yongo iliyothene inofunanyo vepha mudhina langa, miyo ndinodha iirana ira Baba alemeziwe dhela mwa Mwanee. 14 Yongo iliyothene inavephenyo mudhina langa, miyo ndinodha iirana.

15 “Akala munondidhiveliwana, munodha-arela malamulwanga. 16 Miyo ndinodha m’vepha Babanga thitho unodha uva-ani namakami-a mwinango ira akale nanyo modhowa nodhowa. 17 Namakami-a wenuo ngu zimu ochena waimbarimbari oi ilambo kinauwachela, namwasa oi kinauona venango uidhiwa. Nyo munouidhiwa namwasa oi unokalecha mwanyo thitho uli mwanyo. 18 Kandinou-iyani mwekhene. Mbwenye ndinodhadha wanyo. 19 U-adhi isihora yoyeva thitho ilambo kinodha ndionave. Mbwenye nyo munodha ndiona namwasa oi ndili waingumi nyo thitho munodhakala aingumi. 20 Vadambo lelo munodha idhiwa ira miyo na Baba nili ovwelana thitho nyo namiyo nili ovwelana. 21 Mutu uliwethene unovwela malamulwanga noa-arela, ngwenuo unondidhiveliwana. Mbwenye mutu unondidhiveliwana, Babanga thitho unodha m’dhiveliwana. Miyo thitho ndinodha m’dhiveliwana nodhioni-a vakwecha wa liye.”

22 Yudasi mwinango a-kala Isikarioti, atoom’fuka ira: “Mbwiye, n’nga mwasiwa ngwan’ni munofuna mudhioni-e vakwecha wa i-yo a-kala wuilamboi?”

23 Yesu atoom’mwakhula ira: “Akala mutu unondidhiveliwana, unodha-arela madhwanga. Babanga unodha m’dhiveliwana thitho ninodha dhowa makalanga na liye. 24 Mutu unokonda a-ndidhiveliwana kano-arela madhwanga, thitho madhu anovwa nyoala kai anga mbwenye mba Babanga andirumile.

25 “Nditouwandelani vyevi vili miyo vambo-i na nyo. 26 Mbwenye namakami-a oi ngu zimu ochena unofuna dhatumiza Babanga mudhina langa, unodha ufunji-ani nouthuuchani vyongo vyothene vyauwandenleni miyo. 27 Ndinou-iyedhelani rendele nouva-ani rendelanga. Rendele unouva-ani miyo ngo-iyana na rendele unovelela ilamboi. Miriminyu kirucheye venango ova. 28 Mutovwa viuwandenleni miyo ira, ‘Ndinaadhowa thitho ndinodha welela okoka wanyo.’ A-kale ira munondidhiveliwana, mungasangalalile uvwa ira ndinaadhowa uli Babanga, namwasa oi Baba ngundimuwa kwaranya miyo. 29 Ee-no nditouwandelani vyongo vya-anaireye, ira vyadhaireya mudharoromele. 30 Kandinouwandelani vyongo vinjinji namwasa oi namatonga wa ilambwila unaaudha thitho liye kana kopolo va miyo. 31 Ira ilambo iidhiwe ira ndinodhiveliwana Baba, ndinoira vyongo movwelana na vyandiwandenle Babuo. Venyathini dhoweni nikhumeo uno.”

15 “Miyo ndili muri waimbarimbari wa mauva mbwenye Babanga ngu namalima. 2 Liye unogwanda tambi iliyothene mwa miyo yo-ova-a vyova-a thitho tambi iliyothene yova-a vyova-a unoisamalela voisazulela ira iva-e vyova-a vinjinji. 3 Nyo mutomala chena namwasa wa madhu auwandenleni miyo. 4 Mukale ovwelana na miyo thitho miyo ndinokala ovwelana na nyo. Mofwanafwana na tambi iliyothene yoi kinooda va-a vyova-a akala kili yo-indana na muri wa mauvuo, nyo thitho kamunaode va-a vyova-a akala kamuli o-indana na miyo. 5 Miyo ndili muri wa mauva nyo muli tambidhee. Mutu uliwethene o-indana na miyo miyo thitho kala o-indana naliye, unova-a vyova-a vyoinjiva namwasa oi kamunaode irana yongo iliyothene vo-okami-iwa na miyo. 6 Akala mutu kanodhowanave kala o-indana na miyo, unoponyedhiwa undhe ninga tambi amala yongouma. Atu anogumanya tambidho nodhiponyedha vamuloni thitho dhinovya. 7 Mwadhowanave kala ovwelana na miyo na madhwanga kalave mwanyo, munooda vepha yongo iliyothene inofunanyo thitho inodha ireya wanyo. 8 Baba unolemeziwa mwadhowanave va-a vyova-a vinjinji thitho mwathonyi-edha ira muli anamafunjedhanga. 9 Mofwanafwana na Babanga oi unondidhiveliwana, miyo thitho ndinoudhiveliwanani. Ee-no mudhowenave irana vyongo vinairi-e ira ndidhowenave udhiveliwanani. 10 Mwa-arelanga malamulwanga munodha iri-a ira hora dhothene ndoudhiveliwenganani, mofwanafwana na miyo oi ndino-arela malamulo a Babanga noiri-a ira hora dhothene andidhiveliwengana.

11 “Nditouwandelani vyongo vyevi ira mukale osangalala ninga munosangalalela miyo thitho ira sangalala winyuo uwenjedheleye maningi. 12 Ndinoutongani ira mudhivelengana mofwanafwana na mwemo munoudhiveliwanani miyo. 13 Kavali mutu una udhivela ulukhulu kwaranya wa mutu uvelenle ingumiyee namwasa wa axamwalee. 14 Mwairana vyongo vinoutongani miyo, munokala axamwalanga. 15 Kandinouromolani thitho ira adhaari namwasa oi dhaari kanoidhiwa vinoira patarawee. Mbwenye ndinouromolani ira axamwalanga, namwasa oi nditouwandelani vyongo vyothene vyavwide miyo wa Babanga. 16 Kai nyo mwandisakunle, mbwenye miyo ndatousakulani ira mudhowenave va-a vyova-a vyoinjiva, thitho ira vyova-a vinyuvyo vya-amale, ira yongo iliyothene inavephe nyo Baba mudhina langa auva-eni.

17 “Ndinoutongani vyongo vyevi ira mudhivelengana. 18 Akala ilambo inouidani, muthuulelenga ira yaromile idanana miyo ya-anaidane na nyo. 19 Mwa-akale ikhundu ya ilambo ilambo yangaudhiveliwenganani. Voi kamuli ikhundu ya ilambo, thitho miyo ndausakunleni khumela vailambo, ngumwasiwa ilambo inouidani. 20 Muthuulelenga madhu auwandenleni miyoale ira: Dhaari kanokala ndimuwa kwaranya patarawee. Akala tatoondi-ara-ara, nyo thitho anodha wu-ara-arani. Akala tato-arela madhwanga, anodha-arela thitho madhwinyu. 21 Mbwenye anodha uwirelani vyothene vyevi namwasa wa dhina langa, namwasa oi katim’mwidhi andirumile. 22 Nda-akhonde a-dha dhaaongana, aliwa katakaena yodawa. Mbweye va e-ni aliwa katina mwasa urunela vyodawa viwa. 23 Mutu uliwethene unoidana na miyo unoidana thitho na Babanga. 24 A-kale ira kationi mabasa airile miyo vari viwa oi mutu mwinango kanaairevo, tangakanle o-odawa. Mbwenye va ee-ni aliwa atondiona nondiidanana thitho idanana Babanga. 25 Vyevi vitoireya ira madhu alembiwile mu Ilamulo akwakwaneli-edhiwe. Madhwee mboi: ‘Atoondiidanana vo-okala mwasa.’ 26 Adhafiya namakami-a unofuna miyo dhautumizelani khumela wa Baba, oi ngu zimu waimbarimbari okhumela wa Baba, wenuo unodha ndiirela umboni, 27 nyo thitho munodha ndiirela umboni, namwasa oi mukanle na miyo khumela voroma.

16 “Nditouwandelani vyongo vyevi ira iroromelo inyu ya-afooke. 2 Atu anodha ukhumi-ani masinagoga. Mwaimbarimbari inodhafiya hora yoi mutu uliwethene unofuna dhauphani unodhathuulela ira utolaba urumiwi opambuleya wa Nlungu. 3 Mbwenye anodha irana vyevi namwasa oi katinondiidhiwa thitho katinom’mwidhiwa Baba. 4 Mbwenye nditouwandelani vyongo vyevi, ira hora yoi viireeye yadhafiya, mudhathuulele ira ndatoouwandelani.

“Vyongo vyevi kandauwandenleni va maromelo namwasa oi ndali vambo-i na nyo. 5 Va-eni ndinodhowa wa wenuo andirumile, mbwenye kavali uliwethene wa nyo unondifuka ira, ‘N’nga munodhowa wani?’ 6 Mbwenye namwasa oi nditouwandelani vyongo vyevi, mutosukwala maningi mirimani mwinyu. 7 Onga mwaimbarimbari, ndinodhowa ira nyo muganyali. Namwasa oi nda-adhowe, namakami-ule kanodha wa nyo. Mbwenye ndadhowa ndinamam’tumize wa nyo. 8 Thitho aliwa wadhadha unodhavelela umboni wu ilamboi okhuza vyodawa, longomano na utongi wa Nlungu. 9 Yoroma unodhavelela umboni okhuza vyodawa, namwasa oi aliwa katinondiroromela. 10 Wadhamala unodhavelela umboni okhuza longomano, namwasa oi miyo ndinaadhowa wa Baba thitho kamunodha ndionave. 11 Vomari-a unodhavelela umboni okhuza utongi wa Nlungu, namwasa oi namatonga wa ilambwila utomala tongiwa wale.

12 “Nditokaanave vyongo vinjinji vyoi ndiuwandeleni, mbwenye va e-ni kamunooda vivwechecha vyothene vyevyo. 13 Mbwenye namakami-uo adhadha oi ngu zimu waimbarimbari, unodhausogolelani mwiimbarimbari yothene. Namwasa oi kanodhaonga vinofuna liye thuulela vaekhene, mbwenye unodhaonga vivwide liye nouidhiwi-ani vyongo vinofuna dhaireya. 14 Liye unodha ndilemeza, namwasa oi unodha uidhiwi-ani vyongo vyavwide liye wa miyo. 15 Vyongo vyothene vina Baba pyanga. Ngumwasee ndinouwandelani ira namakami-uo unodha uidhiwi-ani vyongo vivwide liye wa miyo. 16 Wahora yoyeva kamunodha ndionave, thitho wahora yoyeva munodha ndiona.”

17 Angaongile vyevi, anamafunjedhee enango tatooroma fukana ira: “N’nga unothapulelan’ni vanoniwandela liye ira, ‘Wahora yoyeva kamunodha ndionave mbwenye wahora yoyeva munodha ndiona,’ thitho ira, ‘ndinodhowa wa Babaa’?” 18 Aliwa taonga ira: “N’nga unothapulelan’ni vanoonga liye ira, ‘wahora yoyeva’? Kaninoviidhiwa vinoonga liye.” 19 Yesu atooidhiwa ira anofuna m’fuka, e-no atoafuka ira: “N’nga munofukana viongile miyovi ira: ‘Wahora yoyeva kamunodha ndiona, thitho ira wahora yoyeva munodha ndiona?’ 20 Mwaimbarimbari ndinouwandelani ira, munodhanla no dumbela mbwenye ilambo inodha sangalala. Munodha sukwala, mbwenye sukwala winyu unodha chinjeya kala sangalala. 21 I-yana abalanga unovwa upha maningi namwasa oi horee itofiya. Mbwenye mwana abaliwa unodiwala upha othene weule namwasa oi unosangalala ira mwana utobaliwa vailambo. 22 Saasawa thitho na nyo, va e-ni muli osukwala. Mbwenye mwadhandiona okoka miriminyu thitho inodha sangalala. Kavali unofuna dhamari-a sangalala winyu. 23 Vadambo lelo kamunodha ndifukave vyofuka. Mwaimbarimbari ndinouwandelani ira, mwadhavepa yongo iliyothene wa Baba mudhina langa, liye unodhauva-ani. 24 Fiyedha va e-ni kamunavepevo yongo iliyothene mudhina langa. Muvephe thitho munodhava-iwa ira musangalale maningi.

25 “Nditouonganani vyevi dhela muvifwanafwani-o. Hora inodhafiya yoi kandinodha uonganani okoka vo-indi-edha basa vifwanafwani-o, mbwenye ndinodha uwandelani vya Baba movweya pama. 26 Vadambo lelo munodhavepha yongo wa Baba mudhina langa. Mbwenye kandinothapulela ira miyo ndinodha uvephelani khabe. 27 Babuo unoudhiveliwanani namwasa oi munondidhiveliwana thitho mutondiroromela ira miyo ndadhidhe ninga namaimelela wa Nlungu. 28 Ndadhidhe va ilamboi ninga namaimelela wokhumela wa Baba. Va e-ni ndinaakhuma va ilamboi thitho ndinodhowa wa Baba.”

29 Anamafunjedheao tatoonga ira: “Mbwiye va-eni ninovwechecha vinoonga nyo namwasa oi kamuno-indi-edha basa vifwanafwani-o. 30 Va-eni nitoidhiwa ira nyo mutoidhiwa vyongo vyothene thitho kavanofuneelave mutu ira aufukeni vyofuka. Vamwasa wen’na ninororomela ira nyo mwakhumele wa Nlungu.” 31 Yesu atoawakhula ira: “N’nga va e-ni mutororomela? 32 Mwaimbarimbari ndinouwandelani ira, inodhafiya hora thitho njen’na, yoi mwethene munobalaleya, uliwethene dhowa nyumbaniwee nondi-iya ndekhene. Mbwenye kandinodhakala ndekhene, namwasa oi Baba uli namiyo. 33 Miyo nditouwandelani vyevi ira mukale mwarendele namwasa wa miyo. Muilambonimu munogumanana nyarwa dhilukhulu, mbwenye mulimbe rima! Miyo nditoigonji-a ilambo.”

17 Yesu angaongile vyongo vyevi, atooing’ana dhulu noonga ira: “Baba, hora itofiya. Mulemeze mwaninyu, ira mwaninyu aulemezeni. 2 Nyo mutom’va-a Mwaninyu utongi vaatu othene ira atu am’va-idhe nyo, liye aava-e ingumi yo-omala. 3 Ingumi yo-omala tanodha ikaana tafunjedha noidhiwa vya nyo Nlungu m’mbo-i baa-i uli waimbarimbari, na vya Yesu Kristu, wam’rumile nyo. 4 Nditoulemezani vailambo yavathi, na mwasa oi nditomari-a laba basa landiva-idhe nyo. 5 Moi e-no Baba, mundirumeli-e ira ndikale vakhundu vinyu thitho mundiva-e titimi-o lana miyo vakhundu vinyu ilambo ya-ana panduchiwe.

6 Atu aatukunle nyo muilambo nondiva-a, miyo nditoaidhiwi-a dhina linyu. Ali inyu, mbwenye mutondiva-a thitho aliwa atovwela madhwinyu. 7 Va e-ni atoidhiwa ira vyongo vyothene vyandiva-idhe nyo pyokhumela wa nyo, 8 namwasa oi nditoawandela madhu andiwandenle nyo. Aliwa atoarumela thitho atoidhiwa ira miyo dhadhidhe ninga namaimelelinyu nororomela ira nyo ngwandirumele. 9 Ee-no ndinoalobelela. Kai ira ndinolobelela ilambo khabe, mbwenye ndinolobelela atu andiva-idhe nyo, namwasa oi mbinyu. 10 Vyongo vyothene vina miyo pinyu thitho vyongo vinyu vyothene pyanga. Miyo nditolemeziwa vari vaatu andiva-idhe nyo.

11 “Miyo ndinaakhuma vailamboi thitho ndinodha wa nyo, mbwenye aliwa ano-ala vailamboi. Baba Ochena, mwaaing’anele namwasa wa dhina linyu lindiva-idhe nyo, ira takale ovwelana ninga i-yo nili ovwelana. 12 Vahora yali miyo vambo-i na aliwa, ndatoaing’anela na mwasa wadhina linyu lindiva-idhe nyo. Miyo nditoavunela moi kavali uliwethene wa aliwa unongeile khumi-avo unofuna dhanongiwa, ira lemba likwakwaneli-edhiwe. 13 Mbwenye va e-ni ndinodha wa nyo, thitho ndinouwandelani vyevi ndingali vailamboi ira aliwa tasangalale maningi ninga musangalalile miyo. 14 Nditoawandela madhwinyu, mbwenye ilambo inoaidanana namwasa oi katili ikhundu ya ilambo, mofwanafwana na miyo oi kandili ikhundu ya ilambo.

15 “Kandinovepha ira mwaakhumi-e vailamboi khabe, mbwenye ira mwaavunele wa wothakaluo. 16 Aliwa katili ikhundu ya ilambo, mofwanafwana na miyo thitho oi kandili ikhundu ya ilambo. 17 Mwaacheni-e vo-indi-edha basa imbarimbari. Madhwinyu ndi imbarimbari. 18 Nyo mwatoondiruma udha vailamboi. Mofwanafwana na vyevi, miyo thitho nditoaruma vailamboi. 19 Miyo ndinaadhicheni-a namwasa wa aliwa, ira aliwa thitho tacheni-iwe na imbarimbari.

20 “Kandinolobelela ala baa-i, mbwenye ndinolobelela thitho anondiroromela tangavwide vyafunji-idhe aliwa. 21 Ndinoira vyevi ira othene enala takale ovwelana ninga nyo Baba na miyo nili ovwelana, ira aliwa thitho takale ovwelana na i-yo naifunelo yoi ilambo iroromele ira nyo mwatoondiruma. 22 Nditoatitimi-a ninga mwandititimi-idhe nyo, ira aliwa takale ovwelana ninga muli i-yo ovwelana. 23 Miyo ndikale ovwelana na aliwa, nyo mukale ovwelana na miyo, ira aliwa tavwelane mwaimbarimbari, ira ilambo iidhiwe ira mwatoondiruma thitho ira munoadhiveliwana ninga munondidhiveliwana nyo. 24 Baba, miyo ndinofuna ira atu andiva-idhe nyoala tadhakale vambo-i na miyo unofuna miyo dhakala, ira tadhaone titimi-o langa lindiva-idhe nyo, namwasa oi mwatoondidhiveliwana mwa-anakaathei-e ilambo. 25 Baba olongomana, mwaimbarimbari ilambo kainouidhiwani, mbwenye miyo ndinouidhiwani thitho ala atoidhiwa ira ngunyo mwandirumile. 26 Miyo nditoiri-a ira aliwa taidhiwe dhina linyu thitho ndinodha dhowanave aidhiwi-a dhinalo ira aliwa thitho taoni-engana udhivela ninga wandioni-idhe nyo, ira miyo ndikale ovwelana na aliwa.”

18 Angamadhi onga vyongo vyevi, Yesu atoovenyathi vambo-i na anamafunjedhee novandela dimba la Sidroni dhowa wali munda. Liye na anamafunjedhee tatoofiya mundanimo. 2 Yudasi Am’velenle Yesule, anooliidhiwa thitho limburolo namwasa oi hora dhinjinji Yesu anoagumanana anamafunjedhee weo. 3 Ee-no Yudasi atootukula gulu la anyakhondo na magwarda okhumela wa andimuwa asembe na wa Afarisi. Aliwa tatoofiya weo tangatukunle vyomoneyana, nyale na viphano. 4 Voi Yesu anooidhiwa vyafuna m’mwireela, atoakwivela noafuka ira: “N’nga munosakaan’ni?” 5 Aliwa tatoom’mwakhula ira: “Yesu wau Nazareti.” Moi e-no liye atoawakhula ira: “Ngumiyo.” Mbwenye Yudasi am’velenlule, thitho ali vevo.

6 Mbwenye vyaawandenle liye ira: “Ngumiyo,” aliwa tatoowelela nduli nougwa. 7 Adhamale atoafuka okoka ira: “N’nga munosakaan’ni?” Aliwa tatoonga ira: “Yesu wau Nazareti.” 8 Yesu atoonga ira: “Nditouwandelani ira ngumiyo. Ee-no akala munosaka miyo, mwaa-iyachi ala tadhowenga.” 9 Vyevi vyatooireya ira akwakwaneli-edhiwe madhu anoonga ira: “Vaatu othene andiva-idhe nyo, kavali adimenle.”

10 Adhamale Simoni Pedru oi ana sarasada, atoolitholola nogwandana libaru la ono odyana la dhaari wa ndimuwa wa sembe. Dhaaruo dhinalee ali Maliko. 11 Mbwenye Yesu atoom’mwandela Pedru ira: “Weli-edha sarasadalaa limburonimwee. N’nga kandinofwanela mwela kopo lindiva-idhe Babanga?”

12 Adhamale anyakhondwale, ndimuwa wa anyakhodo na magwarda a Ayuda tatoom’inda Yesu nom’manga. 13 Voroma tatoom’dhowana wa Anasi, namwasa oi ali sezelee Kayafa, oi ali ndimuwa wa asembe yawa yeyo. 14 Kayafa wen’na ngwaawandenle Ayudale ira vyali vyokami-a wa aliwa ira mutu mbo-i akwele atu othene.

15 Moi e-no Simoni Pedru na namafunjedha mwinango, tanoom’arela Yesu. Namafunjedha mwinanguo atooidhiwana na ndimuwa wa asembe, ee-no tatoofiya vambo-i na Yesu vaindharoni va nyumba ya ndimuwa wa asembe. 16 Mbwenye Pedru atooimela undhe valango. Ee-no namafunjedha oi atooidhiwana na ndimuwa wa asembule, atoodhowa maongana gwarda wa valango, adhamale atoom’volocha Pedru. 17 Sikana mwinango oi ali gwarda wa valangovo atoom’fuka Pedru ira: “N’nga we khuli mbo-i wa anamafunjedha a mutu wen’na?” Liye atoowakhula ira: “Khabe kai miyo.” 18 Moi ee-no adhaari na magwarda tali tangaimenle duzi na mulo wamakala wa-indi-idhe aliwa, namwasa oi undhe wanoodidila thitho taira wota. Naliyene Pedru atooimela vambo-i naaliwa nootanga muluo.

19 Moi e-no ndimuwa wa asembe atoom’fuka Yesu vyaanamafunjedhee na vyafunji-a liye. 20 Yesu atoom’mwakhula ira: “Miyo ndatoonga vakwecha waatu othene. Hora dhothene ndanoofunji-a masinagoga na kachisi mwagumaneecha Ayuda, thitho kandiongile yongo iliyothene vakhundu. 21 N’nga mwasiwa ngwan’ni munondifuka? Mufuke atu tavwide vyaonga miyo. Kaonani! Atu othene enala tatoidhiwa vyaonga miyo.” 22 Angaongile vyevyo, mbo-i wa magwarda aimenle duzi, atoom’khoma Yesu puradha noonga ira: “N’nga unom’mwakhula e-no ndimuwa wa asembe?” 23 Yesu atoom’mwakhula ira: “Akala nditoonga yongo iliyothene yodaweya, undiwandele. Mbwenye akala ndiongile vyaimbarimbari, n’nga mwasiwa ngwan’ni unondikhoma?” 24 Adhamale Anasi atoom’tumiza Yesu wa Kayafa ndimuwa wa asembe mbwenye angali omangiwene.

25 Vahora yeniyo Simoni Pedru ali angaimenle vevo nootanga mulo. Moi e-no aliwa tatoom’fuka ira: “N’nga we thitho kuli mbo-i wa anamafunjedhee?” Liye atookhonda noonga ira: “Khabe kai miyo.” 26 M’mbo-i mwa adhaari a andimuwa wa asembe, oi ali balee wa mutu agwandiwile libaru na Pedrule, atoonga ira: “Ndatouona mundani mule ungali vambo-i na mutu wen’na, n’nga ndinaanama?” 27 Mbwenye Pedru atookhonda okoka thitho hora yeniyene thumbi atoola.

28 Moi e-no tatoom’khumanee Yesu wa Kayafa m’dhowanee nyumbani wa namatonga. Hora yen’na yali namaebe-i maningi. Mbwenye aliwa katavolowile m’mba mwa namatonguo voova thakali-iwa, namwasa oi tafuna tamadye paskwa. 29 Ee-no Pilato atookhuma noafuka ira: “N’nga mutu wen’na udawilen’ni?” 30 Aliwa tatoom’mwakhula ira: “A-kale ira mutula kairile yodawa, kanan’dhena wanyo.” 31 Moi e-no Pilato atoawandela ira: “M’tukhuleni mumam’tonge mwekhene movwelana na ilamulo inyu.” Ee-no Ayudao tatoom’mwandela ira: “I-yo kaninorumeli-iwa upha mutu uliwethene.” 32 Vyevi vyatooireya ira madhu aongile Yesu ooni-a mwemo munofuna liye dhakwela, akwakwaneli-edhiwe.

33 Ee-no Pilato atoovolowa okoka m’mbamwee motongela miselu nom’mwitana Yesu thitho atom’fuka ira: “N’nga we uli Mwene wa Ayuda?” 34 Yesu atoom’mwakhula ira: “N’nga fuka weu munofuna muidhiwee, venango atu enango tateuwandelani vyamiyo?” 35 Pilato atoowakhula ira: “N’nga miyo ndili Muyuda? Atu a mbumbaa na andimuwa asembe mbauvelenle wa miyo. N’nga we wuirilen’ni?” 36 Yesu atoom’mwakhula ira: “Umwenanga kai wa ilamboi. A-kale ira Umwenanga ngwailamboi, anama-arelanga tangakhomile khondo ira nda-aveleliwe wa Ayuda. Mbwenye Umwenanga kai okhumela muilamboi.” 37 Pilato atoom’fuka ira: “Taabo, n’nga we uli mwene?” Yesu atoowakhula ira: “Munoonga mwekhene ira ndili mwene. Miyo ndatoobaliwa noudha vailamboi ira ndidhairele umboni imbarimbari. Mutu uliwethene uli ikhundu ya imbarimbari unovuruwana madhwanga.” 38 Pilato atoom’fuka ira: “N’nga imbarimbari chini?”

Angafukile yofuka yen’na atookhuma dhowa wali Ayudale, noawandela ira: “Miyo kandim’fwaidhena yodawa iliyothene mutula. 39 Vale mutokaana mwambo oi ndoothathulelengani mutu mbo-i va Paskwa. N’nga munofuna ira ndoothathuleleni Mwene wa Ayuda?” 40 Atwao tatookhuwa okoka ira: “Wenuo khabe, mbwenye munithathulele Baraba!” Mbwenye Barabula ali liphanga.

19 Adhamale Pilato atoom’tukula Yesu nom’kwapula. 2 Thitho anyakhondo tatooluwa ichapowa ya umwene ya minga nom’mwari-a. Tatoom’mwari-a thitho nguwo yaundhe yofilela. 3 Moi tanoodhowa wa liye noonganga ira: “Kacheliwani nyo Mwene wa Ayuda!” Thitho tanoom’khoma mapurada uthoni. 4 Pilato atookhuma okoka vandhe noawandela ira: “Kaing’anani! Ndinom’khumi-edha vandhe ira muidhiwe ira kandim’fwaidhena selu.” 5 Adhamale Yesu atookhuma vandhe angawarile ichapowa yamingaile na nguwee ya undhe yofilelile. Moi e-no Pilato atoawandela ira: “Kaing’anani! Lombwanule ngula!” 6 Mbwenye andimuwa a sembe na magwarda tangam’moni, tatookhuwa ira: “Athomeiwe wenuo! Athomeiwe wenuo!”* Pilato atoawandela ira: “Mum’tukule mumam’thomeye mwekhene, namwasa oi miyo kandinom’fwanyana selu uliwethene.” 7 Ayudao tatoom’mwakhula ira: “I-yo nitokaana ilamulo, thitho movwelana na ilamuloyo liye unofwanela wukwa namwasa oi unaadhionga ira ngu Mwana Nlungu.”

8 Pilato angavwide vyaongile aliwavyo, atoova maningi, 9 moi e-no Pilato atoovolowa okoka m’mbamwee motongela miselu mule nom’fuka Yesu ira: “N’nga ukhumile wani?” Mbwenye Yesu kwam’mwakhunle. 10 Moi e-no Pilato atoom’mwandela ira: “N’nga we kunofuna ndiwakhula? N’nga kunaidhiwa ira nditokaana kopolo dhouthathula thitho dhouthomeya vaimurini?” 11 Yesu atoom’mwakhula ira: “Kamwakaena kopolo iliyothene va miyo mwaakonde a-va-iwa khumela dhulu. Ngumwasee mutu undivenlele wa nyo utokaana yodawa ilukhulu maningi.”

12 Namwasa wa vyevi Pilato atoodhilimbi-edhave saka ndhila yoi am’mthathule. Mbwenye Ayudao tanookhuwave ira: “Mwathathula mutula, kamuli xamwali wa Kaisara. Mutu uliwethene odhionga kala mwene ngoruni-ana na Kaisara.” 13 Moi e-no Pilato angavwide madhu enala, atookumi-edha Yesu vandhe, thitho liye atookaathi vapandoni otongela miselu. Valimburo laitaniwa ira limburo losaka-edhiwa na mabwe, mbwenye mu Ieberi laitaniwa ira Gabata. 14 Dambo leli lali Lokozeela Paskwa thitho yali 12 hora. Moi e-no liye atoawandela Ayuda ira: “Kaing’anani! Wen’na ngu mweninyu!” 15 Mbwenye aliwa tatookhuwa ira: “Mum’phe! Mum’phe! Athomeiwe wenuo!* Pilato atoafuka ira: “N’nga ndithomeye mweninyu? Andimuwa a sembe tatoowakhula ira: “I-yo kanina mwene unango mbwenye mweni-u ndi Kaisara baa-i.” 16 Adhamale Pilato atoom’velela mandhani mwiwa ira tamam’phe vom’thomeya vaimurini.

Moi e-no Yesu ali mandhani mwiwa. 17 Liye atootukula ekhene imuri yoonelavo nyarwa* nodhowa wu limburo laitaniwa ira limburo vanotatileliwa magaragadu a miru, mbwenye mu Ieberi laitaniwa ira Gologota. 18 Weo tatoom’thomeya vaimuri vambo-i na alombwana ambili, mwinango ikhundu inango, mwinango ikhundu inango, Yesu ongokala vari. 19 Pilato atoolemba thitho dhina laizo noli-ela vaimurini yoonelavo nyarwiyo. Alembile ira: “Yesu wau Nazareti, Mwene wa Ayuda.” 20 Mbwenye Ayuda anjinji tatoolileri dhina laizolo, namwasa oi valimburo lathomeiwile Yesulo lali duzi na sidadi, thitho Pilato alilembile mu Ieberi, mu Ilatini na mu Igiriki. 21 Mbwenye andimuwa a sembe a Ayudao tatoom’mwandela Pilato ira: “Kamulembe ira ‘Mwene wa Ayuda tai,’ mbwenye mulembe ira liye aongile ira, ‘Miyo ndili Mwene wa Yuda.’” 22 Mbwenye Pilato atoawakhula ira: “Vilembile miyo, piyevyo.”

23 Anyakhondwao tangam’khomele Yesu vaimurini, tatootukula nguwee yaundhe noigawa vikhundu vin’nai, ira nyakhondo uliwethene atukulevo ikhundu imbo-i. Tatootukula thitho nguwee ya mwari. Mbwenye nguwee ya mwariyo kiyana vogumani-a, yasakanyiwile khumela dhulu fiya vathi. 24 Ee-no aliwa tatootapanya ira: “Nguila kaniikhaule, mbwenye niire vyolotela ira niidhiwe unofwanela itukula.” Vyevi vyatoireya ira vikwakwaneli-edhe lemba linoonga ira: “Aliwa tatoogawana nguwo dhanga, voira vyolotela.” Ee-no anyakhondwao tatooviiradi vyevyo.

25 Mbwenye vaduzi na imuri yoonelavo nyarwa ya Yesu, vatooimela m’mee na balee wa i-yana wa m’meeuo, Mariya mwadhi Kolopa, na Mariya Madalena. 26 Ee-no Yesu angam’moni m’mee na namafunjedha wam’dhiveliwana liye angaimenle duzi, atoom’mwandela m’meeuo ira: “M’ma, romela penene, mwaninyu unakale ula.” 27 Adhamale atoom’mwandela namafunjedhuo ira: “Romela penene, ula unakale m’maa.” Romela hora yenio namafunjedhuwo atoom’tukula i-yanuo nom’dhowana mudhiwee.

28 Vasogolovee, Yesu angaidhi ira vyothene vitoireya ira malemba akwakwaneli-edhiwe, atoonga ira: “Nditokaana tona.” 29 Valimburonivo vatookala muno odhala na vinyu owawa. Ee-no tatootukula tonje nolibwini-a vinyuni owauwo thitho atooli-ela wu isimuri ya isopo nolifii-a valomoni va Yesu. 30 Yesu angalawilile vinyu owauwo, atoonga ira: “Nditokwakwaneli-edha ifunelwinyu!” Thitho atoorami-a murwee novelela zimwee.*

31 Voi dambo leli lali lokozeela, Ayudao katafunile ira mitembwiyo ikaleve va vimurini vyoonelavo nyarwa va dambo la Sabudu, (namwasa oi Sabudu leli lali nlukhulu maningi), moi e-no aliwa tatoom’vepha Pilato ira taarumeli-e ira taundhe mendo yaatu athomeiwilao nothithi-avo mitembwiwa. 32 Ee-no anyakhondo tatoodha noundha mendo yaatu ambili athomeiwile vambo-i na Yesu. 33 Mbwenye tangafiile vali Yesu, katam’mundhile mendo namwasa oi ali angakwide wale. 34 Mbwenye m’mbo-i mwa anyakhondwao atoom’latha mbarunimu na mwalango thitho hora yeniyene vatookhuma sangiri na ma-inje. 35 Mutu aoni vyevyo ngwavelenle umboni wen’na thitho umboneuo ngwaimbarimbari. Liye unoidhiwa ira unoonga vyaimbarimbari, ira nyo thitho muroromele. 36 Mwaimbarimbari vyevi vyatooireya ira likwakwaneli-edhiwe lemba linoonga ira: “Katinodha undha likuvalee nalimbo-i lene.” 37 Thitho lemba n’nango linoonga ira: “Aliwa anodha ing’ana mutu um’lathile aliwa.”

38 Vyevi vingamadhi, Yosefi wau Armateya, oi ali namafunjedha wa Yesu mbwenye kaadhioneli-edha vakwecha namwasa oova Ayuda, atoom’vepha Pilato ira amakhumi-evo tembo wa Yesu thitho Pilato atoom’rumeli-a. Ee-no atoofiya nokhumi-avo tembuo. 39 Nikodemu adhidhe wa liye nama-iyu voromule, atoodha thitho angatukunle mule othangani-ana alowe okwaranya makilu 32. 40 Ee-no aliwa tatootukula tembo wa Yesu noubilinga na nguwo dhapama thitho u-ela vyonukhela movwelana na mwambo wa-arela Ayuda volokota tembo. 41 Wu limburo wathomeiwile Yesuule watookala munda oi wana masiye mapya, thitho mwali mwa-anarome lokotiwa mutu. 42 Voi lali dambo lokozeela Pwando la Ayuda, thitho masiyao ali duzi, aliwa tatoodhowa malokota Yesu mwemo.

20 Dambo loroma la sumanalo, Mariya Madalena atoodhowa masiyenio namaebe-i maningi, ungalive isi thitho atoona ira libwe latookhumi-iwavo wale vamasiyenivo. 2 Ee-no atootamanga dhowa wa Simoni Pedru na wanamafunjedha mwinango wam’dhiveliwana Yesu maningule. Liye atoawandela ira: “Mbwiye utokhumi-iwamo masiyeni mule thitho kandinoidhiwa um’edhi aliwa.”

3 Angaongile e-no Pedru na namafunjedha mwinangule tatoovenyathi nodhowa masiyeni ule. 4 Ambilene tatooroma tamanga, mbwenye namafunjedha mwinanguo anotamanga maningi kwaranya Pedru thitho ngwaromile fiya masiyenio. 5 Angaoramile patamela warimo, atoona nguwo dhingali vathi mbwenye kaavolowilemo. 6 Adhamale na liyene Pedru atoofiya, thitho atoovolowa masiyenimo. Mwemo afwaidhe nguwodhile dhingali vathi. 7 Nguwo yabilingiwilena muru wa Yesu ile kaya-eliwile vambo-i na nguwo dhinango dhile, mbwenye tatooivinda noi-ela viwa vene. 8 Adhamale namafunjedha aromile fiya masiyeni ule atoovolowa thitho masiyenimo, moi atoona nororomela vyawandeliwile liye vile. 9 Aliwa tali ta-anavwecheche vinoonga malemba ira Yesu afwanela venyathi-iwa muukwa. 10 Ee-no anamafunjedhao tatoowelela nyumbani wiwa.

11 Mbwenye Mariya atoo-alela weo angaimenle duzi na masiyao alanga. Alanga e-no, atoorama ira aone masiyenimo 12 thitho atoona angelo ambili awarile vyochena tangakaathidhe vali tembo wa Yesu. M’mbo-i akaathidhe wali muruee thitho mwinango akaathidhe wali mendwee. 13 Aliwa atoom’fuka ira: “M’ma, n’nga munolela n’ni?” I-yanuo atoawakhula ira: “Mbwiyanga utotukuliwamo, thitho kandinoidhiwa um’edhi aliwa.” 14 Angaongile vyevi, atoodhimbinuwa thitho atoom’mona Yesu angaimenle vevo, mbwenye kaazindiyele ira ali Yesu. 15 Yesu toom’fuka i-yanuo ira: “I-yanawe, n’nga unolelan’ni? N’nga unosakaani?” Voi i-yanuo athuulela ira ngumutu asamalela munduo, liye atoom’mwandela ira: “Akala ngunyo ukhumi-idhemo, mundiwandele um’edhi nyo ira miyo ndimam’tukule.” 16 Yesu atoonga ira: “Mariya!” Liye atoodhimbinuwa noonga mu Iebere ira: “Rabboni!” (Thapulela ira “Namafunji-a!”) 17 Yesu atoom’mwandela ira: “Kundikamelele namwasa oi hora yoi ndidhowe wa Baba kinakwakwane. Mbwenye udhowe umawandele abalanga ira, ‘Miyo ndinaadhowa wa Babanga na wa Babinyu, wa Nlungwanga na wa Nlungwinyu.’” 18 Mariya Madalena atoodhowa wa anamafunjedhao maawandela ira: “Miyo nditom’mona Mbwiye!” Thitho atoawandela vyam’mwandenle Yesu vile.

19 Namaulo a dambo lelo, loi lali dambo loroma lasumanalo, anamafunjedhao tatoogumanyeya vambo-i m’mba moi tatoofunga misuwo namwasa oova Ayuda. Mbwenye Yesu atoovolowa noimela vari viwa thitho atoawandela ira: “Rendele ukale vari vinyu.” 20 Angaongile vyevi, atoaoni-a mandhee na mbarunimwee. Ee-no anamafunjedhao tatoosangalala tangaoni Mbwiyeo. 21 Yesu atoawandela okoka ira: “Rendele ukale na nyo. Mofwanafwana na mwandirumile Baba, miyo thitho ndinourumani.” 22 Angaongile vyevi atoavudhelela mwela noawandela ira: “Muwachele zimu ochena. 23 Mwalevelela mutu odawa, kuongela ira Nlungu utom’levelela wale. Mbwenye mwa-alevele mutu odawa, kuongela ira Nlungu kanam’levele.”

24 Mbwenye Tomasi oi anoidhiweya thitho ira Didimo, m’mbo-i wa anamafunjedha 12 ale, kaali vambo-i na aliwa vyadhidhe Yesu. 25 Ee-no anamafunjedha enangwao tatom’mwandela ira: “I-yo nitom’mona Mbwiye!” Mbwenye liye atoawakhula ira: “Nda-aone vilonda vyamaperego mandhanimwee, no-ela ibuno yanga mwakhomeliwile liye maperego thitho e-la dhandha langa mbarunimwee, navang’onovene miyo kandinororomela.”

26 Vangavirile malambo 8, anamafunjedheao tatoogumanyeya okoka m’mba thitho Tomasi ali vambo-i na aliwa. Angalive ira viseo vyatoofungiwa, Yesu atoovolowa thitho atooimela vari viwa noonga ira: “Rendele ukale vari vinyu.” 27 Adhamale atoom’mwandela Tomasi ira: “E-la ibuno yaa va thitho uone mandhani mwangamu. Kadha udhandi-inde mbaruni mwangamu thitho u-iye kaikela mbwenye uroromele.” 28 Tomasi atoonga ira: “Mbwiyanga na Nlungwanga!” 29 Yesu atoom’fuka ira: “N’nga utororomela namwasa oi utondiona? Osangalala mbaatu anororomela masiki ta-aone.”

30 Onga vyaimbarimbari, Yesu atooira thitho vizindiyelo vinango vinjinji vamethoni va anamafunjedhao, vyoi kavilembiwile mu bukhu leli.* 31 Mbwenye vi vitolembiwa ira muroromele ira Yesu ndi Kristu Mwana Nlungu, thitho namwasa ororomela winyu, mukaena ingumi dhela mudhinalee.

21 Vyevi vingamadhi, Yesu atooneela okoka wa anamafunjedheao wu bara la Tiberiya. Woneela weeo wali moi e-ni. 2 Simoni Pedru, Tomasi (oi anoitaniwa thitho ira Didimo), Natanieli wau Kana wa Galileya, ana Zebedeyo na anamafunjedhee enango ambili, othene enala tali vambo-i. 3 Moi ee-no Simoni Pedru atoonga ira: “Miyo ndinaa mapha somba.” Aliwa thitho tatoonga ira: “ I-yo thitho ninodhowa vambo-i na we.” Aliwa tatoodhowa nogwela mwadiya, mbwenye ma-iyu othene enao kataphide yongo.

4 Mbwenye hora yacha undhe, Yesu atoimela khundu mwa bara, mbwenye anamafunjedhao katam’zindiyele ira ali Yesu. 5 Moi e-no Yesu atoonga ira: “A-imanyo, n’nga mutokaana yodya iliyothene?” Aliwa tatoom’mwakhula ira, “Khabe!”. 6 Yesu atoawandela ira: “Muponyedhe kokotuwo ikhundu ya dhandha lodyana ya mwadiyuwo thitho munofwanya yongo inango.” Ee-no aliwa tatooponyadi kokotuwo, mbwenye kataodileve umburulela mwadiyani namwasa oinjiva wa somba. 7 Vidhaire e-no, namafunjedha oi Yesu anoom’dhiveliwana maningule atoom’mwandela Pedru ira: “Ndi Mbwiye!” Simoni Pedru angavwide ira ndi Mbwiye, atoowara nguwee yaundhe, namwasa oi ali mandhave,* thitho atooluphela bara. 8 Mbwenye anamafunjedha enangwao tatoodha tangali mwadiyani ung’ono tamburulanga kokota odhala na somba, namwasa oi katali undedai maningi na rundani. Va-adhi mametru 90 baa-i ira tavandele.

9 Tangafiile rundanio tatoona mulo wa makala vangali somba thitho tatoona pau. 10 Yesu atoawandela ira: “Mudhena uno somba dhinango dhiphidhe nyo.” 11 Ee-no Simoni Pedru atoogwela mwadiyanimo nomburulela rundani kokota wadhanle somba dhilukhulu dhokwakwana 153. Mbwenye angalive ira mwatookala somba dhinjinji, kokotuwo kwaakauwile. 12 Yesu atoawandela ira: “Dhani mudhadye.” Mbwenye kavali na m’mbo-ene mwa anamafunjedhao alimbile rima m’fuka ira: “N’nga nyo muli ani?” Namwasa oi tanoidhiwa ira ndi Mbwiye. 13 Yesu atoodhowa matukula pau noagawedha, thitho atooira vimbo-ive na somba. 14 Yen’na yali fendo yanararu Yesu aoneelanga wa anamafunjedheao angamadhi venyathi-iwa muukwa.

15 Tangamari-idhe udya yodyayo, Yesu atoom’fuka Simoni Pedru ira: “Simoni mwana Juwau, n’nga unondidhiveliwana miyo kwaranya vi?” Liye atoom’mwakhula ira: “Ee Mbwiye, nyo thitho munoidhiwa ira ndinoudhiveliwanani maningi.” Liye atoom’mwandela ira: “Udyi-e ana mabilanga.” 16 Adhamale atoom’fuka okoka ira: “Simoni mwana Juwau, n’nga unondidhiveliwana?” Liye atoom’mwakhula ira: “Ee Mbwiye, nyo thitho munoidhiwa ira ndinoudhiveliwanani maningi.” Moi e-no liye atoom’mwandela ira: “Ukumbize ana mabilanga.” 17 Atoom’fuka fendo yanararu ira: “Simoni mwana Juwau, n’nga unondidhiveliwana maningi?” Pedru atoovwa tangaranga namwasa oi atoom’fuka fendo yanararu ira: “N’nga unondidhiveliwana maningi?” Ee-no liye atoonga ira: “Mbwiye nyo munoidhiwa vyongo vyothene. Munoidhiwa thitho pama ira ndinoudhiveliwanani maningi.” Yesu atoom’mwandela ira: “Udyi-e ana mabilanga. 18 Mwaimbarimbari ndinouwandela ira, vyali we zombwe, wawara wekhene nodhowa wafunawe. Mbwenye wadhaulula, unodha thapula mionwaa ira mutu mwinango auwari-e thitho unodha udhowana unokondawe a-funa.” 19 Atoonga vyevi vofuna thonyi-edha tundu wa wukwa wafuna liye dhalemezana Nlungu. Angaongile vyevi, atoom’mwandela ira: “Udhowenave ndi-arela.”

20 Pedru atoodhimbinuwa noona namafunjedha wenuo Yesu am’dhiveliwana liyule aa-arelanga. Namafunjedha wen’na ngwen’ne asamenle vamirimani va Yesu va yodya ya namaulo ile, nom’fuka ira: “Mbwiye, n’nga baani unofuna uvelelani?” 21 Ee-no angam’moni, Pedru atoom’fuka Yesu ira: “Mbwiye n’nga chini inofuna dhaireya wa liye?” 22 Yesu atoonga ira: “Akala miyo ndinofuna ira liye akaenave ingumi fiyedha udha wanga, n’nga we unavyon’ni? We udhowenave ndi-arela baa-i.” 23 Ee-no vyatoovweya vari va abali ira namafunjedha wen’na kanodhakwa. Mbwenye Yesu kam’mwandele ira kanodhakwa, mbwenye aongile ira: “Akala miyo ndinofuna ira liye akaenave ingumi fiyedha udha wanga, n’nga we unavyon’ni?”

24 Namafunjedha wen’na ngwairele umboni vyongo vyevi. Liye ngwalembile thitho vyongo vyevi thitho ninoidhiwa ira umboni unovelela liyeula ngwaimbarimbari.

25 Vatokala thitho vyongo vinjinji vyairile Yesu. Vya-akale ira vyongo vyothene vyalembiwile mwaimbo-i na imbo-i, ndinothuulela ira vailambwila kavakale limburo lofuna lokota mabukhu.*