Rute na Naomi

Vahora inango wu Israeli watookala ndhala. Ee-no Naomi na man’nee vambo-i na-imee ambili, Tatoothamela wu Mowabu. Tangali weo man’nee Naomi atookwa thitho a-imee ambilale tatoothela. A-iyanao madhiniwa ali Rute na Olipa. Mbwenye vangavirile hora, a-imee ambinlene tatookwa.

Naomi angavwide ira ndhala wu Israeli itomala, atothuulela vyowelela wu Israeli. Rute na Naomi tatoovenyathi vambo-i na livyaliwa. Mbwenye tangali ndhila Naomi atoawandela ira: ‘Muli a-iyana apama maningi. Mwanookami-a a-imanga thitho miyo. Mbwenye muwelele waninyu wu Mowabu thitho munooda theliwa okoka.’ Rute na Olipa taongile ira: ‘Ninoudhiveliwanani maningi voi kaninofuna u-iyani.’ Naomi atowakanyi-edha ira tawele. Vasogolovee Olipa atoowela mbwenye Rute kaawelenle. Naomi atom’mwandela Rute ira: ‘Kam’mone fwaa unaawelela wa abalee na wa milungwee. Welela vambo-i na liye, udhowenga nyumbani wa anamabalaa.’ Mbwenye Rute awakunle ira: ‘Kandinou-iyani. Abalinyu anodha kala abalanga thitho Nlungwinyu unodha kala Nlungwanga.’ N’nga unothuulela ira Naomi adhivwide a-vi Rute angaongile vyevi?

Rute na Naomi tafiile wu Israeli vahora yo-anda sevada ingaromile. Dambo n’nango Rute atoodhowa mapalakata sevada o-alela, mundani mwa lombwana mwinango dhinalee Boazi. Lombwanula ali mwana Rahabe. Angavwide vyoi Rute ali wau Mowabo mbwenye akala na Naomi, atoowandela anamalabee ira ta-iyenga sevada mwinango ira Rute aode upalakata.

Dambo n’nango angawenleo na maulo, Naomi atom’fuka ira: ‘N’nga penene udhowile mapalakata sevada wani?’ Rute atoowakula ira: ‘Mundani mwa lombwana mwinango dhinalee Boazi.’ Ee-no Naomi atom’mwandela ira: ‘Enao ndi abali amananga. Hora dhothene udhowenga mindani mwiwa vambo-i na asikana enango. Liye kanouirela iburutu.’

Moi e-no hora dhothene Rute adhowecha mundani mwa Boazi fiyedha hora yo-anda mala. Boazi atoona ira Rute anoolaba basa mwathindhi thitho ali i-yana wa pama maningi. Walelene mutu akwa a-abanle mwana, balee wa lombwanuo anoodhowa ma’mthela i-yana wamakweluo. Moi e-no Boazi atoom’thela Rute. Aliwa tatoobala mwana thitho tam’va-idhe dhina loi Obedi. Afwee a Naomi tatoosangalala maningi. Aliwa taonga ira: ‘Yohova utouva-a Rute thitho ukadhi aukami-anga maningi. Va-eeni utouva-a idhuulu. Yohova atitimi-iwe.’ Obedi atookala mbwiyee wa Mwene Davide.