Paulo atootumiziwa wu Roma

Ulendo waneraru wa Paulo wagomele wu Yerusalemu. Angafiile weo atoomangiwa. Ee-no nama-iyu atoona masopenya. Yesu atoom’mwandela ira: ‘Unodha dhowa wu Roma ira umalaleele weo.’ Paulo atootukhuliwa wu Yerusalemu nodhowa wu Kaisareya dhowa makala perezoni wa vyawa vinli. Vahora yatongiwa selwee na mulimbo tonga miselu mwinango dhinalee Festo, Paulo atoonga ira: ‘Selwangula ndinovepa ira umatongiwe wu Kaisareya.’ Moi ee-no Festo atoonga ira: ‘Weyo uvepile ira umatongiwe wu Kaisareya, unodhowadi.’ Vodhowa wu Roma, Paulo agwenle Barku vambo-i naabalee auzimu ambili, Luka na Arisitako.

Tangali vabaranivo vatookala lipevo lakopolo wamalambo manjinji. Mutu uliwethene athuulela ira kavali unofuna vulumuwa. Mbwenye Paulo atoonga ira atunyo ngelo utondiwandela dhela muvyoro-a ira: ‘Khuove Paulo, unamafiye wu Roma thitho uliwethene barkunimu kanokwa. Ee-no kamuove kavali unofuna wukwa.’

Liphevo lakhopololo latoodhowanave omba wa malambo 14. Ee-no tatooroma ona isuwa ya Melita. Mbwenye Barkulo latombiyela usevani moi latooroma thweya namwasa wamabimbi. Masiki ira vyali ee-no, atu othene talimwemo okwakwana 276 tatoofiya rundani. Enango tanoo-ambelela mbwenye enango ta-indi-edha basa mapedaso a Barkwiyo enao ambeluwa. Tangafiile, atu avaisuwanivo tatoawachela phama nowa-indi-edhela mulo ira taotenga.

Vangavirile medi miraru, anyakhondo enango tatoom’tukhula Paulo nom’dhowana wu Roma. Angafiile abali tatoodha dham’mona. Paulo angaaoni, atoom’simba Yohova thitho atoolimba rima. Angalive ira ali nyaperezo, anorumeli-iwa kala nyumba inango yalendi mbwenye anoing’aneliwa na anyakhondo. Liye atookala weo wavyawa vinli. Atu tadha dham’mona, anowalaleela Vyaumwene wa Nlungu thitho vya Yesu. Liye atoolemba thitho makarta odhowa wu Asiya minori nau Yudeya. Veva Yohova atoom’indi-edha basa Paulo ira Milanyu yapama ifiye waatu amaziza enango.