Masopenya a Juwau

Rumiwi Juwau vyali liye perezo vaisuwa ya patimo, Yesu atoom’moni-a masopenya okwakwana 16. Masopenyala tatoothonyi-edha vyafuna dhaireya ira dhina la Nlungu lidhacheni-iwe, Umwenee udhe thitho ira ifuneloyee iireye vailambo yavathi vano ninga mwemo muli aliwa dhulu.

Masopenya enango, Juwau atoom’mona Yohova angali dhulu vapandwee watitimi-o. Atoorungunuwiwa naandimuwa 24 owara vyowara vyochena thitho vichapowa vya oro. Juwau atoovwa ula ogudha thitho vatookala wala wa ndhari. Andimuwa 24 ale tatookokora nom’lambela Yohova. Masopenya enango Juwau atoona atu anijnji okumela maziza thitho na viongelo vyo-iyana-iyana tam’lambelanga Yohova. Mwana libila wenuo uli Yesu, anoasogolela uma-inje aingumi. Vingaireile ee-no atoona masopenya enango. Aoni Yesu angaromile tonga ninga Mwene wa dhulu na andimuwa, 24 ale. Masopenya enango Juwau am’moni Yesu awananga na nyowa ilukulu yeniyo ili Satana, thitho nyowiyo yali vambo-i na viwandavyee. Satana na viwandavyo vyatootamangi-iwa dhulu noponyedhiwa vailambo yavathi.

Vingaireile ee-no Juwau atoona masopenya amwana libila naatu okwakwana 144.000 tangaimeele vamwangoni wa Ziyoni. Atoona thitho ngelo aphurumuwanga dhuludhulu nowandelanga atu ira tam’movenga Nlungu thitho tam’va-enga titimi-o.

Juwau atoona thitho masopenya enango othonyi-edha khondo ya Arumagedo. Vakhondo yen’na, Yesu nagululee tatoom’gonji-a Satana na ilambo yothakalai. Vidhaireye ee-no Juwau atoona masopenya omari-a othonyi-edha rendele dhulu na vailambo yavathi. Atoona Yohova anganongile Satana na othene anom’arela thitho uliwethene dhulu na ilambo yavathi, tanoom’lambela Nlungu thitho lemeza dhinalee.