Mose atoona likhupu li-indanga mulo

Mose atookala wu Midiyani wavywa 40. Liye atoothela nokaana a-ima. Dambo n’nango adyi-anga mabila duzi na mwango wa Sinai, atoona likhupu li-indanga mulo mbwenye kalavya. Angawandamenle ira aone vyaireyavyo, atoovwa madhu kumela valikhupunivo oonga ira: ‘Mose! Khuwandamele likhupulo. Ungula sapatodhaa namwasa oi limburo liimenle weelo tochena.’ Yohova ngwaonga mbwenye a-indi-edhe basa ngelo.

Mose atoova maningi moi atookhunela uthoniwee. Yohova atom’mwandela ira: ‘Nditoona ira Aisraeli anaaona nyarwa maningi. Ndinofuna avulumucha madhani mwa Aiguputu nowadhowana muilambo yapama.’ Weyo umaasogolele vokhuma wu Iguputu.’ Vinooneya ira Mose atoodabwa maningi na vyevi.

Liye atoofuka ira: ‘N’nga akala tandifuka ira uurumile mbaani, ndimawakhule a-vi?’ Nlungu atoom’mwakula ira: ‘Umaawandele ira Yohova Nlungu wa Abrahamu, wa Izaki na wa Yakobo ngundirumile.’ Moi ee-no Mose atoonga ira: ‘N’nga ta-andiroromele?’ Ee-no Yohova atoom’mwandela ira aponyedhe golomondolee vathi. Hora yeniyene golomondolo latoosanduwa nyowa. Mbwenye anga-indile mwilani yatoosanduwa udha golomondo. Ee-no Yohova atoom’mwandela ira: ‘Wadhowa mairana vyevi anamauroromele ira ndite uruma.’

Mose atoonga ira: ‘Miyo ndinorucheyecha voonga.’ Voi ee-no Yohova atom’lanyedha ira: ‘Miyo ndinamauwandelenga vyofwanelela onga thitho ndinouva-a Aroni ira amaukami-enga.’ Mose angaidhiwile ira Yohova unom’kami-a, atootukula i-yanee naa-imee noroma ulendo odhowa wu Iguputu.