Yodawa ya Mwene Davide

Sauli angakwide, Davide atookala Mwene. Liye aromile tonga angana vyawa 30. Dambo n’nango angali vadhulu va nyumbee, atoom’mona i-yana obaleya angasakasakile atoofwanya ira i-yanuo ali Batiseba thitho ali mwadhi Uriya. Davide atom’mwitani-a i-yanuo nom’gonathinee. Angazindeyele ira i-yanuo utokaana wise, Davide atoosaka ndhila yoi yodawayee ya-aidhiweye. Liye atoowandela ndimuwa wa anyakhondo ira a-ele Uriya vasogolo nom-iya ira aphiwe. Vyevi vyatooireyadi thitho Davide atom’thela Batiseba.

Mbwenye Yohova anoona vyongo vyothene vyevi. N’nga airilen’ni? Liye atom’ruma Natani ira amatapanye na Davide vya mwasula. Natani angafiile wa Davide atom’mwandela ira: ‘Vatookala mutu mwinango ofuma wenuo ana mabila manjinji thitho vatookala mutu osauwa ana libila limbo-i baa-i. Mutu osauwo anoolidhiveliwana maningi libilaleelo. Ee-no mutu ofumule atom’mwakha mutu osauwa libilalee ira likale lee.’ Davide angavwide vyevi atoothakaleliwa maningi thitho atoonga ira: ‘Mutu wenuo unofwanela phiwa.’ Natani atom’mwandela Davide ira: ‘Mutu ofumuo ngunyo.’ Davide angazindiyenle vyathapulela Natani, Atoodhivwela tangaranga maningi. Ee-no atom’mwandela Natani ira: ‘Nditom’dawela Yohova.’ Yodawayeeyo yatoodhi-edha nyarwa Davide vambo-i na banjalee. Yohova atoom’langa Davide mbwenye kaam’pide namwasa oi atoodhiyevi-a thitho atoochinyuwa khumela vathi varima.

Davide anoofuna manga kachisi wa Yohova. Mbwenye Yohova am’sakunle mwanee Solomu ira ngunofuna manga kachisuo. Davide atooroma gumani-a vyongo vyoi Solomu a-indi-edhe basa vomanga kachisi. Liye aongile ira: ‘Kachisi wa Yohova unofwanela kala obaleya maningi. Voi Solomu ngu mwana, ndinom’kami-a fwanya mafwaramento omangana kachisula.’ Ee-no Davide atoovelela kobiri dhinjinji dhoi dhidhakami-e vabasa lomanga kachisi. Atoofwanya atu adodoliso nogumanyi-a oro na siliva n’njinji. Thitho atoogumanyi-a matabwa okumela wu Turo na wu Sidoni. Davide anga-adhi vang’ono wukwa, atom’mwandela Solomu moda munofuna dhakalela kachisi. Aongile ira: ‘Yohova atoondiwandela moda munofunawee mangela kachisuo khuove namwasa oi liye unoukami-a. Limba rima thitho urome laba basa.’