Yesu atoogumanana alimbo pha Somba

Vangavirile hora khumela vevo Yesu vyagumanena liye arumiwee, Pedru atoothuulela vyodhowa maphanga somba barani ya Galileya. Tomaji, Yakobo na Juwau naaliwene thitho tatoodhowa. Aliwa tatoolaba basa ma-iyu othene, mbwenye kataphide somba naimbo-ine.

Undhe ungachide, tatoona mutu mwinango angaimenle khundu mwabara. Mutuo atoafuka ira: ‘N’nga mutopha somba? Aliwa tatoowakhula ira: ‘Khabe kaniphide.’ Ee-no atoawandela ira: ‘Ponyedhani mikokotinyu ikhundu ya dhandha lodyana.’ Tadhairena vyaongile liye tatoopha somba dhinjinji thitho tatooimwanana dhimburulela undhe. Hora yeniyene Juwau atoozindiyela ira mutuo ali Yesu thitho atoonga ira: ‘Ee Mbwiye!’ Pedru angavwide vyevi atooluphela mwiko noroma a-mbelela dhowanga rundani. Anamafunjedha enangwao tatoom’arela va mwadiyani.

Tangafiile rundani, tatoofwanya somba dhingali veko. Yesu atoawandela ira tam’va-emo somba dhinango ira awenjedhelena yodyayo. Ee-no atoawandela ira: ‘Dhani nidhadyeni yodya yanamaebe-i.’

Tangamadhi udya, Yesu atoom’fuka Pedru ira: ‘N’nga unondidhiveliwana kwaranya mabasa opha somba?’ Ee-no Pedru atoowakhula ira: ‘Ee mbwiyeni. Nyo thitho munoidhiwa vyevyo.’ Yesu atoonga ira: “Dyi-a a-ima amabilanga.” Ee-no atoofuka thitho ira: ‘Pedru unondidhiveliwana?’ Liye atoowakhula ira: ‘Mbwiye nyo thitho munoidhiwa ira miyo ndinoudhiveliwanani.’ Yesu atoonga ira: “Khumbiza a-ima amabilanga.” Ee-no atoom’fuka fendo yaneraru thitho atoodhivwela tangaranga nowakhula ira: ‘Mbwiye nyo munoidhiwa vyothene ira ndinoudhiveliwanani.’ Yesu atoonga thitho ira: “Dyi-a a-ima amabilanga.” Ee-no atoom’mwandela ira: “Dhowanave ndi-arela.”