KARTA LODHOWA WA AEBERE

1 Walelene, Nlungu anoonga na anamabali-u dhela mwaanamaongela. Atooira vyevi fendo dhinjinji thitho mundhila dho-iyana-iyana. 2 Mbwenye malamboano, liye utoonga na i-yo dhela mwa Mwanee, am’sakunle liye ira akale owachela vyongo vyothene ninga yotuva. Thitho dhela mwa liye, Nlungu atooiri-a ira vakale hora dho-iyana-iyana. 3 Liye unooni-a pama titimi-o la Nlungu thitho ndi ifwanafwani-o yaimbarimbari ya Nlunguo. Thitho madhwee akopolo anokami-a ira vyongo vikalevove. Angamadhi cheni-a vyodawa vi-u, atookala wu dhandha lodyana la Nlungu Nlukhulu. 4 Ee-no liye utokwaranya angelo, moi dhina liva-iwile liye ninga yotuva, tavadhulu maningi kwaranya liwa.

5 Mofwanafwani-a, n’nga ndi ngelo uvi aromile wandeliwavo na Nlungu ira: “We uli mwananga, penene miyo ndili babaa?” Thitho ira: “Miyo ndinodha kala babee thitho liye unodha kala mwananga?” 6 Mbwenye voonga vya hora inofuna liye dharuma okoka Mwanee oroma baliwa vailambo yavathi, liye unoonga ira: “Angelo othene a Nlungu tam’kokorele.”

7 Thitho voonga vya angelwee, liye unoonga ira: “Unoiri-a angelwee kala akopolo thitho unoiri-a arumiwee kala ninga malumi a mulo.” 8 Mbwenye voonga vya Mwanee, liye unoonga ira: “Nlungu ngunouva-a kopolo ira utonge modhowa nodhowa, thitho golomondo la Umwenaa, ndi golomondo la longomano. 9 Wanoodhiveliwana longomano thitho wanooidanana a-vwela malamulo. Ngumwasee Nlungwaa, atouzoza na makhura nouiri-a sangalala maningi kwaranya mamwene afwaa.” 10 Liye unoonga thitho ira: “Mbwiye, voroma mwatookaathei-a ilambo yavathi, thitho dhulu ndi basa la mandhinyu. 11 Vyongo vyothene vyevi vinodha mala, mbwenye nyo munodha kalaove. Mofwanafwana na nguwo yoi inothaala, vyongo vyothenevi vinodha mala. 12 Vyongo vyevi munodha vivindavinda ninga nguwo yolapa thitho ninga yowara moi vinodha chinjiwa. Mbwenye nyo kamunodha chinja, thitho munodha kalaove modhowa nodhowa.”

13 N’nga ndi ngelo uvi aromile liye m’mwandelavo ira: “Ukale udhandha langa lodyana, fiyedha ndidhaa-ela amwidanaa othene vathi va manyalwaa? 14 Angelo othene ndi mizimu yolabela atu enango.* Nlungu unoaruma ira tamalabele atu anofuna liye avulumucha.

2 Ngumwasee va-eeni kwaranya walelene ninofwanela thuulela modi-a vyongo vyavwide i-yo, ira na-atukuleye mwavan’gono navan’gono i-yachi iroromelo. 2 Akala madhu aongile angelo alidi aimbarimbari, thitho atu othene odawa na o-ovwela tatoolangiwa movwelana na longomano, 3 n’nga ninodha vulumuwa a-vi napwaza ivulumucho ilukhulu yei? Mbwii-u ngwaromile onga vya ivulumucho yei thitho atu tavwide vyaonga liyevyo tatoonisikimizela vyevyo. 4 Naliyene thitho Nlungu atooirela umboni vya ivulumucho yei vo-indi-edha basa vizindiyelo, vyongo vyodabwi-a, mabasa akopolo o-iyana-iyana na zimu ochena wavelenle liye movwelena na ifuneloyee.

5 Namwasa oi ilambo yavathi inoonga i-yo inodhayo, Nlungu kaivelenle wa angelo ira taitongenga. 6 Mbwenye mboni inango yatoonga ira: “Mutu mbaani ira mum’thuulelenga, venango mwana mutu mbaani ira mu’samalelenga. 7 Mwatoom’thithi-a vang’ono i-yana na angelo. Mwatoom’mwari-a titimi-o na lemezo ninga ichapowa ya umwene thitho mwatoom’ela ira atongenga mabasa a mandhinyu. 8 Vyongo vyothene mutovi-ela vathi va manyalwee.” Voi Nlungu atoo-ela vyongo vyothene vathi va manyalo a mwanee, kuongela ira kavali yongo iliyothene ya-iidhe liye ai-ela vathi va manyalo a mwaneuo. Mbwenye va-eeni, kaninoona ira vyongo vyothene vili vathi va manyalwee. 9 Mbwenye ninoona Yesu, athithi-iwile vang’onule i-yana na angelo. Mbwenye va-eeni utowari-iwa titimi-o na lemezo ninga ichapowa ya umwene namwasa oi atookwa. Namwasa oriya rima ulukhulu wa Nlungu, liye atookwa malo mwa atu othene.

10 Vyongo vyothene vyatookalavo ira vititimi-e Nlungu thitho vyatookalavo dhela mwa liye. Ee-no ira akami-e a-ima anjinji kaana titimi-o, vyali vyofwanelela ira rumiwi nlukhulu wa ivulumucho iwa kala olongomana dhela mu nyarwa dhaguman’nena liye. 11 Namwasa oi othene ocheni-a na ocheni-iwao, babiwa ndi m’mbo-ive. Ee-no liye kanokaana manyadho aromola ira abalee, 12 vanoonga liye ira: “Ndinodha laleela dhina linyu wa abalanga. Ndinodha utitimi-ani voomba nyumbo vari va pingo.” 13 Thitho vanoonga liye ira: “Miyo ndinodha m’nyindela.” Noonga okoka ira: “Kaing’anani! Miyo vambo-i na a-ima andiva-idhe Yohova.”*

14 Voi “a-ima” othene enao mba sangiri na nokhu, liye thitho atookala wa sangiri na nokhu. Atooirana vyevi ira dhela muukwawee, anonge Namanami-a, oi utokaana kopolo yopha. 15 Atooirana vyevi ira athathule atu othene oi tali muudhari muingumiiwa yothene namwasa oova wukwa. 16 Namwasa oi liye kanokami-a angelo, mbwenye unokami-a mbumba* ya Abrahamu. 17 Ee-no liye afwanela kala ninga “abalee” muvyongo vyothene, ira akale ndimuwa wa sembe wa tangaranga na ororomeleya va vyongo vyokhuza Nlungu, naifunelo yoi avelele sembe yokhunela vyodawa vyaatu ira nivwelane okoka na Nlungu. 18 Voi liye atoorucheya vahora yawesedhiwa liye, unooda kami-a thitho atu anowesedhiwa.

3 Ee-no abali-u ochena oi muli mu gulu laatu oitaniwa dhulu, muthuulele vya Yesu unom’rumela i-yo, ira ndi rumiwi na ndimuwa wa asembe. 2 Liye ali ororomeleya wa Nlungu am’enle liye kala rumiwi na ndimuwa wa sembe, ninga mwemo thitho mwakalele Mose ororomeleya vanyumbani va Nlungu. 3 Yesu unofwanela titimi-iwa maningi kwaranya Mose, namwasa oi mulimbo manga nyumba unolemeziwa kwaranya nyumbiyo. 4 Pyaimbarimbari ira nyumba iliyothene inomangiwa na mutu mwinangwee, mbwenye apanduchile vyongo vyothene ndi Nlungu. 5 Mose ali rumiwi ororomeleya vanyumbani va Nlungu thitho urumiweuo wali umboni wa vyongo vyafuna dhaongiwa sogolo. 6 Mbwenye Kristu ali mwana thitho anoing’anela nyumba ya Nlungu mororomeleya. I-yo ninokalave nyumba ya Nlunguo nadhowanave kaana ufulu oonga no-indedhela mwakopolo idedi-edho inonyindela i-yo fiyedha khomoni.

7 Ee-no movwelana na vinoonga zimu ochena ira: “Penene mwavwa madhu a Nlungu, 8 kamuumi-e miriminyu ninga vyakalele aliwa na anamabalinyu mwandiiri-idhe aliwa thakaleliwa maningi, ninga mwakalele aliwa vadambo landiwesedhile aliwa kokolani. 9 Kokolanimo, anamabalinyu tatoondiwesedha angalive ira tatoona mabasanga wa vyawa 40. 10 Ngumwasee ndatoothakaleliwana mbumba yeniyo, moi ndaongile ira: ‘Mirimiwa inodimeli-iwa hora dhothene thitho aliwa katiidhi ndhila dhanga.’ 11 Ee-no ndatoolumbela ndangathakaleliwile ira: ‘Katinodha volowa mulimburo langa lovuma.’”

12 Muwenjele abali ira vari vinyu, mutu kakhume wa Nlungu waingumi nokaana rima othakala o-okaana iroromelo. 13 Malomwee, mudhowenave limbi-ana dambo na dambo, hora iliyothene inoonga nyo ira “Penene,” ira inyengo yakopolo ya vyodawa ya-aumi-e rima wa mutu uliwethene wa nyo. 14 Ninoira vyairilena Kristu akala vyongo vyanyindenle i-yo voroma ninodhowanave vilabi-edha basa fiyedha khomoni. 15 Voi malemba anoonga ira: “Penene mwavwa madhu a Nlungu, kamuumi-e miriminyu ninga vyakalele aliwa na anamabalinyu mwandiiri-idhe aliwa thakaleliwa maningi.”

16 N’nga mbaani vale avwide mbwenye aliwa m’thakaleliwi-a Nlungu? N’nga kai atu othene akhumile ilambo ya Iguputu mosogoleliwa na Mose? 17 I-yavo vyevyo, n’nga mbaani airi-idhe ira Nlungu athakaleliwe wa vyawa 40? N’nga kai atu adawile nokwela kokolanale? 18 N’nga mbaani aalumbelele liye ira katinodha volowa mulimburolee lovuma? N’nga kai enale akhondile am’vwelale? 19 Ee-no, ndinoona ira kataode volowa mulimburo lovumalo namwasa oi katana iroromelo.

4 Ee-no voi yolanyedha yovolowa mulimburo lovuma itokalavove, muire polepole ovela ira mutu mwinango wa nyo unooda imwanana kwakwaneli-edha vinofuneya ira amavolowe mulimburo lovumalo. 2 Milanyu yapama yatoolaleeliwa wa i-yo, ninga mwemo thitho mwalaleeliwile aliwa wa anamabali-u. Mbwenye madhu avwide aliwao kataakami-idhe namwasa oi aliwa katana iroromelo yofwanafwana na yaatu tavwele madhwao. 3 I-yo oi ninaathonyi-edha iroromelo ninaavolowa mulimburo lovumalo. Voonga vya limburo lovumali liye aongile ira: “Ee-no ndatoolumbela ndingathakaleliwile ira, ‘Katinodha volowa mulimburo langa lovuma,’” angalive ira ali angamari-idhe basalee vahora yakaathi-iwile ilambo. 4 Voonga vya dambo la 7, ikhundu inango ya malemba inoonga ira: “Thitho Nlungu atoovuma vamabasee othene vadambo la 7.” 5 Vano thitho unoonga ira: “Katinodha volowa mulimburo langa lovuma.”

6 Ee-no voi ngari yovolowa mulimburo lovumalo itokalavove, thitho atu taromile uvwa milanyu yapamayo kataodile volowamo namwasa o-ovwela, 7 vangavirile hora, Nlungu atoonga musalimo la Davide ninga mwemo mwaongile i-yo wale mukartali ira: “Penene mwavwa madhu a Nlungu, kamuumi-e miriminyu.” Ee-no utosakula dambo linoromola liye ira “Penene.” 8 Namwasa oi aakale ira Yoswa atoavolowana mulimburo lovuma, Nlungu kaonge thitho vasogolovee vya dambo n’nango. 9 Ee-no limburo lovuma la sabudu litokalavove waatu a Nlungu. 10 Mutu uvolowile mulimburo lovuma la Nlungu, kuongela ira utovuma thitho va mabasee, ninga mwemo Nlungu mwavumile liye va mabasee.

11 Ee-no, dhoweni niireni vilivyothene vinaode i-yo ira nivolowe mulimburo lovumalo, naifunelo yoi mutu mwinango a-akale o-ovwela ninga vyate anamabali-uao. 12 Namwasa oi madhu a Nlungu mbaingumi thitho akopolo, moi mboirwa kwaranya sarasada lililothene loirwa wu na wu. Anolatha mutu rimani fiyedhela i-yani-a ingumi na zimu thitho makhuva na makhura a makhuva. Madhu a Nlungu anooda thitho zindiyela vinothuulela mutu na vinofuna rimee. 13 Kavali yopanduchiwa iliyothene yoi Nlungu kanooda iona. Namwasa oi wa liye vyongo vyothene vili vooneela thitho unooda viona pama moi i-yo ninodhawakula wa Nlunguo va vyoira vi-u.

14 Ee-no, voi nitokaana ndimuwa wa asembe wa vadhulu Yesu Mwana Nlungu, oi atoodhowa dhulu, dhoweni nidhowenave laleela vyoi ninom’roromela. 15 Namwasa oi ndimuwa wa asembe una i-yo ula, kai ndimuwa wa asembe oi kanonivwela tangaranga va vyofooka vi-u. Mbwenye ndi ndimuwa wa asembe oi atoowesedhiwa muvyongo vyothene ninga i-yo, thitho atookalave o-odawa. 16 Ee-no dhoweni nifiyengani wu pando wa umwene wa Nlungu thitho nilobelengani na ufulu oonga ira anivwele tangaranga nonithonyi-edha riya rima ulukhulu vahora yofwanelela.

5 Ndimuwa wa asembe uliwethene osakuliwa vari vaatu, unosakuliwa ira alabenga basa la Nlungu malo mwaatu, noira avelelenga yotuva na sembe dhokhunela madawo aatu. 2 Unokala oleva rima voira vyongo naatu o-oidhiwa vyongo na odawa,* namwasa oi liye thitho utokaana vyofookavyee. 3 Thitho namwasa wa vyofooka vyeevyo, unofuneela velela sembe dha vyodawavyee, ninga mwemo munovelelela liye sembe dha vyodawa vyaatu enango.

4 Mutu kanosakula ekhene ira alemeziwe, mbwenye unoira sakuliwa na Nlungu ninga mwasakuliwile Aroni. 5 Vili thitho saasawa na Kristu. Liye kaadhiva-idhe ekhene titimi-o vodhisakula ekhene kala ndimuwa wa asembe. Mbwenye am’va-idhe titimi-o lelo ngwenuo am’mwandenle ira: “We uli mwananga. Penene miyo ndili babaa.” 6 Ninga munoongela liye vaikhundu inango ya malemba ira: “We uli mulimbo velela sembe odhowa nodhowa, mofwanafwana na mulimbo velela sembe Melekizedeki.”

7 Vyali liye vailambo yavathi, Kristu atoolobela mosembezela na movepa wa ule oi angaodile m’vulumucha wuukwa. Atoolobela mokhuwa nogwi-a mi-odi, thitho atoovuruwaniwa namwasa oi anoova Nlungu. 8 Angalive ira ali mwana Nlungu, atoofunjedha kala ovwela namwasa wa nyarwa dhaguman’nena liye. 9 Thitho angakanle olongomana, atookaana izo yovulumucha modhowa nodhowa atu othene tanom’vwela, 10 Namwasa osakuliwa na Nlungu ira akale ndimuwa wa asembe mofwanafwana na mulimbo velela sembe Melekizedeki.

11 Nitokaana vyongo vinjinji vyoi nivionge vyokhuza liye, mbwenye vinaarucha vionga namwasa oi nyo munodembuwecha vwechecha vyongo. 12 Fiyedha va-eeni mungafwanele kala anamafunji-a. Mbwenye kavili e-no, namwasa oi munofuneela thitho mutu mwinango oi aufunji-eni makhundo oroma a madhu opambuleya a Nlungu, romela vamaromelo. Nyo mutoroma okoka funa ukaka a-kala yodya yothakhuna. 13 Mutu uliwethene unokalelave umwa ukaka kanoidhiwa madhu a longomano thitho ulive mwana. 14 Mbwenye yodya yothakhuna chaatu owarala mwauzimu oi anooda i-yani-a vyofwanelela na vyo-ofwanelela namwasa oi tano-indi-edha basa dodoliso liwa lothuulela.

6 Ee-no voi nitomala funjedha makhundo oroma okhuza Kristu, dhoweni nidhilimbi-edhe mwathindhi ira nikale owarala mwauzimu. Kaniwelele okoka uvifunji-edho vyoroma, vyoi kuchinyuwa wu mabasa okwa, roromela Nlungu, 2 ifunji-edho yokhuza ubadizo, sameli-a mandha, venyathi-iwa wa alimbo wukwa thitho tongiwa modhowa nodhowa. 3 Nlungu arumela, ninodhilimbi-edhadi ira niwarale mwauzimu.

4 Vatokala atu awandeliwile na Nlungu, oi atooroma wachelavo yotuva yapezi yadhulu na zimu ochena 5 oi thitho atoovwavo madhu apama a Nlungu na maraeli-o anofuna dhaveleliwa vailambo yavathi inodhiyo. 6 Mbwenye va-eeni atu enala atovandhuwa thitho pyo-oodeya aweleli-edha okoka ira tachinyuwe, namwasa oi anaathomeya okoka Mwana Nlungu nom’nyoza vakwecha. 7 Mateya anowachela maraeli-o okhumela wa Nlungu arumbweliwanga dhongwe wiliwili. Amala mateya anomeli-a vyomela ira vikami-e alimbo lima. 8 Mbwenye mateya ameli-a vimiri vyaminga anokondiwa thitho ano-ala vang’ono tembeleliwa. Vakhomonivee anoka-iwa.

9 Mbwenye angalive ira ninoonga e-ni, kaninokaikela ira vamwasa wa vyongo vinodhi-a ivulumucho, nyo odhiveliwiwa muli vapama i-yani-a na avandhuwilale. 10 Namwasa oi Nlungu kai o-olongomana ira adiwale basa linyu na udhivela wathonyi-edhe nyo vadhinalee, volabela ochena thitho munaadhowanave alabela. 11 Mbwenye ninofuna ira mwethene mudhowenave thonyi-edha thindhi ninga lana nyo voroma, ira idedi-edho inyu ikale yosikimizeleya fiyedha khomoni. 12 Muirena vyevi ira mwa-akale opolola, mbwenye musazi-edhenga atu oi namwasa wa iroromelo noleva rima anaawachela vyongo vyalanyedhile Nlungu.

13 Vahora yalanyedha Nlungu Abrahamu, atoolumbela vadhinalee namwasa oi kavali mwinango nlukhulu kwaranya liye oi angaodile m’lumbelela. 14 Liye aongile ira: “Mwaimbarimbari ndinodha uraeli-a noinjivi-a mbumbaa.”* 15 Ee-no Abrahamu angathonyi-edhile leva rima, atoowachela yolanyedha yei. 16 Namwasa oi atu volumbela anoromolecha mutu mwinango wandimuwa kwaranya aliwa, thitho lumbelo liwalo linomali-a kangana uliwethene namwasa oi lumbelolo linosikimizela ira vinoonga aliwavyo pyaimbarimbari. 17 Mofwanafwana na vyevi, Nlungu unofuna asikimizela atu owachela yolanyedhayo ira ifuneloyee kinodha chinja. Moi ee-no atoolumbela va vyongo vyalanyedhile liyevyo. 18 Atooirana vyevyo ira va vyongo vinli vyo-ochinjeya vyoi namwasa wa vyevi pyo-oodeya ira Nlungu aname, i-yo oi nitotawela ulimburo lovuneleya nilimbi-iwe nororomela maningi vyongo vinodedi-edha i-yo. 19 Idedi-edho yi-ui ili ninga nangula* wa vingumi vi-u thitho chosimikizeleya na yokaatheya. Idedi-edhoi inonivolocha wari, e-la wa kurtina yofungana 20 oi aromile volowao ndi Yesu ira anidhulele ndhila. Liye ndi ndimuwa wa asembe odhowa nodhowa mofwanafwana na mulimbo velela sembe Melekizedeki.

7 Melekizedeki wen’na ali mwene wa sidadi la Salemu na mulimbo velela sembe wa Nlungu Wadhuludhulu, thitho atoodhowa magumana na Abrahamu nom’raeli-a vahora yakhuma liye mapha mamwene. 2 Abrahamu atoom’va-a yakhumi ya vyongo vyothene. Dhina leli linothapuleliwa ira “Mwene wa longomano” na mwene wa Salemu, thapulela “Mwene wa rendele.” 3 Kavali valembiwile dhina la babee, la m’mee venango zizalee thitho dambo labaliwile liye na lakwide liye kalinoidhiweya, mbwenye atoom’mwiri-a kala ofwanafwana na Mwana Nlungu, liye ngu mulimbo velela sembe odhowa nodhowa.

4 Ee-no munooda ona ira mutula ali ofuneya maningi. Moi namabali-u Abrahamu, atoom’va-a yakhumi ya vyongo vyofuneya maningi vyatukunle liye khondoni. 5 Pyaimbarimbari movwelana na Ilamulo, a-ima aalombwana a Levi oi tanoova-iwecha izo ya namavelela sembe tanoowandeliwa ira tawachelenga yakhumi khumela waatu. Atu enala tali abaliwa angalive ira tali ambumba ya Abrahamu. 6 Mbwenye mutu wen’na, oi kakhumele muzele obaliwela wa Alevi atoowachela yakhumi khumela wa Abrahamu, thitho atoom’raeli-a Abrahamuo oi alanyedhiwile na Nlungu. 7 Ee-no kavali unofuna runi-a ira wang’ono atooraeli-iwa na wandimuwa. 8 Alevi anoowachela vyakhumi thitho mbaatu oi tanookwa. Mbwenye mutu mwinango awachenle vyakhumi, malemba anom’mwirela umboni ira liye utokaana ingumi. 9 Ninooda thitho onga ira angalive ira Levi anoowachela vyakhumi liye thitho atoovelela vyakhumi dhela mwa Abrahamu. 10 Namwasa oi vyagumana Abrahamu na Melekizedeki Levi ali a-anabaliwe, mbwenye ali oi unodha kala wa mbumba ya Abrahamuo.

11 Kaana alimbo velela sembe a ziza la Alevi wali ikhundu ya Ilamulo ya Mose yava-iwile Aisraeli. Aa-kale ira alimbo velela sembe a ziza la Alevi tangakami-idhe atu kala olongomana, n’nga vangafuneele thitho mulimbo velela sembe ninga Melekizedeki? N’nga kavyakale vyokwakwana kaana mulimbo velela sembe ninga Aroni? 12 Voi usembuo unaachinja, Ilamulo thitho inofwanela chinja. 13 Mutu unoongiwa veva ngwaziza n’nango thitho kavali mutu uliwethene wa ziza lelo alabilevo vaiguwa ya sembe. 14 I-yo nothene nitoidhiwa ira Mbwii-u akhumele mu ziza la Ayuda mbwenye Mose kaongilevo ira alimbo velela sembe anodha khumela mu ziza leli.

15 Va-eeni vyevi vinaavweya pama namwasa oi vatodha mulimbo velela sembe mwinango ofwanafwana na Melekizedeki. 16 Liye ndi mulimbo velela sembe, a-kala movwelana na vyafuna malamulo, mbwenye movwelana na kopolo ya ingumi yoi kinonongeya. 17 Namwasa oi malemba atoom’mwirela umboni ira: “We uli mulimbo velela sembe odhowa nodhowa mofwanafwana na usembe wa Melekizedeki.”

18 Ee-no malamulo oromao anaakhumi-iwa namwasa oi mbo-okwakwanela na o-okami-a. 19 Ilamulo kiiri-idhe ira yongo iliyothene ikale yolongomana. Mbwenye idedi-edho ya vyongo vyapama yadhidhena liye, chinonikami-a wandamela Nlungu. 20 Thitho vyevi kavyaireile vo-olumbeliwa. 21 (Namwasa oi vatokala alombwana enango takanle anamavelela sembe vo-olumbeleliwa, mbwenye liye ndi mulimbo velela sembe oira lumbeleliwa. Lumbela weu ndi waongile mulimbo velela sembuo ira: “Yohova* utolumbela ira, ‘We uli mulimbo velela sembe odhowa nodhowa,’ thitho kanodha chinja mathuulelwee.’”) 22 Movwelana na vyevi, Yesu ndi izindiyelo ya vwelano lapama maningi. 23 Thitho vanoofuneya alimbo velela sembe anjinji ira tavolowelena namwasa oi wukwa wanooiri-a ira mutu a-adhowenave kala mulimbo velela sembe. 24 Mbwenye voi liye unodhowanave kaana ingumi yodhowa nodhowa, kavali mulimbo velela sembe unofuna m’volowela limburo. 25 Ee-no liye unooda vulumucha atu anolobela wa Nlungu dhela mudhinalee, namwasa oi liye kanodhakwa thitho unodhowanave asembezelela wa Nlungu.

26 Ndimuwa wa sembe wen’na ngofwanelela wa i-yo. Namwasa oi ngororomeleya, o-odawa, o-othakali-iwa, o-iyana naatu odawa thitho utogweli-iwa vadhulu maningi. 27 Mo-iyana na andimuwa asembe enango, liye kanofuneela velela sembe dambo nlilothene, voroma namwasa wa vyodawavyee amala vyaatu enango. Vili e-no namwasa oi liye atoodhivelela fendo imbo-i baa-i ira akale sembe yokami-a atu modhowa nodhowa. 28 Ilamulo ino-ela alombwana okaana vyofooka kala andimuwa asembe. Mbwenye lumbela waireile vasogolo va Ilamulo watoosakula mwana oi ali olongomana modhowa nodhowa.

8 Va vyongo vinoonga i-yovi, likhundo nlukhulu toi: Nitokaana ndimuwa wa asembe ninga wen’na, thitho liye uli wu dhandha lodyana la pando wa umwene wa Nlungu nlukhulu. 2 Liye ndi rumiwi wa valimburo lochena na wa va sasa waimbarimbari, omangiwa na Yohova* a-kala mutu. 3 Ndimuwa wa asembe uliwethene unosakuliwa ira avelelenga yotuva na sembe. Ee-no ula thitho afwanela kaana yongo inango yoi avelele. 4 Liye aakaleve vailambo yavathi kaakale mulimbo velela sembe, namwasa oi vatokala wale alombwana ovelela vyotuvavyo movwelana na Ilamulo. 5 Urumiwi unolaba atwala uli ninga ifwanafwani-o na ruthi wa vyongo vyadhulu. Vyevi pyofwanafwana na lamulo lam’va-idhe Nlungu Mose anga-adhi vang’ono funa manga sasa. Lamulolee lali loi: “Uonecheche ira utoira vyongo vyothene mo-arela ifwanafwani-o yaoni-iwile we vamwangoni.” 6 Mbwenye Yesu utowachela urumiwi wavadhulu maningi, namwasa oi liye thitho ngu namaimelela wa vwelano lapama maningi, lelo lakaathi-iwile mwalamulo va vyolanyedha vyapama.

7 Aakale ira vwelano loromanle kalana vyodawa, kavafuneele thitho vwelano lanambili. 8 Namwasa oi Nlungu unaaona ira atu anaadawi-a vyongo vinango moi liye unoonga ira: ‘“Kaing’anani! Malambo anaaudha’ ‘oi ndinodha ira vwelano lipya na nyumba ya Israeli thitho na nyumba ya Yuda, uongile e-no ngu Yohova. 9 Mbwenye vwelano leli kalinodha kala lofwanafwana na lairile miyo na anamabaliwa vadambo laakhumi-idhe miyo muilambo ya Iguputu. Voi aliwa katadhowilenave vwela vwelano langa, ndatoo-iya asamalela,’ uongile e-no ngu Yohova.

10 ‘“Vwelano linofuna miyo dhaira na nyumba ya Israeli vasogolo vamalambo enao tili,’ ndinodha e-la malamulwanga mathuuleloni mwiwa noalemba mirimani mwiwa. ‘Miyo ndinodha kala Nlungwiwa thitho aliwa anodha kala atwanga, uongile e-no ngu Yohova.*

11 ‘“Mutu kanodha funji-a thitho narala fwee venango balee ira, “Um’mwidhiwe Yohova!” Namwasa oi mutu uliwethene unodha ndiidhiwa romela mwana fiyedha ndimuwa. 12 Miyo ndinodha avwela tangaranga vavyoira viwa vyo-olongomana, thitho kandinodha thuulelave vyodawa viwa.”’

13 Voonga ira “vwelano lipya,” liye utoiri-a ira loromalo la-akaenave basa. Akala vwelano linaamala kopolo thitho linaaudha lawale kuongela ira li-adhi vang’ono ira linongeye.

9 Vwelano loroma nle latookaana malamulo aurumiwi wopambuleya thitho limburo lochena la vailambo yavathi. 2 Namwasa oi vatoomangiwa kwartu loroma la sasa thitho kwartunimo mwatookala yo-elavo nyale, meza na mapau asembe, thitho laitaniwa Limburo Lochena. 3 Mbwenye e-la wa kurtina lofungana wanambili watookala kwartu linango laitaniwa Limburo Lochena maningi. 4 Mwemo mwatookala chiwaya ya oro yokha-ana sembe na likasa la vwelano lo-eliwa oro. Wari mwa likasalo mwatookala muno wa oro okaana mana, ligolomondo la Aroni lapwethile nle na mabwe osema avwelano. 5 Vadhulu va likasalo vatookala akerubi atitimi-o oi mapepelwiwa tanoogudumela va yofungana likasalo. Mbwenye yen’na kai hora yoonga vyongo vyevi mwa imbo-i na imbo-i.

6 Vyongo vyevi vingamadhi saka-edhiwa e-ni hora dhothene alimbo velela sembe tanoovolowa kwartu loroma malabanga maurumiwi opambuleya. 7 Mbwenye kwartu lanambililo avolowamo ngu ndimuwa wa asembe baa-i fendo imbo-i va yawa, thitho avolowanga anootukulecha sangiri. Sangiriyo anooivelela namwasa wa liye, thitho namwasa wa vyodawa vyairile atu enango mo-oidhiwa. 8 Ee-no zimu ochena unonikami-a vwechecha pama ira ndhila yodhowa wu limburo lochena yali ya-anakalevo vahora yalivo sasa oromuo. 9 Sasa wenuo wali ifwanafwani-o ya hora ino thitho movwelana na ifwanafwani-oyo, vyotuva na sembe vinoveleliwa. Mbwenye, vyevi kavinoiri-a ira mutu unolaba maurumiwi opambuleyuo kaana ithuulela rima yochena. 10 Malomwee, vinokhuza vyodya, vyomwa na sanganiko dho-iyana-iyana dhocheni-a vyongo na ma-inje.* Vyevyo vyali vyofuneya movwelana na malamulo okhuza manungo thitho vyatookaathe-iwa fiyedha mu hora yosaka-edha okoka vyongo.

11 Mbwenye, vahora yadhidhe Kristu ninga ndimuwa wa asembe wa vyongo vyapama vyakwakwani-idhiwile, atoovirana mu sasa nlukhulu na olongomana maningi thapulela ira kunofwanyeya vailamboi. 12 Liye atoovolowa mulimburo lochena na sangiree, a-kala ya mabokho ambudi venango ya ng’ombe dhing’ono dha lombwana. Avolowile fendo imbo-i mulimburo lochenalo nonivulumucha modhowa nodhowa. 13 Akala sangiri ya mabokho ambudi na ya ng’ombe dhalombwana thitho dora la ng’ombe ya i-yana, linookiwa atu othakali-iwa, aliwa kaladi ochena va methoni va Nlungu, 14 n’nga a-vi na sangiri ya Kristu, oi adhivelenle angali o-okaana damba wa Nlungu dhela mu zimu ochena? N’nga sangiri yeniyo kinodha cheni-a vithuulela rima vi-u wu mabasa okwa ira nilabe urumiwi opambuleya wa Nlungu wa ingumi?

15 Ngumwasee liye ndi namaimelela wa vwelano lipya ira atu aitaniwile tawachele yolanyedha ya ingumi yo-omala. Vyevi vitoodeya namwasa wa wukwawee, oi wali ninga khuto loathathula wu vyodawa vyana aliwa mu vwelano la wale nle. 16 Namwasa oi vakaathi-iwile vwelano na Nlungu, vanofwanela ira mutu uimelenle vwelanuo akwe. 17 Namwasa oi vwelano linolaba basa akala ira mutu mwinango utokwa, voi kalinolaba basa akala mutu uimelele vwelanuo uli wa ingumi. 18 Ngumwasiwa vwelano loroma nle latookaathei-iwa voindi-edha basa sangiri. 19 Mose awandela atu othene enao lamulo lililothene la mu Ilamulo, anootukula sangiri ya ng’ombe dhing’ono dhalombwana, sangiri ya mabokho ambudi na ma-inje nowaza bukhulo* naatu othene vo-indi-edha basa uzoya wa mabila ofila maningi na visivimiri vya isopo. 20 Liye anoawandela ira: “Yen’na ndi sangiri ya vwelano liuwandenleni Nlungu ira mulilokote.” 21 Adhamale atooka thitho sangiri ile vasasani na viya vyothene vya-indi-edhiwa basa va urumiwi opambuleya. 22 Movwelana na Ilamulo, vyongo vyothene vinocheni-iwa na sangiri thitho va-achuchi-iwe sangiri atu katinoleveleliwa vyodawa viwa.

23 Ee-no vyali vyofuneya ira vifwanafwani-o vya vyongo vya dhulu vicheni-iwe mwandhila yen’na. Mbwenye vyongo vya dhuluvyo vinofuneela cheni-iwa na sembe dhapama maningi kwaranya dhedhi. 24 Kristu kavolowile valimburo lochena losakanyiwa na atu, loi ndi iruthiruthi ya limburo la imbarimbari, mbwenye liye avolowile limburo la dhuluwene weo. Va-eeni liye uli dhulu ira aoneelenga vamethoni va Nlungu malo mwa i-yo. 25 Liye kaadhowile dhuluo ira amavelelanga sembe mowelelawelela, ninga mwairela ndimuwa wa asembe. Namwasa oi ndimuwa wa sembe anoovolowa mu limburo lochena yawa na yawa angatukunle sangiri ya vinyama, a-kala yee. 26 Vya-akale e-no, angafuneile rucheya mowelela welela romela vakathi-iwile ilambo. Mbwenye liye utooneela fendo imbo-i baa-i khomoni wahora ino* ira amali-e vyodawa dhela musembee. 27 Mofwanafwana na vinoireela atu oi anodedi-edhela wukwa fendo imbo-i baa-i, amala dhatongiwa, 28 naliyene thitho Kristu aveleliwile sembe fendo imbo-i baa-i ira amali-e vyodawa vyaatu anjinji. Mbwenye fendo yanambili inofuna liye dhaoneela, ifunelwee kinodha kala mali-a vyodawa. Thitho anofuna dham’mona ndi atu anom’dedi-edhela na rima othene ira aavulumuche.

10 Voi Ilamulo inooni-a iruthiruthi ya vyongo vyapama vinofuna udha sogolo a-kala vyongo vyaimbarimbari. Thitho vyevi kavinoiri-a ira atu anolambela Nlungu takale olongomana vo-indi-edha basa sembe dhinodhowanave aliwa velela yawa iliyothene. 2 Aakale ira sembedho dhinoairi-a kala olongomana, n’nga kata-iye dhivelela? Tanga-iidhe namwasa oi vyakale ira atu anolaba urumiwi opambuleyuo atomala cheni-iwa, katakaena thitho ithuulela rima yoi aliwa mbodawa. 3 Mbwenye mo-iyana na vyevyo, yawa iliyothene sembe dhedhi dhinoathuucha vya vyodawa viwa. 4 Namwasa oi kai vyoodeya ira sangiri ya ng’ombe dhalombwana na mabokho a mbudi imali-eletu vyodawa.

5 Ee-no Kristu angadhidhe vailamboi atoonga ira: “‘Nyo kamwafunile sembe dha vinyama na sembe dhinango, mbwenye mwandikhozeele manungo. 6 Nyo kamwarumenle sembe dhothene dhoka-a na sembe dhinoveleliwa namwasa wa vyodawa.’ 7 Moi e-no miyo ndaongile ira, ‘Kaonani! Miyo nditodha (mupukutu mwalembiwile vya miyo) dhaira ifunelwinyu nyo Nlungwanga.’” 8 Angaongile ira: “Nyo kamwarumenle venango funa sembe dha vinyama, sembe dhothene dhoka-a, sembe dhoveleliwa namwasa wa vyodawa thitho na sembe dhinango,” dhoi ndi sembe dhinoveleliwa movwelana na Ilamulo, 9 atoonga okoka ira: “Kaonani! Miyo nditodha dhaira ifunelwinyu.” Liye unaakhumi-a masaka-edho oromao ira akaathi-e anambili. 10 Namwasa wa “Ifunelo” yen’na, nitocheni-iwa dhela mu manungo a Yesu Kristu avelenle liye sembe fendo imbo-i baa-i.

11 Mbwenye mulimbo velela sembe uliwethene unoimela valimburonivee ira alabe urumiwi opambuleya thitho ira avelele sembe dhimbo-ive dhedho mowelela welela dhoi kadhinomali-a vyodawa. 12 Mbwenye mutu wen’na atoovelela sembe imbo-i ya vyodawa yokami-a atu modhowa nodhowa, thitho atookaathi wu dhandha lodyana la Nlungu. 13 Romela hora yeniyo, unave dedi-edha fiyedha vahora inofuna liye dha-ela amwidanee vathi vamanyalwee. 14 Dhela mu sembe imbo-i baa-i, liye unaairi-a atu anocheni-iwa kala olongomana modhowa nodhowa. 15 Naaliwene thitho zimu ochena unaaniirela umboni, namwasa oi unoonga ira: 16 “‘Vwelano linofuna miyo dhaira naaliwa vasogolo vamalambo enao tili’, ‘ndinodha e-la malamulwanga mirimani mwiwa noalemba mathuuleloni mwiwa,’ uongile e-no ngu Yohova.”* 17 Adhamale atoonga okoka ira: “Thitho kandinodha thuulelave vyodawa viwa na vyoira viwa vyothonyi-edha a-vwela malamulo.” 18 Moi vyevi vyaleveleliwa, sembe inoveleliwa namwasa wa vyodawa kinofuneyave.

19 Ee-no abali, ninolimba rima volowa mulimburo lochena namwasa wa sangiri ya Yesu. 20 Liye ngwanidhulele ndhila yen’na yoi ndi ipya thitho ya ingumi moi inovirana va kurtina yofungana, yoi ndi manungwee. 21 Voi nitokaana ndimuwa wa sembe unoing’anela nyumba ya Nlungu, 22 dhoweni nifiyeni wa Nlungu narima wethene thitho ningana iroromelo yothene, namwasa oi mirimi-u itocheni-iwa ira na-akaena okoka ithuulela rima yothakala, thitho manungwi-u ato-ambi-iwa na ma-inje ochena. 23 Dhoweni nidhowenave laleela vakwecha idedi-edho yi-u thitho kanitekenyeye, namwasa oi unilanyedhileo ngororomeleya. 24 Thitho dhoweni nithuulelena* ira nilimbi-ane vamwasa othonyi-edha udhivela noirana mabasa apama. 25 Kani-iye gumaneya vambo-i, ninga munoirela atu enango mwailemeelo yo-ofiya vamigumano. Mbwenye dhoweni nilimbi-ane thitho niirengana vyevi, simbwasimbwa vanoona nyo ira dambolo linaakwivela.

26 Akala ninoira vyodawa mwakhomove ningamadhi idhiwa imbarimbari molinyali, kavalive sembe inango inofuna veleliwa namwasa wa vyodawa vi-uvyo. 27 Mbwenye vatokala idedi-edho inango yoophi-a yotongiwa, thitho thakaleliwa o-inda mulo unofuna dhanonga alimbo runi-ao. 28 Mutu uliwethene apwaza Ilamulo ya Mose anoophiwa mo-ovweliwa tangaranga, akala vatokala umboni waatu ambili venango araru. 29 N’nga munoona a-vi akala mutu utonyingala Mwana Nlungu, pwaza sangiri ya vwelano yacheni-iwilena liye, thitho nyoza zimu wa Nlungu unothonyi-edhana liye riya rima ulukhulu? Mutu wen’na unofwanela langiwa maningi. 30 Namwasa oi nitom’mwidhiwa aongile ira: “Weli-edha kwanga, ndinodha weli-edha miyo.” Oi thitho aongile ira: “Yohova unodha tonga atwee.” 31 Langiwa na Nlungu wa ingumi koophi-a.

32 Mbwenye mudhowenave thuulela malambo awale. Namwasa oi mungamadhi wachela wala okhumela wa Nlungu, mwatoogumanana nyarwa ilukhulu. 33 Hora dhinango mwanoonyoziwa nooni-iwa nyarwa vamwinjini* thitho hora dhinango mwanookami-echa atu enango agumanana nyarwa ninga dhedhi. 34 Mwanoovwela tangaranga atu tali perezo, mwanoosangalalave angalive ira mwanoowakiwa vyongo vinyu, voidhiwa ira fuminyu njapama maningi thitho yo-omala.

35 Ee-no mukaleve olimba rima namwasa oi munodha wachela yotuva ilukhulu maningi. 36 Munofwanela kala ovilela thitho irana ifunelo ya Nlungu ira mudhawachele vilanyedhile Nlunguo. 37 “U-adhi isihora yoyeva” thitho “unodhuo mo-odembuwa unofiya.” 38 “Mbwenye mutwanga olongomana unodha kaana ingumi namwasa wa iroromeloyee,” thitho “awelela nduli, miyo kandinom’dhiveliwanee.” 39 I-yo kanili gulu laatu owelela nduli dhowa manongiwa, mbwenye nili atu okaana iroromelo inofuna nikami-a dhakaana ingumi yo-omala.

11 Iroromelo ndi a-kaikela ira vyongo vinodedi-edha we vinodha ireya, na umboni oi vyongo vyo-ooneya vitokalavodi. 2 Namwasa wairoromelo, atu a hora yawale tatookaana umboni oi Nlungu unosangalala naaliwa.

3 Namwasa wairoromelo, ninozindiyela ira madhu a Nlungu atooiri-a ira mahora o-iyana-iyana akale mamburonimwee, moi vyongo vyooneya vyatookalavo khumela wu vyongo vyo-ooneya.

4 Namwasa wairoromelo, Abeli atoovelela wa Nlungu sembe ya pereso yavadhulu kwaranya ya Kaini. Namwasa wa iroromelo yeyo, Nlungu atoom’va-a umboni oi ali olongomana vawachenle liye vyotuvavyeevyo. Angalive ira atookwa, liye unaaongave dhela mwa iroromeloyeeyo.

5 Namwasa wairoromelo, Inoki atoothami-iwa ira a-akwe mooni-iwa nyarwa, moi kaafwanyeile uliwethene namwasa oi Nlungu atoom’thami-a. A-anam’thami-e, Nlungu atoom’va-a umboni oi unosangalala na liye. 6 Thitho, vo-okala iroromelo pyo-oodeya m’sangalali-a Nlungu. Namwasa oi mutu uliwethene unofuna lambela Nlungu, unofwanela roromela ira liye utokalao thitho unovelela yotuva waatu anom’sakasaka na rima othene.

7 Namwasa wairoromelo, Nowa angawenjeli-iwile na Nlungu va vyongo vyoi vyali vya-anaoneye, atoothonyi-edha ova Nlungu thitho atoosaka-edha mwadiya ira liye na banjalee tavulumuwelemo. Namwasa wa iroromelo, atooruni-a ilambo moi atooniwa ira ngolongomana namwasa wa iroromeloyo.

8 Namwasa wa iroromelo, Abrahamu angaitaniwile, atoovwela nodhowa wu limburo ladedi-edha liye liwachela ninga yotuva. Liye atoodhowadi, angalive ira kaaidhiwa wadhowa liye. 9 Namwasa wa iroromelo, tatoodhowa makala ninga alendo muilambo yalanyedhiwile aliwa. Liye akalecha matendani vambo-i na Izaki na Yakobo, oi thitho Nlungu atoalanyedha ira unodha ava-a ilamboyo. 10 Namwasa oi liye adedi-edha sidadi lokaana sapato yolimba, loi mulimbo lembela nolimanga ndi Nlungu.

11 Namwasa wa iroromelo, Sara naliyene atoowachela kopolo yokaana wise angalive ira tunga lobala lali lingakwaranyile, namwasa oi anoona ira mulimbo lanyedhuo ngororomeleya. 12 Vamwasa wen’na, khumela wa lombwana m’mbo-i, oi ali ninga okwa, watoobaliwa a-ima anjinji ninga nyenyedi dha dhulu thitho o-olengeseya ninga useva wa chereerani mwa bara.

13 Othene enala tatookwa tangana iroromelo, angalive ira vyolanyedhavyo kavyakwakwaneli-edhiwe vahora yana aliwa ingumi. Mbwenye tatooviona vya-anakwakwaneli-edhiwe noviwachela. Aliwa tatoolaleya thitho vakwecha ira tali alendo na o-odimbela muilambo. 14 Namwasa oi atu anolaleela vyongo vyevi anovelela umboni oi anosakasaka mwathindhi mamburo yiwene. 15 Mbwenye aakale ira tanoothuulela wakhumele aliwa, tangakanlena mwasa owaweleli-a nduli. 16 Mbwenye va-eeni anodhilimbi-edha maningi ira takaena limburo lapama, loi ndi dhulu. Ee-no Nlungu kanokaana manyadho romoliwa ira Nlungwiwa, namwasa oi utoasaka-edhela sidadi.

17 Namwasa wairoromelo, vahora yawesedhiwa Abrahamu, vyali ninga utomala m’velela wale Izaki kala sembe. Ee-no mutu awachenle maraeli-o modhiveliula, ali okozeya velela sembe mwanee oi ali m’mbo-i baa-i. 18 Liye ali okozeya irana vyevyo angalive ira ali angamadhi wandeliwa ira: “Mbumba* yaulanyedhile miyo inodha khumela mwa Izaki.” 19 Mbwenye anoidhiwa ira akwa, Nlungu utokaana kopolo dhom’venyathi-a. Moi atoom’mweleli-edha mwaneeuo thitho vyevi vyaimelela vyongo vinango vya sogolo.

20 Namwasa wairoromelo, Izaki naliyene thitho atoom’raeli-a Yakobo na Ezau, noawandela vyongo vyafuna dhaireya sogolo.

21 Namwasa wairoromelo, Yakobo anga-adhi vang’ono ira akwe, atooraeli-a a-ima aalombwana a Yosefi m’mbo-i na m’mbo-i adhamale atoolambela Nlungu angasamenle golomondolee.

22 Namwasa wairoromelo, Yosefi anga-adhi vang’ono ira akwe, atoonga vyothama wa Aisraeli, thitho atoava-a malangi-o okhuza makhuvee.*

23 Namwasa wairoromelo, Mose angabaliwile, anamabalee tatoom’lokota wa myedi miraru, namwasa oi tatoona ira mwanuo ali obaleya maningi. Aliwa kataovile lamulo la mwene. 24 Namwasa wairoromelo, Mose angaulukhunle atookhonda romoliwa mwana wa mwana wa i-yana wa Farau, 25 thitho atoosakula oni-iwa nyarwa vambo-i naatu a Nlungu, malo moira vyodawa nosangalala wahora yoyeva. 26 Liye atoirana vyevi namwasa oi aona ira nyoziwawee ninga mutu ozoziwa,* uli ninga fuma yapereso yavadhulu kwaranya fuma yau Iguputu, namwasa oi anoothuulela maningi yotuva yafuna liye dhawachela. 27 Namwasa wairoromelo, atookhuma wu Iguputu, mbwenye a-kala namwasa oova mwene. Liye atoodhowanave vilela moleva rima ninga unaam’mona o-ooneyuo. 28 Namwasa wairoromelo, liye atooira paskwa nodholi-a sangiri vamakaxiru ira ngelo wa Nlungu a-aphe a-imiwa oroma baliwa.

29 Namwasa wairoromelo, atu a Nlungwao tatoovandela va bara yofiila vangaumile ninga varundani, mbwenye Aiguputu tangawesedhile ira tavandele, bariyo yatoabwini-a.

30 Namwasa wairoromelo, panda wa Yeriko watoogwa, atu tangaurungunuwile wa malambo 7. 31 Namwasa wairoromelo, Rahabi putanle kaaphiwile vambo-i naatu o-ovwela, namwasa oi liye atoawachela mwarendele atu tadhowile mazondela sidadilo.

32 N’nga ndidhowenave onga vifwanafwani-o vinango? Hora inondiyevela ira ndidhowenave onga vya Gidiyoni, Baraki, Samisoni, Yefita, Davide, Samueli na anamaongela enango. 33 Namwasa wairoromelo, atu enala tatoogonji-a mamwene vakhondo, tatooira vyolongomana, tatoolanyedhiwa vyongo vinango, tatoofunga milomo ya kalamu, 34 katavyide na mulo, kataphiwile na sarasada, tali ofooka mbwenye tatoova-iwa kopolo, tatookhoma khondo mwakopolo notamangi-a magulu aanyakhondo. 35 A-iyana tatoowachela atu tavenyathi-iwile muukwa. Mbwenye atu enango tatooni-iwa nyarwa namwasa oi katarumenle i-ya vyaroromela aliwa ira tathathuliwe. Aliwa tatooirana vyevi ira tadhavenyathi-iwe venyathi-iwa wapama maningi. 36 Atu enango tatoowesedhiwa namwasa oi tatoonyoziwa nokwapuliwa. Wenjedhela vevo tatoomangiwa nofungeliwa perezo. 37 Tatooponyedhiwa mabwe, tatoowesedhiwa, tatoogwandiwa vari, tatoophiwa na sarasada, tatoowenda tangawarile matembe amabila na ambudi, tanoorambulela vyongo, tanoo-ara-ariwa thitho tanoogumanana nyarwa dhinango. 38 Aliwa tali apama maningi, oi tali o-ofwanelela kala muilambo yei. Tanoowendawenda kokolani, myangoni, mapaoni na milindini.

39 Angalive ira othene enala Nlungu anoaoni-a umboni oi unoadhiveliwana namwasa wa iroromeloiwa, kataoni kwakwaneli-edhiwa wa yolanyedhayo. 40 Vili ee-no namwasa oi Nlungu atoovaelatu ona yongo yapama maningi yoi aniva-e, ira aliwa ta-akale olongomana i-yo na-anakale.

12 Ee-no voi nitorungunuwiwa na gulu nlukhulu la mboni,* dhoweni ni-iyeni yongo iliyothene yonyemela na yodawa inonimanga mo-orucha. Thitho nitamange movilela va pikisano uli i-yula. 2 Niirena vyevyi vanoing’anechecha i-yo rumiwi nlukhulu na okwakwaneli-edha iroromelo yi-u, Yesu. Namwasa oidhiwa ira unodha sangalala sogolo, liye atoovilela vaimuiri yoonelavo nyarwa.* Liye kaabanle ira vyongo vyova-a manyadho vinom’mwiireela thitho va-eni uli wu dhandha lodyana la pando wa umwene wa Nlungu. 3 Ee-no muthuulele modi-a vya mutu avilenle maongelo onyoza aatu odawa, oi vyaonga aliwa vyevyo adhipheyi-a okhene. Muthuulele vya mutu wen’na ira mwa-achenyele na-awelela nduli.

4 Vakhondo inokhoma nyo volimbanana yodawa yei, kaiira mutofiya vochuchi-a sangiri inyu. 5 Thitho mutovaelatu diwala malangi-o ouwenjeli-ani ninga anowandeliwa a-ima ira: “Mwananga, kupwaze langiwa okhumela wa Yohova,* venango welela nduli vahora inousumulula liye. 6 Namwasa oi Yohova unolanga mutu uliwethene unom’dhiveliwana liye, thitho unokwapula mutu uliwethene unom’mona liye ira ngu mwanee.”

7 Munofwanela vilela ira mufunji-iwe. Nlungu unoirana nyo vyongo ninga a-imee. N’nga ndi mwana uvi oi kanolangiwa na babee? 8 Mbwenye akala kamulangiwile ninga munofwanela langiwela i-yo othene, kuongela ira kamuli a-imee, mbwenye muli a-ima a mutu mwinango. 9 Babi-u onibala anoonilanga mbwenye angalive e-no nanoom’lemeza. N’nga kaninofwanela gonjela kwaranya veva Babi-u wauzimu ira nikaena ingumi? 10 Namwasa oi babi-u onibala atoonilanga wahora yoyeva movwelana na vyaona liye ira pyofwanelela, mbwenye Nlungu unonilanga ira vyongo viniwendele pama thitho ira nikale ochena ninga liye. 11 Pyaimbarimbari ira kavali langiwa unokala osangalali-a vahora yeniyene, mbwenye unokala wopha. Mbwenye vasogolovee waatu afunjedhilevo yongo volangiwa weu, vira wahora unova-a yova-a ya rendele yoi ndi longomano.

12 Ee-no mulimbi-e mandha aatu ofooka na mabondo ogobowa, 13 thitho mudhowenave saka-edha ndhila dhinowenda manyalwinyu ira yano ipheile ya-agudjuwe, mbwenye iili-iwe. 14 Mudhilimbi-edhenga kala mwarendele naatu othene nokala ochena, namwasa oi akala mutu kai ochena kanodha ona Mbwiye. 15 Muonecheche ira mutu mwinango a-aimwanane wachela riya rima ulukhulu wa Nlungu ira va-akale chichi othakala noromi-a nyarwa thitho noiri-a ira atu anjinji tathakali-iwe. 16 Muonecheche thitho ira vari vinyu va-akale mutu wa unyambi* venango mutu uliwethene o-osimba vyongo vyopambuleya ninga Ezau, oi atoovelela izoyee ninga mwana oroma baliwa vochinjani-a na yodya yadyide liye fendo imbo-i baa-i. 17 Mutoidhiwa ira vasogolovee vyafuna liye wachela maraeli-o atookondiwa. Angalive ira atoodhilimbi-edha na rima wethene wu alanga ira babee achinje mathuulelo, vyatooimwananeya.

18 Nyo kamwafiile vamwango oi munooda usamela, o-inda mulo, okaana rambo odimba, wa isi ilukhulu na lipevo nlukhulu, 19 thitho oi vatoovweya ula wa lipenga na madhu a mwinangwee moi atwao tangaavwide, tatoovepa ira katiwandeliweve okoka. 20 Namwasa oi tatoova maningi na lamulo loi: “Masiki inyama iliyothene inofuna samela mwanguo, iponyedhiwe mabwe.” 21 Thitho vyaoni aliwa weo vyali vyoophi-a maningi moi Mose atoonga ira: “Ndinaaova nongurumela.” 22 Mbwenye mutofiya wu mwango wa Ziyoni na sidadi la Nlungu wa ingumi, Yerusalemu wa dhulu, weo uli angelo anjinji maningi,* 23 vagumanwiwa ulukhulu. Weo thitho uli pingo wa oroma baliwuo, pingo waatu othene oi madhiniwa atolembiwa dhulu. Weo uli Nlungu namatonga wa othene, na olongomana oi anokaana ingumi movwelana na kopolo ya zimu ochena oi akami-iwile kala olongomana. 24 Utokala thitho Yesu namaimelela wa vwelano lipya, na sangiri iwaziwile yoi inoonga mundhila yapama maningi kwaranya sangiri ya Abeli.

25 Muire polepole ira mwa-a-iye* m’vwela unoonguo. Namwasa oi akala ale takondile a-vwela wenuo avelele yowenjeli-a ya Nlungu va ilambo yavathi katavulumuwile, i-yo thitho kaninodha vulumuwa na-avwele wenuo unoonga angali dhulu. 26 Vahoriyo madhwee atootekenya ilambo yavathi, mbwenye va-eeni utolanyedha ira: “Ndinodha tekenya thitho dhulu, a-kala ilambo yavathi baa-i.” 27 Madhu oi “ndinodha tekenya thitho,” anothapulela ira vyongo vinofuna liye dhatekenyavyo vinodha khumi-iwavo namwasa oi vyongo vyevi kavipanduchiwile na Nlungu. Anodha vikhumi-avo ira vyo-otekenyeyavyo vi-ale. 28 Ee-no, voi ninodha wachela Umwene oi khunodha tekenyeya, dhoweni nikaleve ororomeleya ira Nlungu adhowenave nithonyi-edha riya rima ulukhulu, ira niirenga urumiwi opambuleya mundhila yorumeleya, moova Nlungu na mwalemezo maningi. 29 Namwasa oi Nlungwi-u uli ninga mulo ononga.

13 Mudhowenave adhiveliwana abali. 2 Kamudiwale wachela alendo,* namwasa oi voirana vyevi, atu enango tatoowachela angelo mo-oidhiwa. 3 Muthuulelenga atu tali perezo kalanga ninga mumangiwile vambo-i na aliwa.* Muthuulelenga thitho atu anooni-iwa nyarwa, voi thitho nanyoene muli atu. 4 Banja likale lolemezeya vamethoni vaatu othene, thitho vogona vaatu othelana vakale vo-othakali-iwa, namwasa oi Nlungu unodha tonga atu anoira unyambi* naatu anoraruwa.* 5 Kamudhiveliwengana kobiri, mbwenye mukalenga okwakwana na vyongo vinanyo vahoriyo. Namwasa oi Nlungu uongile ira: “Kandinodha u-iyani venango utawani navang’onovene.” 6 Nikale olimba rima thitho nionge ira: “Yohova ngunondikami-a. Kandinodha ova. N’nga mutu unondiira n’ni?”

7 Muthuulelenga atu anousogolelani, namwasa oi enala tatoufunji-ani madhu a Nlungu. Thitho vanothuulelanyo vya makalelwiwa apama, mu-arele iroromelo iwa.

8 Yesu Kristu ngween’neve dhilo, penene, thitho kanodha chinja modhowa nodhowa.

9 Kamudimeli-iwe na mafunji-edho o-iyana-iyana o-oidhiweya. Riya rima wa Nlungu kunofuna ukami-ani ira mukale olimba, a-kala vyodya. Namwasa oi atu anokalelave thuulela vya vyodya,* kavinoaganyali-a.

10 I-yo nitokaana iguwa ya sembe yoi atu anolaba basa lopambuleya vatendani katina ufulu odya vyongo vinoveleliwa vaiguwanivo. 11 Namwasa oi sangiri ya vinyama, ndimuwa wa asembe anooivolowana mulimburo lochena ninga sembe yolevelela vyodawa, mbwenye vinyamavyo anoovidhowana undhe wa sasa mavika-a. 12 Ee-no naliyene thitho Yesu atooni-iwa nyarwa undhe wa lango nlukhulu wa sidadi ira acheni-e atu na sangiree. 13 Dhoweni nim’arele undhe wa sasao, ninyoziwanga ninga mwemo mwanyoziwele liye. 14 Namwasa oi va-eeni kanina sidadi lokaatheya, mbwenye ninofunechecha sidadi linodhalo. 15 Dhoweni hora dhothene nim’titimi-e Nlungu dhela mwa Yesu. Namwasa oi irana vyevi uli ninga sembe inovelela i-yo wa Nlungu thitho nino-indi-edha basa milomwi-u volaleela dhinalee. 16 Thitho kamudiwale irana vyongo vyapama nogawela atu enango vyongo vinanyo, namwasa oi Nlungu unosangalala na sembe ninga dhedhi.

17 Muvwelenga atu anousogolelani noagonjelanga namwasa oi aliwa anoing’anela vingumi vinyu moi anodha wakhula selu. Muirengana vyevi ira talabenga basa liwa mosangalala a-kala modungunya, namwasa oi tairangana vyevi kavinouwendelani pama

18 Mudhowenave nilobelela, namwasa oi ninororomela ira nitokaana ithuulela rima yochena* thitho ninofuna irana vyongo vyothene moona rima. 19 Mbwenye simbwasimbwa ndinoulimbi-ani ndilobelela ira ndiwelele weo mombaranya.

20 Va-eeni, Nlungu wa rendele am’venyathi-idhe namakumbiza nlukhulu wa mabila oi utokaana sangiri ya vwelano lo-omala, Mbwii-u Yesu, 21 auva-eni vyongo vyothene vyofuneya ira muire ifuneloyee. Thitho dhela mwa Yesu Kristu, anikami-e irana vyongo vyothene vyom’sangalali-a. Nlungu atitimi-iwe modhowa nodhowa. Ame.

22 Va-eeni abali, ndinaauvepani ira muvuruwane moleva rima madhu olimbi-ala, namwasa oi karta liulembeleni miyoli kalilapile. 23 Muidhiwe ira bali-u Timoteo utothathuliwa thitho akala unodha vachineneeva, ndinom’dhanee vambo-i dhauonani.

24 Muvelele mwenyula wanga waatu anosogolela vari vinyu thitho waatu enango othene ochena. Abali awu Italiya uno anaaumwenyulani.

25 Riya rima ulukhulu wa Nlungu ukale nanyo mwethene.