Vyalanyedhile Efita

Aisraeli tatoo-iya okoka lambela Yohova thitho tatooroma lambela milungu yonama. Vahora a Amoni vyaadhimbinuwele aliwa noroma komana khondo naaliwa, milungu yonamiyo chaakami-idhe. Aisraeli tatoorucheya wa vyawa vinjinji. Ee-no aliwa tatoom’mwandela Yohova ira: ‘Nitoudawelani pepani nivulumucheni wa amwidani-u.’ Adhamale, Aisraeli tatookhumi-amo mafwano othene noroma okoka lambela Yohova. Yohova kaafuna ira aliwa tarucheyengave.

Ee-no atwao tatom’sakula Efita ira aasogolelenga vodhowa khondoni. Efita atom’mwandela Yohova ira: ‘Mwadhowa manikami-a ganyali khondwila, ndinoulanyedhani ira ndinodha velela wanyo mutu uliwethene wavanyumbani vanga wenuo unarome dhandiwachela.’ Yohova atoowakuladi lobelo la Efita thitho Aisraeli tatooganyalidi vakhondwiyo.

Vahora Efita vyawelela liye waniwa, mutu oroma m’mwachela ali mwanee wa i-yana. Mbwenye liye ana mwana m’mbo-i baa-i. Mwaneula atoom’mwachela wu ainanga thitho aombanga kocho. N’nga Efita airilen’ni? Liye atoothuulela vyongo vyaongile liye thitho aongile ira: ‘Mwananga utondisukwali-a. Ndatoolanyedha wa Yohova thitho ira ndikwakwaneli-edhe yolanyedhayo, ndinofwanela uruma ira umalabenga sasani wa Yohova wu Silo.’ Mbwenye mwaneuo aongile ira: ‘Baba munofwanela irana vyevyo vilanyedhilenyo. Ndinouvepani ira mundirumeli-e ira ndidhowe mwangoni naafwanga wa medi mili. Ndamala ndinodhowa sasaniwo.’ Mwana Efita atoolaba mororomeleya waingumiyee yothene. Yawa iliyothene afwee tanoodhowa wu Silo mam’mona.