KARTA LOROMA LODHOWA WA AKORITIYO

1 Miyo Paulo, wosakuliwa kala rumiwi wa Kristu Yesu movwelana na ifunelo ya Nlungu vambo-i na bali-u Sostene, 2 ndinolembela nyo a pingo wa Nlungu wu Koritiyo, mucheni-iwile mwa Kristu Yesu, nyo muitaniwile ira mukale ochena, vambo-i na atu othene ali wu limburo nlilothene anoitana vadhina la Mbwii-u Yesu Kristu, liye ndi Mbwiiwa na Mbwii-u.

3 Nlungu Babi-u na Mbwii-u Yesu Kristu tauva-eni riya rima ulukhulu na rendele.

4 Hora dhothene ndinom’simba Nlungwanga, voona riya rima ulukhulu wauthonyi-edheleni liye dhela mwa Kristu Yesu. 5 Namwasa ovwelana naliye, muli ofuma muvyongo vyothene, thitho utoukami-ani kaana dodoliso loonga noidhiwa vyongo vyothene, 6 voi umboni* oonga vya Kristu utokaatheya vari vinyu. 7 Mutokaana yotuva yokwakwanela vanodedi-edhela nyo mwa ifunelo ona oneela wa Mbwii-u Yesu Kristu. 8 Thitho Nlungu unodha ulimbi-ani fiyedha khomoni, ira mwa-akaena myasa younukhedhani vadambo la Mbwii-u Yesu Kristu. 9 Nlungu auitaneni ira mukale ovwelana na Mwanee Yesu Kristu Mbwii-u, ngororomeleya.

10 Va-eni ninousembezelani abali, mu dhina la Mbwii-u Yesu Kristu, ira mwethene muongenga movwelana thitho vari vinyu kavakale gaaneya, mbwenye mukale ovwelana maningi vokaana rima umbo-ive na mathuulelo mambo-ive. 11 Namwasa oi atu enango a banja la Kulowe atondiwandela vya nyo abalanga, ira vari vinyu vatokala gaaneya. 12 Ndinothapulela ira, atu enango mwa nyo anoonga ira: “Miyo ndili wa Paulo,” enango anoonga ira, “Miyo ndili wa Apolo,” enango thitho anoonga ira, “Miyo ndili wa Kefa,” voi enango thitho anoonga ira, “Miyo ndili wa Kristu.” 13 N’nga Kristu ngogaaneya? N’nga Paulo atoothomeiwa vaimurini yoonelavo nyarwa* ira nyo muvulumuchiwe? N’nga venango mwabadiziwile mudhina la Paulo? 14 Ndinosimba Nlungu ira kandabadizile mutu uliwethene wa nyo khumi-avo Kirisipo na Gayo, 15 moi kavali mwinango unofuna onga ira mwabadiziwile mudhina langa. 16 Pyaimbarimbari ira ndatoobadiza thitho atu a vanyumba ya Sitefana. Mbwenye vya atu enangwao, kandinoidhiwa akala ndatoobadizavo mutu uliwethene waaliwa. 17 Kristu kandirumile ira ndibadizenga atu, mbwenye ira ndilaleelenga milanyu yapama, a-kala mwadodoliso loonga,* ovela ira imuri yoonelavo nyarwa* ya Kristu inokala yo-okaana basa.

18 Mwasa okhuza imuri yoonelavo nyarwa, ndiyongo yopupwa waatu anofuna dhowa manongiwa, mbwenye wa i-yo anovulumuchiwa, yen’na ndi kopolo ya Nlungu. 19 Namwasa oi Malemba anoonga ira: “Ndinodha mali-a zelu dha atu azelu thitho ndinodha konda wenjela waatu azelu.” 20 N’nga wazelu uli wani? N’nga mulembi uli wani? N’nga oidhiwa runi-a wahora ino* uli wani? N’nga Nlungu kairi-idhe ira zelu dha ilamboi dhikale dho-okaana basa? 21 Namwasa onyindela zelu dhiwa atu ailambo katifiile vom’mwidhiwa Nlungu. Malomwee, Nlungu atoona ira pyapama vulumucha atu ororomela dhela mumilanyu inoona atu enango kala yo-okaana basa.

22 Ayuda anofuna ona vizindiyelo thitho Agiriki anosakasaka zelu. 23 Mbwenye i-yo ninolaleela vya Kristu wenuo aphiwile vothomeiwa vaimuri yoonelavo nyarwa. Ayuda anoona ira vyevi pyosukwali-a mbwenye atu amaziza enango anoona ira vyevi pyo-okaana basa. 24 Angalive ira vili e-no, Ayuda na Agiriki aitaniwile anoona ira Kristu ndi kopolo ya Nlungu na zelu dha Nlungu. 25 Namwasa oi yongo ya Nlungu inoona atu ira cho-okaana basa chazelu kwaranya atu, thitho yongo ya Nlungu inoona atu ira chofooka chakopolo kwaranya atu.

26 Abali munooda ona ira aitaniwile vari vinyu kai anjinji anooniwa naatu ira mbazelu, thitho kai anjinji ali akopolo, kai anjinji akhumele mabanja olemezeya. 27 Mbwenye Nlungu atoosakula atu anooniwa na ilambo ira mbo-okaana zelu, ira ava-e manyadho atu azelu, thitho Nlungu atoosakula atu anooniwa kala ofooka ira ava-e manyadho atu akopolo. 28 Nlungu atoosakula vyongo vinooniwa na ilambo ira vyo-okaana basa na vyongo vinopwaza atu, vyongo vyoi kavilivo, ira airi-e vyongo vilivo kala vyo-okaana kopolo. 29 Atooirana vyevi ira va-afwanyeye mutu ogaya vamethoni va Nlungu. 30 Mbwenye nyo muli ovwelana na Kristu Yesu namwasa wa Nlunguo. Yesuo unonithonyi-edha zelu dha Nlungu na longomanolee. Dhela mwa Yesu, atu anooda cheni-iwa, thitho dhela mu yoombolana anooda thathuliwa, 31 ira vivwelane na vinoonga Malemba ira: “Mutu unogaya, agaye mwa Yohova.”*

2 Ee-no abali, vahora yadhidhe miyo wanyo dhalaleela vya segeredo yopambuleya ya Nlungu, kandaongile mosikimizela venango mothonyi-edha ira nditokaana zelu dhodabwi-a. 2 Voi vyali miyo vambo-i nanyo ndatoosakula ira nda-aidhiwe iliyothene khumi-avo Yesu Kristu, athomeiwile. 3 Vyadhidhe miyo wanyo, ndali ofooka thitho ndanoongurumela noova. 4 Voonga nolaleela, madhwanga kaali okopa venango othonyi-edha zelu, mbwenye ali ooni-a zimu na kopolo, 5 ira mwa-aroromele zelu dhokhumela waatu mbwenye kopolo ya Nlungu.

6 Va-eeni ninoonga vyazelu waatu olimba mwauzimu, mbwenye a-kala zelu dhahora ino* venango dhaanamatonga ahora ino oi anodha nongiwa. 7 Mbwenye ninoonga vya zelu dha Nlungu dhoi ndi zelu dholokhoteya, dhinooneela mu segeredo yopambuleya. Nlungu atoosaka-edhelatu vyevi walelene, ira nititimi-iwe. 8 Kavali namatonga uliwethene wahora ino aidhiwa vya zelu dhedhi, namwasa oi aakale ira tanoodhiidhiwa, kataphe Mbwiye wa titimi-o. 9 Mbwenye movwelana na vinoonga malemba, kavali mutu aoni uvwa venango thuulela visaka-edhele Nlungu atu anom’dhiveliwana.” 10 Nlungu atoo-indi-edha basa zimwee vonithonyi-edha vyongo vyevi, namwasa oi zimu unosakasaka vyongo vyothene, masiki vyongo vyodi-a vya Nlungu.

11 N’nga ndi mutu uvi unaidhiwe mathuulelo a mutu mwinango i-yavo vili rimanimwee? Mofwanafwana na vyevi, kavali unoidhiwa mathuulelo a Nlungu, khumi-avo zimu wa Nlungu. 12 I-yo kaniwachenle zimu wa ilambo, mbwenye zimu wokhumela wa Nlungu, ira niidhiwe vyongo viniva-idhe Nlungu moriya rima. 13 Ninoonga thitho vyongo vyevi, a-kala na madhu ofunji-iwa na zelu dhaatu, mbwenye na madhu aninfunji-idhe zimu, vanoonga i-yo vyongo vyauzimu na madhu auzimu.

14 Mbwenye mutu odhiveliwana vyongo vyailambo kanorumela* vyongo vya zimu wa Nlungu, namwasa oi unoviona ira pyo-okaana basa thitho kanooda viidhiwa, namwasa oi vinofuna sakasakiwa mokami-iwa na zimu. 15 Mbwenye mutu wauzimu unosakasaka vyongo vyothene, mbwenye liye kanosakasakiwa na mutu uliwethene. 16 N’nga “mbaani unoidhiwa mathuulelo a Yohova* ira am’va-e malangi-o?” Mbwenye i-yo nitokaana mathuulelo a Kristu.

3 Moi e-no abali, kandiodile uonganani ninga atu auzimu, mbwemye ninga atu odhiveliwana vyongo vyailamboi, ninga visia-ima mwa Kristu. 2 Ndatouva-ani ukaka, a-kala yodya yothakuna, namwasa oi mwali mwa-analimbe mokwakwanela. Thitho e-ni kamunalimbeve, 3 namwasa oi munothuulelave ninga atu amuilamboi. N’nga akala munoirelana bivu thitho kangana mwekhave, kai vyaimbarimbari ira muli atu aututu thitho munowenda ninga atu ailamboi? 4 Akala mutu mwinango unoonga ira: “Miyo ndili wa Paulo,” thitho mwinango unoonga ira: “Miyo ndili wa Apolo,” n’nga kavinothapulela ira munofwanafwana naatu othene?

5 N’nga Apolo mbaani? N’nga Paulo mbaani? I-yo nili anamalaba aukami-idheni kala ororomela movwelana na basa laniva-idhe Mbwiye. 6 Miyo ndatoodhala, Apolo atoo-elela, mbwenye Nlungu ngwaulukhuli-idhe. 7 Ee-no mutu udhanle venango e-lela kai ofuneya maningi, mbwenye Nlungu oi ngunoulukhuli-a. 8 Mulimbo dhala na o-elela anolaba basa tangana ifunelo imbo-ive, mbwenye mutu uliwethene unodha wachela yotuva movwelana na basalee. 9 Namwasa oi i-yo nili anamalaba afwee a Nlungu. Nyo muli munda wa Nlungu unolimiwa, nyumba ya Nlungu.

10 Movwelana na riya rima ulukhulu wandithonyi-edhe Nlungu, ndatoo-ela sapato ninga munoirela mutu wadodoliso* vabasa lomangamanga. Mbwenye unomanga va sapatonivo ngu mutu mwinango. Ee-no mutu uliwethene aing’anecheche pama moda unomangela liye. 11 Namwasa oi kavali mutu mwinango una-ele sapato dhinango khumi-avo dhamadhi e-liwa wale, dhoi dhinoimelela Yesu Kristu. 12 Akala mutu unomanga va sapatonivo na oro, fero, mabwe apereso yavadhulu, miri, malachi na maphuru, 13 basa la mutu uliwethene linodha idhiweya ira toi a-vi. Dambo n’nango basalo linodha idhiweya moda muli aliwa, namwasa oi mulo ngunofuna dhaoni-a vyevyo vakwecha. Muluo unodha oni-a basa la mutu uliwethene ira toi a-vi. 14 Akala vimangile mutu vasapatonivo vinodha kalavove, unodha wachela yotuva. 15 Akala vimangile mutu vitovya na mulo, kuongela ira vitonongeya, mbwenye liye unodha vulumuwa. Mbwenye unodha kala ninga utovulumuwa vamuloni.

16 N’nga nyo kamunoidhiwa ira muli kachisi wa Nlungu thitho zimu wa Nlungu unokala mwari mwinyu? 17 Akala mutu utononga kachisi wa Nlungu, mutuo unodha nongiwa na Nlunguo, namwasa oi kachisi wa Nlungu ngochena thitho ngunyo.

18 Mutu kadhinami-enga. Akala mutu uliwethene wanyo unothuulela ira ngwazelu muhora ino,* akale opupwa ira akale wazelu. 19 Wa Nlungu zelu dhaatu amuilamboi to-okaana basa, namwasa oi malemba anoonga ira: “Liye unoiri-a ira atu azelu tamangeye na migo-iwa.” 20 Anoonga thitho ira: “Yohova* unoidhiwa ira mathuulelo aatu azelu mbo-okaana basa.” 21 Ee-no kavakale mutu odhiulukhuli-a namwasa waatu, voi vyongo vyothene ndi vinyu, 22 peno Paulo, Apolo, Kefa,* ilambo, ingumi, wukwa, vyongo vilivo venango vinodha, vyothene phinyu. 23 Nyo muli a Kristu thitho Kristu ngwa Nlungu.

4 Atu taodenga ona ira nili anamalaba a Kristu thitho anamalaba a masegeredo opambuleya a Nlungu. 2 Vamwasa wen’na, yofuneya wa anamaing’anela kukala ororomeleya. 3 Vyoi nditongiwe na nyo venango na tribunale lothene laatu kai ilo wa miyo. Onga mwaimbarimbari miyo kandinovitonga ndekhene. 4 Rimani mwanga kandinodhiruni-a vamwasa uliwethene, mbwenye vyevi kavinothapulela ira ndili olongomana, namwasa oi Yohova* unoona vinoira miyo. 5 Ee-no kamutonge yongo iliyothene hora ya-anakwakwane, fiyedha Mbwiye angafiile. Liye unodha iri-a ira masegeredo aisini taoneele mbwenye thitho unodhaoneeli-edha vakwecha vyongo vili rimani. Thitho uliwethene vaekhene Nlungu unodha m’simba.

6 Nyo abali, nditoonga vyongo vyevi vyokhuza miyo na Apolo ira muvwecheche likhundolee naifunelo yoi mufunjedhe wa i-yo lamulo loi: “Kamukwaranye vyongo vyolembiwa.” Kaninofuna ira mutu uliwethene akale odhiulukhuli-a noirangana vyongo mwasakulo. 7 N’nga unouiri-a kala o-iyana na atu enango mbaani? N’nga utokaana yongo yoi kwaate wachela? Akala wate wachela vyongo vyevyo, mwasiwa ngwan’ni unodhiulukhuli-a kala ninga kwaate wachela?

8 N’nga mutorumbala? N’nga mutomala fuma? N’nga mutoroma tonga ninga mamwene i-yo a-kalavo? Ndingadhiveliwile mungaromile tonga ninga mamwene ira i-yo thitho nitongenga vambo-i na nyo ninga mamwene. 9 Ndinoona ninga Nlungu uto-ela i-yo arumiwi khomoni wa gulu la atu odhowa maphiwa namwasa oi vili ninga nili valimburo lowaredhela thitho looni-iwa wu ilambo, wa angelo thitho waatu. 10 Ninooniwa kala opupwa namwasa wa Kristu, mbwenye nyo munooniwa kala owenjela mwa Kristu. I-yo nili ofooka, nyo muli akopolo. Nyo munaalemeziwa mbwenye i-yo ninaanyoziwa. 11 Fiyedha va-eni nina ndhala, tona, thitho usiwa. Ninave khomiwa, ninave rambulela vokala. 12 Thitho ninave laba basa mwathindhi namandhi-u. Taniongelanga vya iburutu ninoaraeli-a, thitho tanioni-anga nyarwa ninodhowanave vilela moleva rima 13 taniongelanga vyongo vyothakala, ninowakhula mokhurudheya. Fiyedha va-eni, ninooniwa ninga vikatha vya ilambo thitho na vyongo vyothene vyonyakavala.

14 Kandinolemba vyongo vyevi ira ndiuva-eni manyadho, mbwenye ndiulangi-eni ninga a-imanga odhiveliwiwa. 15 Angalive ira mukaena atu ouing’anelani 10.000 mwa Kristu, kamuna ababa anjinji. Miyo ndili babinyu mwa Kristu Yesu namwasa oi ndatoudhelanani milanyu yapama. 16 Ee-no ndinoulimbi-ani ira mu-arelenga miyo. 17 Ngumwasee ndinourumelani Timoteo, voi liye ngu mwananga odhiveliwiwa thitho ororomeleya mwa Mbwiye. Liye unodha uthuuchani mwemo munoirela miyo vyongo vom’labela Kristu Yesu na munofunji-edhela miyo uliwethene, mu pingo uliwethene.

18 Atu enango tanodhiulukhuli-a kalanga ninga kandinodhadha weo. 19 Mbwenye Yohova* arumela ndinodha weo chineneeva, thitho kandinodhafuna uvwa madhwiwa odhiulukhuli-ao, mbwenye ndinodhafuna ona kopolo dhiwa. 20 Namwasa oi Umwene wa Nlungu kunooni-iwa na madhu, mbwenye kopolo. 21 N’nga munasakule n’ni? Ndidhe wa nyo na chamu, venango ndidhe mwaudhivela thitho mofwasa?

5 Limbili litovweya ira vari vinyu vanaaireya unyambi* thitho unyambee ngoi atu amaziza enango katinoirana. Vinovweya ira lombwana mwinango utotukulana na i-yana wa babee. 2 N’nga munasangalala na vyevi malo mosukwala, ira mutu uirile vyevi unokhumi-iwa vari vinyu? 3 Angalive ira kandili weo mwauzimu ndili weo, thitho nditomalam’tonga wale mutu uirilena vyevi, kalanga ninga ndili na nyo weo. 4 Mwagumaneya mudhina la Mbwii-u Yesu, muidhiwe ira ndili nanyo muzimu thitho mukopolo ya Mbwii-u Yesu. 5 Ee-no muvelele mutuo wa Satana ira mukhumi-e makalelo othakala adhidhena liye pingoni,* naifunelo yoi pingonimo mudhowenave kala makhalelo apama fiyedha vadambo la Mbwiye.

6 Gaya winyu kai wapama. N’nga kamunoidhiwa ira rombwe oyeva otupi-ana mapau unooda tupi-a utu othene omunyiwa? 7 Mukhumi-e rombwe otupi-a wawale, ira mukale pau ipya, voi muli pau yo-okaana yotupi-a. Namwasa oi Kristu atooveleliwa ninga sembi-u ya Paskwa. 8 Ee-no dhoweni niireni pwando la paskwali, lo-okaana rombwe otupi-a, venango rombwe otupi-a unoimelela vyongo vyothakala na vyodawa, mbwenye na pau yo-okaana yotupi-a yoi inoimelela ona rima na imbarimbari.

9 Mukarta langa, ndatoulembelani ira mu-iye vwelana naatu aunyambi. 10 Kandinothapulela ira murambelengatu atu aunyambi oi tanokala muilamboi venango aidyani, owaka afwiwa na olambela mafwano. Ira muirena vyevyo, kuongela ira munofwanela khumamo ilambonimo. 11 Mbwenye va-eeni ndinoulembelani ira mu-iye vwelana na mutu uliwethene oitaniwa bali oi ngwaunyambi, venango waidyani, olambela mafwano, olalata, omwa maningi vyolezeli-a, venango owaka afwee, masiki m’dyanee mutu wen’na khabe. 12 N’nga ndiizo yanga tonga atu ali undhe? N’nga kai nyo vale munotonga atu ali mwari? 13 N’nga Nlungu unotonga mutu uli undhe? “M’khumi-enivo vari vinyu mutu othakaluo.”

6 Mutu mwinango wanyo akaana selu na fwee, n’nga mwasiwa ngwan’ni unolimba rima dhowa wa anamatonga ira atongiwe naatu o-olambela Nlungu, malo modhowa waatu ochena? 2 N’nga kamunoidhiwa ira atu ochenao anodha tonga ilambo? Thitho akala munodha tonga ilambo, n’nga kamunooda tonga miselu ming’ono ninga yeniyo? 3 N’nga kamunoidhiwa ira ninodha tonga angelo? N’nga ninaimwanane a-vi tonga miselu ya malamboano? 4 Ee-no akala mutokaana miselu ya malamboano yofwanela tonga, n’nga munovelela izo yotonga waatu oi pingo kunooda anyindela? 5 Ndinoonga vyevi ira ndoova-eni manyadho. N’nga vari vinyu kavali mutu wazelu na m’mbo-ene oi unooda tonga miselu yaabalee? 6 N’nga bali am’tukulelenga balee tribunaleni, waatu o-olambela Nlungu?

7 Onga mwaimbarimbari, akala munotukulelana tribunaleni kuongela ira mutoimwanana. N’nga mwasiwa ngwan’ni kamunorumela daweliwa? N’nga mwasiwa ngwan’ni kamunorumela luza? 8 Malomwee, nyo munoirela abalinyu vyongo vyodaweya, nowabela.

9 N’nga pyaimbarimbari ira nyo kamunoidhiwa ira atu o-olongomana katinodha volowa mu Umwene wa Nlungu? Kamunami-iwe. Aunyambi,* olambela mafwano, oraruwa, alombwana anorumela goniwa na alombwana afwiwa, alombwana anogonathina alombwana afwiwa, 10 mambavwa, aidyani, omwa maningi vyolezeli-a, olalata, venango owaka afwiwa, othene enao katinodha volowa mu Umwene wa Nlungu. 11 Thitho enango anyo mwali e-no. Mbwenye muto-ambi-iwa nokala ochena, mutosakuliwa, thitho munooniwa kala olongomana mudhina la Mbwii-u Yesu Kristu, na zimu wa Nlungwi-u.

12 Vyongo vyothene pyorumeleya wa miyo, mbwenye vyothene kai vyoganyali-a. Vyongo vyothene pyorumeleya wa miyo, mbwenye kandinodha rumela ira yongo inango inditongenga. 13 Yodya isaka-edhiwile ingulu, thitho ingulu isaka-edhiwile yodya, mbwenye Nlungu unodha nonga ingulu na yodyayene. Manungo kai oirelana unyambi, mbwenye mba Mbwiye thitho Mbwiye ngunovelela vyongo vyofuneela manungoni. 14 Volabi-edha basa kopolodhee Nlungu atoom’venyathi-a Mbwiye thitho unodha nivenyathi-a.

15 N’nga kamunoidhiwa ira manugwinyu ndi vyano vya Kristu? N’nga nditukulenga vyano vya Kristu novithangani-anga na vyano vya puta? Vyevyo pyo-oodeya! 16 N’nga kamunoidhiwa ira mutu ugonathile na puta unokala manungo mambo-i na putalo? Namwasa oi taongile ira, “ambilao anodhakala manungo mambo-i.” 17 Mbwenye ovwelana na Mbwiye unokala vambo-i na liye muzimu. 18 Mutawe unyambi.* Yodawa iliyothene inoira mutu ndi yaundhe wa manungwee, mbwenye unoira unyambi unodawela manungwee. 19 N’nga nyo kamunoidhiwa ira manungwinyu ndi kachisi wa zimu ochena uli mwanyo, wava-iwilenyo na Nlungu? Thitho mwinyaa kai nyo, 20 namwasa oi mwaguliwile na pereso yavadhulu. Mulimwethene munakalele vyongo, mum’titimi-e Nlungu na manungwinyu.

7 Va-eni vamwasa walembile nyoule, ndipama ira lombwana a-aidhiwane* na i-yana. 2 Mbwenye namwasa osimbwa wa unyambi,* lombwana uliwethene akaena i-yanee waekhene thitho i-yana uliwethene akaena man’nee waekhene. 3 Lombwana avelelenga vyofuneela wa i-yanee, i-yana thitho avelelenga vyofuneela wa man’nee. 4 I-yana katongenga manungwee, mbwenye man’nee aatongenga. Lombwana thitho katongenga manungwee, mbwenye i-yanee aatongenga. 5 Kamukhondi-ane unango nafwee, i-yavo akala mutovwelana ira mwa-aire vyevyi vahora yavwelan’ne nyo naifunelo yoi mu-indi-edhe basa hora yeniyo volobela, mwamala munodhowanave ira ninga mwairelecha nyo, ovela ira Satana unodha uwesedhani mwaimwanana dhikhondi-a. 6 Kandinoonga vyevi ninga lamulo, mbwenye ira muidhiwe vyorumeleya. 7 Ndingadhiveliwile alombwana othene ta-akale ninga miyo. Mbwenye uliwethene utokaana yotuva im’va-idhe Nlungu thitho ninom’labela mundhila dho-iyana-iyana.

8 Va-eni wa o-othela na a-iyana amakwele ndinoonga ira, ndipama ira takaleve ninga muli miyomu. 9 Mbwenye akala katinooda dhikhondi-a, tathele, namwasa oi ndipama thela i-yani-ana rucheyanga na naluveluve.

10 Waatu athenle ndinovelela malangi-o ala, ira i-yana kam’iye man’nee. Malangi-o enala mbokhumela wa Mbwiye. 11 Mbwenye akala utomwadhana na man’nee, akaleve e-no o-otheliwa. Mbwenye vya-akale e-no, awelelane na man’neuo. Lombwana thitho kam’iye i-yanee.

12 Mbwenye waatu enangwala, miyo, a-kala Mbwiye, ndinoonga ira: Akala bali utokaana i-yana o-ororomela, thitho i-yanuo unorumela kalanga vambo-i na liye, kam’iye i-yaneuo. 13 Akala thitho i-yana utokaana lombwana o-ororomela, thitho lombwanuo unorumela kala vambo-i na liye, kam’iye man’neuo. 14 Lombwana o-ororomela unocheni-iwa namwasa wa i-yanee, thitho i-yana o-ororomela unocheni-iwa namwasa wa baluo. I-yavo vyevi, a-iminyu katakale ochena, mbwenye va-eni mbochena. 15 Mbwenye akala mutu o-ororomeluo utosakula khumavo,* um’iye adhowenga vyee. Vyaira e-no bali venango rongola unokala othathuwa, mbwenye Nlungu unouva-ani rendele. 16 I-yanawe, n’nga kunoidhiwa ira wadhowanave kala vambo-i na man’naa venango unooda m’vulumucha? We thitho lombwanawe, n’nga kunoidhiwa ira wadhowanave kala vambo-i na i-yanaa venango unooda m’vulumucha?

17 Angalive ira vili e-no mutu uliwethene akale ninga vyali liye vaitaniwa liye na Yohova* Nlungu. Enala ndi malangi-o anovelela miyo wu mipingo yothene. 18 N’nga vatokala lombwana aitaniwile angali oineliwa? Akaleve oineliwa. N’nga vatokala aitaniwile angali o-oineliwa? Akaleve e-no o-oineliwa. 19 Ineliwa kai yongo tai thitho a-ineliwa kai yongo tai, mbwenye yofuneya kulokota malamulo a Nlungu. 20 Mutu uliwethene akaleve ninga vyali liye vahora yaitaniwa liye. 21 N’nga waitaniwile ungali dhaari? Vyevyo kaviukhumbanyi-e. Mbwenye akala utokaana ngari yothathuwa, uilabi-edhe basa. 22 Mutu uliwethene aitaniwile mwa Mbwiye angali dhaari, ndi namalaba wa Mbwiye othathuwa thitho mutu uliwethene aitaniwile a-ali dhaari, ndi dhaari wa Kristu. 23 Mwaguliwile na pereso yavadhulu, mu-iye kala adhaari atu. 24 Abali, uliwethene akaleve ninga mwali liye vahora yaitaniwa liye na Nlungu.

25 Mbwenye onga vyaatu a-ali vabanjani, kandina lamulo nlilothene la Mbwiye, mbwenye ndinovelela malagi-o anga ninga mutu athonyi-edhiwile tangaranga na Mbwiye ira ndikale ororomeleya. 26 Namwasa wa nyarwa dhinogumanana i-yo, ndinoona ira ndipama ira mutu akaleve ninga muli liye. 27 Akala utokaana i-yana, kusake mwasa ofuna m’iyela. Thitho akala khuna i-yana, u-iye m’msaka. 28 Mbwenye wathela,* kudawile tai. Thitho akala mutu o-okala vabanjani utothela,* kadawile tai. Mbwenye atu othelanao tanodha gumanana nyarwa vaingumiiwa. Miyo ndinaavilimbi-edha ubarelani.

29 Mbwenye abali miyo ndinaauwandelani vi: Hora i-adhila njoyeva. Romela va-eeni, mutu una i-yana akalenga ninga kana i-yana 30 thitho ale anola takalenga ninga oi katinala. Ale anosangalala takalenga ninga oi katinasangalala, thitho anogula vyongo takalenga ninga o-okaana yongo. 31 Ale anolabi-edha basa ilamboi takalenga ninga oi katinoilabi-edha basa mokwakwanela. Namwasa oi vyoireya vya vailamboi vinaachinja. 32 Ndinofuna ira mukale o-okhumbanya. Lombwana o-othela unokhumbanyedha vyongo vya Mbwiye, mwemo munam’dhiveliwi-edhe liye Mbwiye. 33 Mbwenye lombwana othela unokhumbanyedha vyongo vya ilamboi, mwemo munam’dhiveliwi-edhe liye i-yanee 34 thitho unokala ogawaneya. Naliyene thitho i-yana o-otheliwa na namwali, anokhumbanyedha vyongo vya Mbwiye, ira akale ochena manungonimwee na mathuulelwee. Mbwenye i-yana otheliwa unokhumbanyedha vyongo vyailambo, mwemo munam’dhiveliwi-idhe liye man’nee. 35 Ndinoonga vyevi ira ndiukami-eni, a-kala ukanyi-edhani, mbwenye ira ndiulimbi-eni irana vyongo vyofwanelela nom’labela Mbwiye hora dhothene vo-okala vyodhodhomi-a.

36 Mbwenye akala mutu oi kali vabanjani unoimwanana dhikondi-a, thitho utokwaranya vatunga la uzombwe, ndipama ira athele. Airana vyevi kadawile. 37 Mbwenye akala mutu mwinango utosikimizela rimanimwee ira unooda kala o-othela thitho unooda tonga mathuulelwee nosakula rimanimwee kalave o-othela, utoira pama. 38 Mutu u-iile kala ekhene nothela utoira pama, mbwenye ukondile a-thela utoira pama maningi.

39 I-yana unokala omangeya vahora inokaana man’nee ingumi. Mbwenye man’neuo akwa, i-yanuo unokala othathuwa notheliwa na mutu uliwethene unofuna liye, mbwenye atheliwe mwa Mbwiye. 40 Mbwenye ndinoona ira angakanle osangalala maningi a-akale ira angadhowilenave kala ninga muli liye. Thitho ndinororomela ira nditokaana zimu wa Nlungu.

8 Va-eeni voonga vya vyodya vyoveleliwa wa mafwano, othene nili oidhiwa vyongo. Idhiwa vyongo unoiri-a mutu kala odhiulukhuli-a, mbwenye udhivela unolimbi-a. 2 Akala mutu mwinango unothuulela ira utoidhiwa vyongo vinangovyee, kanaviidhiweve mokwakwanela. 3 Mbwenye akala mutu unodhiveliwana Nlungu, wenuo unoidhiweya wa Nlungu.

4 Moi e-no vamwasa odya vyodya vyoveleliwa wa mafwano, ninoidhiwa ira fwano kai yongo thitho ira khuli Nlungu mwinango mbwenye Nlungu m’mbo-i baa-i. 5 Atu anoonga ira vatokala milungu minjinji, peno dhulu venango vailambo yavathi. Ee-no waatu enao vatokaladi milungu minjinji na a mbwiye anjinji. 6 Mbwenye wa i-yo Nlungu ulivo m’mbo-i baa-i, oi ngu Baba. Vyongo vyothene vyakhumele wa liye, thitho i-yo nili atwee. Vatokala thitho Mbwiye m’mbo-i, Yesu Kristu, oi vyongo vyothene vyapandhuchiwile dhela mwa liye, thangani-avo i-yo.

7 Mbwenye kai othene anoidhiwa vyevi. Namwasa oi enango voroma tanoolambela mafwano, tadyanga yodya yoveleliwa wa mafwano tanoona ninga yodyayo choveleliwadi wa mafwano. Amala ithuulela rima iwa inoaruchi-a namwasa oi chofooka. 8 Mbwenye yodya kinanikami-e kwivela wa Nlungu. Akala kanidyide yodyayo, kai ira nitodawi-a yongo, thitho akala nitodya, kai ira nili apama maningi kwaranya liye. 9 Mbwenye muirenga polepole ira ufulwinyu osakhuluo, wa-akale ogwegweducha waatu ofooka. 10 Akala mutu mwinango utoona we oidhiwa vyongo udyanga yodya kachisini wa mafwano, n’nga ithuulela rima ya mutu ofookiyo kinodha m’limbi-a udya vyodya vyoveleliwa wa mafwano? 11 Ee-no idhiwawaa vyongo unooda iri-a ira unonge mutu ofookuo, oi ndi balaa wam’kwele Kristu. 12 Mbwenye nyo mwadawelanga balinyu mundhila yen’na nophei-anga ithuulela rima iwa yofookayo, munodawela Kristu. 13 Ee-no akala yodya inom’sukwali-a balanga, kandinodha dyave nyama navang’onovene, ira nda-am’sukwali-e balanga.

9 N’nga kandina ufulu oirana vinofuna miyo? N’nga kandili rumiwi? N’nga kandinam’monevo Yesu Mbwii-u? N’nga nyo kamuli basa lamandhanga mwa Mbwiye? 2 Akala waatu enango kandili rumiwi, mo-okaikela wa nyo ndili rumiwi, namwasa oi muli izindiyelo yosikimizela ira ndili rumiwi mwa Mbwiye.

3 Yowakhula yanga waatu anondikaikela chiyi: 4 N’nga kanina ufulu odya venango umwa? 5 N’nga kanina ufulu othela i-yana ororomela ira niwendenga vambo-i ninga munoirela arumiwi othene, abaliwa Mbwiye na Kefa?* 6 N’nga miyo na Barnaba ngu i-yo baa-i a-ana ufulu o-iya laba mabasa ira nifwanyenga vyofuneeleya vaingumi? 7 N’nga vatokala nyakhondo unolaba, amala liye dhipagalinga ekhene? N’nga mbaani unolima munda wa mauva mbwenye liye a-dya vyova-avyee? Venango mbaani unofuwa vifuovyee amala liye a-mwa ukakee?

8 N’nga vinoonga miyovi ndi mathuulelo aatu baa-i? N’nga Ilamulo kinoonga thitho vimbo-ive vyevi? 9 Ilamulo ya Mose inoonga ira: “Kumange ng’ombe lomo vahora inoputa aliwa mbeu.” N’nga Nlungu unokhumbanyedha ng’ombe baa-i? 10 Venango aongile madhu enala vothuulela i-yo? Madhu enala aalembiledi vothuulela i-yo, namwasa oi olima na oputa mbeu, anofwanela laba basa na idedi-edho yoi tawachele yongo inango.

11 Akala natouva-ani vyongo vyauzimu, n’nga pyodaweya wachela vyongo vyofuneya vaingumi khumela wa nyo? 12 Akala atu enango anodedi-edhela ira mwaairele vyongo vyevi, n’nga i-yo kanina ufulu wenuo? Mbwenye i-yo kani-indi-edhe basa ufulu wenuo, malomwee ninovilela muvyongo vyothene ira na-aimwanani-e atu enango uvwa milanyu yapama yoonga vya Kristu. 13 N’nga kamunoidhiwa ira atu anolaba mabasa opambuleya anodya vya kachisini, thitho anolaba vaiguwani ya sembe hora dhothene anowachela vinango mwa vyongo vyoveleliwa vaiguwani ya sembeyo? 14 Mbwenye Mbwiye atoowandela atu anolaleela milanyu yapama ira tafwanyenga vyofuneya vaingumiiwa dhela mu milanyu yapama.

15 Mbwenye kandina-indi-edhevo basa ufulu wen’na. Thitho kaiira ndilembile vyevi ira ndirome labi-edha basa ufulu wen’na, namwasa oi vingakanle pama ira miyo ndikwe, i-yani-ana ira—kavali mutu unaode ndiwaka ufulu unogayelana miyo! 16 Akala ndinolaleela milanyu yapama, wenuo kai mwasa ogayela, namwasa oi nditewandeliwa irana vyevi. Soka wa miyo akala kandinolaleela milanyu yapama. 17 Ndairangana vyevi mofuna wanga, ndinodha wachela yotuva. Mbwenye angalive ira ndiirena vyevi mokanyi-edheya, ndilive namaing’anela movwelana na izo yava-iwile miyo. 18 N’nga yotuva yanga chini? Yotuva yanga choi ndalaleelanga milanyu yapama ndiilaleelenga mwapezi, ira nda-alabi-edhe basa modaweya ufulwanga va vyongo vyokhuza milanyu yapama.

19 Angalive ira nditokaana ufulu nditodhiiri-a kala dhaari waatu othene, naifunelo yoi ndikami-e* atu anjinji. 20 Wa Ayuda ndatookala ninga Muyuda, ira ndikami-e Ayuda. Waatu o-arela Ilamulo ndatookala ninga o-arela Ilamulo ira ndikami-e atu o-arela Ilamulo angalive ira kandino-arela Ilamulo. 21 Waatu o-okaana llamulo ndatookala ninga o-okaana Ilamulo, ira ndikami-e atu o-okaana Ilamulo. Ndatoirana vyevi angalive ira ndino-arela Malamulo a Nlungu thitho lamulo la Kristu. 22 Waatu ofooka ndatookala ninga mutu ofooka, ira ndikami-e* atu ofooka. Nditoira vyongo vyothene waatu o-iyana-iyana ira ndidhilimbi-edhe munaodele miyo vulumucha atu enango. 23 Ndinoira vyongo vyothene namwasa wa milanyu yapama, ira ndilaleele milanyuila waatu enango.

24 N’nga kamunoidhiwa ira oira pikisano otamanga anotamanga othene, mbwenye unofuna mawachela yotuva ngum’mbo-i baa-i? Mutamangenga mundhila yoi mumawachele yotuva. 25 Mutu uliwethene unoirana pikisano unokala odhikondi-a vavyongo vyothene. Atu anoirana vyevyo ira tamawachele khara yoi inonongeya. Mbwenye i-yo, ira nimawachele khara yoi kinonongeya. 26 Ee-no kaiira ndinotamanga mo-oidhiwa unodhowa miyo. Thitho ndinoponya pama maxokwanga, ira nda-akhome liphevo. 27 Mbwenye ndinokhoma manungwanga noasogolela ninga dhaari, ira vasogolo voi nditolaleela atu enango, ndikale o-ofwanelela* mundhila inango.

10 Va-eni abali, ndinofuna muidhiwe ira anamabali-u awale, tatoowenda vathi varambo thitho othene tatoovandela bara. 2 Othene tatoobadiziwa ninga anama-arela a Mose, dhela murambo na bara. 3 Othene tanoodya yodya yauzimu imbo-ive. 4 Thitho othene tanoomwa ma-inje auzimu mambo-ive. Namwasa oi tamwa valiphandhe lauzimu laa-arela, thitho liphandhelo lathapulela* Kristu. 5 Angalive ira vyali e-no, mbwenye anjinji mwaaliwa, Nlungu kaadhiveliwilena moi tatoophiwa kokolani.

6 Vyongo vyevi ndi vifwanafwani-o wa i-yo, ira na-iyene thitho na-asililenga vyongo vyothakala ninga mwairele aliwa. 7 Thitho kanilambelenga mafwano ninga mwairele enango mwaaliwa, movwelana na vinoonga malemba ira: “Atu tatookaathi, noroma udya noumwa. Adhamale tatooimela noroma sangalala.” 8 Thitho kaniirenga unyambi,* ninga mwairele enango mwaaliwa, noukwa atu okwakwana 23.000 dambo limbo-i. 9 Thitho kanim’mwesedhenga Yohova,* ninga mwam’mwesedhele enango mwaaliwa, noukwa angalumiwile na nyowa. 10 Kanikale thitho odungunya, ninga mwairele enango mwaaliwa, nophiwa na ngelo ononga. 11 Vyongo vyaaireelevi ndi vifwanafwani-o wa i-yo thitho vyalembiwile ira viniwenjeli-e i-yo anokala khomoni wahora ino.

12 Ee-no mutu unothuulela ira utoimela pama, aire polepole ira a-agwe. 13 Kavali vyowesedha vinogumanana nyo vyo-iyana na vinogumanana atu enango. Mbwenye Nlungu ngororomeleya thitho kanodha rumela ira mugumanena vyowesedha fiyedha voi kamunooda vilela, mbwenye vanogumanana nyo vyowesedhavyo liye unodha velela ndhila yovulumuwela ira muode vilela.

14 Ee-no abalanga odhiveliwiwa, murambele lambela mafwano. 15 Ndinoonga nanyo ninga atu ozindiyela. Mutonge mwekhene akala vinoonga miyovi pyaimbarimbari venango khabe. 16 N’nga kopo ya vinyu inoraeli-echa i-yo, kinothapulela gaana sangiri ya Kristu? N’nga pau inomeyameya i-yo, kinothapulela gaana manungo a Kristu? 17 Voi vali pau imbo-i, angalive ira i-yo nili anjinji, nili manungo mambo-i, namwasa oi i-yo othene ninodya pau imbo-ive.

18 Kathuulelani vinoira Aisraeli: N’nga anodya vyongo vyoveleliwa vaguwa la sembe, kai ira anogaana na iguwa ya sembe? 19 N’nga likhundolee toi a-vi? N’nga vyongo vinoveleliwa sembe wa mafwano venango mafwano aimbarimbari ndi yongo? 20 Khabe, mbwenye ndinothapulela ira vyongo vinovelela sembe atu amaziza enango, anovivelela wa viwanda, a-kala wa Nlungu. Thitho kaninofuna ira muirenga yongo iliyothene yovwelana na viwanda. 21 Kavinoodeya ira mumwenga vili koponi la Yohova* na vili koponi la viwanda. Thitho kavinoodeya ira mudyenga “vamezani va Yohova” na vamezani va viwanda. 22 Venango ‘n’nga ninofuna ira Yohova* akaena sanje’? N’nga kopolo dhi-u dhinokwaranya kopolodhee?

23 Vyongo vyothene pyorumeleya, mbwenye kai vyongo vyothene vili vyoganyali-a. Vyongo vyothene pyorumeleya, mbwenye kai vyongo vyothene vili vyolimbi-a. 24 Mutu uliwethene kafunenga vyongo vyoganyali-a liye baa-i, mbwenye vyoganyali-a atu enango.

25 Mudyenga yongo iliyothene yoguli-iwa vamerekado mungana ithuulela rima yapama thitho kamufukenga vyofuka. 26 Namwasa oi “ilambo yavathi na vyothene vili mwemo pya Yohova.”* 27 Akala mutu o-ororomela utouitanani ira mumadye thitho munofuna dhowa, mumadye yongo iliyothene inofuna liye mauva-ani mungana ithuulela rima yapama thitho kamufuke vyofuka. 28 Mbwenye akala mutu mwinango utouwandelani ira: “Vyevi vitoveleliwa sembe,” kamudye vyevyo namwasa wa mutu uwandenlenuo thitho ithuulela rima. 29 Kandinoongana ithuulela rima yaa, mbwenye ya mutu mwinanguo. Kandinofuna ira ndilabi-edhenga basa ufulwanga amala tongiwanga na ithuulela rima ya mutu mwinango. 30 Angalive ira nditokaana ufulu odya yodyao nom’simba Nlungu, n’nga ndipama irana vyevyo akala vinoiri-a ira atu enango tandinyoze?

31 Ee-no akala munaaudya venango umwa, venango irana yongo iliyothene, muirenga vyongo vyothene ira vidhi-e titimi-o wa Nlungu. 32 Murambelenga sukwali-a Ayuda, Agiriki na pingo wa Nlungu. 33 Miyo thitho ndinovilimbi-edha irana vyevi. Ndinovilimbi-edha sangalali-a atu othene vavyongo vinoira miyo. Kandinofuna vyodhiganyali-a dekhene, mbwenye vyoganyali-a atu anjinji ira tavulumuchiwe.

11 Mundi-arelenga, ninga thitho muno-arela miyo Kristu.

2 Ndinousimbani namwasa oi munondithuulela va vyongo vyothene thitho munolokota sanganiko ninga mwemo mwaivelenle miyo wa nyo. 3 Mbwenye ndinofuna muidhiwe ira muru wa lombwana uliwethene ndi Kristu, muru wa i-yana ndi lombwana thitho muru wa Kristu ndi Nlungu. 4 Lombwana uliwethene unolobela venango onga madhu a Nlungu angawarile yongo inango murunimwee, unoiri-a manyadho murwee. 5 Mbwenye i-yana alobelanga venango onga madhu a Nlungu a-wara yongo muruni, unoiri-a manyadho murwee, voi ndi saasawa thitho noinga pala. 6 Namwasa oi akala i-yana kanowara yongo muruni unofwanela inga pala. Mbwenye voi inga maningi sisi venango inga pala chiyongo yova-a manyadho wa i-yana, unofwanela waranga yongo inango murunimwee.

7 Lombwana kanofwanela wara yongo murunimwee, voi liye ndiifwanafwani-o na titimi-o la Nlungu, mbwenye i-yana ndi titimi-o la lombwana. 8 Namwasa oi lombwana kakhumele wa i-yana, mbwenye i-yana ngwakhumele wa lombwana. 9 Thitho lombwana kapanduchiwile namwasa wa i-yana, mbwenye i-yana ngwapanduchiwile namwasa wa lombwana. 10 Vamwasa wen’na thitho namwasa waangelo, i-yana unofwanela wara yongo inango muruni vothonyi-edha ira uli vathi va utongi.

11 Thitho vari vaatu o-arela Mbwiye, i-yana unonyindela lombwana thitho lombwana unonyindela i-yana. 12 Namwasa oi ninga muli aliwa ira i-yana akhumele wa lombwana, thitho lombwana unobaliwa na i-yana. Mbwenye vyongo vyothene vinokhumela wa Nlungu. 13 N’nga munoona a-vi: Pyofwanela ira i-yana alobelenga wa Nlungu o-owarene yongo muruni? 14 N’nga makalelo katinoufunji-ani ira akala lombwana utokaana sisi lolapa vinokala vyova-a manyadho? 15 Mbwenye akala i-yana utokaana sisi lolapa ndi titimi-o wa liye. Vili e-no namwasa oi utova-iwa sisilee malo mwa yowara murunimwee. 16 Mbwenye, akala atokalavo oruni-ana na vyevi ofuna ikalelo inango, i-yo na mipingo ya Nlungu kanina ikalelo yeyo.

17 Mbwenye vanovelela miyo malangi-o enala, kai ira ndinaa usimbani namwasa oi vinoireya mwagumaneya vambo-i kai vyapama, mbwenye vyothakala. 18 Yoroma, nditovwa ira mwagumaneya pingoni, vanokala gaaneya vari vinyu thitho ndinoona ira pyaimbarimbari. 19 Vanofwanela kala magulu opanduwa vari vinyu, ira atu orumeleya wa Nlungu taidhiweye.

20 Mwagumaneya vambo-i ira mudye Yodya ya Namaulo ya Mbwiye, kamunoira vyongo mundhila yofwanelela. 21 Namwasa oi hora yodya yafiya, uliwethene unokala angamadhi udya yodyayee, ee-no mwinango unokaana ndhala thitho mwinango unokala angamadhi lezela. 22 N’nga kamuna nyumba ira munooda madyelao venango mamwelao? N’nga munonyoza pingo wa Nlungu nova-a manyadho atu oi katina yongo iliyothene? N’nga ndionge n’ni wa nyo? Ndiusimbeni? Va vyongo vi kandinousimbani.

23 Vyongo vyothene vyavwide miyo wa Mbwiye ndi vyevyo vyaufunji-idheni miyo, ira Mbwiye Yesu na ma-iyu aveleliwile liye atootukula pau, 24 thitho angamadhi lobela atoimeyameya noonga ira: “Pawila inoimelela manungwanga enao anoveleliwa namwasa wa nyo. Muirengana vyevi vondithuulela.” 25 Angamadhi udya yodya ya namaulo atoira vimbo-ive na kopo, noonga ira: “Kopwila inoimelela vwelano lipya lelo lakaathi-iwile vo-indi-edha basa sangiranga. Muirengana vyevi mwamwanga vili koponimu vondithuulela.” 26 Namwasa oi hora iliyothene inodya nyo pawila noumwa vili koponimu, munokala ira munaalaleela wukwa wa Mbwiye fiyedhela liye angadhidhe.

27 Ee-no mutu uliwethene unodya pawila venango umwa vili kopo la Mbwiye mo-ofwanelela, unodha kaana landu wa tutu na sangiri ya Mbwiye. 28 Mutu aromenga dhifuka akala ngofwanelela udya pau venango umwa vili koponimu. 29 Namwasa oi akala mutu unaaudya noumwa a-zindiyela vinoimelela tutulo, vinodha iri-a ira alangiwe. 30 Ngumwasee anjinji anyo mbofooka na obulela, thitho angaasi atokwa.* 31 Mbwenye nazindiyela moda uli i-yo, kaninotongiwa. 32 Mbwenye nalangiwa, kuongela ira Yohova* unonifunji-a ira na-alangiwe vambo-i na ilambo. 33 Ee-no abalanga, mwagumaneya vambo-i ira mudye Yodya ya Namaulo ya Mbwiye, mudedi-engana. 34 Akala mutu mwinango utokaana ndhala, adye nyumbaniwee ira mwagumaneya vambo-i mwa-atongiwe. Va myasa dhinango dhi-adhi ndinodha dhisaka-edha ndadhadha weo.

12 Ee-no abali, voonga va vyotuva vyauzimu, kandinofuna ira mukale o-oidhiwa. 2 Munoidhiwa ira mwa-anakale ororomela, mwanoosogoleliwa thitho dimeli-iwa na mafwano o-oonga. 3 Mbwenye chineneeva ndinofuna muidhiwe ira kavali mutu unosogoleliwa na zimu wa Nlungu wenuo unaonge ira: “Yesu ngotembeleliwa!” Kavali mutu thitho unofuna onga ira: “Yesu ngu Mbwiye!” mo-osogoleliwa na zimu ochena.

4 Vatokala vyotuva vyo-iyana-iyana mbwenye zimu ngu m’mbo-i. 5 Thitho vatokala maurumiwi o-iyana-iyana mbwenye Mbwiye ngu m’mbo-i. 6 Thitho vatokala mabasa o-iyana-iyana, mbwenye Nlungu ngu m’mbo-i wenuo unovelela kopolo yolabela mabasa wa mutu uliwethene. 7 Mutu uliwethene unokami-iwa na zimu ochena, thitho Nlungu unovelela zimuo naifunelo yoi mutuo aode kami-a atu enango. 8 Mwaifwanafwani-o, zimu unokami-a mutu ira aonge madhu a zelu, thitho zimu umbo-ive wenuo unokami-a mutu mwinango ira aonge madhu ozindiyela. 9 Zimu umbo-ive wenuo unokami-a mutu ira akaena iroromelo, voi mwinango unom’kami-a kaana yotuva yoili-a, 10 mwinango unom’va yotuva yolaba mabasa akopolo, mwinango ongela, mwinango zindiyela madhu ovudheleliwa, mwinango onga viongelo vyo-iyana-iyana thitho mwinango thapulela viongelo. 11 Mbwenye vyothene vyevi vinoodeya na zimu umbo-ive wenuo, thitho mutu uliwethene unova-iwa vyotuvavi mosogoleliwa na zimuo.

12 Tutu tilimbo-i, mbwenye litokaana vyano vinjinji thitho vyano vyothene vya tutu, angalive ira pivinjinji vili manungo mambo-i. Saasawa thitho na Kristu. 13 I-yo othene nabadiziwile na zimu umbo-i ira nikale tutu limbo-i. Akala nili Ayuda venango Agiriki, adhaari venango atu aufulu, othene nawachenle zimu umbo-i.

14 Tutu kinokaana yano imbo-i, mbwenye vinjinji. 15 A-kale nyalo lionga ira: “Voi kandili dhandha kandili ikhundu ya tutu,” vyevi kavinairi-e ira nyalolo la-aire ikhundu ya tutu. 16 Thitho a-kale libaru lionga ira: “Voi kandili litho, kandili ikhundu ya tutu,” vyevyo kavinairi-e ira libarulo la-akale ikhundu ya tutu. 17 Tutu lothene la-akale litho, n’nga navwengana n’ni? N’nga tutu lothene la-akale libaru, n’nga navwenga nukhela na n’ni? 18 Mbwenye Nlungu atoo-ela vyano vyothene vya tutuni, iliyothene valimburolee, ninga mwafunela liye.

19 Vyano vyothene vya-akale yano imbo-i, n’nga tutu langakanlevo? 20 Ee-no vatokala vyano vinjinji, mbwenye tutu tilimbo-i. 21 Litho kinawandele dhandha ira: “Kunabasa wamiyo,” venango thitho muru kunawandele manyalo ira: “Kamunabasa wamiyo.” 22 Thitho vyano vinooneya ninga pyofooka, pyofuneya. 23 Thitho vyano vinooneya ninga pyonyozeya, ndivinolemeza i-yo maningi. Ee-no vyano vya tutuli-u vyo-ooneya pama ndivinosamalela i-yo maningi, 24 mbwenye vyano vi-u vyobaleya kaninofuneela visamalela e-no. Nlungu atoogumani-a pama tutu li-u lothene ira vyano vyo-olemezeya visamaleliwenga pama. 25 Atooirana vyevi ira tutu la-akale logaaneya, mbwenye vyanovyee visamalelengana. 26 Thitho yano imbo-i yarucheya, vyano vinango vyothene vinorucheya vambo-i. Mbwenye thitho yano inango yalemeziwa, vyano vinango vyothene vinosangalalela vambo-i.

27 Muli tutu la Kristu thitho uliwethene wa nyo ndi yano ya tutulo. 28 Nlungu utovelela vyoira wa mutu uliwethene pingoni. Yoroma arumiwi, yanambili anamaongela, yaneraru anamafunji-a, mabasa akopolo, vyotuva vyoili-a, urumiwi okami-a atu enango, dodoliso losogolela vyongo, thitho yotuva yoonga viongelo vyo-iyana-iyana. 29 Kai othene anofuna kala arumiwi. Thitho kavinaodeye ira othene akale anamaongela. N’nga othene anooda kala anamafunji-a? N’nga othene anooda laba mabasa akopolo? 30 Thitho kai othene ana yotuva yoili-a. Kai othene anoonga viongelo vyo-iyana-iyana. Thitho kai othene anakale othapulela. 31 Ee-no mudhilimbi-edhe ira muwachele vyotuva vilukhulu. Vingalive e-no ndinouoni-ani ndhila yapama maningi.

13 Akala ndinooda onga viongelo vyaatu na vyaangelo mbwenye miyo a-kaana udhivela, ndili ninga bero linola venango kocho. 2 Thitho akala nditokaana yutuva yoongela, yovwechecha masegeredo othene opambuleya noidhiwa vyongo vyothene, moi nditokaana iroromelo yolimba yooda susi-a myango, mbwenye miyo a-kaana udhivela, vinoira miyovyo kavina basa. 3 Akala ndinovelela vyongo vyanga vyothene ira ndidyi-e atu enango, thitho akala ndinovelela manungwanga ira ndigaye, mbwenye miyo a-kaana udhivela, kavali inofuna miyo ganyali.

4 Udhivela ngoleva rima* thitho ngoriya rima. Udhivela kunokaana sanje, kunogaya, kunodhiulukhuli-a, 5 kunoira vyongo vyo-ofwanelela,* kunoira vinofuna aliwa baa-i, kunothakaleliwa thitho kunolokota myasa. 6 Kunosangalala na vyongo vyo-olongomana, mbwenye unosangalala na imbarimbari. 7 Unovu-elela vyongo vyothene, unororomela vyongo vyothene, unodedi-edha vyongo vyothene thitho unovilela vyongo vyothene.

8 Udhivela kunomala. Mbwenye akala vatokala vyotuva vyoongela, vinodha mala. Akala ndi onga viongelo vinango, unodha mala. Masiki yotuva yoidhiwa vyongo, inodha mala. 9 Namwasa oi kaninoidhiwa vyongo vyothene thitho ninoongela mo-okwakwanela. 10 Mbwenye nadhaidhiwa vyongo vyothene, vyo-okwakwanelavyo vinodha kwakwanela. 11 Vahora yali miyo mwana ndanoonga ninga mwana, thuulela ninga mwana noona vyongo ninga mwana. Mbwenye viulukhunle miyovi, ndito-iya vyau-ima. 12 Va-eeni kaninoona pama namwasa oi nino-indi-edha basa supeyo lo-ooneya pama, mbwenye vahora yeniyo ninodha onanga pama. Va-eni kandinoidhiwa vyongo vyothene, mbwenye vahora yeniyo ndinodha idhiwa vyongo vyothene ninga mwemo munondiidhiwela Nlungu. 13 Mbwenye va-eni va-adhi vyongo viraru: Iroromelo, idedi-edho na udhivela. Mbwenye ilukhulu va vyothene vyevi ndi udhivela.

14 Mukaena udhivela mbwenye mudhilimbi-edhenga thitho ira muwachele vyotuva vya zimu ochena, simbwasimbwa yotuva yoongela. 2 Namwasa oi oonga viongelo vyo-iyana-iyana kanoonga naatu, mbwenye na Nlungu. Kavali unovwa vinoonga liye, mbwenye liye unoonga masegeredo opambuleya mokami-iwa na zimu. 3 Mbwenye oongela, unokami-a atu thitho unoalimbi-a noadidili-a rima na madhwee. 4 Oonga viongelo vyo-iyana-iyana unodhilimbi-a ekhene, mbwenye oongela unolimbi-a pingo. 5 Ndangadhiveliwile mwethene mwa-aongenga viongelo vyailendo, mbwenye ndinoona ira ndipama muongelenga. Onga vyaimbarimbari oongela unokwaranya oonga viongelo vyo-iyana-yana, khumi-avo akala oonga viongelo vyo-iyana-yanauo unothapulela ira alimbi-e pingo. 6 Abali, akala miyo nditodha weo vachineneeva ndionganga viongelo vyo-iyana-iyana vyoi nyo kamuviidhi, n’nga munaganyalin’ni? Vingakanle vyokami-a ndadha wa nyo dhauwandelani madhu awachenle miyo khumela wa Nlungu, venango yotuva yoidhiwa vyongo, venango ulosi venango thitho ifunji-edho.

7 Vyevi ndi saasawa na mafarameto ano-indi-edhiwa basa voomba nyumbo ninga itoliro venango bangwe.* N’nga pyoodeya idhiwa nyumbo inoombiwa na itoliro venango bangwe akala mavweelwee mbamambo-ive? 8 N’nga lipenga la-ale movweya pama, mbaani unofuna kozeela khondo? 9 Saasawa thitho akala munoonga vyo-ovweya pama. N’nga mutu unaidhiwe a-vi vyongo vinoonga nyoovyo? Munokala ninga munoongela lipevo.* 10 Vailambo yavathi vatokala viongelo vinjinji, mbwenye vyothene vitokaana thapulelawee. 11 Akala kandinoidhiwa vinothapulela iongelo inango, ndinokala lendo wamutu unoonguo thitho unoonguo unokala lendo wa miyo. 12 Saasawa thitho nanyo. Voi munofunechecha kaana vyotuva vya zimu, mudhilimbi-edhe kaana vyotuva vinaode limbi-a pingo.

13 Ee-no mutu unoonga iongelo inango* alobele ira aode thapulela. 14 Namwasa oi akala ndinolobela muiongelo yailendo, yotuva yanga ya zimu ndi inolobela, mbwenye mathuulelwanga katinoira yongo iliyothene. 15 N’nga yofuneya chini? Ndinofwanela lobela na yotuva ya zimu, mbwenye thitho na madhu ovweya. Ndiombe nyumbo dhotitimi-a na yotuva ya zimu, mbwenye thitho na madhu ovweya. 16 Namwasa oi akala mokami-iwa na yotuva ya zimu munom’titimi-a Nlungu, n’nga mutwene baa-i unaonge a-vi ira “Ame” voi liye kaidhi viongile nyo, valobelo linyu losimba? 17 Pyaimbarimbari ira munovelela lobelo losimba mundhila yapama, mbwenye mutu mwinanguo kanolimbi-iwa. 18 Ndinosimba Nlungu ira ndinoonga viongelo vinjinji kwaranya nyo mwethene. 19 Angalive ira vili e-no, ndipama ira pingoni ndionge madhu 5 ovweya ira ndifunji-e atu enango, i-yani-ana onga madhu 10.000 muiongelo yoi atu katinoivwechecha.

20 Abali, kamukale a-ima vamwasa ovwechecha vyongo. Mbwenye mukale ninga a-ima va vyongo vyothakala, thitho vamwasa ovwechecha vyongo mukale andimuwa. 21 Muilamulo muli madhu oi: “Yohova* uongile ira ‘Ndinodha onga naatwala vo-indi-edha basa atu aviongelo vinango, mbwenye aliwa katinodha ndivwela.’” 22 Ee-no onga viongelo vyo-iyana-iyana ndi izindiyelo yaatu o-ororomela, a-kala ororomela, voi ongela ndi izindiyelo yaatu ororomela, a-kala o-ororomela. 23 Akala pingo wethene utogumaneya vambo-ive thitho atu othene anoonga viongelo vyo-iyana-iyana moi mutovolowa atwene baa-i venango o-ororomela, n’nga katinodha onga ira mutokaana mi-ala? 24 Mbwenye akala nyo mwethene munaaongela, moi mutovolowa mutu o-ororomela venango mutwene, liye unosumululeya thitho unodhiona ekhene namwasa wa vinoonga nyoovyo. 25 Liye unozindiyela vyongo vyovithaleya vya rimanimwee, voi unodha orama nom’lambela Nlungu, thitho unodha onga ira: “Pyaimbarimbari Nlungu uli vari vinyu.”

26 N’nga niirenga a-vi abali? Mwagumaneya vambo-i, mutu mwinango unooda kaana salimo,* mwinango funji-a, mwinango onga madhu awandeliwile liye na Nlungu thitho mwinango onga viongelo vyo-iyana-iyana* mwinango thapulela. Muirengana vyevi ira mulimbi-engana. 27 Akala vatokala atu oonga viongelo vyo-iyana-iyana,* katikwaranye ambili venango araru thitho tadedi-engana voonga thitho mwinango athapulelenga. 28 Mbwenye akala kavali mutu othapulela, oonga viongelo vyo-iyana-iyanuo aire miyala thitho aongenga na Nlungu rimani. 29 Anamaongela ambili venango araru taonge thitho atu othene tadhilimbi-edhe vwechecha thapulela wa vinoonga aliwavyo. 30 Mbwenye akala namaongela ukaathidhe vathi utowachela madhu khumela wa Nlungu, oromule arome miyala. 31 Nyo mwethene munooda ongela, mbwenye munofwanela dedi-ana voonga ira atu othene tafunjedhe nolimbi-iwa. 32 Thitho anamaongela ta-indi-edhanga basa vyotuva vya zimu anofwanela kala ovikhondi-a. 33 Namwasa oi Nlungu kanoira vyongo mo-ofwanelela, mbwenye liye ndi Nlungu wa rendele. Ninga muli aliwa mumipingo yothene yaatu ochena, 34 a-iyana takalenga omiyala mipingoni, namwasa oi pyo-orumeli-iwa ira aliwa taongenga, mbwenye tagonjelenga, ninga munoongela Ilamulo. 35 Akala tanofuna idhiwa vyongo vinangovyee, tamafuke aman’niwa mudhi, voi pyova-a manyadho ira i-yana aongenga pingoni.

36 N’nga madhu a Nlungu takhumele wa nyo? N’nga venango ngunyo baa-i awandeliwile madhwao?

37 Mutu athuulelanga ira ngunamaongela venango utokaana yotuva ya zimu, unofwanela rumela ira viulembeleni miyovi ndi lamulo la Mbwiye. 38 Mbwenye akala mutu mwinango kanorumela* vyevi, liye thitho kanodha rumeliwa.* 39 Ee-no abalanga mudhilimbi-edhe ira muongelenga, mbwenye kamukhondi-e mutu onga viongelo vyo-iyana-iyana. 40 Mbwenye vyongo vyothene viireyenga mofwanelela thitho mundhila yapama.*

15 Va-eni abali, ndinofuna ndiuthuucheni vya milanyu yapama ilaleele miyo wa nyo, yoi thitho nyo mwatooiwachela noiroromela. 2 Munodha vulumuchiwa mwadhowanave kala olimba mu milanyu yapama yaulaleeleni miyo. Mbwenye mwa-adhowenave kala olimba kuongela ira roromela winyu kunabasa.

3 Ndatoufunji-ani vyongo vyoroma vyawachenle miyo, thitho vyali vyoi Kristu atookwela vyodawa vi-u, movwelana na vinoonga Malemba, 4 thitho liye atoolokotiwa masiyeni, adhamale atoovenyathi-iwa va dambo laneraru movwelana na Malemba. 5 Vali thitho vyoi atooneela wa Kefa,* adhamale atooneela wa arumiwi 12 ale. 6 Moi e-no atooneela wa abali okwaranya 500 vahora imbo-ive, thitho anjinji mwaaliwa alive vambo-i na-iyo, mbwenye enango atomala wukwa.* 7 Adhamale atooneela wa Yakobo, vasogolovee waarumiwee othene. 8 Mbwenye vogomi-edha atooneela wa miyo ninga kombwani obaliwa malambo a-anakwakwane.

9 Vaarumiwi othene miyo ndili mwana maningi thitho kandili ofwanelela itaniwa rumiwi, namwasa oi ndanoo-ara-ara pingo wa Nlungu. 10 Mbwenye namwasa oriya rima ulukhulu wa Nlungu, ndili ninga muli miyomu. Thitho riya rima ulukhulu wandioni-idhe liye kwaadhowile vapezi, mbwenye ndatoolaba basa mwathindhi kwaranya arumiwi enango othene. Kaiira ndairana vyevi na kopolo dhanga baa-i, mbwenye namwasa oriya rima ulukhulu wa Nlungu. 11 Peno mwafunji-iwile namiyo venango naaliwa, milanyu inolaleela i-yo njeniyo yaroromele nyo.

12 Va-eeni akala ninolaleela ira Kristu atoovenyathi-iwa, n’nga mwasiwa ngwan’ni enango a nyo anoonga ira atu okwa katinodha venyathi-iwa? 13 Onga mwaimbarimbari akala alimbo wukwa katinodha venyathi-iwa, kuongela ira Kristu naliyene kaavenyathi-iwile. 14 Thitho akala Kristu kaavenyathi-iwile laleela wi-u ko-okaana basa, thitho iroromelwinyu cho-okaana basa. 15 Akala ira alimbo wukwa katinodha venyathi-iwa kuongela ira nili amboni onama a Nlungu, namwasa oi ninovelela umboni onama oonga ira Nlungu atom’venyathi-a muukwani Kristu angalive ira kaam’venyathi-idhe. 16 Namwasa oi akala alimbo wukwa katinodha venyathi-iwa, Kristu thitho kaavenyathi-iwile. 17 Thitho akala Kristu kaavenyathi-iwile, iroromelwinyu cho-okaana basa thitho vyodawa vinyu kavileveleliwile. 18 Akala vili e-no, anama-arela a Kristu akwide, atodimela modhowa nodhowa. 19 Akala idedi-edho yi-u mwa Kristu cha ingumi yen’na, kuongela ira nili ovwi-a tangaranga kwaranya atu enango othene.

20 Mbwenye onga mwaimbarimbari Kristu atoovenyathi-iwa muukwa, liye ali mutu oroma venyathi-iwa mwaalimbo wukwa.* 21 Voi wukwa watoodha dhela mwa mutu m’mbo-i, venyathi-iwa muukwa thitho watoodha dhela mwa mutu m’mbo-i. 22 Ninga muli aliwa ira atu othene tanokwa namwasa wa Adamu, atu othene thitho tanodha kaana ingumi dhela mwa Kristu. 23 Mbwenye venyathi-iwa waatu okwa unodha ireya mundhila ila: Yoroma Kristu ninga yova-a yoroma, adhamala atu oi mba Akristu vahora yokalavowee.* 24 Moi e-no vakhomoni va vyothene, adhamali-a maguverno othene, utongi othene na kopolo dhothene, unodha velela Umwene wa Nlungwee na Babee. 25 Namwasa oi unofwanela kala mwene notonganga fiyedha Nlungu adhamala e-la amwidani othene vathi vamanyalwee. 26 Mwidani unofuna dhamari-edha nongiwa, ndi wukwa. 27 Nlungu, “atoo-ela vyongo vyothene vathi vamanyalwee.” Mbwenye liye aonga ira ‘uto-ela vyongo vyothene vathi va manyalwee,’ vyevi kavinothangani-avo na Nlunguo oi ngwavelenle vyongo vyothene wa liye. 28 Mbwenye vyongo vyothene vyadhakala vathivee, naliyene thitho Mwanuo unodha thonyi-edha ira uli vathi va utongi wa Nlungu, ira Nlungu adhakale namatonga wa vyongo vyothene.

29 Akala atu okwa tanodha venyathi-iwa, n’nga atu ale anobadiziwa ira takwe anodhairan’ni? Akala ndiimbarimbari ira atu anobadiziwao katinodha venyathi-iwa, n’nga mwasiwa ngwan’ni tanobadiziwa ira takwee? 30 N’nga mwasiwa ngwan’ni i-yo nino-ela ingumii-u vangovini hora dhothene? 31 Dambo nlilothene ninokala va ngovi yoi ninooda wukwa. Vyevyo pyaimbarimbari ninga mwemo munogaela miyo namwasa wa uxamwalinyu na Kristu Yesu Mbwii-u. 32 Akala ndatoolimbana na vilombo vyoophi-a wu Efeso ninga mwairele atu enango, n’nga ndaganyanlevo n’ni? Akala alimbo wukwa katinodha venyathi-iwa, “dhoweni nidye noumwa namwasa oi bebe-i ninokwa.” 33 Kamunami-iwe,* vwelana na atu othakala unononga makalelo apama. 34 Murome thuulela mwazelu noiranga vyongo mofwanelela thitho kamudawe. Namwasa oi enango mwa nyo katim’mwidhi Nlungu, ndinoonga vyevi ira ndoova-eni manyadho.

35 Mbwenye mutu mwinango unooda fuka ira: “N’nga atu okwa anodha venyathi-iwa a-vi? N’nga anodha venyathi-iwa na manungo oi a-vi?” 36 We mutu o-othuulela pama! Wadhala yongo inoroma wukwa ya-anamele. 37 Thitho wadhalanga kunodhala imuri yomala ulukhula nawale, mbwenye mbeu baa-i peno tirigu venango mbeu iliyothene. 38 Mbwenye Nlungu unoulukhuli-a movwelana na vinofuna liye, thitho mbeu dhothene dhaulukhulanga kadhinokala saasawa. 39 Vyongo vyothene vinokaana likungu kavili saasawa. Vatokala likungu laatu, vinyama, mbalame na somba, mbwenye likungu la vyothene vyevi to-iyana. 40 Vatokala thitho matutu adhulu na matutu availambo yavathi, mbwenye titimi-o la matutu adhulu to-iyana na titimi-o la matutu availambo yavathi. 41 Titimi-o la dhuwa to-iyana na titimi-o la mwedi, venango thitho na lanyenyedi. Thitho titimi-o la nyenyedi inango to-iyana na la nyenyedi inango.

42 Ndi saasawa thitho novenyathi-iwa wa alimbo wukwa. Tutu linovu-eleliwa linokala loi linooda nongeya, mbwenye tutu linovenyathi-iwa linokala loi kalinooda nongeya. 43 Tutu linovu-eleliwa lingali lonyozeya, mbwenye linovenyathi-iwa lingali la titimi-o. Linovu-eleliwa lingali lofooka, mbwenye linovenyathi-iwa lingali lakopolo. 44 Tutu linovu-eleliwa lingali launyama, mbwenye linovenyathi-iwa lingali lauzimu. Akala vatokala tutu launyama, vatokala thitho lauzimu. 45 Voi malemba anoonga ira: “Adamu, oi ali mutu oroma, atookala mutu waingumi.” Adamu ogomi-edha atookala zimu ova-a ingumi. 46 Mbwenye mutu aromile udha kaali wauzimu. Mutu waunyama ngwaromile udha adhamale mutu wauzimu. 47 Mutu oromuo akhumenle vailambo yavathi thitho apanduchiwile na ulongo.* Wanambilio akhumenle dhulu. 48 Atu opanduchiwa na ulongo ali ninga mutu oroma apanduchiwile na ulongo. Thitho adhulu ali ninga akhumenle dhuluo. 49 Ninga i-yo va-eni nili ninga mutu apanduchiwile na ulongule, ninodha fwanafwana thitho na wadhuluo.

50 Mbwenye abali, muidhiwe ira nyama na sangiri kavinavolowe mu Umwene wa Nlungu, thitho yongo yoi inooda nongeya kinawachele a-nongeya. 51 Kandivuruwaneni, ndinouwandelani segeredo yopambuleya: Kaiira i-yo othenene ninodhakwa, mbwenye nothene ninodha chinja 52 muhora yoyeva, mombaranya ninga mokupa wa litho, vola wa lipenga lomari-a. Namwasa oi lipenga linodhanla, amala alimbo wukwa anodha venyathi-iwa na matutu oi katinodha nongeya thitho ninodha chinja. 53 Namwasa oi matutu oi anooda nongeyala anodha chinja kala matutu oi katinooda nongeya. Thitho matutu oi anooda wukwala anodha chinja kala o-okwa. 54 Mbwenye matutu oi anooda nongeyala tadhakala oi katinooda nongeya thitho matutu oi anooda wukwala tadhachinja kala oi katinooda wukwa, vinoonga malemba vinodha kwakwaneli-edhiwa, vyoi: “Wukwa unodha midhiwa* modhowa nodhowa.” 55 “We wukwa, n’nga ganyaliwaa uliwani? We wukwa, n’nga kopolwaa inodhi-a nyarwa ilukhulu iliwani?” 56 Kopolo inodhi-a wukwa ndi vyodawa, mbwenye lamulo linooni-a kopolo ya vyodawa. 57 Mbwenye ninom’simba Nlungu namwasa oi unonikami-a ira niganyali dhela mwa Mbwii-u Yesu Kristu!

58 Ee-no abalanga odhiveliwiwa, mukale olimba thitho o-otekenyeya. Hora dhothene mukaengana vyoira vinjinji va basa la Mbwiye, voidhiwa ira vyongo vyothene vinoira nyo vabasa la Mbwiye kavinodha kala vyapezi.

16 Vamwasa wa vyovelela vyodhowa waatu ochenao, munooda a-rela malangi-o avelenle miyo wu mipingo yau Galatiya. 2 Dambo loroma la sumana nlilothene, mutu uliwethene a-elenga yongo inangoyee vakhundu nyumbaniwee movwelana na vinaode liye, ira vyovelela kavidhaveleliwe ndadhafiya. 3 Mbwenye ndadhafiya weo, ndinodha ruma alombwana anofuna nyo arumela dhela mu makartinyu ira tadhadhowena yotuva inyu yatangaranga wu Yerusalemu. 4 Mbwenye akala vanodha funeela ira miyo ndidhadhowe na aliwa, ninodha dhowa vambo-i.

5 Ndinodha weo dhauonani ndadhakhuma wu Masedoniya, namwasa oi ndinovirana wu Masedoniya. 6 Ndinodha kala vambo-i na nyo weo, venango thitho hora yothene yodidila, ira mudhandivelele unofuna miyo dhowa. 7 Kandinofuna ira nduoneni va-eeni namwasa oi ndinaavira baa-i, mbwenye Yohova arumela ndinofuna ira ndidhakale na nyo wa malambo mangaasi. 8 Mbwenye ndinokalave uno wu Efeso fiyedha vapwando la Petekoste, 9 namwasa oi lango* lukhulu wa urumiwi utondidhuleela, mbwenye vatokala oruni-a anjinji.

10 Timoteo adhafiya uli nyo, muire vilivyothene vinaode nyo ira a-aove yongo vahora inofuna liye dhakala na nyo, namwasa oi liye unaalaba basa la Yohova* ninga miyo. 11 Ee-no kavadhakale mutu om’pwaza. Mudham’velele mwarendele ira adhafiye uno, namwasa oi miyo naabali ninam’dedi-edha.

12 Voonga vya bali-u Apolo, ndatoom’sembezela maningi ira adhe weo vambo-i naabali. Kaali ifunelo yee ira adhe weo va-eni, mbwenye unodha akaana pata.

13 Mukale methove, mukaena iroromelo yolimba, mukale olimba rima thitho mukale akopolo. 14 Vyongo vyothene vinofunanyo iranga, muviirenga mwaudhivela.

15 Abali, munoidhiwa ira atu abanja la Sitefana, mbaromile kala ororomela* wu Akaya thitho tatoodhivelela volabela atu ochena. Ee-no ninaaulimbi-ani ira, 16 nanyeene thitho mudhowenave gonjela atu ninga enao, na mutu uliwethene unolaba basa leli mwathindhi. 17 Mbwenye ndinosangalala ira Sitefana, Fortunato na Akaiko tali vambo-i na miyo uno, namwasa oi tanondikami-a malo mwanyo. 18 Atu enala tatondilimbi-a maningi thitho tatoulimbi-ani. Ee-no mulemezenga atu ninga enala.

19 Mipingo yau Aziya inaaumwenyulani. Akila na Piriska na pingo unogumanyeya vandhe viwa, unaaumwenyulani nyo mwethene mokhumela vathi va rima, mwa Mbwiye. 20 Abali othene anaaumwenyulani. Mumwenyulane mwaudhivela.

21 Va-eeni muwachele mwenyula wanga miyo Paulo, ulembile miyo na dhandha langa.

22 Vakala mutu oi kanodhiveliwana Mbwiye, atembeleliwe. Dhani Mbwii-u! 23 Riya rima ulukhulu wa Mbwiye Yesu ukale na nyo. 24 Ndinousimikizelani nyo mwethene oi muli anamafunjedha a Mbwiye Kristu Yesu ira ndinoudhiveliwanani.