Azombwe 4 tatoom’vwela Yohova

Nebukadinezara angatukunle azombwe awu Yuda nowadhowa wu Babulo, atom’sakhula o-arela mwene mwinango dhinalee Aspenaz ira aing’anela azombwao. Nebukadinezara atom’mwandela Aspenaz ira asakule azombwe amanungo apama thitho obaleya. Atoom’mwandela ira azombwao tasamaleliwe pama thitho tafunji-iwe wa vyawa viraru naifunelo yoi tadhakhale andimuwa andimuwa aguverno. Azombwao tafwanela funji-iwa leri, lemba noonga iongelo ya Akasidi. Tafuneela thitho va-iwa vyodya vyevyo mwene naanamalaba enao alaba vandhevee vyadya aliwa. Va gurupu la azombweli vatookhala Danieli, Ananiya, Misaeli na Azariya. Mbwenye Aspenaz atowava-a madhina Aibabulo oi Belitesazara, Sadiraki, Mesaki na Abedinego. N’nga vyaafunji-a aliwavyo vyatooiri-a ira azombwala ta-iye m’labela Yohova? Khabe.

Aliwa tatoosimikizela rimani mwiwa ira anodhowanave m’vwela Yohova. Tanooidhiwa ira katinofwanela udya yodya ya mwene namawasa oi ilamulo ya Yohova yanookhondi-a udya vinango mwa vyodya vyevyo. Ee-no tatoom’mwandela Aspenaz ira: ‘Pephani, kamuniva-enga yodya ya mwene.’ Mbwenye Aspenaz atoawakhula ira: ‘Mwa-adyenga vyodya vya mwene munoonda thitho mwene unondipha.’

Ee-no Danieli atoothuulela zelu dhinango. Atoom’mwandela Aspenaz ira: ‘Muniva-enga mathamba na ma-inje wa malambo 10. Mwamala mudhanifwanafwani-edhele moda unooneya i-yo na mwemo azombwe enango munooneela aliwa.’ Aspenaz atoorumela.

Vangavirile malambo 10, Danieli naafwee ararwale tanooneya khala amanungo apama maningi kwaranya azombwe enango. Yohova atoosangalala namwasa oi azombwao tatoom’vwela thitho atoom’va-a Danieli zelu moi anooda thapulela masophenya na vyoro-a.

Vyawa viraru vile vingamadhi, Aspenaz atoodhowa vambo-i na azombwe othene wa Nebukadinezara. Angaongile naaliwa Nebukadinezara atoona ira Danieli, Ananiya, Sadiraki na Azariya tali azelu na oidhiwa vyongo kwaranya azombwe enangwao. Ee-no atowasakula ira talabenga basa nyumbaniwee. Mwenula anoofukedhela zelu waazombwala namwasa oi Yohova atoakhami-a kaana zelu kwaranya atu othene azelu amuilambwiyo.

Angalive ira azombwe 4 ala takala muilambo yaanyaa, katadiwanle ira aliwa tali atu a Nlungu. N’nga we unom’vwela Yohova malambo othene angalive ira anamabalaa ali undendai?