Mwasiwa Ngwan’ni Utokala Nyarwa Dhinjinji?

1, 2. N’nga atu anofuna idhiwan’ni taonanga nyarwa dhiireyanga?

MALAMBOANO utokala nyarwa dhinjinji. Wiliwili ninovwecha milanyu yothakala, ninga ila: “Dhalela wama-inje unooda nonga sidadi lothene. Venango mbava unooda volowa grejani upa mwinji waatu na futi. Wukwa wanamabala na marenda odhimba i-ya a-ima taonanga nyarwa.”

² Atu anofuna idhiwa mwasiwan’ni unoireya masokha avilengo na vyongo vyoopi-a e-ni. Aliwa anodhifuka ira mwasiwa ngwan’ni vatokala idana na nyarwa dhinjinji vailambo yavathi. N’nga nyo mwatoromanga dhifuka ee-no?

3, 4. (a) N’nga Habakuku amfukilen’ni Yohova? (b) N’nga Yohova ammwakule a-vi?

³ Bibilya linooni-a ira anamalaba ororomeleya a Nlungu, thitho tanodhifuka vyoonga vyevyo. Mofwanafwani-a, Namaro-edha Habakuku atomfuka Yohova ira: “Mwasiwa ngwan’ni munondioni-a vyongo vyopa? Mwasiwa ngwan’ni munodhowanave rumeli-a kalelo lothakalali? Mwasiwa ngwan’ni vyongo vyothakala vinoireya vamethoni vanga? Thitho mwasiwa ngwan’ni utokala kangana na khondo?”—Habakuku 1:3.

⁴ N’nga Yohova awakule a-vi? Va lemba la Habakuku 2:2, 3, Yohova atolanyedha ira unodha mali-a nyarwadho. Vyevi vinooni-a ira Yohova unodhiveliwana vinjinji atu. Bibilya linoonga ira “liye unonifuna i-yo othene.” (1 Pedru 5:7) Mwaimbarimbari Nlungu unoidanana nyarwa kwaranya mwemo munaidananela i-yo. (Esaya 55:8, 9) N’nga mwasiwa ngwan’ni utokala nyarwa dhinjinji? Dhoweni nione vinoonga Bibilya vyoonga vyevyo.

MWASIWA NGWAN’NI UTOKALA NYARWA DHINJINJI?

5. (a) N’nga andimuwa anjinji amareligiau anoongan’ni vyoonga nyarwa? (b) N’nga Bibilya linoongan’ni vyoonga vyevyo?

⁵ Fendo dhinjinji, andimuwa amareligiau anoonga ira vyothene vinoireya kufuna wa Nlungu. Enango anoonga ira masoka avilengo anokumela wa Nlungu, thitho ira liye utokaana mwasa ovweya pama oirela vyevyo. Mwana akwa, enango anoonga ira Nlungu ufunne ira mwanuo amakale ngelo dhulu. Mbwenye vyothene vyevi kai imbarimbari. Yohova chipo kanoiri-a vyongo vyothakala. Bibilya linoonga ira: “Nlungu waimbarimbari kanoira vyothakala navang’onovene, thitho wanguru dhothene tanoira vyongo vyo-olongomana navang’onovene!”—Yobo 34:10.

6. Mwasiwa ngwan’ni atu anjinji anoona ira unoiri-a nyarwa vailambo yavathila ngu Nlungu?

⁶ Atu anjinji anoona ira unoiri-a nyarwadhi ngu Nlungu mwasiwa aliwa anothuulela ira unotonga ilambwila nguliye. Mbwenye i-yo nitofunjedha vamuru wa 3 ira Satana ngunotonga ilambwila.

7, 8. N’nga timyasa miraru dhiivi dhinoiri-a ira uireyenga vyongo vyothakala?

⁷ Mwasa mwinango unoiri-a ira ukale nyarwa dhinjinji ngoi “ilambo yothene ili mandhani mwa othakaluo.” (1 Juwau 5:19) Satana ngunamatonga wauwalanga na othakala. Liye “unave nami-a ilambo yothene yavathi”. (Apokalipse 12:9) Atu anjinji tali ninga liye. Mwasiwa ngwenuo ilamboi mutokala alimbo nama anjinji, umwidani na vyongo vyothakala.

⁸ Mwasa wanambili unairi-a ira ukale nyarwa dhinjinji vailambo yavathi, mbamadawo. Adamu na Eva tatonilandi-a madawo. Namwasa wenuo, atu anjinji tanodhitukulela thitho anoviona kala ofuneya kwaranya enango. Vyevyo vitothotha madugudugu, khondo na irelana uwalanga. Vyongo vyothene vyevi vinodhi-a nyarwa. (Namalaleya 4:1; 8:9) Hora dhinango atu anogumanana nyarwa mwasa wa “hora ya soka na yorucha na vyongo vyo-odedi-edha.”—Namalaleya 9:11.

9. Mwasiwa ngwan’ni nitoidhiwa ira Nlungu unodha mali-a nyarwa?

⁹ Nyarwa dhinogumanana atu kadhinokumela wa Yohova. Liye kanoiri-a ira ukale khondo, vyongo vyoopi-a na uwalanga. Thitho kai Nlungu unori-a ira uireyenga masoka avilengo ninga vindharandhara, lipevo nlukulu na dhalela wama-inje. Mbwenye venango nyo munodhifuka ira: ‘Akala ira Yohova ngwanguru dhothene, mwasiwa ngwan’ni vyongo vyothakala kavinomala?’ Nlungu utokaana mwasa ovweya unammwiri-a ira a-iye vyongo vyothakala ireyenga. Mbwenye nitoidhiwa ira liye unodha mali-a vyevyi mwasiwa unonifuna, thitho unonidhiveliwana.—1 Juwau 4:8.

MWASIWA NGWAN’NI NLUNGU UTO-IYA NYARWA IREYANGA?

10. N’nga Satana aongilen’ni voonga vya Yohova mundani mwa Edeni?

¹⁰ Mundani mwa Edeni, Namanami-a atonami-a Adamu na Eva ira ta-amvwele Nlungu. Satana aongile ira Nlungu ali namatonga o-ofwanelela thitho ira kaaode mva-a Adamu na Eva vyothene vyafuneela aliwa. Satana afuna ira aliwa taroromele ira liye angatongile pama kwaranya Nlungu, thitho ira atu katinofuneela tongiwa na Nlungu.—Maromelo 3:2-5; onani madhu akomoni 27.

11. Chofuka iivi inofwanela i-yo wakula?

¹¹ Adamu na Eva tangakondile vwela Yohova, aliwa tatomdhimbinuela. Aliwa taoni ira tangaodile sakula okene vyongo vyofwanelela na vyo-ofwanelela. Mbwenye ngu Yohova uidhi vyongo vinofuna i-yo. N’nga Nlungu aaoni-e a-vi ira Adamu na Eva tatoira vyongo vyo-ofwanela?

12, 13. (a) (b) Mwasiwa ngwan’ni Yohova kanongile Adamu na Eva? (b) N’nga mwasiwa ngwan’ni Yohova utom-iya Satana ira akaena mautongee?

¹² Adamu na Eva tangadawile, Yohova kaanongile. Mwasiwa ngwan’ni? Mwasa oi Yohova atoonga ira tanofwanela kaana a-ima na dhala ilambo yothene yavathi. Vyofuna vya Nlungu vinoireyadi, angalive ira Namanami-a unowesedha weleli-edha nduli. Ee-no Yohova ato-iya Adamu na Eva ira takaena a-ima. A-imala tangasakule okene vwela Nlungu venango Satana.—Maromelo 1:28; Esaya 55:10, 11.

¹³ Mbwenye kai Adamu na Eva baa-i. Satana atoonga thitho vyonama voonga vya Yohova vamethoni vamamiliyau aangelo. (Yobo 38:7; Danieli 7:10) Ee-no, Yohova utomva-a Satana hora yoi atonge ilambo yavathi. Thitho utoiri-a atu kaana mautongiwa. Yohova utoira vyevyo mwasa ofuna oni-a umboni waatu othene ira Satana ngumalimbo nama.

14. N’nga nguumboni uuvi uoneile romela vyawa vinjinji vivirile ndulimu?

¹⁴ Romela vyawa vinjinji ndulimu, atu tanodhilimbi-edha ira tadhitongenga okene mbwenye katiodile. Vyevi vitooni-a ira Satana ngonama. Imbarimbari choira atu anofuneya kami-iwa na Nlungu. Namaro-edha Jeremiya atoonga imbarimbari voonga ira: “Miyo nditoidhiwa pama Yohova ira, ndhila dha mutu kai dhee. Mutu okumela tumbuluni kanaode sogolela manyalwee.”—Jeremiya 10:23.

N’NGA MWASIWA NGWAN’NI YOHOVA KANOMALI-A NYARWADHI FIEDHELA MALAMBOANO?

15, 16. (a) Mwasiwa ngwan’ni Yohova uto-iya nyarwadhi ireyanga fiedha malamboano? (b)  N’nga mwasiwa ngwan’ni Yohova kanamali-a vyongo vyothakala vinoireyavyi?

¹⁵ N’nga mwasiwa ngwan’ni Yohova uto-iya nyarwadhi ireyanga fiedha malamboano? Mwasiwa ngoi vanofwanela vira hora indendai ira atu tazindiyele ira utongi wa Satana kunaoda tonga. Thitho hora inave oni-a ira Umwene wa Satana ngo-ofwanelela. Atu tanodhilimbi-edha mwamakalelo o-iyana-iyana autongi mbwenye vyothene vyevyo kavikami-idhe. Angalive ira atu atowenjedhela dodoliso liwa mwasa wa siyesiya, vyongo ninga a-longomana, sauwa, uwalanga na khondo vitowenjedheleya kwaranya walelene. Ula nguumboni oi i-yo kaninaode dhitonga pama okave mo-osogoleliwa na Nlungu.

¹⁶ Mbwenye Nlungu kaafunne mali-a nyarwa dhiromi-idhe Satana vahora yeniyo, mwasa oi vyevyo vingaoneile ira liye unokami-a utongi wa Satana. Nlungu kanaire vyevyo navang’onovene. Ira vyevi vingairi-idhe atu roma thuulela ira tanooda dhitonga pama okave. Mbwenye pyonama thuulela ira atu anooda dhitonga okave. Ee-no Yohova kanokami-a atu vamwasa onama neri-a liye kanonama.—Aebere 6:18.

17, 18. N’nga Yohova unodha mali-a a-vi vyongo vyothene vyothakala?

¹⁷ N’nga Yohova unooda mali-a vyongo vyothene vyothakala vinoiri-a Satana vambo-i naatu? Ee wa Nlungu vyongo vyothene pyoodeya. Yohova utoidhiwa hora inofuna liye dhaoni-a ira Satana ngonama. Vanduli viwa Yohova unodha saka-edha ilambo yavathi ira ikale paradaiso ninga mwafunela liye voroma. Atu okwa anodha venyathi-iwa. (Juwau 5:28, 29) Atu katinodha bulela venango wukwa. Vyongo vyothene vyothakala viromi-idhe Satana vinodha mala. Yohova unodha indi-edha basa Yesu ira “anonge mabasa a Satana.” (1 Juwau 3:8) Ninooda kala aimwerumweru voidhiwa ira Yohova ngoleva rima voniva-a hora yoi nikaena ngari yommwidhiwa thitho yosakula tongiwa na liye. (Muleri 2 Pedru 3:9, 10.) Pyaimbarimbari ira ninave ona nyarwa. Mbwenye Yohova unoniva-a nguru ira nivilele nyarwadho.—Juwau 4:23; muleri 1 Akoritiyo 10:13.

¹⁸ Yohova kanomkanyi-edha mutu ira amvwelenga. Liye utoniva-a ufulu oira vyosakula. Dhoweni nivwecheche pama funeya wa yotuva yodabwi-ila.

N’NGA NYO MUNASAKULEN’NI?

19. (a) N’nga Yohova univa-idhe yotuva yan’ni? (b) N’nga Mwasiwa ngwan’ni ninofwanela onanga yotuva yen’na kala yofuneya?

¹⁹ Yotuva yodabwi-a yokaana ufulu oira vyosakula iniva-dhe Yohova inoni-iyani-a vinjinji na vinyama. Mwasiwa ngoi vinyama kavinaoda i-yani-a vyongo vyapama na vyothakala. (Sanganikho 30:24) Thitho i-yo kanili ninga makina osasaedhiwa tanaira vyongo ninga mwasasaedhiwile aliwa. Yohova utoniva-a ufulu oira vyosakula. Mwasiwa ngwan’ni ninofwanela onanga vyevyo kala vyofuneya? Mwasiwa ngoi ninodhiveliwa sakula tundu unofuna i-yo kala, atu anofuna kala afwi-u na vinofuna i-yo ira vaingumiyi-u. Yohova utoidhiwa ira yosakula yen’na inoniva-a imwerumweru.

20, 21. Pivyosakhula vyapama viivi vinofwanela nyo ira vaingumini vinyu?

²⁰ Yohova unofuna ira i-yo nimdhiveliwengana. (Mateu 22:37, 38) Liye utoniva-a ufulu osakula. Namabala uliwethene unokala waimwerumweru mwanee aonganga kumela vathi varima ira: “Miyo ndinoudhiveliwanani Babani.” Yohova thitho unokala waimwerumweru nasakula mdhiveliwana na mlabela. Pyovwi-a tangaranga ira Satana, Adamu na Eva tatosakula a-vwela Nlungu. N’nga nyo munasakulan’ni?

²¹ Yosakula yapama inaodenyo sakula kumlabela Yohova. Mamiliyau aatu atosakula irana ifunelo ya Nlungu i-ya irana ifunelo ya Satana. (Sanganikho 27:11) Ninga muonile i-yo, Nlungu unodha mali-a nyarwa na chinja ilambo yavathi kala Paradaiso. N’nga munofwanela iran’ni chineneeva ira mudhakale Paradaizonimo? Ninodha ona vyevyo muru o-arela.