N’nga mutoidhiwa?

Mwasiwa ngwan’ni vyali vyokami-a ira mutu aodenga velela djiwa venango kangaiwa ninga sembe?

ILAMULO ya Mose, yanorumeli-a atu ira tavelelenga djiwa venango kangaiwa ninga sembe wa Yohova. Hora dhothene mbalame dha mitundu mbilidi danorumeli-iwa kala ninga dhimbo-ive muilamulo vamwasa ovelela sembe, namwasa oi akala mutu kan’na kangaiwa, anooda velela djiwa. (Lev. 1:14; 12:8; 14:30) N’nga mwasiwa ngwan’ni vyevi vyali vyokami-a? Mwasa mwinango ngoi hora dhinango vyali vyorucha fwanya djiwa. Mwasiwa ngwan’ni?

Madjiwa ndi mbalame dhedho dinothamathama, thitho dhinofwanyeya wu Israeli mu myedi yovi-a. Mwedhi wa Outubro, dhinothamela wu suli wewo unofwa aliwa limburo lovi-a thitho dhanowelela wu Yerusalemu hora yodhidhila yavira. (Nyu. 2:11, 12; Jer. 8:7) Ee-no vyali vyorucha wa Aisraraeli, fwanya djiwa ninga sembe mu hora yodhidhila.

Kangaiwa kadhinothamathama wiliwili, e-no dhanofwanyeya wu Israeli yawa yothene. Wenjedhela veva kangaiwa dhanofuiwa. (Muvwelani-e na lemba la Juwau 2:14, 16.) Bukhu n’nango laongile ira “mavandhe na masidade au Pilistina wanofwanyeya kangaiwa dhofuwa. Vanyumbani iliyothene, atu tanopovola vachi-ini lanyumba namwasa oi kangaiwadho dhikalenga mweemo.”—Muvwelani-e na lemba la Esaya 60:8.

Vyevi vinothonyi-edha ira Yohova anoadhiveliwana no thuulela atwee, vowarumeli-a velela sembe mbalame dhedho dhafwanyeya wu Israeli yawa yothene.