Nlungu atoopanducha atu ambili oroma lombwana na i-yana

Yohova atoosaka-edha munda wa Edeni. Mundanimo mwatookala mafolori, miri na vinyama vyo-iyana i-yana. Adhamale atootukula teya noumba mutu nom’va-a dhina loi Adamu. Yohova atoovudhelela mwela punoni mwa Adhamu. Utoidhiwa vyaireile? Mutuo atokaana ingumi. Atoom’mwandela ira aing’anelenga munduo thitho vinyama vyothene aviva-e dhina.

Mbwenye Yohova atoom’va-a lamulo lofuneya maningi loonga ira: ‘Vyova-a vya muri uliothene wa mundanimu uvidyenga, khumi-avo vya muri m’mbo-i baa-i. Wadhadya vyova-a vya muri wen’na, unodhakwa.’

Adhamale Yohova atoonga ira: ‘Ndim’saka-edhele i-yanee ira am’kami-enga.’ N’nga airilena a-vi vyevyo? Yoroma, atom’mwiri-a Adamu ira agone irulo ilukulu. Adhamale ongokumi-amo mbaru imbo-i noi-indi-edha basa mbarwiyo vosaka-edha i-yana. I-yanuo atoom’va-a dhina loi Eva. Ee-no Adamu na Eva tali banja loroma. N’nga Adamu atoom’dhiveliwana i-yaneuo? Ee, atom’dhiveliwana maningi fiyedhela onga ira: ‘Eeyaa, ndili osangalala ira Yohova uto-indi-edha basa mbarwanga vondisaka-edhela i-yananga. Va-eeni nditokaana fwanga ondikami-a.’

Yohova atom’mwandela Adamu na Eva ira tabale a-ima thitho tadhali-e ilambo yavathi. Nlungu afuna ira talabenga basa vambo-i mosangalala nosaka-edha ilambo yothene yavathi ira ikale paradaizo obaleya ninga munda wa Edeni. Mbwenye vyongo kavyaireile ninga mwafunela Yohova. N’nga utoidhiwa mwasee? Ninodha tapanya vyaireile mu muru o-arela.