Umwene watoogaaneya

Vahora Solomu vyalambela liye Yohova, wu Israeli watookala rendele. Mbwenye vasogolovee Solomu atoothela a-iyana anjinji amaziza enango thitho a-iyanao tanoolambela mafwano. Vang’ono navang’ono naliyene thitho Solomu atoochinja noroma lambela mafwano. Yohova atoothakhaleliwa maningi na vyevi. Atom’mwandela Solomu ira: ‘Umwene wa Israeli unokumi-iwa mu banjalaa thitho unongaaneya muvikundu vinli. Ndinodha velela ikhundu ilukhulu ya umwenula wa namalabaa thitho banjalaa ndinodha liva-a ikhundu yoyeva.’

Yohova atooirana vyongo vinango vothonyi-edha ira vyevi vinodha ireyadi. Dambo n’nango, namalaba wa Solomu dhinalee Yerobowamu angali vaulendoni, atoogumanana namaongela Ahiya. Ahiya atoong’amba yowarayee mapedaso okwakwana 12. Adhaire ee-no atom’mwandela Yerobowamu ira: ‘Yohova unokumi-a umwenula wu banja la Solomu thitho unougawa vikhundu vinli. Tukhula mapedaso 10 ala namwasa oi weyo unodha kala mwene wa maziza 10.’ Mwene Solomu angavwide vyevi, anoofuna m’pha Yerobowamu. Ee-no Yerobowamu atootawela wu Iguputu. Vangavirile hora, Solomu atookwa thitho mwanee Rehobowamu atookala mwene. Vidhaireye ee-no Rerobowamu atoona ira unooda welela wu Israeli.

Andimuwa awu Israeli tatom’mwandela Rehobowamu ira: ‘Mwaatonganga pama atwala anokala ororomeleya wa nyo.’ Mbwenye azombwe afwee tam’mwandele ira: ‘Waatongenga atwala mwauwalanga thitho waava-enga mabasa orucha kwaranya enao aalabi-a babaa.’ Rehobowamu atoovwela malangi-o aazombwe afwee. Ee-no anoatonga atwao wauwalanga thitho atwao tatom’dhimbinuwela. Atwao tatom’sakula Yerobowamu ira akale mwene wa maziza 10, wenuo waidhiweya ira umwene wa Israeli. Maziza meli baa-i mbenao akanleve ororomeleya wa Rehobowamu thitho taidhiweya ira umwene wa Yuda. Veva pyoi maziza 12 Aisraeli tatoogaaneya.

Yerobowamu kaafuna ira atwee tadhowenga malambela wu Yerusalemu weo mwenee ali Rehobowamu. N’nga utoidhiwa mwasee? Yerobowamu aova ira atwao anooda m’dhimbinuwela nodhowa uikundu ya Rehobowamu. Ee-no atosaka-edha mafwano meli amwana ng’ombe noawandela atwao ira: ‘Mulambelenga uno namwasa oi wu Yerusalemu ndi udendai.’ Ee-no atwao tatooroma lambela ana ng’ombao thitho tatom’diwala Yohova.