KARTA LODHOWA WA AFILIPI

1 Miyo Paulo vambo-i na Timoteo, adhaari a Kristu Yesu, ndinolembela atu othene ochena oi mbaanamafunjedha a Kristu Yesu ali wu Filipi, thitho anamaing’anela na arumiwi okami-a:

2 Nlungu Babi-u na Mbwii-u Yesu Kristu, auva-eni riya rima ulukhulu na rendele.

3 Ndinosimba Nlungwanga hora dhothene ndathuulela vya nyo. 4 Ndinoira vyevi mumalobelwanga othene osembezela anoira miyo mosangalala namwasa wa nyo mwethene. 5 Ndinom’simba namwasa wa vyovelela vinyu vikadhi nyo muvelelanga ira* vikami-e vabasa lolaleela milanyu yapama, romela vadambo loroma fiyedha e-ni. 6 Namwasa oi kandinokaikela ira uromi-idhe basa lapama wa nyo, unodha limari-a fiyedhela vadambo la Kristu Yesu. 7 Pyofwanelela wa miyo ira ndouthuuleleni nyo mwethene mwandhila yen’na, namwasa oi muli avarimani vanga. Ngunyo mwandikami-idhe vahora yamangiwile miyo na makurenti perezoni, thitho vovunela milanyu yapama nokaathei-a mwalamulo basa lolaleela milanyu yapama. Nyo vambo-i na miyo natooganyali na riya rima ulukhulu wa Nlungu.

8 Thitho Nlungu unoidhiwa ira ndinofunechecha uonani nyo mwethene. Udhivelanga wa nyo ngulukhulu ninga una Kristu Yesu. 9 Miyo thitho ndinodhowanave lobela ira udhivelinyu udhowenave ulukhula maningi vambo-i noidhiwa vyongo molinyali na dodoliso loidhiwa vyongo vyapama. 10 Muire vyevi ira muode sakula vyongo vyofuneya naifunelo yoi mukale o-okaana yodawa thitho o-osukwali-a atu enango fiyedha dambo la Kristu. 11 Muirena vyevi thitho ira mudhaleliwe na vyova-a vyolongomana, mokami-iwa na Yesu Kristu, ira Nlungu alemeziwe notitimi-iwa.

12 Abali, ndinofuna muidhiwe ira vyandiireele, vitokami-a ira milanyu yapama imwadheye. 13 Namwasa oi Mangwarda oing’anela mwene na atu enango, tatovwa ira ndimangiwile namwasa wa Kristu. 14 Abali anjinji anolabela Mbwiye, tatolimba rima namwasa omangiwa wanga, thitho tanodhowanave thonyi-edha limba wiwa rima voonga Madhu a Nlungu mo-oova.

15 Pyaimbarimbari ira atu enango tanolaleela vyoonga Kristu namwasa ondifunela bivu thitho vopikisana na miyo. Mbwenye enango tanolaleela na ifunelo yapama. 16 Atu ogomi-edhala tanolaleela milanyu yoonga vya Kristu namwasa wa udhivela, voi tanoidhiwa ira ndisakuliwile ira ndivunele milanyu yapama. 17 Mbwenye atu oromala tanoirana vyevi namwasa wa rima ofuna kangana, a-kala na ifunelo yapama. Aliwa tanofuna ndiromi-edha nyarwa perezonimuno. 18 N’nga vyo-arelavyee pyoi a-vi? Pyoi milanyu yoonga vya Kristu inave laleiwa. Akala ndi mwainyengo venango mwaimbarimbari, miyo ndinosangalala namwasa wa vyevi. Thitho ndinodhowanave kala osangalala, 19 namwasa oi ndinoidhiwa ira vyevi vinodha iri-a ira ndivulumuchiwe namwasa wa malobelwinyu osembezela thitho mokami-iwa na zimu wa Yesu Kristu. 20 Vyevi pyovwelana na vinodedi-edhela miyo mofunechecha thitho idedi-edho yanga yoi kandinodha va-iwa manyadho mwandhila iliyothene. Mbwenye ira mwa ufulwanga othene oonga, e-ni Kristu utolemeziwa dhela mwa miyo, ninga mukanle aliwa viireyanga ndulimu. Angalive ira ndikaena ingumi venango ndikwe, liye unodhowanave lemeziwa.

21 Namwasa oi wa miyo ndinokaana ingumi ira ndim’labelenga Kristu, thitho ndakwa ndinodha ganyali. 22 Akala ndinodhowanave kaana ingumi na tutu leli, mabasa a mandhanga anodha wenjedheleya, mbwenye yofuna sakula veva, kandinoionga. 23 Va vyongo vinlivi miyo kandinoidhiwa ira ndinasakule yongo ivi, namwasa oi ndinofunechecha ndangathathuliwile ira ndikaena Kristu, vyoi onga mwaimbarimbari pyapama maningi. 24 Mbwenye ndipama ira ndidhowenave kaana ingumi na tutu leli namwasa wa nyo. 25 Ee-no, voi nditosikimizela vyevi, ndinoidhiwa ira ndinokaanave ingumi thitho ndinodhowanave kala vambo-i na nyo ira mudhowe vasogolo thitho ira musangalale namwasa wa iroromelwinyu. 26 Ee, ira ndadhawela okoka wa nyo, sangalala winyu unodha wenjedheleya namwasa oi muli anama-arela a Kristu Yesu.

27 Mbwenye inofuna miyo choi makalelwinyu akale ovwelana na milanyu yapama ya Kristu, ira akala nditodha dhauonani venango kandidhidhe, ndivwenga vya nyo ira munaadhowanave kala ovwelana. Thitho na rima umbo-ive,* munovilimbi-edha movwelana ira mudhowenave roromela milanyu yapama. 28 Mbwenye nyo kamunoova mwandhila iliyothene atu anouruni-ani. Wen’na nguumboni oi tanodha nongiwa, mbwenye wa nyo nguumboni oi munodha vulumuchiwa. Umboni wen’na ngokhumela wa Nlungu. 29 Vili e-no namwasa oi mwatoova-iwa ngari, a-kala yororomela Kristu baa-i, mbwenye thitho yorucheya namwasa wa liye. 30 Namwasa oi nyo munogumanana nyarwa dhimbo-ive ninga dhiguman’nena miyo dhoi fiyedha va-eeni, munave uvwa ira ndinave dhilimbanana.

2 Muirenga vyongo vyothene vinaodenyo ira mulimbi-engana mwa Kristu, mudidili-engana rima mwaudhivela, muthonyi-edhenga zimu odhiveliwana irela vyongo vambo-i, muthonyi-edhengana dhivelo nlukhulu thitho tangaranga. 2 Mwairanga vyevi, munodha iri-a ira sangalala wanga uwenjedheleye. Muthonyi-edhenga ira munothuulela movwelana, mutokaana udhivela ofwanafwana noira muli ovwelana maningi thitho mathuulelwinyu mbamambo-ive. 3 Kamuirenga iliyothene na rima odhiveliwana kangana venango namwasa odhiulukuli-a, mbwenye modhiyevi-a muonenga atu enango kala oukwaranyani. 4 Kamuthuulelenga vinofuna nyo baa-i, mbwenye muthuulelenga thitho vinofuna atu enango.

5 Mukaena mathuulelo ninga ana Kristu Yesu. 6 Angalive ira liye aoneya ninga Nlungu, mbwenye karomile thuulelavo vyoi akale ofwanafwana na Nlungu. 7 Liye kairile vyevyo, mbwenye atoo-iyachi vyongo vyothene vyana liye, nokala ninga dhaari thitho atookala mutu.* 8 Kwaranya vevo, angakanle mutu atoodhiyevi-a atookala ovwela fiyedha ukwa. Ee wukwa wa vaimurini yoonelavo nyarwa. 9 Va mwasa wen’na, Nlungu atoom’lemeza nom’va-a izo yavadhulu thitho moriya rima atoom’va-a dhina lokwaranya madhina othene. 10 Liye atooira vyevi ira dhela mu dhina la Yesu, othene tam’kokorele akala ali dhulu, vailambo yavathi venango vathi vateya. 11 Ira mutu uliwothene arumele vamwinji ira Yesu Kristu ndi Mbwiye, ira viva-e titimi-o Nlungu Baba.

12 Abali naarongolanga odhiveliwiwa, vyali miyo vambo-i na nyo, hora dhothene mwanoovwela. Kamuirile vyevi vahora yali miyo vambo-i na nyo baa-i angalive ira kandilive na nyo munavevwela maningi. Mofwanafwana na vyevi, uliwethene wa nyo adhowenave ndilimbi-edha iranga vyevi moova nongurumela ira adhavulumuwe. 13 Neri-a Nlungu ngunoulimbi-ani. Liye unouva-ani rima ofuna irana vyongo vinom’dhiveliwi-a thitho kopolo dhoirela vyongovyo. Liye unoira vyevi namwasa oi pievyo vinom’sangalali-a. 14 Mwairanga vyongo murambelenga ng’ung’uza thitho kangana, 15 ira mwa-akaena mwasa onukedheliwa thitho o-odawa. Mbwenye mukale a-ima a Nlungu o-okaana damba vari vaatu amakalelo othakala na amathuulelo obenda. Vari vaatu enala, nyo munaawala ninga vyomoneela vyamuilamboi. 16 Vanoira nyo vyevi, mu-indedhe mwakopolo Madhu a ingumi. Mwaira e-no ndinodha kaana mwasa osangalalela dambo la Kristu. Namwasa oi ndinoidhiwa ira kandatamangele vapezi venango dhilimbi-edha vapezi. 17 Mbwenye angalive ira ndinokutuleliwa ninga sembe ya vyomwa, ndinowenjedhela va sembe dhinovelela nyo thitho urumiwi opambuleya unoira nyo mororomeleya. Ndinodhiveliwa thitho sangalala vambo-i na nyo. 18 Ndinoulimbi-ani ira nyo thitho musangalale vambo-i na miyo.

19 Vachineneeva ndinodedi-edha mwa Mbwiye Yesu ira ndiurumeleni Timoteo, ira ndidhalimbi-iwe ndadhavwa moda uli vyongo wa nyo. 20 Voi kandina mutu unango una rima ninga wee. Oi unooda samaleladi mwapama vyorambulela vinyu. 21 Atu enango anothuulela vinofuna aliwa baa-i, a-kala vya Yesu Kristu. 22 Mbwenye nyo mutoidhiwa ifwanafwani-o yapama yathonyi-edhe Timoteo, ira ninga mwana unolaba na babee, liye utolaba ninga dhaari vambo-i na miyo vomwadha milanyu yapama. 23 Ee-no ndinodedi-edhela urumelani mutu wen’na ndamala idhiwa vyongo vinofuna ndiireela. 24 Mwaimbarimbari ndinororomela ira Mbwiye unondirumeli-a ira ndidhe mo-odembuwa.

25 Mbweye va-eeni ndinoona ira ndipama urumelani Epafroditu. Wen’na ngubalanga, namalabafwanga na nyakondo fwanga. Wam’rumile nyo thitho unondikami-echa va vyorambulela vyanga. 26 Ndinofuna m’ruma namwasa oi unofunechecha uonani nyo mwethene, thitho unaasukwala namwasa oi mwatoovwa ira unaabulela. 27 Pyaimbarimbari ira atoobuleladi fiyedha a-la vang’ono funa wukwa. Mbwenye Nlungu atoom’vwela tangaranga. Thitho tangarangiyo kavwele liye baa-i kabe, mbwenye na miyene ira sukwala wanga wa-awenjedheleye. 28 Ee-no, ndinaam’ruma okoka mombaranya ira mwam’mona mukale osangalala thitho ira sukwala wanga uyeve. 29 Ninga mwahora dhothene, m’mwacheleni na mandha menli ninga munoirelecha nyo vowachela anama-arela Ambwiye. Mum’mwachele mosangalala thitho abali ninga enala mwaalemezenga maningi, 30 namwasa oi a-adhi vang’ono funa wukwa valaba liye basa la Kristu. Thitho atoo-ela ingumiyee vangovini ira adhandilabele malo mwanyo, voi kamwaode udha uno ira mudhandikami-e.

3 Vogomi-edha abalanga, dhowananive sangalala ninga anama-arela a Mbwiye. Ulembelani okoka vyongo vyaulembeleni miyo kai yorucha wa miyo, mbwenye kufuna ubarelani.

2 Muwenjele naatu anoira vyongo ninga anambwa. Muwenjele naatu anopei-a afwiwa. Muwenjele naatu anoineliwa. 3 I-yo ngwiineliwile mwaimbarimbari, namwasa oi ninoira urumiwi opambuleya mosogoleliwa na zimu wa Nlungu. Ninodhititimi-a mwa Kristu Yesu thitho kaninonyindela vyongo vinoona atu ira pyofuneya. 4 Masiki miyo kwaranya mutu uliwothene, nditokaana myasa yonyindela vyongo vinoona atu ira pyofuneya. Akala vatokala mutu unothuulela ira utokaana myasa yonyindela vyongo vinoona atu kala vyofuneya, miyo ndili okwaranya mutu wenuo. Namwasa oi: 5 ndaineliwile va dambo la 8 ndili wa mbumba la Israeli, waziza la Benjamini, ndili muebere obaliwa wa Aebere. Onga vya ilamulo, ndili Farisi. 6 Onga vya thindhi, ndanoo-ara-ara pingo. Onga vyoirana longomano vo-arela ilamulo, ndatooni-a ira kavali mwasa ondinukedhela. 7 Mbwenye vyongo vyaona miyo ira pyoganyali-a, ndinaaviona ira pyo-okaana basa namwasa wa Kristu. 8 Mwaimbarimbari, ndinoona ira vyongo vyothene pyo-oganyali-a namwasa oi ndatooidhiwa Yesu Kristu Mbwiyanga, yoi chiyongo yapereso yavadhulu maningi. Namwasa wa liye, ndatoo-iyachi vyongo vyothene thitho ndinoviona ninga dhungu, ira ndikale vauxamwali waimbarimbari na Kristu, 9 thitho ndioniwe ira ndili nama-arelee. Kai ira ndili olongomana namwasa oi ndinoira vyongo vyothene mofwanelela vo-arela Ilamulo, mbwenye namwasa oi ndinororomela Kristu. Longomano leli tokumela wa Nlungu thitho linodha namwasa wairoromelo. 10 Ifunelo yanga choi ndim’mwidhiwe thitho ira ndiidhiwe vyakopolo dha wenuo am’venyathi-idhe muukwa. Ndinofunechecha thitho ira ndirucheye ninga mwarucheile liye, fiyedha wukwa ninga mwemo mwakwele liye. 11 Ndiirile vyevi ira akala pyoodeya ndidhafwanye ngari yovenyathi-iwa muukwa vovenyathi-iwa oroma.

12 Kai ira nditowachela yotuvayo venango ira ndili olongomana kabe. Mbwenye ndinave dhilimbi-edha ira ndimawachele yotuva namwasa oi nditoidhiwa ira ifunelo ya Kristu Yesu vondisakula yali yei. 13 Abali, miyo kandinodhiona ira nditowachela yotuvayo kabe. Mbwenye vatokala yongo imbo-i inoira miyo: ndinodiwala vyongo vya nduli thitho ndinodhilimbi-edha ira ndimafwanye vyasogolo. 14 Ndinodhilimbi-edha ira ndikwakwaneli-edhe ifunelo yanga yomawachela yotuva. Yotuva yei kudhowa makaana ingumi dhulu thitho Nlungu unodha ivelela waatu ale aitan’ne liye dhela mwa Kristu Yesu. 15 Ee-no dhoweni othene oi nili olimba mwauzimu, nikaena mathuulelo enala. Thitho akala mutokaana mathuulelo o-iyana na enala, Nlungu unodha uva-ani mathuulelo ofwanelela. 16 Mbwenye mwandhila iliyothene idhowile i-yo vasogolo, dhoweni nidhowenave iranga vyongo vinoira i-yovyo.

17 Nyo abali mwethene, mudhilimbi-edhe ndi-arelanga thitho muonechechenga atu anoira vyongo movwelana na ifwanafwani-o yauoni-idheni i-yo. 18 Namwasa oi vatokala atu anjinji anoira vyongo ninga amwidani aimuri yoonelavo nyarwa* ya Kristu. Walelene ndaaromola vaduzi navaduzi mbwenye va-eni ndinoaromola ndilanga. 19 Atu enala anodedi-edhela nongiwa thitho Nlungwiwa ndi vingulu viwa. Aliwa anonyindela vyongo vyoi vingaava-idhe manyadho thitho tanothuulela vyongo vyavailambo yavathi baa-i. 20 Mbwenye i-yo nili anarala adhulu thitho ninodedi-edhela mosangalala namavulumucha okumela weo oi ngu Mbwiye Yesu Kristu. 21 Liye unodha chinja manungwi-u onyozeyala ira akale ofwanafwana na manungwee atitimi-o. Unodha irana vyevi vo-indi-edha basa kopolodhee dhinjinji dhinom’kami-a tonga vyongo vyothene.

4 Ee-no nyo abalanga, miyo ndinoudhiveliwanani thitho ndinofunechecha uonani. Nyo munondisangalali-a thitho muli ichapowa yanga yatitimi-o. Abalanga odhiveliwiwa, ndinoulimbi-ani ira mudhowenave kala ororomeleya wa Mbwiye.

2 Ndinoakumbanyedha Eodiya na Sitike ira tamali-e a-vwelana wiwa ninga anama-arela a Mbwiye. 3 Ndinouvepa we namalaba fwanga waimbarimbari, ira udhowenave akami-a a-iyanala. Aliwa tatodhilimbi-edha mwathindhi laba basa lomwadha milanyu yapama vambo-i na miyo. Tatoira vyevi vambo-i na Kelementi thitho anamalaba afwanga enango, oi madhiniwa tali bukhu la ingumi.

4 Hora dhothene musangalalenga mwa Mbwiye. Miyo ndinowelela thitho onga ira, musangalalenga! 5 Atu othene taidhiwe ira muli ololela. Mbwiye uli duzi. 6 Kamukumbanyenga na yongo iliyothene. Malomwee, mulobelenga hora dhothene wa Nlungu mum’sembezelenga ira ausogolelengani va yongo iliyothene thitho hora dhothene mum’simbenga. 7 Mwaira e-no, rendele wa Nlungu unokwaranya vwechecha uliwothene, unodha vunela miriminyu na mathuulelwinyu vano-arela nyo Kristu Yesu.

8 Vogomi-edha abali, dhowananive thuulela vyongo vilivyothene vyaimbarimbari, vyongo vyothene vyofuneya, vyongo vyothene vyolongomana, vyongo vyothene vyochena, vyongo vyothene vyolimbi-a udhivela, vyongo vyothene vinosimba atu, kalelo nlilothene lapama thitho yongo iliyothene yosimbeya mudhowenave thuulelanga vyongo vyevi. 9 Vyongo vyafunjedhile nyo, vyongo vyarumenle nyo, vyongo vyavwide nyo wa miyo thitho vyongo vyaoni nyo ndiviiranga, muirengana vyevyo thitho Nlungu wa rendele unodhakala na nyo.

10 Miyo ndinosangalala maningi mwa Mbwiye ira va-eeni mutoroma okoka ndithuulela. Ndinoidhiwa ira mukanle mundithuulelanga hora yothene yen’na, mbwenye kamwana pata othonyi-edha vyevi. 11 Kandinoonga vyevi namwasa oi ndinorambulela yongo, namwasa oi nditofunjedha kwakwanana vyongo vina miyo mo-otukulela moda uli vyongo vaingumi yanga. 12 Nditoidhiwa munokalela aliwa wakaana vyongo vyoyeva thitho mwemo munosangalalela wee wakaana vyongo vinjinji. Va yongo iliyothene thitho va vyoireya vyo-iyana-iyana, nditofunjedha kala orumbala nokala wandhala. Nditofunjedha thitho kaana vyongo vinjinji na a-kaana yongo. 13 Va vyongo vyothene ndinokaana kopolo kumela wa Nlungu unondiva-a kopolo.

14 Mbwenye mwatoira pama vondikami-a va nyarwa dhanga. 15 Nyo abali au Filipi, mutoidhiwa thitho ira mungavwidewene milanyu yapama vyakuma miyo wu Masedoniya kavali na pingo m’mbo-ene wakami-ana na miyo vamwasa ova-a nowachela, i-yavo nyo. 16 Namwasa oi vyali miyo wu Tezalonika, nyo mwatoonditumizela yongo inango ira indikami-e va vyafuneela miyo thitho kamwairile vyevi fendo imbo-i baa-i, mbwenye fendo mbili. 17 Kaiira ndinofuna ira mundiva-e vyotuva kabe, mbwenye ndinofunechecha ira muirenga vyongo vyapama vyoi vinouganyali-ani maningi. 18 Mbwenye, miyo nditokaana vyothene vinofuneela miyo thitho vinokwaranya vinofuneela miyo. Kandinorambulela yongo namwasa oi Epafroditu utondiva-a vyongo vyanditumizele nyo. Vyongo vyevi vili ninga kwema lonukela pama thitho sembe yorumeleya yoi njosangalali-a wa Nlungu. 19 Namwasa wa vyevi, Nlungwanga unodha uva-ani vyongo vyothene vinofuneela nyo movwelana na injiva wa fumee ya titimi-o, dhela mwa Kristu Yesu. 20 Va-eeni Nlungu oi ngu Babi-u atitimi-iwe modhowa nodhowa. Ame.

21 Muvelele mwenyula wanga waatu othene ochena oi mbaanamafunjedha a Kristu Yesu. Abali ana miyo vambo-i anaaumwenyulani. 22 Atu othene ochena tanaaumwenyulani, mbwenye simbwasimbwa anyumbani wa Kaisara.

23 Riya rima ulukhulu wa Mbwiye Yesu Kristu ukale na nyo, namwasa oi mathuulelwinyu mbapama.