Gidiyoni atoogonji-a Amidiyani

Vangavirile hora, Aisraeli tatoo-iya m’lambela Yohova thitho tatooroma lambela milungu yonama. Wa vyawa 7, Amidiyani tanoobecha vifuo vya Aisraeli thitho anongela mbeu dhiwa. Votawa Amidiyani, Aisraeli tanoovithala paoni wamabwe thitho myangoni. Ee-no tatom’vepha Yohova ira aavulumuche. Moi ee-no Yohova atooruma ngelo ira adhowe wa Gidiyoni. Ngeluo atom’mwandela Gidiyoni ira: ‘Yohova utousakhula ira ukale nyakhondo olimba rima thitho wakopolo.’ Gidiyoni atoofuka ira: ‘N’nga mutu o-okaana basa ninga miyo ndinavulumuche a-vi Aisraeli?’

N’nga Gidiyoni asimikizele a-vi ira Yohova utom’sakula? Liye atoo-ela uzoya vathi nom’mwandela Yohova ira: ‘Akala namaebe-i uzoyula unonyeta na lumyo mbwenye mateya kala oumene, ndinodha idhiwa ira mutondisakula ira ndimavulumuche Aisraeli.’ Maebe-i adambo lo-arela atoofwanya ira uzoya utonyeta mbwenye mateya tali oumene. Gidiyoni atoovepa thitho ira maebe-i a dambo lo-arela afwanye uzoyoule utouma mbwenye mateya akale onyeta. Vyevi vingaireile, Gidiyoni atoosikimizela ira Yohova utom’sakula. Vasogolovee atoogumani-a anyakhondwee ira amakhome khondo na Amidiyani.

Yohova atom’mwandela Gidiyoni ira: ‘Ndinodha akami-a Aisraeli ira taganyali vakhondwila. Mbwenye namwasa oi utokaana anyakhondo anjinji, unodha thuulela ira muganyalile nakopolo dhinyu. Uwandele uliothene unoova ira awelele.’ Ee-no anyakhondo 22.000 tatoowelela mbwenye ta-alele tali okwakwana 10.000. Yohova atoonga ira: ‘Anyakondo ala atoinjiva. Udhowe naaliwa i-njeni noawandela ira tamamwe ma-inje. Ee-no umasakhule enao anofuna mamwa ma-inje wu taing’ananga amwidaniwa.’ Anyakondo 300 baa-i mbenao tamwa ma-inje wu taing’ananga amwidaniwa. Yohova atoolanyedha ira anyakhondo oyevao, anodha gonji-a anyakhondo Amidiyani 135.000.

Nama-iyu, Yohova atom’mwandela Gidiyoni ira: ‘Va-eeni dhowa umakhome khondo na Amidiyani.’ Gidiyoni atoava-a anyakhondweao malipenga anyanga na mino milukulu thitho minonimo tatoo-elamo vyomoneyana. Liye atoawandela ira: ‘Muonechechenga vyevyo vinoira miyo ira nanyeene thitho muirengana vyevyo.’ Gidiyoni atooli-a lipengalee, nouthwa munulee, ee-no tatoothukula vyomoneyana noing’ani-a dhulu nokuwa ira: ‘khondo ya Yohova na ya Gidiyoni!’ Anyakhondo 300 ale tatooira vimbo-ive. Amidiyani tangavwide vyevyo tatooroma tawa. Namwasa ododomeya mathuulelo, aliwa tatooroma dhimbinuwelana okene. Veva Yohova atookami-a Aisraeli gonji-a amwidaniwa.