Yohova atoom’levela rima Yona

Atu asidadi la Ninive tanooirana vyongo vyothakala. Ee-no Yohova atom’mwandela namaongelee Yona ira amaawandele ira ta-iye irana vyothalavyo. Mbwenye Yona atootawa nogwela Barku yodhowa wu Tarisi.

Tangali vaulendo, vabaravo vatooireya liphevo lakopolo voi mulimbo wendi-a Barkwiyo atoova maningi. Aliwa tatoolobela wa milungwiwa nofuka ira: ‘N’nga vyevi vinoireya namwasa wan’ni?’ Ee-no Yona atoawandela ira: ‘Atunyo udawile ngumiyo. Yohova atoondiruma ira ndiire vyongo vinangovyee ee-no ndinaatawa. Mundiponyedhe ma-injenimu thitho lipevoli linomiyala.’ Mulimbo wendi-a Barkuo kaafuna m’ponyedha ma-injeni. Mbwenye Yona atoawakanyi-edha ira tam’ponyedhe ma-injenimo. Ee-no tatooponyedhadi ma-injenimo thitho liphevolo latoomiyala.

Yona athuulela ira baa-i utomala wukwa. Vahora yabwina liye atooroma lobela wa Yohova. Ee-no Yohova atooruma somba dhowa mam’midha Yona. Thitho kaakwide. Mbwenye angali mbani mwasombiyo atoolobela ira: ‘Yohova ndinoulanyedhani ira ndinongo vwela yongo iliyothene inandiwandele nyo.’ Yona atookala mbani mwasomba malambo mararu, adhamale sombiyo yatoodhowa mam’raveya rundani.

Yona angavulumuwile, Yohova atoom’ruma okoka ira adhowe wu Ninive. Vahora yen’na Yona kaakondile. Angafiile weo atoawandela atu amakalelo othakalao ira: ‘U-adhi malambo 40 ira sidadi la Ninive linongiwe.’ Atu awu Ninive tangavwide milanywiyo, tatoochinjelatu no-iya irana vyongo vyothakala. Mwene atoawandela ira: ‘Dhoweni nilobeleni wa Nlungu thitho ni-iyeni irana vyothakala. Venango kaninonongiwa.’ Yohova angaoni ira atwao atochinyuwa kaanongile sidadilo.

Yona kaadedi-edhela vyevyo, ee-no atoothakaleliwa maningi. Kathuulelani, Yohova atoom’levela rima Yona thitho m’vwela tangaranga mbwenye Yona kaavwele tangaranga atu awu Ninive. Yona atookhuma sidadinimo nodhowa makala chindo mwa muri. Adhamale imuriyo yatouma thitho Yona atoothakaleliwa okoka. Ee-no Yohova atoom’fuka ira: ‘N’nga unodhivwela tangaranga namwasa waimurila baa-i mbwenye a-vwela tangaranga atu awu Ninive? Miyo nditowavwela tangaranga thitho kandaanongile.’ N’nga veva Yohova athapulelan’ni? Athapulela ira atu awu Ninive tali ofuneya maningi kwaranya imuri iliyothene.