KARTA LODHOWA WA AROMA

1 Miyo Paulo dhaari wa Kristu Yesu, ndatooitaniwa ira ndikale rumiwi nosakuliwa ira ndilaleele milanyu yapama ya Nlungu. 2 Liye atoolanyedha milanyu yen’na walelene dhela mwa anamaongelee khumela mu Malemba opambuleya. 3 Milanywiyo inoonga vya Mwanee oi abaliwile muziza* la Davide, 4 thitho Nlungu atoom’venyathi-a mwaneeula vo-indi-edha basa kopolo ya zimwee ochena. Wen’na ndi Yesu Kristu Mbwii-u. 5 Dhela mwa liye, Nlungu atoonithonyi-edha riya rima ulukhulu nondisakula kala rumiwi ira ndimakami-e atu a maziza othene ira taroromele, vwela thitho lemeza dhinalee. 6 Nyo thitho muli vari vaatu amaziza enala mwaitaniwile ira mukale anama-arela a Yesu Kristu. 7 Kartali ndilembele nyo mwethene munokala wu Roma oi munodhiveliwiwa na Nlungu thitho mwatooitaniwa ira mukale ochena:

Mukaena riya rima ulukhulu na rendele okhumela wa Babi-u Nlungu na wa Mbwii-u Yesu Kristu.

8 Yoroma ndinosimba Nlungwanga dhela mwa Yesu Kristu namwasa wa nyo mwethene, namwasa oi atu vailambo yothene anoonga vya iroromelwinyu. 9 Hora dhothene ndalobelanga ndinouromolechani, thitho Nlungu unom’labela miyo urumiwi wavakhundu na rimanga wethene volaleela milanyu yapama yoonga vya Mwanee, unondiirela umboni. 10 Ndinom’vepecha ira akala pyoodeya thitho akala unofuna, ndidhe weo fendo yen’na baa-i. 11 Namwasa oi ndinofunechecha uonani ira nduuva-eni yotuva yauzimu ira mukale olimba, 12 venango ira ndidhalimbi-iwe na iroromelwinyu, nyo thitho mudhalimbi-iwe na iroromelo yanga.

13 Mbwenye ndinofuna muidhiwe abali ira wahora yolapela ndikanle ndifunanga udha weo, mbwenye vinaa imwananeya. Ndinofuna ndidhaone vyo-arelavo vya basa li-u lolaleela ninga vili aliwa vari vaatu amaziza othene. 14 Miyo nditokaana mangawa wa Agiriki na wa atu o-okala Agiriki thitho waatu azelu na waatu o-okaana zelu. 15 Ee-no ndinofunechecha dhalaleela milanyu yapama wa nyo muli wu Roma. 16 Miyo kandinokaana manyadho volaleela milanyu yapama. Onga mwaimbarimbari milanywila ndi ndhila yakopolo ino-indi-edha basa Nlungu vofuna vulumucha mutu uliwethene una iroromelo. Voroma wa Ayuda amala wa Agiriki. 17 Dhela mu milanywila, Nlungu onoonga longomanolee waatu tana iroromelo. Vyaira e-no iroromeloyo inolimba movwelana na vinoonga malemba ira: “Mutu olongomana unodha kaana ingumi namwasa wa iroromeloyee.”

18 Khumela dhulu, Nlungu unaaoni-a thakaleliwawee waatu o-om’mova na oira vyothakala oi anoiri-a ira imbarimbari ya-aidhiweye. 19 Vili e-no namwasa oi Nlungu utoava-a umboni okwakwanela oakami-a ira tam’mwidhiwe. 20 Khumela vapanduchiwile ilambo makalelo a Nlungu o-ooneya na metho anaaoneya pama. Makalelo enala a Nlungu, kopolodhee dho-omala na vinotho-nyi-edha ira liye ngu Nlungu anaaoneya dhela mu vyongo vipanduchile liye voi atwao katina mwasa ovweya o-ororomelela ira Nlungu utokalao. 21 Angalive ira tanooidhiwa Nlungu aliwa katam’lemezile nom’simba. Malomwee tatooroma thuulela vyongo vyo-okaana zelu thitho mirimiwa yothakaliyo kiyavwechechile vyongo. 22 Angalive ira tanodhionga ira tatokaana zelu, aliwa katina zelu. 23 Malo molemeza Nlungu oi kanokwa, aliwa tanolemeza mafwano aatu oi tanokwa* thitho mafwano olandana na mbalame, vinyama vya mendo 4 na vinyama vyowambadha.

24 Ee-no movwelana na vyofuna vya mirimiwa, Nlungu atoa-iya ira tairena vyonyakavala, na vyova-a manyadho manungwiwa. 25 Ee-no aliwa tato-iya imbarimbari ya Nlungu nororomela vyonama thitho tanolambela nolabela vyongo vyopanduchiwa malo mwa namapanducha oi ngunofwanela titimi-iwa modhowa nodhowa. Ame. 26 Ngumwasiwa Nlungu atoa-iya ira ta-arelenga vyofuna viwa vyo-okondi-eya vyogonana voi a-iyana vari viwa ato-iya ndhila ya ibaliwelo ya manungwiwa noiranga mo-iyana na ibaliwelo. 27 Saasawa thitho alombwana, aliwa tato-iya ndhila ya ibaliwelo yofuna a-iyana nosililangana alombwanave na naluveluve othakala. Alombwanave irelana vyonyakavala novaelatu wachela yotuva movwelana nodawa wiwa.

28 Voi aliwa katafuna m’mwidhiwa pama Nlungu, liye atoa-iya ira tadhowenave thuulela vyongo vyothakala noirana vyongo vyo-ofwanelela. 29 Thitho tanoira vyo-olongomana vya tundu uliwethene, thakala uliwethene, idyani na vyongo vyothene vyothakala. Mirimiwa yatoodhala na bivu, upha atu, indalendale, inyengo nooni-a afwiwa nyarwa. Tanoodhiveliwana thitho mafyeda, 30 nonukedha afwiwa. Aliwa tanooidanana Nlungu, tali aiburutu, odhiulukhuli-a, ogaya, mapanga, o-ovwela anamabala, 31 o-ozindiyela, o-okwakwaneli-edha vilanyedhile aliwa, o-okaana udhivela thitho o-okaana tangaranga. 32 Angalive ira atwala tanoliidhiwa pama lamulo lolongomana la Nlungu, loi atu anoirana vyongo vyevi anofwanela phiwa, tanodhowanave viirangana. Wenjedhela vevo aliwa thitho anovwelana naatu anoirana vyongo vyevi.

2 Ee-no akala we unotonga atu enango mo-obala ira uli ani, kuna mwasa ovweya odhiona ira unoira vyongo vyapama. Voi watonganga atu enango, unokala udhitonganga wekhene namwasa oi we thitho unoirecha vyevyo. 2 Nitoidhiwa ira Nlungu atonganga ira atu anoirana vyevi talangiwe, unotonga movwelana na imbarimbari.

3 We watonganga atu anoirecha vyongo vinoirecha we, n’nga unothuulela ira unodha vithala ira wa-atongiwe na Nlungu? 4 N’nga kunaidhiwa ira Nlungu unaauoni-a riya rimawee ulukhulu, a-thakaleliwa mombaranya noleva rimawee naifunelo yoi uchinyuwe? 5 Mbwenye namwasa oi kunofuna chinja nooni-a ira utochinyuwa, Nlungu unodha ulanga vadambo linofuna liye dhatonga molongomana. 6 Liye unodha tonga mutu uliwethene movwelana na vyoira vyee. 7 Atu anodhilimbi-edha fwanya titimi-o, lemezo, ingumi yo-onongeya nodhowanave irana vyongo vyapama, liye unodha ava-a ingumi yo-omala. 8 Nlungu unodha athakaleliwana atu anodhiveliwana kangana, o-o-arela imbarimbari na anoira vyongo vyo-olongomana. 9 Mutu uliwethene unoirana vyongo vyothakala, masiki akale Muyuda venango Giriki, unodha gumanana nyarwa na vyongo vyopha. 10 Mbwenye uliwethene unoirana vyongo vyapama unodha wachela titimi-o, lemezo na rendele, yoroma Muyuda amala Giriki. 11 Namwasa oi Nlungu kana sakulo.

12 Atu othene adawile ta-anaidhiwe ilamulo, anodhakwa ta-anaidhiwe ilamulo. Mbwenye atu othene adawile tangaidhi ilamulo, anodha tongiwa movwelana na ilamulo. 13 Voi atu ovwa ilamulo baa-i, Nlungu kanoaona kala olongomana mbwenye anoi-arela ilamuloyo mbanofuna dhaoniwa ira mbolongomana. 14 Atu amaziza enango tairanga vilembiwile muilamulo ya Nlungu angalive ira aliwa katiidhi ilamulo, anothonyi-edha ira ilamuloyo ili mirimani mwiwa. 15 Atu enala anothonyi-edha ira makhundo amuilamulo atoolembiwa mirimani mwiwa thitho ithuulela rimaiwa inoairela umboni thitho mathuulelwiwa anoaruni-a venango arumeli-a akala vinoira aliwavyo pyapama venango pyothakala. 16 Vyevi vinodha oneya vadambo linofuna Nlungu dhatonga dhela mwa Kristu Yesu vyongo vyasegeredo vinoira atu nothuulela. Vyevi vinodha ireya movwelana na milanyu yapama inolaleela miyo.

17 Enango a nyo munodhiromola ira muli Ayuda, munonyindela ilamulo thitho munogaya ira muli vauxamwali na Nlungu. 18 Munoidhiwa vinofuna Nlungu thitho munosangalala na vyongo vyapama namwasa oi mwatoofunji-iwa Ilamulo. 19 Munororomela ira munooda sogolela atu o-oona nomoneela atu ali isini. 20 Munothuulela ira munooda kami-a atu o-okaana zelu nofunji-a a-ima namwasa oi munovwechecha imbarimbari inofwanyeya mu Ilamulo. 21 N’nga we unofunji-a atu enango, mwasiwa ngwan’ni kunodhifunji-a wekhene? Unolaleela atu enango ira, “Kamube,” n’nga mwasiwa ngwan’ni we thitho unoba? 22 We unoongecha ira, “Kamuraruwe,” n’nga mwasiwa ngwan’ni unoraruwecha? We unoongecha ira unothakaleliwana mafwano, n’nga mwasiwa ngwan’ni unobecha vyongo vya kachisini? 23 We unogaecha namwasa oidhiwa ilamulo, n’nga mwasiwa ngwan’ni unom’mwirela Nlungu vyaiburutu vopwanya thitho Ilamulo? 24 Ninga mwaongele malemba, “dhina la Nlungu linaanyoziwa vari vaatu amaziza enango namwasa wa nyo.”

25 Ineliwa kwapama akala we uno-arela ilamulo. Mbwenye akala unopwanya ilamulo, ineliwawaa ko-okaana basa. 26 Ee-no akala mutu o-oineliwa uno-arela makhundo olongomana Amuilamulo, angalive ira liye kaineliwile, unodha oniwa ninga mutu oineliwa. 27 Mutu oi ngo-oineliwa a-arelanga Ilamulo, unodha utonga namwasa oi angalive ira utoineliwa thitho utokaana malamulo olembiwa, we kunoavwela. 28 Namwasa oi mutu uli Muyuda undhe baa-i kai Muyuda, thitho ineliwa wamanungo baa-i, kai ineliwa. 29 Kala Muyuda waimbarimbari unokhumela rimani thitho ineliwawee unokala wa rimani oiriwa na zimu, a-kala na malamulo oira lembiwa. Titimi-iwa wa mutu wenuo unokhumela wa Nlungu a-kala waatu.

3 N’nga kala Muyuda una upama oi a-vi, venango ineliwa unoganyali-a n’ni? 2 Upamee utokalavo unjinji. Yoroma, madhu opambuleya a Nlungu ali mandhani mwa Ayuda. 3 N’nga akala enango katali ororomeleya, vinothapulela ira na Nlungwene thitho kai ororomeleya? 4 Khabe. Angalive ira mutu uliwethene unokala onama, Nlungu unoongechave vyaimbarimbari movwelana na vinoonga malemba ira: “Mwatongiwanga, munoongecha vyaimbarimbari ira muganyali.” 5 N’nga ninaonge a-vi akala a-longomana wi-u unothonyi-edha ira Nlungu ngolongomana? N’nga kuongela ira Nlungu ngo-olongomana anithakaleliwangana? (Ndinoonga ninga munoongela atu enango.) 6 Khabe! N’nga Nlungu a-aire e-no, ilambo unodha itonga a-vi?

7 Akala imbarimbari ya madhu a Nlungu itovweya maningi namwasa wa vyonama vyaonga miyo thitho vyevi vitom’dhi-edha titimi-o, n’nga mwasiwa ngwan’ni ndinotongiwa ninga ndili odawa? 8 Ndi-iyelen’ni onga vinoninukhedhecha atu ira ninoongecha vile ira: “Dhoweni niire vyongo vyothakala ira vakale vyongo vyapama.” Atu anoonga vyevi anodha tongiwa movwelana na longomano.

9 N’nga vyaira e-no kuongela ira i-yo Ayuda nili apama kwaranya atu enango? Khabe. Namwasa oi ninga muongele i-yo ndulimu, Ayuda na Agiriki othene, anaatongiwa na vyodawa 10 movwelana na vinoonga malemba ira: “Kavali mutu nam’mbo-ene uli olongomana. 11 Kavali mutu ozindiyela navang’onovene thitho kavali mutu odhilimbi-edha m’sakasaka Nlungu. 12 Atu othene atopanduwa, thitho katina basa. Kavali na m’mbo-ene unothonyi-edha riya rima.” 13 Vamelo viwa vali ninga masiye odhuleya. Aliwa anoonga vyainyengo na lumi liwa.” “Valomoni viwa vali ninga nyongo ya nyowa.” 14 “Thitho mwano mwiwa mudhanle tembelela na madhu othakala.” 15 “Manyalwiwa anotamanga maningi dhowa mapha atu.”* 16 “Hora dhothene tanoira vyongo vyononga nodhi-a nyarwa, 17 thitho katinoidhiwa ndhila ya rendele.” 18 “Aliwa katinom’mova Nlungu.”

19 Nditoidhiwa ira vyongo vyothene vinoonga Ilamulo vinolaba basa waatu ano-arela Ilamulo. Ifuneloyee kuiri-a ira atu ta-akaena yonukhedha thitho thonyi-edha ira ilambo yothene itokaana selu vamethoni va Nlungu noira inofwanela langiwa. 20 Kavali mutu unooniwa kala olongomana na Nlungu namwasa o-arela ilamulo, voi ilamulo inonikami-a zindiyela ira nili odawa.

21 Mbwenye va-eni, vitoidhiweya ira mutu unooda kala olongomana wa Nlungu vo-o-arela ilamulo. Vyevi pyaongiwile thitho mu Ilamulo na vyaongile anamaongela. 22 Atu othene anothonyi-edha ira mbororomeleya wa Yesu Kristu, anooniwa kala olongomana wa Nlungu, namwasa oi wa liye othene mbaambo-ive. 23 Voi atu othene mbodawa thitho anoimwanana thonyi-edha pama titimi-o la Nlungu. 24 Thitho oniwa kala olongomana namwasa oriyawee rima ulukhulu uthonyi-edhe liye voathathula na sembe ya Kristu Yesu, uli ninga yotuva yo-opagali. 25 Nlungu atoom’velela ninga sembe ira atu takale vauxamwali okoka na Nlunguo vororomela sangiree. Liye atooira vyevi vofuna oni-a longomanolee namwasa oi atoothonyi-edha ira ngo-othakaleliwa mombaranya volevelela vyodawa vyaireile walelene. 26 Liye atooirana vyevi ira aoni-e longomanolee va-eni voona ira mutu unom’roromela Yesu ngolongomana.

27 N’nga veva vatokala mwasa ogayela? Khabe. N’nga nigayenga namwasa o-arela ilamulo? Khabe ba-i, mbwenye nigayenga namwasa o-arela lamulo la iroromelo. 28 Nioni ira mutu unokala olongomana mwairoromelo, a-kala vo-arela ilamulo. 29 N’nga liye ndi Nlungu wa Ayuda baa-i? N’nga liye kai Nlungu waatu a maziza enango thitho? Ee, liye ndi Nlungu thitho waatu amaziza enango. 30 Voi Nlungu ndi m’mbo-i baa-i, liye unodha ona ira atu oineliwa mbolongomana namwasa wa iroromelwiwa. Unodha ona thitho ira atu o-oineliwa mbolongomana namwasa wa iroromelwiwa. 31 N’nga veva ninaamali-a ilamulo namwasa wa iroromelwi-u? Khabe! Malomwee ninaalimbi-a ilamulo.

4 Voi vili e-no, n’nga niongen’ni vyokhuza namabali-u Abrahamu? 2 Mofwanafwani-a, aakale ira Abrahamu anooniwa kala olongomana namwasa wa vyaira liye, angakanlena mwasa ogaya mbwenye a-kala vamethoni va Nlungu. 3 N’nga malemba anoongan’ni? Anoonga ira: “Abrahamu atoororomela vyam’mwandenle Yohova, thitho atooniwa ira ngolongomana.” 4 Namalaba atambili-iwa kobiree kavinothapulela ira patarawee ngoriya rima, mbwenye pyafwanela liye tambili-iwa namwasa olaba basa. 5 Mbwenye Nlungu oi unoona atu odawa kala olongomana, unoona ira mutu oi kalabile basa mbwenye liye roromela, ngolongomana. 6 Davide atoonga vya mutu osangalala oi Nlungu unom’mona kala olongomana angalive ira vyoiravyee kavinovwelana na Ilamulo. Liye aongile ira: 7 “Osangalala mbaatu aleveleliwile vyoira viwa vyo-ovwela malamulo noleveleliwa vyodawa viwa. 8 Osangalala ngu mutu oi Yohova kanodha thuulela yodawayee.”

9 N’nga mbaatu oineliwa baa-i anosangalala venango o-oineliwa thitho anosangalala? Voi ninoongecha ira: “Abrahamu atooniwa kala olongomana namwasa wa iroromeloyee.” 10 N’nga liye ali oi a-vi vahora yaoniwa liye kala olongomana? N’nga ali oineliwa venango a-anaineliwe? Liye ali a-anaineliwe. 11 Thitho Nlungu atoom’mwandela Abrahamu ira aineliwe ninga izindiyelo yothonyi-edha ira Nlungu atoom’mona ira ngolongomana a-anaineliwe namwasa wa iroromelo. Atooirana vyevi ira adhakale baba waatu othene o-oineliwa ana iroromelo, ira atwao tadhaoniwe ira mbolongomana. 12 Ira adhakale thitho baba waatu o-oineliwa, a-kala oineliwa baa-i mbwenye thitho waatu anowenda mo-arela iroromelo ninga yana babi-u Abrahamu a-anaineliwe.

13 Namwasa oi Abrahamu venango mbumbee* katalanyedhiwile ira anodha wachela ilambo namwasa o-arela ilamulo, mbwenye aliwa tatoowandeliwa yolanyedhayo namwasa oi Abrahamu atookaana iroromelo thitho Nlungu atoom’mona ira ngolongomana. 14 Namwasa oi akala atu ano-arela ilamulo mbanofuna dhawachela yotuvayo, kuongela ira iroromelo kinave basa thitho yolanyedha ile itomala. 15 Imbarimbari choi, pwanya Ilamulo unoiri-a ira mutu alangiwe, mbwenye va-akale ilamulo mutu kanofwanyeyana yodawa.

16 Namwasa wa iroromelo liye atoolanyedhiwa yolanyedha yei ira ikale yovwelana noriya rima ulukhulu wa Nlungu. Thitho atoolanyedhiwa yolanyedha yei ira ikale yosikimizeleya waatu othene oi ndi mbumbee,* a-kala waatu tano-arela Ilamulo baa-i, mbwenye thitho waatu ano-arela iroromelo ya Abrahamu oi ndi baba wa i-yo othene. 17 (Vyevi pyovwelana na vinoonga malemba ira: “Nditousakula ira ukale baba waatu amaziza manjinji.”) Vyevi vyali e-no wa Nlungu am’roromela Abrahamu, oi unovenyathi-a atu okwa thitho unoonga vya vyongo vyoi kavilivo kalanga ninga vitokalavo.* 18 Abrahamu atookaana idedi-edho thitho iroromelo yoi unodhakala baba waatu amaziza manjinji, angalive ira vyevi vyaoneya ira pyo-oodeya. Liye atoororomela vyevi movwelana na vyaongiwile ira: “Mwemu ndi munofuna dhakalela mbumbaa.”* 19 Angalive ira atookaana iroromelo yolimba, liye anoothuulela vya manungwee, voi vahoriyo ali ninga okwa (namwasa oi ana vyawa vyowandamela 100). Thitho anooidhiwa ira Sara ngoulula maningi moi kanooda kaana mwana. 20 Mbwenye namwasa wa yolanyedha ya Nlungu, iroromeloyee yatoodhowanave kala yolimba thitho yatoom’va-a kopolo moi atoom’titimi-a Nlungu. 21 Thitho liye kaakaikela ira Nlungu utokaana kopolo yokwakwaneli-edha vyalanyedhile liye. 22 Namwasa wa vyevi, “Nlungu atoom’mona ira ngolongomana.”

23 Mbwenye madhu oi “Nlungu atoom’mona ira ngolongomana” kaalembiwile namwasa wa liye baa-i. 24 Atoolembiwa thitho namwasa wa i-yo oi ninooniwa ira nili olongomana namwasa oi ninororomela Nlungu am’venyathi-idhe Yesu Mbwii-u. 25 Yesu atooveleliwa namwasa wa vyodawa vi-u thitho atoovenyathi-iwa ira nioniwe kala olongomana.

5 Voi va-eni ninooniwa kala olongomana namwasa okaana iroromelo, dhoweni nikale varendele* na Nlungu dhela mwa Mbwii-u Yesu Kristu. 2 Roromela Yesu unonikami-a ira niodenga wandamela wa Nlungu nosangalala na riya rimawee ulukhulu. Dhoweni nisangalale* namwasa oi nitokaana idedi-edho yowachela titimi-o la Nlungu. 3 Kai vyevi baa-i, mbwenye ninooda thitho sangalalanga* nagumanangana nyarwa namwasa oi nitoidhiwa ira nyarwa dhi-u dhinonikami-a ira nivilele. 4 Vilela unonikami-a ira nikale orumeleya wa Nlungu thitho kala orumeleya wa Nlungu unonikami-a ira nikaena idedi-edho. 5 Idedi-edhoyo kinoniiri-a kala okhumbanya namwasa oi Nlungu unothonyi-edha ira unonidhiveliwana vo-indi-edha basa zimu ochena unoniva-a liye.

6 Vahora yali i-yo ofooka, Kristu atookwela atu odawa vahora yakaathi-iwile na Nlungu. 7 Namwasa oi pyorucha ira mutu mwinango akwele mutu olongomana. Mbwenye venango mutu unooda dhivelela ira akwele mutu wapama. 8 Mbwenye Nlungu unonithonyi-edha udhivelee, namwasa oi vyali i-yo odawa, Kristu atoonikwela. 9 Voi ninooniwa kala olongomana namwasa wa sangiri ya Kristu, Nlungu unodha nivulumucha mothakaleliwawee dhela mwa Kristu. 10 Akala vyali i-yo odawa natoovwelani-iwa na Nlungu dhela muukwa wa Mwanee, kuongela ira ninodha vulumuchiwa na ingumi ya Yesu. 11 Mbwenye kai vyevyo baa-i, ninosangalala thitho namwasa oi dhela mwa Mbwii-u Yesu Kristu, nili vauxamwali na Nlungu oi nitovwelani-iwa dhela mwa Yesuo.

12 Dhela mwa mutu m’mbo-i vyodawa vyatoovolowa muilambo thitho vyodawavyo vyatoodhi-a wukwa. Ee-no wukwao watoomwadheya waatu othene namwasa oi atu othene tatoodawa. 13 Ilamulo ya-anakalevo vyodawa vyali vingakanlevo wale, mbwenye mutu kanafwanyeye odawa akala ira kavali lamulo. 14 Angalive ira vili e-no, wukwa watooroma tonga romela muhora ya Adamu fiyedha muhora ya Mose, thangani-avo waatu oi katadawile ninga vyate Adamu, oi ali ofwanafwana na afuna udha.

15 Mbwenye yotuva yavelenle Nlungwila, cho-iyana na vyodawa, namwasa oi atu anjinji tatookwa dhela mwa mutu m’mbo-i. Mbwenye riya rima ulukhulu wa Nlungu thitho yotuva yapezi yavelenle liye dhela mwa mutu m’mbo-i oi ngu Yesu Kristu, pya pereso yavadhulu maningi. Nlungu unodha velela maraeli-o manjinji waatu anjinji, volabi-edha basa yotuva yei. 16 Mwemo mwaireele vyongo dhela mwa mutu m’mbo-i adawile pyo-iyana na yotuvai. Khumela va yodawa imbo-ile atu othene tatootongiwa ira mbodawa, mbwenye yotuva yavelenle Nlungu namwasa wa vyodawa vya atu anjinji, yatooiri-a ira atu taoniwenga ira mbolongomana. 17 Wukwa watootonga ninga mwene namwasa wa yodawa ya mutu m’mbo-i. Mbwenye atu awachenle riya rima ulukhulu wa Nlungu thitho yotuva yapezi ya longomano, anodha kaana ingumi ira tatonge ninga mamwene dhela mwa mutu m’mbo-i, oi ngu Yesu Kristu.

18 Ee-no ninga mwakalele aliwa ira dawa wa mutu m’mbo-i watooiri-a ira atu o-iyana-iyana tatongiwe ira mbodawa, irana yongo imbo-i yolongomana watooiri-a thitho ira atu o-iyana-iyana taoniwe ira mbolongomana noira tadhakaena ingumi. 19 Voi a-vwela wa mutu m’mbo-i watooiri-a ira atu anjinji tadawe, vwela wa mutu m’mbo-i unodha iri-a thitho ira atu anjinji takale olongomana. 20 Ilamulo yatooveleliwa ira atu tazindiyele ira mbodawa. Mbwenye vyainjiva vyodawavyo, riya rima ulukhulu wa Nlungu watoowenjedheleya maningi. 21 N’nga namwasa wan’ni? Ninga mwemo vyodawa mwatongile aliwa ninga mwene vambo-i na wukwa, riya rima ulukhulu thitho utonge molongomana ninga mwene. Thitho vyevi vinodha iri-a ira atu tadhakaena ingumi yo-omala dhela mwa Mbwii-u Yesu Kristu.

6 N’nga nionge n’ni? N’nga nidhowenave dawa ira riya rima ulukhulu wa Nlungu uwenjedheleye? 2 Mwaimbarimbari khabe. Voi natookwa wu vyodawa, n’nga nidhowenganave dawa namwasa wan’ni? 3 N’nga kamunoidhiwa ira i-yo othene nabadiziwile thitho nili ovwelana na Kristu Yesu, nabadiziwile thitho muukwawee? 4 Ee-no natoo-eliwa masiyeni vyabadiziwile i-yo muukwawee, ira mofwanafwana na Kristu wenuo avenyathi-iwile dhela mu titimi-o la Baba, i-yo thitho nikaena ingumi ipya. 5 Namwasa oi akala nili ovwelana na liye vokwa mofwanafwana na liye, mwaimbarimbari ninodha kala thitho ovwelana na liye vovenyathi-iwa mofwanafwana na liye. 6 Namwasa oi nitoidhiwa ira makalelwi-u awale atoothomeiwa vambo-i na liye vaimurini naifunelo yoi manungwi-u odawala akale o-okaana kopolo, thitho ira na-akale adhaari a vyodawa. 7 Namwasa oi mutu ukwide kanokaanave selu* wa vyodawavyee.

8 Akala natookwa vambo-i na Kristu, ninororomela ira ninodha kaana thitho ingumi vambo-i na liye. 9 Nitoidhiwa ira voi Kristu utovenyathi-iwa, kanodha kwave thitho kanotongiwa na wukwa. 10 Liye atookwa fendo imbo-i baa-i ira akumi-e vyodawa thitho utokaana ingumi ira airengana ifunelo ya Nlungu. 11 Nyo thitho mukalenga ninga atu okwa wu vyodawa, mbwenye aingumi wa Nlungu dhela mwa Kristu Yesu.

12 Ee-no kamurumele ira vyodawa vitongengave ninga mwene manungwinyu oi anokwa vo-arela vinofuna aliwa. 13 Thitho kamuvelele manungwinyu wu vyodawa ira akale mafwaramento oirana vyongo vyo-olongomana, mbwenye mudhivelele wa Nlungu ninga atu avenyathi-iwile. Manungwinyu thitho mwaavelele wa Nlungu ninga mafwaramento oirana vyongo vyolongomana. 14 Vyodawa kaviutongengani ninga mwene, namwasa oi kamuno-arela ilamulo, mbwenye munosogoleliwa na riya rima ulukhulu wa Nlungu.

15 N’nga vyaira e-no kuongela ira nidawenga namwasa oi kanino-arela ilamulo, mbwenye ninosogoleliwa na riya rima ulukhulu wa Nlungu? Mwaimbarimbari khabe. 16 N’nga nyo kamunoidhiwa ira mwadhivelelanga wa mutu mwinangwee nom’vwelanga, munokala adhaaree? Munokala adhaari a vyodawa vyevyo vinosogolela wuukwa, venango adhaari a vwela weo unosogolela wu longomano. 17 Mbwenye ninosimba Nlungu ira angalive ira voroma mwali adhaari a vyodawa, mwatoovwela mokhumela vathi varima makhundo mapya afunji-iwile nyo. 18 Ee voi mwatoothathuliwa wu vyodawa, mwatookala adhaari a longomano. 19 Ndinouwonganani ninga munoongecha atu enango namwasa ofooka wa manungwinyu. Moda wavelenle nyo manungwinyu ira akale adhaari a vyongo vyonyakavala na o-ovwela malamulo naifunelo yoi muirenga vyongo mo-o-arela malamulo, muvelele thitho manungwinyu ira akale adhaari a longomano na ochena. 20 Namwasa oi vyalinyo adhaari a vyodawa, mwali othathuwa wu longomano.

21 N’nga vahora yeniyo mwava-echa vyova-a vyoi a-vi? Vyali vyongo vyoi va-eeni vinaauva-ani manyadho. Thitho vyo-arelavo va vyongo vyevyo ndi wukwa. 22 Mbwenye namwasa oi va-eeni mutothathuliwa wu vyodawa nokala adhaari a Nlungu, munova-a vyova-a vyochena thitho komoniwee munodha kaana ingumi yo-omala. 23 Namwasa oi vyodawa vinodhi-a wukwa, mbwenye yotuva ivelenle Nlungu ndi ingumi yo-omala dhela mwa Mbwii-u Kristu Yesu.

7 Abali, n’nga kamunoidhiwa ira ilamulo inokaana kopolo va mutu vahora inokaana liye ingumi? Ndinoongana nyo anoidhiwa Ilamulo. 2 Mofwanafwani-a, i-yana otheliwa mwa lamulo unokalave vambo-i na man’nee vahora yoi man’neuo ngwaingumi. Mbwenye man’neuo akwa, i-yanuo unokala othathuwa wu lamulo lokhuza man’nee. 3 Akala i-yanuo utotheliwa man’neuo angana ingumi, kuongela ira utoraruwa. Mbwenye akala man’neuo utokwa, i-yanuo ngothathuwa wu lamulo lokhuza man’nee, ee-no atheliwa na lombwana mwinango kanaararuwa tai.

4 Abalanga, manungo a Kristu atouthathulani wu Ilamulo ira mukale a mutu mwinango oi atoovenyathi-iwa naifunelo yoi niva-e vyova-a wa Nlungu. 5 Namwasa oi vahora yakala i-yo movwelana na manungwi-u odawala, Ilamulo yatooiri-a ira vyofuna vya manungwi-u odawao vizindiyeliwe. Thitho vyofuna vyevi vinganiiri-idhe ira nikwe. 6 Mbwenye va-eeni nitothathuliwa wu Ilamulo, namwasa oi nitokwa wu Ilamulo yanisogolela ira nikale adhaari mundhila ipya mosogoleliwa na zimu ochena, a-kala mundhila yawale mosogoleliwa na malamulo olembiwa.

7 N’nga nionge a-vi? N’nga Ilamulo chodawa? Mwaimbarimbari khabe. Onga mwaimbarimbari, kandaidhiwe vyodawa aakale ira kavali Ilamulo. Mofwanafwani-a, aakale ira Ilamulo kiongile ira kusilile mwabivu, miyo kandaidhiwe “Silila mwabivu.” 8 Mbwenye namwasa wa Ilamulo, vyodawa vitondiiri-a kala mutu osilila wa tundu uliwethene. Namwasa oi Ilamulo ya-anakalevo, vyodawa kavyana kopolo. 9 Ilamulo ya-anakaleo ndali waingumi. Mbwenye Ilamulo ingafiile vyodawa vyatookala okoka na kopolo mbwenye miyo ndatookwa. 10 Lamulo lafuna ndisogolela ira ndimafwanye ingumi, landisogolele wuukwa. 11 Vyodawa vyatoo-indi-edha basa lamulo leli vondinyengelela thitho vyatoondipha. 12 Ee-no Ilamulo vaokhene chochena thitho malamulo mbochena, mbolongomana, na apama.

13 N’nga vyevi vinothapulela ira yongo yapama yatooiri-a ira ndikwee? Khabe. Vyodawa pyairi-dhe ira ndikwe. Ilamulo chapama namwasa oi chiiri-idhe ira viidhiweye pama ira vyodawa pinoiri-a ira ndikwe. Ee-no malamulo atoonikami-a idhiwa ira vyodawa pyothakala maningi. 14 Nitoidhiwa ira Ilamulo chokhumela wa Nlungu dhela mwa zimu, mbwenye miyo kandili olongomana thitho ndatooguli-iwa kala dhaari wa vyodawa. 15 Kandinovwechecha vinondiireela. Namwasa oi vinofuna miyo irana kandinoviirana. Mbwenye ndinoira vinoidanana miyo. 16 Mbwenye akala ndinoirana vyo-ofuna miyo, ndionge ira ndinorumela ira Ilamulo chapama. 17 Unoirana vyevyo kai miyo, mbwenye pyodawa vili mwa miyo. 18 Nditoidhiwa ira manungoni mwanga modawamu, kamuli yongo iliyothene yapama. Namwasa oi ndinofuna irana vyongo vyapama, mbwenye kandinooda viirana. 19 Vyongo vyapama vinofuna miyo irana kandinoviirana, mbwenye vyongo vyothakala vinokonda miyo a-funa ndinoviirana. 20 Mbwenye akala ndinoirana vyongo vinokonda miyo a-funa kuongela ira unoirana vyevyo kai miyo, mbwenye ndi vyodawa vili mwa miyo.

21 Vinondiireela pyoi, ndafuna irana vyongo vyapama ndinoona vyongo vyothakala mwa miyo. 22 Rimani mwanga ndinosangalala maningi na malamulo a Nlungu, 23 mbwenye ndinoona lamulo lili manungoni mwanga lilimbananga na malamulo a mathuuleloni mwanga nondiiri-a kala dhaari wa ilamulo ya yodawa ili manungoni mwanga. 24 Miyo mutu orucheya! N’nga mbaani unofuna ndivulumucha wu manungo anondiiri-a ira ndikwala? 25 Nlungu unodha ndivulumucha dhela mwa Mbwii-u Yesu Kristu. Ee-no mathuuleloni mwanga ndili dhaari wa malamulo a Nlungu, mbwenye manungoni mwanga ndili dhaari wa lamulo la vyodawa.

8 Ee-no atu ali ovwelana na Kristu Yesu katina selu. 2 Namwasa oi lamulo la zimu lelo linova-a ingumi movwelana na Kristu Yesu litouthathulani wu lamulo la vyodawa na laukwa. 3 Namwasa wa manungo na vyodawa, Ilamulo kiyana kopolo youthathulani. Mbwenye Nlungu ira authathuleni, atootumiza Mwanee angana manungo ninga aatu odawa ira alevelele vyodawa. Ee-no Nlungu atoogonji-a vyodawa vo-indi-edha basa manungo. 4 Nlungu atooira vyevi ira i-yo oi ninowenda mo-arela zimu a-kala mo-arela vyofuna vya manungwi-u, nikwakwaneli-edhe vyongo vyolongomana vinofuna Ilamulo. 5 Namwasa oi atu ano-arela vyofuna vya manungo, mathuulelwiwa othene anokala va vyongo vya manungo. Mbwenye atu ano-arela zimu, mathuulelwiwa othene anokala va vyongo vyauzimu. 6 Voi thuulela maningi vyongo vyaututuni unodhi-a wukwa, mbwenye thuulela maningi vyongo vyauzimu unodhi-a ingumi na rendele. 7 Thuulela maningi vyongo vyaututu unoiri-a atu kala vaumwidani na Nlungu, namwasa oi manungo kanovwela lamulo la Nlungu thitho onga mwaimbarimbari kanooda livwela. 8 Ee-no atu ano-arela vyofuna vyaututu katinooda m’dhiveliwi-a Nlungu.

9 Akala zimu wa Nlungu uli mwa nyo, muno-arela zimuo a-kala vyofuna vyaututu. Akala mutu kana zimu wa Kristu, wenuo kai wa Kristu. 10 Mbwenye akala muli ovwelana na Kristu, zimu unoiri-a ira mukaena ngari ya ingumi yo-omala namwasa wa longomano angalive ira manungo mbokwa namwasa wa vyodawa. 11 Akala zimu wa Nlungu wam’venyathi-idhe Kristu Yesu uli mwa nyo, liye unodha i-ndi-edha basa thitho zimu ochena vovenyathi-a manungwinyu okwao ira akaena ingumi.

12 Ee-no abali i-yo kaninofwanela tongiwa na manugwi-u ira niirenga vinofuna aliwa. 13 Namwasa oi mwa-arelanga vyofuna vya manungwinyu, mo-okaikela munodhakwa. Mbwenye mwarumela ira kopolo ya zimu yuukami-eni upha vyofuna vyamanungo, munodha kaana ingumi. 14 Othene anosogoleliwa na zimu wa Nlungu, mwaimbarimbari ndi a-ima a Nlungu. 15 Namwasa oi kamwawachenle zimu waudhaari oi unoiri-a ova, mbwenye mwawachenle zimu oi mukale a-ima, wenuo unokhuwa na i-yo ira: “Abba,* Baba!” 16 Zimu wa Nlungu unoirela umboni vambo-i na zimwi-u ira nili a-ima a Nlungu. 17 Akala nili a-ima a Nlungu, ninodha wachela yotuva inofuna liye dhaniva-a. Thitho narumela gumanana nyarwa vambo-i na Kristu, ninodha wachela yotuva ninga yee notitimi-iwa vambo-i na liye.

18 Ndinoona ira nyarwa dhinogumanana i-yo va-eeni kai yongo vofwanafwani-edhela na titimi-o linofuna i-yo dhava-iwa. 19 Namwasa oi vyopanduchiwa vya Nlungu vinodedi-edhela mofunechecha hora inofuna dhaoneela titimi-o la a-ima a Nlungu. 20 Voi vyopanduchiwa vya Nlungu vyatootogiwa ira pyo-okaana basa, a-kala mofuna wiwa mbwenye dhela mwa mwinyaa avipanduchile. Thitho liye atoovelela idedi-edho, 21 yoi vyopaduchiwavyo vinodha thathuliwa uudhaari wa vyodawa noukwa, nokaana ufulu wa titimi-o la a-ima a Nlungu. 22 Namwasa oi ninoidhiwa ira vyopanduchiwa vyothene vinaadumbela vambo-i nouvwa upha fiyedha va-eni. 23 Mbwenye kai vyevi baa-i. I-yo oi nili vyova-a vyoroma vya zimu, ninodumbela rimanimu vahora inodedi-edha i-yo narima wethene ira nikale a-ima a Nlungu nothathuliwa wu manugwi-u ala dhela mu yoombolana. 24 Namwasa oi natoovulumuchiwa ningana idedi-edho yei, mbwenye yongo inodedi-edhela we yaireya kinokalave idedi-edho. N’nga inodedi-edhela mutu yaireya, unongoidedi-edhelave? 25 Mbwenye akala vyongo vinodedi-edhela i-yo kavinaireye, ninongovidedi-edhelave movilela.

26 Mofwanafwana na vyevi, zimu unonikami-a va vyongo vinoimwanana i-yo. Namwasa oi yorucha choi volobela kaninoidhiwa vinofuna i-yo onga, mbwenye zimu unosembezela malo mwa i-yo va vyongo vyoi kaninooda vionga. 27 Mbwenye liye oi unoidhiwa vya rimani unoidhiwa thitho vinothapulela zimu, namwasa oi unosembezela malo mwaatu ochena movwelana naifunelo ya Nlungu.

28 Ninoidhiwa ira Nlungu unovwelani-a vyoiravyee vyothene vofuna kami-a atu anom’dhiveliwana enao aaitan’ne liye movwelana naifuneloyee. 29 Unoira e-no namwasa oi atooidhiwa vamaromelovene atu aasakunle liye ira adhakale ofwanafwana na Mwanee, ira liye akale oroma baliwa vari va abalee anjinji. 30 Thitho atu avaeletu liye asakula mbenao aaitan’ne liye. Atu aaitan’ne liyao mbenao thitho anoaona liye ira mbolongomana thitho atu anoaona liye ira mbolongomanao mbenao thitho aava-idhe liye titimi-o.

31 N’nga vavyongo vyevi niongen’ni? N’nga akala Nlungu uli wu ikhundu yi-u, mbaani unofuna dhalimbana na i-yo? 32 Voi liye kam’kondi-idhe Mwanee mbwenye atoom’velela malo mwa i-yo othene, n’nga liye unaimwanane a-vi niva-a vyongo vinango vyothene moriya rima vambo-i na Mwaneuo? 33 N’nga mbaani unofuna dhaasumela atu asakuliwile na Nlungu? Voi Nlungu unoaona ira mbolongomana. 34 N’nga mbaani unofuna dhaaruni-a? Kristu Yesu ngwakwide novenyathi-iwa. Liye uli wu dhandha lodyana la Nlungu thitho unoonga mosembezela malo mwa i-yo.

35 N’nga mbaani unofuna dhani-iyani-a na udhivela wa Kristu? N’nga ndi nyarwa, vyopha, a-ra-ariwa, ndhala, usiwa, vyoophi-a venango sarasada? 36 Malemba anoonga ira: “Namwasa wa nyo, ninophiwa hora dhothene thitho nikadhi ninga mabila omaphiwa.” 37 Mbwenye ninogonji-a vyongo vyothene vyevi mokami-iwa na mutu anidhiveliwilena. 38 Namwasa oi nditosikimizela rima ira wukwa, ingumi, angelo, maguverno, vyongo vilivo, vyongo vinodha, kopolo, 39 imo, di-a venango yopanduchiwa iliyothene, kinodha ni-iyani-a na udhivela wa Nlungu uli mwa Kristu Yesu Mbwii-u.

9 Ndinoonga mwaimbarimbari movwelana na Kristu, kandinaanama tai. Thitho ithuulela rima yanga inondiirela umboni mwa zimu ochena, 2 ira ndili osukwala maningi thitho rimanga unondiphecha hora dhothene. 3 Ndingadhiveliwile ira miyo ndi-iyani-iwe na Kristu ninga mutu otembeleliwa malo mwaabalanga oi ndi atu atundwanga, 4 oi mba Aisraeli. Nlungu atoasakula ira takale a-imee thitho atoava-a titimi-o, vwelano, Ilamulo, urumiwi wavakhundu na vyolanyedha. 5 Aliwa ndi a-ima a anamabali-u awale thitho Kristu abaliwile khumela mwaaliwa. Nlungu oi ndilukhulu va vyongo vyothene, atitimi-iwe modhowa nodhowa. Ame.

6 Mbwenye vyevi kavinothapulela ira madhu a Nlungu katakwakwaneli-edhiwile. Namwasa oi kai othene a mbumba ya Israeli oi ndi “Aisraeli” aimbarimbari. 7 Angalive ira aliwa ndi ambumba* la Abrahamu, kavinothapulela ira othene ndi a-imee. Namwasa oi anofuna dhaitaniwa, “Mbumbaa* anodha kumela wa Izaki.” 8 Vyevi vinothapulela ira kai a-ima othene a Abrahamu oi ndi a-ima aimbarimbari a Nlungu, mbwenye a-ima obaliwa movwelana na yolanyedha, mbanooniwa kala mbumba.* 9 Voi yolanyedhaile yaongile ira: “Ndinodhadha okoka hora ninga yen’na thitho Sara unodhakaana mwana walombwana.” 10 Yolanyedhai kiyaveleliwile vahora yen’na baa-i, mbwenye yatooveleliwa thitho wa Rabeka oi ana wise ira abale anasambili a Izaki namabali-ule. 11 Anasambilao ta-anabaliwe thitho ta-anaire yongo iliyothene yapama venango yothakala, Nlungu atooni-a ira ifuneloyee inodha nyindela va liye mwinyauo oi ngunoitana a-kala vyoira vya mutu. 12 Ee-no Nlungu atoom’mwandela Rabeka ira: “Mwana wa ndimuwa unodhakala dhaari wa ng’onwee.” 13 Movwelana na vinoonga Malemba ira: “Ndatoom’dhiveliwana Yakobo, mbwenye Ezau ndatoom’mwidananee.”

14 N’nga niongen’ni veva? N’nga Nlungu utekala o-olongomana? Mwaimbarimbari khabe. 15 Namwasa oi liye atoom’mwandela Mose ira: “Mutu unofuna miyo m’riyela rima ndinodha m’riyela rima, thitho mutu unofuna miyo m’vwela tangaranga, ndinodha m’vwela tangaranga.” 16 Ee-no kavinonyindela funa wa mutu venango thindhilee, mbwenye vinonyindela Nlungu watangaranga. 17 Voonga vya Farau, lemba n’nango linoonga ira: “Nditou-iya na ingumi ira nduuoni-e kopolo dhanga thitho ira dhina langa lilaleiwe vailambo yothene yavathi.” 18 Ee-no liye unovwela tangaranga mutu unofuna liye m’vwela tangaranga, mbwenye unorumeli-a ira atu enango taumi-e mirimiwa.

19 Venango unooda ndiwandela ira: “Mwasiwa ngwan’ni Nlungu unofwanyela atu matangwi? N’nga baani unofuna runi-a ifuneloyee?” 20 N’nga we uli ani ira uruni-engana na Nlungu? N’nga yongo youmbiwa inooda wandela mutu uiwumbile ira, “Mwasiwa ngwan’ni undisaka-edhele e-ni?” 21 N’nga kamunoidhiwa ira mutu oumba yombwe utokaana ufulu o-indi-edha basa ulongo umbo-ive wenuo voumba yongo inango yolemezeya, na yongo inango yonyozeya? 22 Vyevi ndi vyofwanafwana na Nlungu. Liye unofuna oni-a thakaleliwawee na kopolodhee waatu othakala. Angalive ira vili e-no, liye unooni-a vilelawee waatu anoathakaleliwana liye, oi anofwanela nongiwa. 23 Liye atooira vyevyo ira athonyi-edhe ulukhula wa titimi-olee waatu ofwanela vweliwa tangaranga, enao aasakunle liye ira tawachele titimi-olee. 24 Atwee ngu i-yo oi atooniitana a-kala khumela wa Ayuda baa-i mbwenye thitho waatu amitundu inango. 25 Vyofwanafwana na vyaogiwile mu bukhu la Oseya ira: “Atu oi kai anga ndinodha aromola ira ‘atwanga,’ thitho i-yana oi kaadhiveliwiwa ndinodha m’romola ira ‘odhiveliwiwa.’ 26 Weo wawandeliwa aliwa ira, ‘kamuli atwanga,’ anodha wandeliwa ira, “muli a-ima a Nlungu waingumi.”

27 Thitho Esaya atoonga vyokhuza Israeli ira: “Angalive ira ana Israeli anodhakala anjinji ninga useva wa bara, anofuna dhavulumuwa mboyeva baa-i. 28 Namwasa oi Yohova* unodha tonga miselu yaatu availambo yavathi mombaranya.” 29 Thitho movwelana na vyavaeletu Esaya onga, “Yohova* wa magulu akhondo adhulu a-akonde a-ni-iyedha mbumba* nakale ninga Sodoma, thitho nakale saasawa na Gomora.”

30 N’nga niongen’ni veva? Angalive ira atu amaziza enango kata-arenle longomano, aliwa tatookala olongomana namwasa wa iroromelo. 31 Mbwenye angalive ira Aisraeli tanoo-arela lamulo la longomano, aliwa kataodile a-rela lamulo la longomano. 32 Namwasa wan’ni? Namwasa oi aliwa tathuulela ira anooda li-arela muvyoira viwa, a-kala mwairoromelo. Aliwa tatoogwegweduwa na “libwe logwegweduwi-a.” 33 Movwelana na vinoonga malemba ira: “Miyo ndinodha e-la mu Ziyoni libwe logwegweduwi-a na losukwali-a, mbwenye mutu unofuna roromela libwelo kanodha sukwala.”

10 Abali, yongo inofunechecha miyo rimani mwanga thitho lobelo langa losembezela wa Nlungu toi atu aziza langa tavulumuchiwe. 2 Namwasa oi ndinowairela umboni ira mbodhivelela vom’labela Nlungu, mbwenye katinom’mwidhiwa pama. 3 Thitho namwasa o-oidhiwa longomano la Nlungu, aliwa katagonjele longomanolo mbwenye tatoofuna kaathi-a liwalene. 4 Kristu khumala wa Ilamulo, ira mutu uliwethene ororomela akale olongomana.

5 Mose atoolemba ira mutu uliwethene unoirana vyongo vyolongomana movwelana na Ilamulo: “Unodha kaana ingumi namwasa oirana vyevi.” 6 Mbwenye vya longomano loi linodha namwasa wa iroromelo, malemba anoonga ira: “Rimanimwaa kuongenga ira, ‘N’nga mbaani unofuna dhowa dhulu?’ ira amathithi-e Kristu. 7 Venango ira, ‘N’nga mbaani unofuna dhowa lindini?’ ira amavenyathi-e Kristu.” 8 N’nga lemba linoonga a-vi? Linoonga ira: “Madhu a Ilamulwao ali vaduzi nanyo, ali mwano mwinyu na rimani mwinyu,” enala ndi “madhu” airoromelo anolaleela i-yo. 9 Namwasa oi akala unolaleela ‘madhu ali mwano mwaao,’ oi Yesu ndi Mbwiye, thitho rimanimwaa unororomela ira Nlungu atoom’venyathi-a, unodha vulumuwa. 10 Ira mutu akale olongomana unofwanela kaana iroromelo rimanimwee, mbwenye na valomonivee unolaleela vakwecha vya iroromeloyee ira avulumuwe.

11 Vatokala lemba n’nango linoonga ira: “Kavali unororomela liye unofuna dhasukwala.” 12 Kavali i-yana vari va Muyuda na Mugiriki, voi othene enao Mbwiiwa ndi m’mbo-ive, oi unova-a mo-oumeleliwa wa othene anoitana dhinalee. 13 Namwasa oi “Mutu uliwethene unoitana dhina la Yohova* unodha vulumuwa.” 14 N’nga unaitane a-vi dhinalee akala kanom’roromela? N’nga unam’roromele a-vi akala kanavwevo vya liye? N’nga unavwe a-vi vya liye va-akale mutu olaleela? 15 N’nga unalaleele a-vi akala karumiwile? Vili ninga munoongela malemba ira: “Manyalo aatu anolaleela milanyu yapama ya vyongo vyapama, mbobaleya maningi.”

16 Angalive ira vili e-no, kai othene avuruwan’ne milanyu yapama. Namwasa oi Esaya atoonga ira: “Yohova,* n’nga mbaani aroromele vyavwide liye wa i-yo?” 17 Ee-no mutu unokaana iroromelo namwasa wa vyongo vivwide liye. Thitho vyongo vivwide liyevyo, vinokhumela mumadhu oonga vya Kristu. 18 Ndinofuna ndifuke ira, N’nga uvwa katavwide? Voi “madhwiwa tatoovweya vailambo yothene yavathi, thitho milanyuiwa yatoovweya fiyedha magomelo ailambo yavathi weo uli atu.” 19 Thitho ndifuke ira, n’nga pyaimbarimbari ira Aisraeli kataidhi? Yoroma Mose aongile ira: “Ndinodha uiri-ani kaana bivu khumela waatu amaziza enango thitho ndinodha uiri-ani thakaleliwa maningi khumela waatu amaziza o-okaana zelu.” 20 Mbwenye Esaya atoonga molimba rima maningi ira: “Ndatoogumana naatu oi voroma katandisakasaka. Ndatooidhiweya waatu oi katafuka vya miyo.” 21 Mbwenye voonga vya Aisraeli liye aongile ira: “Nditothapula mandhanga dambo lothene waatu o-ovwela na aurambwe.”

11 Ndinofuna ndifuke ira, n’nga Nlungu atookonda atwee? Mwaimbarimbari khabe. Voi miyo thitho ndili m’mbo-i wa Israeli, mbumba* ya Abrahamu, wa ziza la Bejamim. 2 Nlungu kaakondile atwee aaidhi liye voroma. N’nga kamunoidhiwa vinoonga lemba n’nango vyokhuza Eliya, vahora yasembezela liye Nlungu moruni-ana na Aisraeli? Liye aongile ira: 3 “Yohova, aliwa atopha anamaongelinyu nogwi-a viguwa vinyu vya sembe moi ndi-adhi ndekhene baa-i. Va-eeni tatoroma ndisaka ira tandiphe.” 4 N’nga Nlungu am’mwandenle n’ni? Am’mwandenle ira: “Miyo nditokaana atu 7.000 oi katinarome kokorelavo Baala.” 5 Vahora ino thitho vatokala atu enango oyeva asakuliwile moriya rima ulukhulu wa Nlungu. 6 Ee-no akala atosakuliwa moriya rima ulukhulu, katisakuliwile namwasa wa mabasiwa khabe. Vyakala e-no, riya rima weu kunakalave ulukhulu khabe.

7 N’nga nionge a-vi veva? Ninoonga ira yasakasaka Aisraeli kataifwaidhe, mbwenye atu osakuliwa mbaifwaidhe. Atu enangwao tatooumi-a mirimiwa. 8 Ninga munoongela malemba ira: “Nlungu utoairi-a gona irulo ilukhulu mwauzimu, utoava-a metho o-oona na mabaru o-ovwa, fiyedha va-eni.” 9 Thitho Davide aongile ira: “Meziwa ikale go-i, yoagwegweducha na yongo yowalanga. 10 Methwiwa akaena isi ira ta-aone, thitho hora dhothene muorami-e mithaniwa.”

11 Ndinofuna ndifuke ira, n’nga tatoogwegweduwa fiyedha gwelatu? Khabe. Mbwenye namwasa odawa wiwa atu amaziza enango tatoofwanya ivulumucho, thitho vyevi vitoiri-a ira atu odawao takaena bivu. 12 Akala dawa wiwa unodhi-a fuma vailamboi thitho akala yeva wiwa unothapulela fuma wa atu amaziza enango, kuongela ira vanodhakala maraeli-o manjinji namwasa oinjiva wiwa.

13 Va-eni ndinoongana nyo atu amaziza enango. Voi ndili rumiwi orumiwa waatu amaziza enango, ndinolemeza urumiwanga, 14 ira venango ndiiri-e atu aziza langa kaana sanje, novulumucha enango a aliwa. 15 Akala Nlungu utokaathei-a rendele vailambo namwasa okondiwa wiwa, kuongela ira tadhawacheliwa vinodhakala ninga tatoavenyathi-a. 16 Thitho akala pau yomeya yaveleliwile sembe ninga yova-a yoroma njochena, kuongela ira pau yotheniyo njochena thitho. Akala chichi ngochena, kuongela ira tambidhee thitho tochena.

17 Mbwenye akala tambi dhinango dhatoogwandiwa, thitho angalive ira we uli tambi ya muri wa maolivi wa-angani, watoo-eliwa vari vatambi dho-ala thitho watooroma fwanya vyothene vyofuneela khumela wu chichi wa muri wa maolivuo, 18 kudhiulukhuli-e namwasa wa tambi dhagwandiwiledho. Mbwenye akala unodhiulukhuli-a uthuulelenga ira kai we unokami-a chichi, mbwenye chichi ngunokami-a we. 19 Venango unoonga ira: “Tatoogwandavo tambi dhinango ira ta-elevo miyo.” 20 Vyevyo pyaimbarimbari. Aliwa tatoogwandiwa namwasa oi katana iroromelo, mbwenye we ulive vaimurinivo namwasa wa iroromelo. Moi e-no u-iye dhiulukhuli-a, mbwenye uthonyi-edhe ira uli oova. 21 Namwasa oi akala Nlungu kaalevelele tambi dhapwethile vevo, we thitho kunodha leveleliwa. 22 Uthuulelenga riya rima na a-levelela wa Nlungu. Atu agwide Nlungu kaalevelele, mbwenye we watoothonyi-edhiwa, riya rima. Ukaleve ofwanelela thonyi-edhiwa riya rima. Mbwenye wa-aire e-no, naweene thitho unodhagwandiwa. 23 Aliwa taroma kaana iroromelo, anodha e-liwa vaimurinivo, namwasa oi Nlungu unodha aweli-edha okoka vali aliwa. 24 Akala weyo wagwandiwile vamuri wa maolivi unomelecha angani, no-eliwa wu muri wa maolivi oira dhaliwa, vinokala vyo-orucha weleli-edha tambi wagwandiwile aliwa.

25 Abali ndinofuna ira muidhiwe vya segeredo yen’na yopambuleya, ira mwa-adhionenga ira muli atu azelu. Segeredwee njoi atu enango amu Israeli atoumi-a mirimiwa, vyevi vinongo ireya fiyedha numero yothene yaatu okhumela maziza enango yakwakwanela. 26 Aisraeli othene anodha vulumuchiwa mwandhila yen’na movwelana na vinoonga malemba ira: “Namavulumucha unodhakhumela mu Ziyoni thitho unodha mali-a vyongo vyothene vyothakala wa ziza la Yakobo. 27 Leli ndi vwelano linofuna miyo dhaira na aliwa ndadhaakhumi-edha vyodawa viwa.” 28 Pyaimbarimbari ira aliwa ndi amwidani amilanyu yapama thitho vyevi vitoukami-ani. Mbwenye Nlungu utoasakula noadhiveliwana namwasa wa anamabaliwa awale. 29 Nlungu kanodha dungunya namwasa wa vyotuvavyee thitho namwasa oi atoaitana. 30 Nyo mwali o-ovwela Nlungu, mbwenye va-eni mutothonyi-edhiwa tangaranga namwasa wa vwela wiwa. 31 Aliwa va-eni mbo-ovwela thitho Nlungu utouthonyi-edhani tangaranga. Mbwenye unooda athonyi-edha thitho tangaranga ninga mwairele liye na nyo. 32 Nlungu utorumeli-a atu othene ira takale adhaari o-ovwela ira othene enao aathonyi-edhe tangaranga.

33 Mwaimbarimbari, maraeli-o anovelela Nlungu mboinjiva maningi. Zeludhee todi-a, thitho liye ngoidhiwa vyongo maningi. Moda unotonga liye ngorucha uvwechecha, n’nga mbaani unazindiyele ndhiladhee? 34 “N’nga mbaani unoidhiwa mathuulelo a Yohova? Venango mbaani unakale namalangi-ee?” 35 Venango thitho “mbaani uromile m’va-a yongo, ira liye am’mweli-edhe?” 36 Namwasa oi vyongo vyothene vinokhumela wa liye, ndi liye aviphanduchile thitho pyee. Atitimi-iwe modhowa nodhowa. Ame.

12 Ee-no abali ndinousembezelani mwatangaranga ilukhulu ya Nlungu ira muvelele manungwinyu ninga sembe yaingumi, yochena na yorumeleya wa Nlungu yoi nguurumiwi opambuleya vo-indi-edha basa dodoliso lothuulela. 2 Kamu-arelenga zelu dhamalamboano, mbwenye mukaena umutu upya vochinja mathuulelwinyu ira muzindiyele ifunelo ya Nlungu, yapama, na yorumeleya wa liye.

3 Namwasa oriya rima ulukhulu wandithonyi-edhe Nlungu, ndinowandela uliwethene wa nyo weo ira kamudhithuulelenga mokwaranya munofwanela nyo dhithuulela. Mbwenye mutu uliwethene athuulelenga mwazelu modhitonga movwelana na iroromelo yam’va-idhe Nlungu. 4 Tutu litokaana vyano vinjinji, mbwenye vyanovyo kavinolaba basa limbo-ive. 5 Saasawa thitho na i-yo, angalive ira nili anjinji, nili tutu limbo-i mwa Kristu thitho nili vyano vyo-indana. 6 Nitokaana vyotuva vyo-iyana-iyana movwelana na riya rima ulukhulu wathonyi-edheliwe i-yo. Ee-no akala nitokaana yotuva yoonga ulosi dhoweni nionge movwelana na iroromelwi-u. 7 Akala nitokaana yotuva ya urumiwi, dhoweni niuwirenga urumiuo. Mutu unofunji-a, adhowenganave funji-a. 8 Mutu unolimbi-a, adhowenganave limbi-a. Unogawa, agawenga mo-oumeleliwa. Unosogolela, asogolelenga mwathindhi. Thitho unothonyi-edha tangaranga airenga vyevyo mosangalala.

9 Udhivelinyu kukalenga wa inyengo. Muthakaleliwengana vyongo vyothakala nodhilimbi-edha irangana vyongo vyapama. 10 Vodhiveliwana abali, mukaengana udhivela waimbarimbari. Vothonyi-edhana lemezo, mukalenga oroma. 11 Mukale athindhi a-kala apwadho. Mukale olimba mosogoleliwa na zimu. Mum’labele Yohova ninga adhaari. 12 Musangalale namwasa wa idedi-edho. Muvilelenga mwagumanana nyarwa. Mudhowenganave lobela. 13 Mugawanenga na abali vyongo vinanyo movwelana na vyoramburela viwa thitho muwachelenga alendo. 14 Mudhowenave raeli-a atu anou-ara-arani, mwaaraeli-enga a-kala atembelela. 15 Musangalalenga naatu anosangalala thitho mulenga naatu anola. 16 Muonenga atu enango ninga munodhionela nyo. Kamuthuulelenga modhiulukhuli-a, mbwenye mukaena rima odhiyevi-a. Kamudhionenga ninga muli atu azelu maningi.

17 Kamuweli-edhe yongo yothakala wamutu uuwireleni yongo yothakala. Muthuulelenga vyongo vinoona atu othene ira pyapama. 18 Akala pyoodeya mudhilimbi-edhe munaodele nyo ira mukalenga mwarendele naatu othene. 19 Abali odhiveliwiwa, kamuweli-edhe yothakala, mbwenye mu-iyedhe Nlungu, namwasa oi malemba anoonga ira: ‘“Weli-edha kwanga, ndinodha weli-edha miyo,’ uongile ngu Yohova.” 20 Mbwenye “akala mwidanaa utokaana ndhala, um’va-e yodya. Akala utokaana tona, um’va-e ma-inje omwa. Namwasa oi waira vyevi unokala ninga uto-ela makala amulo vamuruvee.”* 21 Kamurumeli-e ira yothakala yuugonji-eni, mbwenye mudhowenave gonji-a yongo yothakala voirana yapama.

13 Mutu uliwethene avwelenga andimuwa a anamatonga, namwasa oi kavali utongi ulivo mo-orumeli-iwa na Nlungu. Anamatonga alivwala ali mamburoni mwiwa mo-iyana-iyana morumeli-iwa na Nlungu. 2 Ee-no mutu unoruni-ana na anamatonga, unoruni-a masaka-edho a Nlungu. Thitho mutu unoruni-a masaka-edho a Nlungu unodhatongiwa. 3 Namwasa oi anamatonga anoophi-a akala unoira vyongo vyothakala, a-kala wairanga vyongo vyapama. Akala unofuna ira wa-aovenga anamatonga, udhowenave irangana vyongo vyapama thitho aliwa anodha usimba. 4 Anamatongao ndi anamalaba a Nlungu ira taukami-eni. Mbwenye akala unoirana vyothakala, uove namwasa oi aliwa atokaana kopolo, voi aliwa ndi anamalaba a Nlungu anolanga mutu unoira vyongo vyothakala.

5 Ee-no vatokala mwasa wapama wogonjela a-kala namwasa oova langiwa mbwenye thitho namwasa wa ithuulela rima inyu. 6 Ngumwasiwa munokhomecha misoko, voi aliwa ndi anamalaba a Nlungu thitho anolikwakwaneli-edha pama basa leli hora dhothene. 7 Muvelelenga waatu othene vinofuna aliwa. Unofuna soko, m’va-eni soko. Unofuna kobiri ya sokosoko, m’va-eni kobiri ya sokosoko. Unofuna oviwa, m’moveni. Unofuna lemeziwa, m’lemezeni.

8 Kamukaena mangawa na mutu uliwethene, mbwenye mudhivelengana, voi mutu unodhiveliwana fwee utokwakwaneli-edha lamulo. 9 Namwasa oi malamulo anoonga ira, “Kuraruwe, kuphe mutu, kube, kusilile mwabivu,” thitho na malamulo enango alivo, madwee ogwandela mbaala: “Um’dhiveliwengana fwaa ninga munodhidhiveliwana we wekhene.” 10 Mutu waudhivela kanam’mwirela fwee vyongo vyothakala, mbwenye udhivela unom’kami-a mutu ira akwakwaneli-edhe lamulo.

11 Muire vyevi namwasa oi mutoidhiwa hora ili i-yo ila ira nili muhora yoi nivenyathi muirulo, namwasa oi ivulumucho yi-u ili duzi maningi i-yani-ana hora yaroma i-yo roromela. 12 Undhe wu-adhi vang’ono funa ucha thitho ni-adhi vang’ono funa fiya nathana. Ee-no dhoweni niunguleni mabasa aisi mbwenye niwareni mabasa anjeza. 13 Dhoweni nikaena kalelo lofwanelela ninga atu anoira vyongo nathana. Nirambelenga mafesta o-ofwanelela, simbwa umwa, unyambi, kalelo lova-a manyadho, kangana na bivu. 14 Mu-arelenga* Mbwiye Yesu Kristu thitho kamukozeelenga irana vinofuna manungo.

14 Muwachele mwapama mutu ufookile mwairoromelo, thitho kamutongenga mutu una mathuulelo o-iyana na inyu. 2 Mutu mwinango unokaana iroromelo yoi unooda udya yongo iliyothene, mbwenye mutu ofooka muiroromelo unodya mathamba baa-i. 3 Mutu unodya iliyothene kanyozenga mutu unokonda a-dya iliyothene, thitho mutu unokonda a-dya iliyothene katongenga mutu unodya iliyothene, voi liye utowacheliwa na Nlungu. 4 N’nga we uli ani ira utongenga namalaba wa fwaa? Ndi patarawee una izo yom’tonga ira ngodawa venango o-odawa namwasa oi Yohova* unooda m’kami-a ira akale olimba.

5 Mutu mwinango unooda ona ira dambo n’nango tofuneya maningi kwaranya n’nango, mbwenye mutu mwinango unooda ona ira malambo othene mbofwanafwana. Ee-no mutu uliwethene asimikizelenga ira vinororomela liyevyo pyolinyali. 6 Mutu unoona ira dambo n’nango tofuneya maningi kwaranya n’nango, unoira vyevyo vofuna m’lemeza Yohova. Mutu unodya yodya iliyothene, unodya ira am’lemeze Yohova, namwasa oi unom’simba Nlungu. Mutu unokonda a-dya iliyothene, unoira vyevyo vofuna m’lemeza Yohova, namwasa oi naliyene thitho unom’simba Nlungu. 7 Onga mwaimbarimbari, kavali mutu uliwethene una ingumi ira adhilemeze ekhene, thitho kavali mutu unokwa ira adhilemeze ekhene. 8 Nakaana ingumi, ninokalela namwasa wa Yohova,* thitho nakwa, ninokwela Yohova. Ee-no nakaana ingumi venango nakwa, nili a Yohova. 9 Ngumwasiwa Kristu atookwa nokaana okoka ingumi, ira akale Mbwiye waatu okwa na aingumi.

10 N’nga mwasiwa ngwan’ni unom’tonga balaa? Venango mwasiwa ngwan’ni unom’nyoza balaa? Voi i-yo nothene ninodha imela vasogolo vapando otongela miselu wa Nlungu. 11 Ninga munoongela Malemba ira: ‘“Vali miyo Nlungu waingumi,’ uongile ngu Yohova,* ‘atu othene anodha ndikokorela, thitho lumi nlilothene linodha rumela vakwecha ira miyo ndili Nlungu.’” 12 Ee-no uliwethene wa i-yo unodha wakula ekhene wa Nlungu.

13 Kanitongengana, mbwenye malomwee musimikizele rima ira kamuirena yongo iliyothene inasukwali-e venango gwegweducha balinyu. 14 Nditoidhiwa thitho ndinororomela mwa Mbwiye Yesu ira kavali yodya yoi vaokhene chothakali-iwa. Mbwenye akala mutu mwinango unoona ira yodya inango chothakali-iwa, iliyothakali-iwa wa liye. 15 Namwasa oi akala balinyu unosukwala namwasa wa yodya, kuongela ira kamunothonyi-edha udhivela. Kamunonge mutu um’kwele Kristu namwasa wa vyodya vinyu. 16 Ee-no kamurumeli-e ira atu taongenga vyongo vyothakala va vyongo vyapama vinoiranyo. 17 Namwasa oi vamwasa ovolowa mu Umwene wa Nlungu yofuneya maningi kai udya venango umwa, mbwenye longomano, rendele na imwerumweru inodha na zimu ochena. 18 Mutu uliwethene unom’labela Kristu mwandhila yen’na ngorumeleya wa Nlungu na waatu.

19 Ee-no dhoweni nidhilimbi-edhe kala mwarendele nolimbi-ana. 20 Mu-iye nonga basa la Nlungu namwasa wa yodya baa-i. Pyaimbarimbari ira vyongo vyothene pyochena, mbwenye akala mutu mwinango unosukwala na vyodyavyo, kai pama vidya. 21 Ndipama a-dya nyama venango a-mwa vinyu venango thitho aira iliyothene inom’sukwali-a balaa. 22 Iroromelo ina we, uibarele vamethoni va Nlungu. Mutu unokala osangalala asakula vyongo mundhila yofwanelela. 23 Mbwenye akala mutu unodya yodya wu akaikelanga, wenuo utokaana landu, namwasa oi kanodya movwelana na iroromeloyee. Mwaimbarimbari, yongo iliyothene inoiriwa mo-ovwelana na iroromelo chodaweya.

15 I-yo oi nili olimba muiroromelo ninofwanela thuulelanga atu ana iroromelo yofooka, a-kala dhidhiveliwi-anga okhene. 2 Mutu uliwethene wa i-yo adhilimbi-edhenga m’dhiveliwi-a fwee thitho airengana vyongo vyom’limbi-a. 3 Namwasa oi masiki Kristu kaaira vyongo vyom’dhiveliwi-a ekhene, mbwenye anooira vinoonga Malemba ira: “Iburutu ya atu anounyozani itondifiyedhela.” 4 Vyongo vyothene vyalembiwile walelene vyalembiwile ira vinilangi-e. Malembala anonikami-a ira nivilele nonilimbi-a, naifunelo yoi nikaena idedi-edho. 5 Ee-no Nlungu unoniva-a kopolo ira niode vilela thitho unonididili-a, aukami-eni nyo mwethene ira mukaena mathuulelo ninga ana Kristu Yesu, 6 ira mwethene vambo-i thitho movwelana, mum’lemeze Nlungu, Baba wa Mbwii-u Yesu Kristu.

7 Ee-no muwachelengana, ninga mwaniwachelele Kristu, ira nititimi-e Nlungu. 8 Onga vyaimbarimbari, Kristu atookala rumiwi waatu oineliwa ira asimikizele ira Nlungu ngororomeleya vothonyi-edha ira vyolanyedha vyalanyedhile Nlunguo wa anamabaliwa pyosikimizeleya. 9 Thitho ira atu amaziza enango talemeze Nlungu namwasa wa tangarangee, movwelana na vinoonga Malemba ira: “Ngumwasiwa ndinodha ulemezani vari vamaziza aatu thitho ndinodha omba nyumbo dhotitimi-a dhina linyu.” 10 Thitho Malemba anoonga ira: “Nyo atu amaziza enango, mudhiveliwe vambo-i na atwee.” 11 Anodhowanave onga ira: “Mum’titimi-e Yohova, nyo atu amaziza othene thitho atu othene tam’titimi-e.” 12 Thitho Esaya aongile ira: “Vanodha kala chichi wa Jese, thitho unofuna dhaoneela ira adhatonge maziza, atu amaziza anodha-ela idedi-edhoiwa va liye.” 13 Nlungu unovelela idedi-edho aukami-eni kala osangalala maningi nokaana rendele vahora inom’roromelanyo, ira mukaena idedi-edho yakopolo mokami-iwa na zimu ochena.

14 Abalanga, miyo kandinokaikela ira nyo muli okozeya irana vyongo vyapama munoidhiwa vyongo vinjinji thitho munooda langi-ana. 15 Mbwenye nditoulembelani makhundo enango mo-ovira khundu ira nduuthuucheni. Ndinoirana vyevi namwasa oriya rima ulukhulu undithonyi-edhe Nlungu. 16 Atoondithonyi-edha riya rima weu ira ndilabe basa lomwadha milanyu yapama ya Nlungu ninga namalaba wa Kristu Yesu, olabela atu amaziza enango. Ndinolaba basa lopambuleyali ira atu amaziza enangwala takale ninga sembe yorumeleya wa Nlungu icheni-iwile na zimu ochena.

17 Ee-no ndili osangalala kala nama-arela wa Kristu Yesu nolaba basa la Nlungu. 18 Kandinodha onga iliyothene iirile miyo ndekhene, mbwenye ndinodha onga viirile Kristu noonga dhela mwamiyo ira ndikami-e atu amaziza enango kala ovwela. 19 Aliwa tatoovwela namwasa wa vyodabwi-a vyakopolo na vizindiyelo vyairile zimu wa Nlungu. Ee-no nditolaleela mokwakwanela milanyu yapama yoonga vya Kristu romela wu Yerusalemu mafiya wu Iluriko. 20 Voirana vyevi ndatoosimikizela rima ira nda-alaleele milanyu yapama ulimburo loi atu atomala idhiwa vya Kristu naifunelo yoi nda-amange vamadhi mutu mwinango manga nyumba, 21 mbwenye ndiire movwelana na vinoonga Malemba ira: “Atu akondile a-wandeliwavo vya liye anodham’mona, thitho akondile a-vwavo vya liye anodha zindiyela.”

22 Ngumwasiwa ndikanle ndiimwanangana udha wa nyo. 23 Mbwenye va-eeni kavali tatamo likondile miyo a-fiyao mu visa vyevi, thitho wa vyawa vinjinji ndikanle ndifunanga dhauonani weo. 24 Ee-no nditokaana iroromelo ira ndadhadhowanga wu Espanya ndinodha uwonani thitho nadhawaredha wahora yoyeva, ndinofuna ira mudhandivelele vang’ono vaulendwanguo. 25 Mbwenye va-eni ndi-adhi vag’ono ira ndidhowe wu Yerusalemu malabela abali.* 26 Abali awu Masedoniya nawu Akaya atovelela mosangalala vyotuva viwa wa abali enango awu Yerusalemu oi mbosauwa. 27 Pyaimbarimbari ira aliwa tatoirana vyevyo mofuna wiwa, namwasa oi aliwa tali ninga tatookaana mangawa wa aliwa. Akala atu amaziza enango tatowachela vyongo vyauzimu khumela wa abalao, aliwa thitho anofwanela ava-a abalao vyongo vyofuneya vaingumi. 28 Ee-no ndadhowa magawa vyongovi, ndinovirana weo vodhowa wu Espanya. 29 Mbwenye ndinoidhiwa ira ndadhafiya waninyuo ndinodha fiyana maraeli-o manjinji okhumela wa Kristu.

30 Ee-no abali, ndinouvephani dhela mwa Mbwii-u Yesu Kristu na udhivela wa zimu, ira mudhowenave ndilobelela wa Nlungu thitho miyo ndinodhowanave lobela. 31 Nidhowenave lobela ira ndimavulumuchiwe waatu o-ororomela awu Yudeya thitho ira abali awu Yerusalemu tamawachele pama yotuva itukunle miyo. 32 Akala Nlungu unorumela, ndinodhadha wanyo mosangalala thitho ninodha limbi-ana. 33 Nlungu oi unovelela rendele akale na nyo mwethene. Ame.

16 Ndinofuna uidhiwi-ani vya rongoli-u Febe, wenuo unolaba mupingo wau Sekreya. 2 Mum’mwachele mwa Mbwiye ninga munowachelela nyo abali thitho mum’kami-e va iliyothene inofuneela liye. Namwasa oi liye atoobarela abali anjinji, thangani-avo miyo.

3 Anamalaba afwanga volabela Kristu Yesu Piriska na Akila tamalimbe manungo. 4 Aliwa tatoo-ela vingumi viwa vangovini namwasa wa miyo, thitho kai miyo ndekhene unoasimba, mbwenye thitho na mipingo yothene ya atu amaziza enango. 5 Ndinomwenyula thitho pingo unogumanyeya vandheviwa. Ndinomwenyula balanga Epeneto, oi ndi m’mbo-i mwa anamafunjedha oroma a Kristu wu Aziya. 6 Ndinomwenyula Mariya, wenuo ukadhi airanga vyongo vinjinji voukami-ani. 7 Ndinomwenyula Androniko na Juniya, oi mbaabalanga na anyaperezo afwanga. Aliwa ndi alombwana oidhiweya maningi wa arumiwi thitho mbaromile kala anamafunjedha a Kristu wahora yolapela kwaranya miyo.

8 Ampiliatu, odhiveliwiwa wanga mwa Mbwiye amalimbe manungo. 9 Ndinomwenyula thitho Urbano namalaba fwi-u mwa Kristu na odhiveliwiwa wanga Estako. 10 Ndinomwenyula Apele oi ngororomeleya mwa Kristu, naatu abanja la Aristobulo. 11 Ndinomwenyula balanga Herodiyona naatu abanja la Narisizo oi mba anama-arela a Mbwiye. 12 Ndinomwenyula Trufena na Trufosa, a-iyana anolaba basa mwathindhi volabela Mbwiye. Ndinomwenyula Peresida odhiveliwiwa wi-u. I-yana wen’na utolaba basa mwathindhi volabela Mbwiye. 13 Ndinomwenyula Rufu, osakuliwa mwa Mbwiye. Ndinomwenyula thitho m’mee oi ngu m’manga. 14 Ndinomwenyula Asunkiritu, Felego, Herme, Patroba, Heme vambo-i na abali ana aliwa. 15 Ndinomwenyula Filologo na Juliya, Nereu na rongolee thitho Olimpa na abali othene ali vambo-i na aliwa. 16 Mumwenyulane mwaudhivela. Thitho mipingo yothene ya Kristu inaaumwenyulani.

17 Va-eni ndinoulimbi-ani abali, ira muire polepole naatu anogawei-a afwiwa thitho anoira vyongo vyosukwali-a atu enango. Vyevi pyo-ovwelana na vyafunjedhile nyo, ee-no munofwanela arambanga. 18 Namwasa oi atu enao kai adhaari a Mbwii-u Kristu, mbwenye ndi adhaari a vyofuna viwa.* Thitho ano-indi-edha basa madhu okopa na ainyengo ira tavandhuche atu o-odawa. 19 Atu othene anoidhiwa ira muli ovwela thitho ndinosangalala na nyo namwasa wa vyevi. Mbwenye ndinofuna ira mukale azelu va vyongo vyapama, o-odawa va vyongo vyothakala. 20 Mo-odembuwa Nlungu oi unovelela rendele unodha m’pwanya Satana vathi va manyalwinyu. Riya rima ulukhulu wa Mbwii-u Yesu ukale na nyo.

21 Namalaba fwanga Timoteo unaaumwenyulani, munomwenyuliwa thitho na Lusiyo, Yasoni na Sosipatero oi ndi abalanga.

22 Miyo Tersiyo ulembile kartali, ndinoumwenyulani mwa Mbwiye.

23 Gayo oi ndinokala nyumbaniwee thitho pingo unogumanyeyecha nyumbaniwee, unaaumwenyulani. Naliyene thitho Erastu oi ngunamaing’anela kobiri dha sidadi na balee Kwarito, anaaumwenyulani. 24 ——

25 Nlungu unoulimbi-ani vo-indi-edha basa milanyu yapama inolaleela miyo na milanyu inolaleiwa yoonga vya Yesu Kristu. Milanyuila njovwelana no vwei-iwa wa segeredo yavakhundu yoi yali yolokoteya wa hora yolapela. 26 Mbwenye va-eni segeredo yen’na itoidhiweya waatu amaziza othene dhela mu maulosi ofwanyeya Malembani. Vyevi pyovwelana na lamulo la Nlungu odhowa nodhowa thitho ifuneloyee choi atu amaziza othene tam’vwelenga dhela mwairoromelo. 27 Nlungu baa-i oi ngwazelu maningi, atitimi-iwe modhowa nodhowa dhela mwa Yesu Kristu. Ame.