N’nga Yobo ali ani?

Muilambo inango yeniyo yaitaniwa Uzi, mwatookala mutu mwinango wenuo am’lambela Yohova. Dhinalee ali Yobo. Liye atokaana banja nlukulu thitho ali ofuma maningi. Yobo ali oriya rima thitho anookami-a atu osauwa, a-iyana amakwele na anapawi. N’nga namwasa oi ali mutu wapama, kaagumanana nyarwa? Khabe kai ee-no.

Satana anoona vyongo vyothene vyaira Yobo, angalive ira Yobo kaaidhiwa vyevyo. Yohova atom’fuka Satana ira: ‘N’nga utom’mona rumiwanga Yobo? Vailambo yothene kavali mutu olongomana ninga liye. Liye unondivwela thitho unoira vyongo vyofwanelela.’ Satana atoowakhula ira: ‘Pyaimbarimbari ira Yobo unouvwelani. Mbwenye namwasa oi munom’barela thitho m’raeli-a. Mutom’va-a limburo lapama thitho vifuo. Mbwenye mwam’mwaka vyongo vyothene vina liye, unooda i-ya uvwelani.’ Yohova atoonga ira: ‘Nditourumeli-a ira um’mwesedhe mbwenye kum’phe.’ Mwasiwa ngwan’ni Yohova atoom’rumeli-a Satana ira am’mwesedhe Yobo? Namwasa oi Yohova anooidhiwa ira Yobo unokalave ororomeleya.

Satana atoom’mwesedha Yobo vom’dhi-edha nyarwa dho-iyana-iyana. Yoroma, atooiri-a ira atu tamabe ng’ombedhee na ngamila. Adhamale, mulo watooka-a mabilee. Watoodha thitho atu enango enao tadhidhe dhaba ngamiladhee dhothene. Thitho anamalaba enao taing’anela vifuo vya Yobo tatoophiwa. Dambo n’nango a-ima a Yobo tali munyumba inango noiranga pwando. Mbwenye mo-odedi-edhela nyumbiyo yatoogwa nopha a-ima othene. Yobo atoovivwela tangaranga maningi navyongo vyothene vyaireilevi, mbwenye liye kaa-iidhe m’lambela Yohova.

Satana athuulela ira Yobo unooda i-ya m’vwela Yohova adhagumanana nyarwa dhinango. Ee-no atooiri-a ira manungo othene a Yobo takaena vilonda. Yobo kaaidhiwa vyongo vyairi-a ira vyevi viireye. Mbwenye liye atoodhowanave m’vwela Yohova. Nlungu anoona vyongo vyothene vyaireya thitho anoosangalala maningi voona ira Yobo unaadhowanave m’roromela.

Adhamale Satana atooruma alombwana araru wa Yobo. Aliwa tatoom’mwandela Yobo ira: ‘Vinooneya ira watoom’dawela Nlungu thitho watoolokota. Ee-no Nlungu anaaulanga namwasa wa vyevyo.’ Yobo aongile ira: ‘Kavali yongo iliyothene idawi-idhe miyo.’ Vingaireile ee-no, Yobo atooroma thuulela ira ngu Yohova airi-a nyarwa dheedho, thitho kaam’mwirela longomano.

Mutu mwinango wenuo dhinalee ali Elihu, anoovuruwana vevo alombwana ararwalee vyatapanya aliwa. Adhamale atoawakhula ira: ‘Vyothene vinoonga nyoovi kai vyaimbarimbari. Yohova ngwa dhuludhulu maningi thitho i-yo atu kaninaode vwechecha vyoiravyee vyothene. Yohova kanaire vyongo vyothakala. Liye unoona vyothene thitho atu tarucheyanga unowakami-a.’

Moi ee-no Yohova atoonga na Yobo ira: ‘Nga wali wani vahora yapanducha miyo dhulu na ilambo yavathi? Mwasiwa ngwan’ni unoonga ira ndinoira vyongo mo-olongomana?’ Yobo atoozindiyela ira athuulela modaweya thitho atoonga ira: ‘Pepani nditoudawelani. Ndaira uvwa vyanyo baa-i, mbwenye va-eeni nditouidhiwani. Kavali yongo iliyothene ya-anaodenyo irana. Mundilevelele namwasa wavyongo viongile miyo.’

Ee-no vyowesedha vya Yobo vyatoomala thitho Yohova atom’mwili-a. Atoom’va-a thitho vyongo vinjinji kwaranya vyongo vyana liye walelene. Yobo atokaana ingumi yosangalala thitho yolapela. Yohova atom’raeli-a angalive ira atoogumanana nyarwa. N’nga we unooda kala ninga Yobo nom’vwelanga Yohova masiki vyongo viruche moi a-vi?