KARTA LANAMBILI LODHOWA WA TIMOTEO

1 Miyo Paulo, rumiwi wa Kristu Yesu mofuna wa Nlungu, movwelana na yolanyedha ya ingumi inakaena i-yo namwasa okala anama-arela a Kristu Yesu, 2 ndinolembela we Timoteo mwananga odhiveliwiwa:

Riya rima ulukhulu, tangaranga na rendele vyokhumela wa Babi-u Nlungu, na wa Kristu Yesu Mbwii-u, vikale na we.

3 Ndinosimba Nlungu oi ndinom’labela urumiwi opambuleya ninga mwemo mwairela anamabalanga awale. Ndinoulaba na ithuulela rima yochena thitho kandinodiwala uromola malobelwanga osembezela, nathana nama-iyu. 4 Ndathuulela mi-odiyaa ndinofunechecha uona ira ndidhasangalale maningi. 5 Namwasa oi ndinothuulela iroromeloyaa yo-okaana inyengo, yoi aromile ikaana ngu mbwiyaa wa-iyana Loisi na m’maa Eunisi, moi ndinororomela ira we thitho utoikaana.

6 Namwasa wa vyevi, ndinouthuucha ira yotuva ya Nlungu ina we, yoi waiwachenle vyau-enle miyo mandha, uithethedhe ninga mulo. 7 Namwasa oi Nlungu kaniva-idhe zimu oova, mbwenye zimu wakopolo, waudhivela na oi nithuulelenga pama. 8 Ee-no kukaena manyadho na basa lolaleela vya Mbwii-u Yesu, venango kaana manyadho na miyo oi ndili nyaperezo namwasa wa liye. Mbwenye ukale okhozeya gumanana nyarwa namwasa wa milanyu yapama thitho unyindelenga kopolo ya Nlungu. 9 Liye atoonivulumucha noniitana ira nikale atwee ochena, a-kala namwasa wa mabasi-u, mbwenye namwasa wa ifuneloyee noriya rimawee ulukhulu. Nlungu atoonithonyi-edha riya rima weu walelene namwasa wa Kristu Yesu. 10 Mbwenye va-eeni vyevi vitosikimizeleya namwasa ooneela wa namavulumuchi-u Kristu Yesu, oi utomali-a kopolo ya wukwa. Thitho vo-indi-edha basa milanyu yapama, utoniidhiwi-a mwemo munakalelena i-yo ingumi yo-onongeya. 11 Thitho ndatoosakuliwa ira ndikale namalaleela, rumiwi na namafunji-a wa milanyu yapamila.

12 Ngumwasee ndinaaona nyarwa e-ni, mbwenye kandinokaana manyadho. Nditom’mwidhiwa unom’roromela miyo, thitho kandinokaikela ira unodha barela vyongo vyothene vyam’va-idhe miyo fiyedha vadambo lotongiwa. 13 Udhowenave i-ndedhela ifwanafwani-o ya madhu olinyali avwide we wa miyo vanothonyi-edha we iroromelo na udhivela unokaana i-yo namwasa ovwelana na Kristu Yesu. 14 Ulokote fuma yavakhundu yava-iwile weila. Uilokote mokami-iwa na zimu ochena una i-yo.

15 We unoidhiwa ira atu othene a provisiya ya Aziya atoondi-iya. Enango mwa atwala ndi Fijelo na Ermojene. 16 Mbwiye avwele tangaranga banja la Onesiforo, namwasa oi anoodha wiliwili dhandilimbi-a, thitho kaana manyadho na makuretanga. 17 Moi vyali liye wu Roma, atoondisakasaka mwathindhi moi atoondifwanya. 18 Mbwiye Yohova* adham’vwele tangaranga vadambo lotongiwa. We unoidhiwa pama vya urumiwi wethene wairile liye wu Efeso.

2 Ee-no we mwananga, udhowenave fwanya kopolo dhela moriya rima ulukhulu wa Kristu Yesu. 2 Vyongo vyavwide we wa miyo na wa mboni dhinjinji, uvifunji-e waatu ororomeleya ira na aliwene thitho tadhakale ofwanelela funji-a atu enango. 3 Ninga nyakhondo wapama wa Kristu Yesu, ukale okozeya gumanana vyorucha. 4 Mutu ulembiwile unyakhondo kanoirana* vyamalonda* ninga vinoirana atu enango, vofuna dhiveliwi-a mutu um’lembile unyakhondo. 5 Masiki va pikisano, mutu kanowachela yotuva aira pikisano mo-o-arela malamulo. 6 Namalima wa thindhi unofwanela kala oroma udya vyova-a vya mbeu dhee. 7 Hora dhothene uthuulelenga viuwandele miyovi thitho Mbwiye unodhaukami-a vwechecha vyongo vyothene.

8 Uthuulele ira, movwelana na milanyu yapama inolaleela miyo, Yesu Kristu atoovenyathi-iwa thitho ali wa mbumba* ya Davide. 9 Namwasa wa milanyuila ndinaaona nyarwa thitho nditofungeliwa perezo ninga liphanga. Mbwenye madhu a Nlungu katinomangeya. 10 Ee-no ndinave vilela mu vyongo vyothene namwasa waatu osakuliwaala, ira na aliwene thitho tavulumuchiwe dhela mwa Kristu Yesu nowachela titimi-o lo-omala. 11 Madhwala mbaimbarimbari: Mwaimbarimbari, akala natookwa vambo-i na liye, ninodhakaana thitho ingumi vambo-i na liye. 12 Nadhowanave vilela, ninodha tonga vambo-i na liye ninga mamwene. Nam’konda, liye thitho unodhanikonda, 13 mbwenye nakala o-ororomeleya, liye unodhakalave ororomeleya, namwasa oi kanodhikonda ekhene.

14 Uathuuchenga vyevi hora dhothene. Uava-enga malangi-o* vamethoni va Nlungu ira ta-akanganenga voonga. Irana vyevi kaunaganyali-a navang’ono vene namwasa oi unononga iroromelo ya alimbo vuruwana. 15 Uirena iliyothene yoodeya ira uthonyi-edhe ira uli orumeleya vamethoni va Nlungu, mutu o-okaana manyadho na basa lilabile liye thitho ofunji-a noonga pama madhu aimbarimbari. 16 Mbwenye urambelenga myasa yo-okaana basa yoi inothakali-a vyongo vyochena namwasa oi inoiri-a ira atu anjinji ta-aovenga Nlungu, 17 thitho madhwiwa anomwadheya ninga ilonda yothathareya. Enango mwa atu enao ndi Emenayo na Fileto. 18 Atu enala anobendi-a imbarimbari voonganga ira atu okwa atoomavenyathi-iwa wale thitho anononga iroromelo ya atu enango. 19 Mbwenye sapato imangile Nlungu molimba itokalavove, thitho ina izindiyelo ya madhu oi: “Yohova* unoidhiwa atwee,” thitho oi: “Mutu uliwethene oitana vadhina la Yohova a-iye irana vyongo vyo-olongomana.”

20 Wari mwa nyumba ilukhulu kamunokala vyongo vya oro na vya fero baa-i, mbwenye munokala thitho vya matabwa na vya ulongo. Vyongo vinango vinokaana basa lolemezeya, mbwenye vinango vinokaana basa lonyozeya. 21 Ee-no akala mutu unorambela vyongo vya basa lonyozeyalo, unodha kala yongo ya basa lolemezeya, yochena yofuneya wa mwinyaa na yokozeya laba basa lililothene lapama. 22 Ee-no utawe naluveluve wa uzombwe, mbwenye u-arele longomano, iroromelo, udhivela na rendele vambo-i naatu anoitana Mbwiye na rima ochena.

23 Thitho, urambelenga runi-ana va vyongo vyo-okaana basa na vyo-okaana zelu namwasa oi vinoromi-a kangana. 24 Dhaari wa Mbwiye kanofwanela kangana naatu. Mbwenye unofwanela kala okurudheya waatu othene, ofwanela funji-a, oleva rima atu enango tam’dawela, 25 thitho ooda va-a malangi-o mopwaseya atu oruni-a ira venango Nlungu unodha arumeli-a ira tachinyuwe* noidhiwa imbarimbari molinyali. 26 Thitho venango anodha zindiyela novulumuwa wu go-i wa Namanami-a, namwasa oi liye utoa-inda aingumi vofuna ira tairengana vinofuna liye.

3 Mbwenye uidhiwe ira malambo omari-a anodha kala hora yavakhundu na yorucha. 2 Atu anodha kala odhidhiveliwana okhene, odhiveliwana kobiri, ogaya, odhigweli-a, onyoza, o-ovwela anamabala, o-osimba, o-ororomeleya, 3 o-odhiveliwana abaliwa, o-ofuna vwelana naatu enango, oongela afwiwa vyothakala, o-odhikondi-a, oophi-a, o-odhiveliwana vyapama, 4 oirela afwiwa vyongo vyothakala, o-ovwa vyoonga vyaatu enango, osimbwa dhiulukhuli-a, odhiveliwana vyosangalali-a malo modhiveliwana Nlungu, 5 thitho ooneya ninga odhivelela wa Nlungu mbwenye anokonda ira kopolo yodhiveleliyo iyachinje. Atu enala uwarambenga. 6 Enango mwaatwala anovolowela mabanja aatu enango mo-ooneya noiri-anga a-iyana enango ira takale adhaariwa. A-iyanala anokala ofooka namwasa wa vyodawa viwa thitho otukuleya na naluveluve o-iyana-iyana. 7 Hora dhothene anofunjedhecha, mbwenye katinooda idhiwa imbarimbari molinyali.

8 Mofwanafwana na Yane na Yambre tam’runi-idhenga Mose, atu enao anodhowanave runi-a imbarimbari. Aliwa atokaana mathuulelo obenda maningi na o-ofwanelela iroromelo yen’na. 9 Mbwenye aliwa katinooda dhowa undendai, namwasa oi uzimoriuwo unooneela pama waatu othene, ninga mwakalele aliwa naatu ambilale. 10 Mbwenye we utodhilimbi-edha a-rela vinofunji-a miyo, ingumi yanga, ifunelwanga, iroromelo yanga, leva rima wanga, udhivelanga novilela wanga. 11 Unoidhiwa thitho mwemo mwarucheele miyo na nyarwa dhaguman’nena miyo wu Atiokeya, wu Ikoniyo na wu Listra. Mbwenye ndatoovilela thitho Mbwiye atoondivulumucha wu vyongo vyothene vyevi. 12 Voi atu othene ofuna kaana ingumi yodhivelela wa Nlungu movwelana na Kristu Yesu, na aliwene thitho anodha a-ra-ariwa. 13 Mbwenye atu othakala anodha dhowanave simbwa thakala nodimeli-a enango thitho aliwa anodha dimeli-iwa.

14 Mbwenye we, udhowenave a-rela vyafunjedhile we na vyaroromenle we vasogolo vovinyindela, namwasa oi unom’mwidhiwa aufunji-idhe. 15 Romela ungali mwana, utoidhiwa malemba ochena anofuna uva-a zelu dhoukami-a ira udhavulumuwe namwasa ororomela Kristu Yesu. 16 Malemba othene avudheleliwile na Nlungu, thitho mbokami-a vofunji-a, sumulula, saka-edha vyongo nolangi-a molongomana, 17 ira mutu wa Nlungu akale ofwanelela maningi na okozeya mokwakwanela laba basa lililothene lapama.

4 Vamethoni va Nlungu na Kristu Yesu unofuna dhatonga atu aingumi na wokwa adhadha mu Umwenee, ndinouwandela mwakopolo ira: 2 Ulaleele madhu. Ulaleelenga modhivelela* vahora yapama na yorucha. Usumulule, runi-a, khumbanyedha, thitho uirengana vyevi na dodoliso lofunji-a noleva rima maningi. 3 Namwasa oi inodha fiya hora yoi atu katinodha funa funji-iwa vyolinyali, mbwenye movwelana na vinofuna aliwa, anodha saka anamafunji-a ira taawandelenga vinodhiveliwana aliwa. 4 Aliwa anodha i-ya vuruwana imbarimbari novuruwananga myasa yonama. 5 Mbwenye we ukaleve othuulela pama va vyongo vyothene, uvilelenga vyorucha, ulabenga basa la namalaleela* thitho ukwakwaneli-edhenga vikhundu vyothene vya urumiwaa.

6 Ndili ninga sembe ya vyomwa, inokutuleliwa vaiguwa ya sembe, thitho hora yoi ndithathuliwe i-adhi vang’ono. 7 Nditokhoma khondo yapama. Nditotamanga vapikisanula fiyedha khomoni. Nditokalave wairoromelo. 8 Va-eeni atondilokotedha ichapowa ya umwene yaatu olongomana. Mbwiye unotonga molongomana, unodha ndiva-a yotuvai vadambolo. Kai ira unodha va-a miyo ndekhene, mbwenye unodha va-a thitho atu othene takadhi tadedi-edhelenga hora inofuna liye dhaoneela.

9 Udhilimbi-edhe ira udhe chineneeva. 10 Uno Dema utondi-iya namwasa odhiveliwana vyongo vya ilamboi thitho udhowile wu Tezalonika. Keresike udhowile wu Galatiya thitho Titu udhowile wu Dalimaziya. 11 U-adhi ndi Luka baa-i. Wadhanga udhe vambo-i na Marku namwasa oi unondikami-echa vaurumiwanga. 12 Mbwenye Tikiko nditom’ruma dhowa wu Efeso. 13 Wadhanga undidhelena kapote wa-iidhe miyo wu Trowade vandhe va Karpo thitho mipukutu simbwasimbwa yatembile.

14 Alexandri ofula vyongo vyakuwa ule, atoondiirela vyongo vyothakala maningi. Yohova* unodha m’mweleli-edha movwelana na mabasee. 15 We thitho uire polepole na liye namwasa oi atooruni-a milanyui-u mwakopolo.

16 Vahora yadhibarela miyo fendo yoroma vaselwanga kavali nam’mbo-ene ali wu ikhundu yanga, moi othene tatoondi-iya. Mbwenye katikaena selu. 17 Mbwenye Mbwiye atooimela duzi na miyo nondiva-a kopolo. Liye atooirana vyevi ira dhela mwa miyo, basa lolaleela liireye mokwakwanela noira maziza othene aatu tavwe milanyuiyo. Thitho ndatoovulumuchiwa mwano mwa kalamu. 18 Mbwiye unodha ndivulumucha wu yothakala iliyothene thitho unodha ndibarela ira ndimakale mu Umwenee wa dhulu. Liye atitimi-iwe modhowa nodhowa. Ame.

19 Uvelele mwenyula wanga wa Piriska na Akila thitho banja la Onesiforo.

20 Erastu atoo-ala wu Koritiyo, Mbwenye Trofimo ndam’-iidhe abulelanga wu Mileto. 21 Udhilimbi-edhe ira udhe uno hora yodidila ya-anafiye.

Ebulo, Pudeni, Linu, Kalaudia vambo-i na abali othene anaaumwenyulani.

22 Mbwiye akale na we namwasa wa zimu unothonyi-edha we. Riyawee rima ulukhulu ukale na nyo.