KARTA LOROMA LODHOWA WA TIMOTEO

1 Miyo Paulo, rumiwi wa Kristu Yesu morumeli-iwa na Nlungu oi ndi namavulumuchi-u vambo-i na Kristu Yesu, oi ndi idedi-edhwi-u. 2 Ndinolembela we Timoteo,* mwananga waimbambari muiroromelo:

Nlungu Babi-u na Kristu Yesu Mbwii-u auva-e riya rima ulukhulu, tangaranga na rendele.

3 Ndinga-adhi vang’ono dhowa wu Masedoniya, ndatouvepa ira ukaleve wu Efeso. Ndinaauvepa thitho ira ukaleve weo naifunelo yoi ukondi-e atu enango ira ta-afunji-enga vyongo vyo-iyana na vinofunji-a i-yo, 4 thitho ira ta-avwelenga myasa yonama nosakasakana maziza aanamabala. Vyevi pyo-okami-a, mbwenye vinoromi-a myasa yo-okaana umboni thitho kavinofunji-a atu yongo iliyothene yokhumela wa Nlungu yokhuza iroromelo. 5 Ifunelo ya malangi-o enala choi nikaena udhivela okhumela rimani ochena, ithuulela rima yapama na iroromelo yo-okaana inyengo. 6 Atu enango atokonda a-rela vyevi thitho atodimeli-iwa noroma a-rela myasa yo-okaana basa. 7 Atu enala anofuna kala anamafunji-a a ilamulo. Mbwenye katinovwechecha vinoonga aliwa venango makhundo anolimbi-edha aliwao.

8 Ninoidhiwa ira Ilamulo chapama akala mutu unoilabi-edha basa mofwanelela. 9 Thitho lamulo kalino-eliwa namwasa wa mutu olongomana. Mbwenye lino-eliwa namwasa waatu o-ovwela malamulo, odhimbinuwela, o-oova Nlungu, odawa, o-ororomeleya, onyoza vyongo vyopambuleya, opha ababiwa na am’miwa, opha atu, 10 aunyambi,* alombwana anogonana na alombwana afwiwa, oba atu, onama, olumbela monama na anoirana yongo iliyothene yo-ovwelana na makhundo olinyali anofunji-a Nlungu. 11 Makhundwala mbovwelana na milanyu yatitimi-o yokhumela wa Nlungu osangalala, ya-edhi liye mandhani mwanga.

12 Ndinosimba Kristu Yesu Mbwii-u, oi ngwandiva-idhe kopolo nondiva-a thitho urumiwi namwasa oi atoona ira ndili ororomeleya. 13 Atooirana vyevyo angalive ira miyo walelene ndali onyoza Nlungu, a-ra-ara atwee thitho waiburutu. Mbwenye atoondivwela tangaranga namwasa oi ndanooirana vyongo mo-oidhiwa, thitho kandana iroromelo. 14 Mbwenye ndatoowachela riya rima ulukhulu wa Mbwii-u Nlungu, thitho iroromelo na udhivela wa Kristu Yesu. 15 Madhu oi Kristu Yesu atoodha vailamboi dhavulumucha atu odawa, ndi madhu aimbarimbari thitho mbofwanela arumela na rima wethene. Vaatu enala odawa, miyo ndili odawa maningi. 16 Mbwenye, atoondivwela tangaranga ira Kristu Yesu athonyi-edhe levawee rima othene wa miyo odawa maningi, ira ikale ifwanafwani-o waatu anofuna dharoromela naifunelo yoi tadhakaena ingumi yo-omala.

17 Wa Nlungu m’mbo-i baa-i oi ngu Mwene odhowa nodhowa, oi ngo-okwa na o-ooneya, ukale lemezo na titimi-o modhowa nodhowa. Ame.

18 Mwananga Timoteo, ndinaaulangi-a irana vyevi movwelana na maulosi avaeletu onga vya we. Ira movwelana na maulosao udhowenave khoma khondo yapama. 19 Ukaena iroromelo na ithuulela rima yapama yoi atu enango ato-iya i-arela thitho iroromelwiwa itothweya ninga mwadiya. 20 Enango mwaatwala ndi Emenayo na Alexandri, thitho nditoavelela wa Satana ira talangiwa, tafunjedhevo yongo no-iya m’nyoza Nlungu.

2 Yoroma ndinaalimbi-a atu othene ira talobelenga, lobela mosembezela, lobela mosimba Nlungu malo mwaatu o-iyana-iyana. 2 Thitho lobelela mamwene naatu othene ana izo yavadhulu, ira nidhowenave kala mopwaseya na mwarendele thitho odhivelela maningi wa Nlungu na mathuulelo apama. 3 Vyevi pyapama thitho pyorumeleya wa Nlungu, oi ndi namavulumuchi-u, 4 oi unofuna ira atu o-iyana-iyana tavulumuwe noidhiwa imbarimbari molinyali. 5 Namwasa oi vatokala Nlungu m’mbo-i na namaimelela m’mbo-i vari va Nlungu naatu. Namaimelelula ngu Kristu Yesu, mutu 6 oi ngwadhivelenle ira akale kuto okwakwanela waatu othene. Vyevi pinofuna dhaireliwa umboni vahoree. 7 Namwasa wa umboni wen’na, miyo ndatoosakuliwa ira ndikale namalaleela na rumiwi. Ndinoonga imbarimbari, kandinaanama-i. Ndatoosakuliwa ira ndifunji-e atu amaziza enango vya iroromelo na imbarimbari.

8 Ee-no, ndinofuna ira wu limburo nlilothene alombwana tadhowenave lobela. Tagweli-enga mandhiwa dhulu mororomeleya wa Nlungu, mo-othakaleliwa noruni-ana. 9 Naaliwene thitho a-iyana tanofwanela dhibalei-a na vyowara vyofwanelela, vowara mwalemezo na mwazelu a-kala dhibalei-a na mastilu omanga sisi, oro, mabwe apereso yavadhulu, venango vyowara vyodula. 10 Mbwenye tadhibalei-enga movwelana na mwemo a-iyana odhivelela wa Nlungu munofwanela aliwa dhibalei-ela. Tadhibalei-enga na mabasa apama.

11 Vofunji-a, a-iyana takalenga omiyala thitho tagonjelenga narima wethene. 12 Kandinorumeli-a ira i-yana afunji-enga venango tonganga lombwana, mbwenye amiyalenga. 13 Namwasa oi aromile panduchiwa ndi Adamu adhamale Eva. 14 Thitho Adamu kaanami-iwile, mbwenye i-yanuo ngwanami-iwile thitho atoodawa. 15 Mbwenye i-yana unodha bareleya abala a-ima akala unodhowanave kaana iroromelo, udhivela nokala ochena thitho othuulela pama.

3 Madhwala mbaimbarimbari: Akala mutu unodhilimbi-edha ira akale namaing’anela,* unofuna basa lapama. 2 Ee-no namaing’anela* unofwanela kala o-okaana mwasa om’nukedhela, lombwana wa i-yana m’mbo-i, o-oira vyongo mokwaranyi-a madile, othuulela pama,* oira vyongo mundhila yapama, owachela alendo thitho oidhiwa funji-a. 3 Kakale mutu osimbwa umwa vyomwa vyolezeli-a, venango wauwalanga, mbwenye akale ololela. Thitho kakale odhiveliwana kangana venango odhiveliwana kobiri. 4 Akale lombwana osamalela pama banjalee thitho oi a-imee anom’vwela na rima wethene. 5 (Akala mutu kanoidhiwa samalela banjalee, n’nga pingo wa Nlungu unausamalele a-vi?) 6 Kakale oi ute badiziwa wene,* ovela ira unooda roma dhiulukhuli-a namwasa ogaya notongiwa mofwanafwana ninga mwatongiwile Namanami-a. 7 Thitho akaena limbili lapama waatu aundhe ira a-anyoziwe naatu nomangiwa mu go-i wa Namanami-a.

8 Naaliwene thitho arumiwi okami-a takale o-oira vyongo ninga a-ima, o-oonga monama, o-omwa vinyu maningi thitho o-odhiveliwana ganyali vyongo mwainyengo. 9 Akale olokota segeredo yopambuleya yairoromelo, angali na ithuulela rima yochena.

10 Voroma tanofwanela wesedhiwa akala mbofwanelela, thitho akala ira katina mwasa owanukhedhela tanofwanelela kala arumiwi.

11 Naaliwene thitho a-iyana katikale oira vyongo ninga a-ima, o-oira vyongo mokwaranyi-a madile, ororomeleya va vyongo vyothene thitho katikale afyeda.

12 Rumiwi okami-a akale lombwana wa i-yana m’mbo-i, osamalela pama a-imiwa na mabanjiwa. 13 Namwasa oi alombwana anosogolela pama anokaana limbili lapama na ufulu unjinji oonga vya iroromelo ili mwa Kristu Yesu.

14 Ndinororomela ira ndinodha vachineneeva, mbwenye ndinoulembela vyevi 15 ira akala ndinodembuwa, uidhiwe vinofwanela we irana vanyumbani ya Nlungu yoi ndi pingo wa Nlungu waingumi. Pinguo ngunolimbi-a nobarela imbarimbari. 16 Onga vyaimbarimbari, segeredo yopambuleya yokhuza kala odhivelela wa Nlungu weu njiilukhulu: ‘Liye atooneela ninga mutu, atooniwa ira ngolongomana vyali liye zimu, atooneela waangelo, atoolaleeliwa wa maziza aatu, atu availambo yavathi tatoom’roromela thitho atoowacheliwa dhulu mu titimi-o.’

4 Mbwenye madhu ovudheleliwa anoonga movweya pama ira hora inango sogolou, iroromelo yaatu enango inodha mala namwasa ovuruwana madhu ovudheleliwa oi mbodimeli-a, na vyongo vinofunji-a viwanda. 2 Thitho vyevi vinodha ireya namwasa wa inyengo yaatu oonga vyonama, oi ithuulela rima iwa ili ninga damba lodha namwasa ovya na fero ya mulo. 3 Atu enala anokondi-a thela, thitho anowandela atu ira tasalenga udya vyongo vipanduchile Nlungu ira atu ana iroromelo na oidhiwa imbarimbari molinyali tadyenga nom’simba Nlungu. 4 Namwasa oi yongo iliyothene ipanduchile Nlungu chapama, thitho kavali inofwanela kondiwa akala mutu utosimba wa Nlungu vodya, 5 namwasa oi inocheni-iwa na madhu a Nlungu thitho lobelo.

6 Wavelelanga malangi-oala wa abali, unodha kala rumiwi wapama wa Kristu Yesu. Thitho unodha ulukhula pama na madhu a iroromelo na ifunji-edho yapama ino-arelecha we mororomeleya. 7 Mbwenye urambelenga myasa yonama yo-olemeza Nlungu ninga inoongecha a-iyana enango oulula. Malomwee, udhifunji-enga wekhene na ifunelo yoi ukaleve odhivelela wa Nlungu. 8 Namwasa oi waredha molimbi-a manungo unokami-a vang’ono, mbwenye kala odhivelela wa Nlungu unokami-a va vyongo vyothene, namwasa oi unokhuza yolanyedha ya ingumii-u va-eeni na ingumi inodhayo. 9 Madhu enala mbaimbarimbari thitho mbofwanela arumela na rima wethene. 10 Ngumwasee ndinolaba basa mwathindhi thitho mwakopolo namwasa oi idedi-edhwi-u ili mwa Nlungu wa ingumi, oi ndinamavulumucha wa atu othene, mbwenye simbwasimbwa atu ororomeleya.

11 Udhowenave afunji-a noawandela ira tairengana vyevi. 12 Khurumele ira mutu uliwethene aupwaze voona ira uli mwana. Malomwee, ukale ifwanafwani-o waatu ororomeleya va vinoonga we, makalelwaa, udhivela, iroromelo na kalelo lochena. 13 Vanondidedi-edhela we udhowenave kala odhivelela voleri va mwinji, volimbi-a* atu na vofunji-a. 14 Khupwaze yotuva yava-iwile we dhela mu ulosi va-eliwile we mandha na gulu la andimuwa. 15 Uthuulelenga modi-a vyongo vyevi thitho uviirengana modhivelela ira atu othene taone ira unaadhowa vasogolo. 16 Hora dhothene uirenga polepole na vyongo vinoira we na vinofunji-a we. Udhowenave irana vyevi, namwasa oi waira e-no unodha dhivulumucha wekhene naatu anofuna uvwela.

5 Khusumulule mwauwali lombwana oulula, mbwenye um’mongengana moriya rima ninga babaa. Azombwe uaongengana ninga abalaa 2 thitho a-iyana oulula uaonengana ninga m’maa. Asikana uaongengana ninga arongolaa thitho voirana vyevi kukaengana mathuulelo aliothene odaweya.

3 Uthuulelenga a-iyana amakwele oi mbaamakweledi.* 4 Mbwenye akala ira i-yana wamakwele utokaana a-ima venango adhuulu, aliwa takale oroma samalela atu avabanjani viwa vothonyi-edha ira mbodhivelela wa Nlungu. Aliwa tanofwanela weleli-edha anamabaliwa na ambwiiwa vyongo vyofuneeleya namwasa oi vyevi vinosangalali-a Nlungu. 5 I-yana oi ngwamakweledi, oi unorambulela mutu om’samalela, unonyindela Nlungu thitho unodhowanave lobela mosembezela nathana nama-iyu. 6 Mbwenye mutu unoirana vyongo mo-arela naluveluvee, ngokwa angalive ira ngwaingumi. 7 Udhowenave ava-a malangi-o* enala ira ta-akaena mwasa oanukhedhela. 8 Mwaimbarimbari, akala mutu kanosamalela atu oi ndi izoyee asamalela, simbwasimbwa avabanjanivee, utokonda iroromelo thitho ngothakala kwaranya mutu o-ororomela.

9 Vathandha wa a-iyana amakwele, valembiwenga i-yana wamakwele okwaranya vyawa 60. Akale thitho oi ali ororomeleya wa man’nee,* 10 oidhiweya ira anoolaba mabasa apama, atoulukhuli-a a-imee pama, anoowachela alendo, atoo-uwa manyalo aatu ochena, atookami-a atu oi tali vanyarwani thitho anoolaba modhivelela basa nlilothene lapama.

11 Mbwenye vathandha wen’na khu-elevo asikana amakwele, namwasa oi akaana naluveluve ofuna lombwana malo molabela Kristu, tanosakula theliwa. 12 Vyaira e-no, tanofwanyeya odawa namwasa oi katikwakwaneli-edhe vyalanyedhile aliwa. 13 Mbwenye malo molaba aliwa tanokalela wendawendanga mavandhe mwaafiwa. Wenjedhela vevo tanokalela thitho onga mafyeda, volowela myasa yaatu enango noonganga vyongo vyo-ofwanelela vionga. 14 Ee-no ndingadhiveliwile ira asikana amakwele tatheliwenga, nobala a-ima thitho samalelenga mabanjiwa naifunelo yoi atu oruni-a ta-anifwanyele mwasa. 15 Thitho enango atomala dimeli-iwa wale moi atoroma a-rela Satana. 16 Akala i-yana uliwethene ororomela utokaana abalee oi mbaa-iyana amakwele, liye unofwanela akami-anga, ira a-iyana amakwelao ta-anyemeli-enga pingo. Vyaira e-no pinguo unooda kami-a a-iyana oi mbaamakweledi.*

17 Andimuwa avapingoni anosogolela pama talemeziwenga maningi simbwasimbwa oi tanokaana thindhi voonga madhu a Nlungu nofunji-a. 18 Namwasa oi madhu a Nlungu anoonga ira: “Khumange ng’ombe lomo vahora inoputa aliwa mbeu.” Thitho anoonga ira: “Namalaba unofwanela tambili-iwa.” 19 Khurumele selu onukhedhiwa wa ndimuwa wa vapingoni, i-yavo akala vatokala umboni waatu ambili venango araru. 20 Atu ana ilemeelo yodawa, uasumululenga ira atu enangwao taove.* 21 Ndinouwandela mwakopolo, vamethoni va Nlungu na Kristu Yesu na va angelo oira sakuliwa, ira u-arelenga malangi-o enala mo-osakula.

22 Khumbaranye e-la mutu uliwethene vaizo, venango gaana naatu enango vyodawa viwa. Udhowenave kaana kalelo lochena

23 Khumwengave ma-inje baa-i, mbwenye umwenga vinyu vang’ono, namwasa wa yoruchayaa ya mbani thitho namwasa oi unobulelecha wiliwili.

24 Vyodawa vyaatu enango vinoidhiweya waatu, thitho anotongiwa hora yeniyene. Mbwenye vyodawa vyaatu enango vinooneela vavira hora. 25 Naaliwene thitho mabasa apama anoidhiweya waatu, thitho vyongo vyo-oidhiweya kavinalokoteye modhowa nodhowa.

6 Atu othene oi mba dhaari taonenga ira mapatrawiwa mbofwanela alemeza na rima wethene, ira dhina la Nlungu na vinonifunji-a liye vya-anyoziwe. 2 Thitho adhaari oi mapatrawiwa ndi makristau, katiairelenga vyongo mo-oalemeza namwasa okala abali. Malomwee talabenga basa mwathindhi maningi, namwasa oi basa liwa lapamalo linokami-a Makristau afwiwa anoadhiveliwana aliwa.

Udhowenave funji-a vyongo vyevi nolimbi-a atu ira tairengana vyevi. 3 Akala mutu unofunji-a vyongo vyonama, thitho kanorumela malangi-o apama okhumela wa Mbwii-u Yesu Kristu, na vyongo vinofunjedha i-yo vyovwelana na dhivelela wi-u wa Nlungu, 4 mutu wenuo ngodhiulukhuli-a, ngogaya, thitho kanovwechecha yongo iliyothene. Malomwee, unodhiveliwana kangana thitho runi-ana voonga. Vyevi vinoromi-a bivu, kangana, ongelana madhu aiburutu nothuulelana mothakala. 5 Vinoiri-a thitho ira atu obenda mathuulelo na o-oidhiwa imbarimbari, takanganenga va vyongo ving’ono vothuulela ira kala odhivelela wa Nlungu ndi ndhila yoganyalela vyongo. 6 Pyaimbarimbari ira kala odhivelela wa Nlungu nokala okwakwana na vina i-yo, ndi ndhila ilukhulu yoganyalela vyongo. 7 Voi kanadhidhena yongo vailambo thitho kaninodha khumavo na yongo. 8 Ee-no, akala nitokaana yodya, vyowara na vogona, nikale okwakwana na vyongo vyevi.

9 Mbwenye atu anofunechecha fuma anogumanana vyowesedha thitho anomangiwa mugo-i. Aliwa anolavela vyongo vyo-okaana basa thitho anoira vyongo mo-okaana zelu. Vyevi vinoadhi-edha nyarwa noukwa. 10 Namwasa oi dhiveliwana kobiri unoromi-a vyopha vya tundu uliwethene, thitho namwasa otukuleya na udhivela wen’na, atu enango ato-iya roromeleya thitho atodhidhi-edha vyopha maningi manungoni mwiwa.

11 We mutu wa Nlungu, utawe vyongo vyevi. Malomwee udhilimbi-edhe kala walongomano, odhivelela wa Nlungu, wairoromelo, waudhivela, ovilela na opwaseya. 12 Ukhome khondo yapama ya iroromelo. U-indedhe mwakopolo ingumi yo-omala yaitaniwele we. Namwasa oi watoolaleya movweya pama vyokhuza ingumi yen’na vari va mboni dhinjinji.

13 Vamethoni va Nlungu, oi unokami-a ira vyongo vyothene vikaenave ingumi na vamethoni va Kristu Yesu, oi atoovelela umboni wapama maningi vamethoni va Potiyo Pilato, ndinouwandela 14 ira uvwelenga malamulo. Uavwelenga ungali ochena na o-okaana mwasa ounukhedhela fiyedha vahora inofuna dhaoneela Mbwii-u Yesu Kristu. 15 Liye ngosangalala na wakopolo thitho ndi Mwene wa mamwene na Mbwiye wa ambwiye, thitho unodhaoneela vahoree. 16 Liye utokaana ingumi yoi kinokwa thitho unokala valimburo lochena maningi moi kavali mutu unaode fiyavo. Kavali mutu uromile m’monavo venango unaode m’mona. Liye alemeziwe thitho kopolo dhee dhikaleve modhowa nodhowa. Ame.

17 Ulangi-e atu ofuma availamboi ira ta-akale odhigweli-a thitho ira ta-anyindelenga fuma yo-onyindeleya, mbwenye tanyindelenga Nlungu, oi unoniva-a modhala mandha vyongo vyothene vinosangalalana i-yo. 18 Uawandele ira tairengana vyongo vyapama takale ofuma vamabasa apama, ova-a modhala mandha thitho takale okozeya gawela atu enango 19 ira talokote pama fuma yokhumela wa Nlungu yoi ndi inyindelo yapama ya sogolo liwa naifunelo yoi ta-indedhe mwakopolo ingumi ya imbarimbari.

20 Timoteo, ulokote pama vyongo viwachenle we wa Nlungu. Urambelenga myasa yo-okaana basa yoi inothakali-a vyongo vyochena. Urambelenga thitho runi-ana vavyongo vinoonga atu enango monama ira “khuidhiwa vyongo.” 21 Namwasa odhioneeli-edha noidhiwa vyongo weu, atu enango tato-iya kala ororomeleya.

Riya rima ulukhulu ukale na nyo.