Azombwe naasikana—mudhowenave dhowa vasogolo mwauzimu mwamala badiziwa

1. N’nga ndi vyongo viivi vyapama vyevyo azombwe anjinji viodile aliwa irana romela walelene?

YAWA iliyothene Makristau anjinji aazombwe anobadiziwa. N’nga nyo mutomala badiziwa? Akala mutomala, muidhiwe ira abali naarongola thitho Yohova anosangalala namwasa wa vyevyo! (Sang. 27:11) Kathuulelani viodile nyo ira walelene ira mufiye va-eeni. Mukadhi mufunjedhanga Bibilya mwathindhi venango wavyawa vingaasi. Funjedhao utoukami-ani sikimiza ira Bibilya ndi Madhu a Nlungu. Kwaranya vyevyo, mutoidhiwa thitho roma mdhiveliwana mwinya bukhu lavakunduli. Namwasa omdhiveliwana maningi Yohova, mutofiya vodhivelela wa liye fiyedha badiziwa. Vyevi pyosangalali-a maningi!

2. N’nga ninofuna nitapanyen’ni muyofunjedha yei?

² Pyo-okaikeli-a ira iroromelo yinyu yanoowesedhiwa vahora ya dhilimbi-edha nyo ira mubadiziwe. Mbwenye vanaulukula nyo, munongo gumanana vyowesedhiwa vinango. Satana unongo dhilimbi-edha ira mu-iye mdhiveliwana Yohova thitho ira mu-iye mlabela. (Aef. 4:14) Kamurumeli-e ira vyevi viuwireeleni. N’nga chini inaukami-e ira mudhowenave kala ororomeleya wa Yohova, nokwakwaneli-edhanga vyolanyedha vyamlanyedhile nyo vodhivelela wa liye? Mudhowenave kaana “thindhi” nodhowa vasogolo ira mukaleve Kristau olimba mwauzimu. (Aeb. 6:1) N’nga munaire a-vi vyevi?

N’NGA MUNAIRE A-VI IRA MUDHOWENAVE DHOWA VASOGOLO?

3. N’nga Makristau othene tanofwanela iran’ni tamala badiziwa?

³ I-yo othene na badiziwa ninofwanela a-rela malangi-o avelenle rumiwi Paulo wa Makristau au Efeso. Liye atowalimbi-a ira takale “andimuwa” mwauzimu. (Aef. 4:13) Vyali ninga unaawandela ira dhowananive dhowa vasogolo. Ninovivwa pama vyathapulela Paulo vevo vyafwanafwani-edha liye ulukula mwauzimu na vinaireya mwana aulukulanga. Anamabala anogaela tabala mwaniwa, mbwenye kaira mwanuo unongokalave mthethe aulukulanga kabe. Vira wahora unoulula venango “i-yachi vyau-ima.” (1 Akor. 13:11) Ndi mwemo thitho vinokalela na i-yo Makistau. Nabadiziwa ninofwanela dhowanave ulukula mwauzimu. Va-eeni dhoweni nioneni makundo enango ananikami-e.

4. N’nga tikalelo liivi lelo linaukami-eni ira mudhowenave dhowa vasogolo mwauzimu? Muongemo. (Afilipi 1:9)

⁴ Mumdiveliwengana maningi Yohova. Thitho va-eeni muromile mdhiveliwana walelene Yohova. Mbwenye munooda wenjedhela udhivelinyu. Moi a-vi? Rumiwi Paulo atoonga ndhila imbo-i yoirela vyevi valemba la Afilipi 1:9. (Muleri.)Paulo atolobela ira udhivela wa Makristau au Filipi “udhowenave ulukula.” Ee-no ninooda ulukuli-a udhiveli-u wa Yohova. Ninoira vyevi nadhowanganave “idhiwa vyongo mwapama thitho zindiyela vyongo vyapama maningi.” Nam’mwidhiwanga pama Yohova, paevo vanoroma i-yo mdhiveliwana maningi thitho simbanga makalelwee namwemo munoirela liye vyongo. Ninokala ofunechecha msangalali-a narambelanga vilivyothene vinamsukwali-e. Ninodhilimbi-edha zindiyela ifuneloyee thitho mwemo munairele i-yo vyongo movwelana na ifuneloyee.

5-6. N’nga chini inanikami-e ira nimdhiveliwengana maningi Yohova? Muongemo.

⁵ Ninoroma mdhiveliwana maningi Yohova nam’mwidhiwa pama Mwanee wenuo athonyi-edhe paama makalelo Ababee. (Aeb. 1:3) Ndhila yapama yeniyo inam’mwidhiwelena i-yo Yesu, ndi funjedha mabukhu 4 amilanyu yapama. Akala kamuna ilemeelo yoleri Bibilya dambo lililothene, munoona a-vi roma ee-ni? Mwaleringa myasa yokuza Yesu, muthuulelenga maningi makalelwee. Liye ali olemeeleya moi hora dhinango anootukulecha a-ima mandhanimwee. (Marku 10:13-16) Liye anooiri-a anamafunjedhee kala othathuwa moi liye anoawaredhana, aliwa kataova m’mwandela mwemo mwavwela aliwa. (Mat. 16:22) Voira vyevi, Yesu asazi-edha Babee wadhulu. Yohova na liyene ngofiyedheya. Ninooda lobela wa liye thitho na lobelanga ninooda m’mwandela vyotheene vyarimani mwi-u. Nili osikimiza ira kananitonge namwasa wa vyevyo. Liye unonidhiveliwana thitho unonikumbanyedha.—1 Pe. 5:7.

⁶ Yesu anovwela tangaranga atu. Rumiwi Mateu atolemba ira: “Voona mwinji waatu liye atoavwela tangaranga, namwasa oi tali onyozeya na odimela ninga mabila o-okaana namakumbiza.” (Mat. 9:36) N’nga liye Yohova avivwa a-vi? Yesu aongile ira: “Babanga wadhulu kanafuna ira m’mbo-i mwaa-imala anongeye.” (Mat. 18:14) Vyevyi pyolimbi-a maningi! Ee-no nam’mwidhiwa pama Yesu, ninoroma mdhiveliwana maningi Yohova.

7. N’nga waredha na Makristau olimba mwauzimu unaukami-eni a-vi?

⁷ Munooda funjedha mwemo munaulukuli-edhe nyo udhivela thitho dhowa vasogolo mwawaredhanga naabali naarongola owarala mwauzimu apingonimwinyu. Muonenga mwemo munasangalalela aliwa. Aliwa katinonong’onedha libondo namwasa osakula mlabela Yohova. Mwaavepenga ira tauwandeleni vikanle vyaireelanga vaurumiwiwa. Mwafunaga sakula vyoira va mwasa unango ofuneya, mwaavepenga ira tauva-eni malangi-o. Muthuulele ira “vakala anamalangi-a oinjiva atu anovulumuwa.”—Sang. 11:14.

8. N’nga munaire a-vi akala hora dhinango munokaikela vinoonga Bibilya?

⁸ Kamukaikelenga vyevyo vinaroromela nyo. Ninga mwemo muonele i-yo ndima yanambili, Satana unowesedha ira auimwanani-eni dhowa vasogolo mwauzimu. Ndhila inango yeyo inoirela vyevyo ndi uiri-ani ira mukaikelenga vyongo vinango vyevyo Bibilya vinafunji-a aliwa. Mwaifwanafwani-edho venango munooda uvwa makundo o-olemeza Nlungu oonga ira vyongo vyate chinja kumela uvyongo vinango. Vinooneya ira mwangali mwana mwali mwa-anathuulelevo myasa yen’na. Mbwenye vanaulukula nyo, mutoroma funja vyevi xikola. Vyevyo vinoonga mapurusorinyu volimbi-a makundwala vinooneya ninga pyaimbarimbari. Vinooneya ira aliwa katisakasakile ira tafwanye umboni osikimizela ira utokala Namapanducha. Muthuulele ira likundo linofwanyeya va Sanganikho 18:17 linoonga ira: “Oroma onga ikunduyee vaseluni unooneya ninga ngwapama, mbwenye fwee adha onga ikunduyeee thitho anoisakasaka.” Malo mororomela iliyothene ivwide nyo xikolani musakesakenga thitho mwaongile makundo aimbarimbari amalembani a M’madhu a Nlungu. Musakasakenga thitho mumabukwi-u. Muwaredhenga naabali naarongola enao voroma karoromelela ira vyongo vyate chinja. Mwaafukenga ira tauwandeleni vyairi-idhe roma roromelela ira utokala Namapanducha wenuo unonidhiveliwana. Irana vyevi unonikami-a ira nithuulelenga umboni oi utokala Namapanducha.

9. N’nga munafunjedhavon’ni vaifwanafwani-o ya Melissa?

⁹ Rongola mwinango unoitaniwa Melissa atoganyali maningi namwasa osakasaka mwasa oonga panduchiwa wa vyongo.b Liye aongile ira: “Xikolani mwasa oi vyongo vyate chinja unoongiwecha mundhila yoi uoneenga ninga pyaimbarimbari. Voroma, kandafuna sakasaka mwasula namwasa oi ndanoova ira venango ndinofwanya ira mwasa oi vyongo vyate chinja pyaimbarimbari. Mbwenye ndatoroma thuulela ira Yohova kanofuna ira niroromelenga vyongo vyevyo vya-ana umboni. Ee-no ndatoroma sakasaka vya mwasula. Ndanoleri bukhu loi, Is There a Creator Who Cares About You? Thitho bukhu loonga ira, Kodi Zamoyo Zinachita Kulengedwa? Na loonga ira, Mmene Moyo Unayambira—Mafunso 5 ofunika Kwambiri. Mabukhu enala mbenao afuneela miyodi thitho ndanofunechecha ndangaalerile walelene.”

10-11. N’nga chini inaukami-eni ira mudhowenave kaana makalelo apama? (1 Atezalonika 4:3, 4)

¹⁰ Murambelenga makalelo othakala. Hora inoulukula azombwe naluveluve ogonana unokala wakopolo maningi. Thitho hora dhinango atu enango anooda akanyi-edha ira kaire vyongo vyamararuo. Satana unofuna ira muirenga vinofunanyo. N’nga chini inaukami-eni ira murambelenga ira makalelo othakala? (Muleri 1 Atezalonika 4:3, 4.) Mwalobelanga mum’mwandelenga Yohova mwemo munavwelanyo Thitho mumvepenga ira auva-eni kopolo. (Mat. 6:13) Muthuulelenga ira Yohova unofuna ira aukami-eni, a-kala utongani. (Sal. 103:13, 14) Thitho Madhu a Nlungu anooda ukami-ani. Melissa, umongile i-yule anorucheya namathuulelo ofuna ira vyothakala. Liye aongile ira: “Leri Bibilya dambo lothene watondikami-a ira nda-agonje. Watondikami-a thuulela ira ndili wa Yohova thitho ndinofuna mlabela.”—Sal. 119:9.

¹¹ Kamuwesedhenga limbanana nyarwa dhinyu vamweka. Muwandelenga anamabalinyu vyevyo vinolimbanana nyo. Pyaimbarimbari ira tapanya mwasa ninga wen’na, kai okweya mbwenye ngofuneya maningi. Melissa aongile ira: “Ndatomvepa Yohova ira andikami-e limba rima thitho ndatom’mwandela babanga vya nyarwa dhanga. Ndangairile vyevi ndatoroma dhivwa pama rimanimwanga namwasa oi ndanoidhiwa ira Yohova unosangalala na miyo.”

12. N’nga munaire a-vi ira musakulenga vyoira mwazelu?

¹² Musogoleliwenga namakundo a Bibilyani. Mwaulukulanga mwavang’ono navang’ono, anamabalinyu anodha roma uva-ani ufulu osakula vyoira. Mbwenye muidhiwe ira kamunafiye tunga loidhiwa vyongo vinjinji. N’nga munaire a-vi ira mwa-aire vyongo vyevyo vinadhodhomi-e uxamwalinyu na Yohova? (Sang. 22:3) Rongola unango dhinalee Keri, atoonga vyamkami-idhe ira asakulenga vyoira mwazelu. Liye atozindiyela ira Kristau owarala mwauzimu, kanafuneela malamulo vamwasa uliwethene. Liye aongile ira: “Ndanofuneela vwecheha makundo a Bibilyani malo moira idhiwa malamulo.” Mwaleringa Bibilya, mudhifukenga ira: ‘N’nga vinoleri miyovi vinondiwandelan’ni vyokuza mathuulelo a Yohova? N’nga ndinofwanyamo makundo aavi enao anandikami-e ira vyongo vyofwanelela? N’nga ndinaganyali a-vi nda-indi-edhanga basa makudwao?’ (Sal. 19:7; Esaya 48:17, 18) Mwaleringa Bibilya thitho thuulela mopwasedha makundwee, vinodha kala vyo-orucha ira musakulenga vyongo vyevyo vinamdhiveliwi-e Yohova. Vanodhowanave nyo dhowa vasogolo munodha ona ira kamunofuneela malamulo valikundo lililothene, namwasa oi munodha vwechecha mwemo Yohova munothuulela liye va myasa yo-iyana-iyana.

13. N’nga afwinyu apama anaukami-eni a-vi? (Sanganikho 13:20)

¹³ Musakulenga afwinyu anomdhiveliwana Yohova. Ninga muongele i-yo walelene, sakula afwinyu apama unoukami-ani ira mukale Kristau olimba mwauzimu. (Muleri Sanganikho 13:20.) Vahora inango rongola unango dhinalee Sara kaasangalala. Mbwenye vatoireya vyongo vyam’mwiri-idhe ira arome kala osangala. Sara aongile ira: “Ndatofwanya afwanga apama vahora yofwanelela. Miyo na rongola unango wasikana nanogumana sumana lililothene ira nifunjedhe Nsanja ya Namaing’anela. Fwanga unango thitho atondikami-a ira ndirome wakula vamigumanoni. Namwasa okami-iwa naafwangala, ndatoroma ona ira funja vameka thitho lobela kofuneya maningi. Vyevi vyatondikami-a ira ndikale vauxamwali olimba na Yohova thitho ndatoroma kala osangalala.”

14. N’nga Juluen airilen’ni ira afwanye afwee apama?

¹⁴ N’nga ninafwanye a-vi afwi-u enao ananikami-e? Julien wenuo uli ndimuwa wavapingoni aongile ira: “Ndingali mwana, ndanofwanya afwanga apama thitho nanolaba basa lolaleela. Afwangala tali athindhi, thitho tatondikami-a ona ira mutu unongosangalalave na urumiwi. Ee-no ndatoroma kaana ifunelo yofuna ira urumiwi wahora dhothene. Ndatozindiyela thitho ira ndanotatila ngari yokala naafwanga apama namwasa ofunanga kaana afwanga atungalanga baa-i. Vangavirile hora ndatokaana thitho afwanga apama ava Beteli. Ifwanafwani-edho yiwa yatondikami-a ira ndisakulenga paama vyosangalali-a vyevyo vyairi-idhe ira ndikale vauxamwali wapama na Yohova.”

15. N’nga paulo am’mwenjeli-idhe n’ni Timoteo va mwasa waatu owaredhana? (2 Timoteo 2:20-22)

¹⁵ N’nga a-vi akala mutozindiyela ira mutu unango pingoni kai ofwanelela m’mwaredhana? Paulo anoidhiwa ira atu enango amupingoni wa Ukristau oroma, katadhiveliwana vyongo vyauzimu. Ee-no atom’mwenjeli-a Timoteo ira aarambenga. (Muleri 2 Timoteo 2:20-22.) Ninoona ira uxamwali-u na Babi-u Yohova ndi wapereso yavadhulu. Ee-no kaninofwanelela rumela ira mutu uliwethene anidhodhomi-e vauxamwalula wenuo ukanle i-yo niudedi-edhanga mwathindhi ira niukaena.—Sal. 26:4.

N’NGA KAANA VIFUNELO UNAUKAMI-ENI A-VI IRA MUDHOWE VASOGOLO MWAUZIMU?

16. N’nga munakaena vifunelo viivi?

¹⁶ Mukaengana vifunelo vyokami-a. Musakenga vifunelo vinalimbi-e iroromelo yinyu thitho ukami-ani ira mukale Kristau olimba mwauzimu. (Aef. 3:16) Mwaifwanafwani-o, munooda sakula ira mudyenga vamwekene thitho leri Bibilya hora dhothene. (Sal. 1:2, 3) Venango munooda lobelanga vaduziduzi thitho kumela vathi varima. Venango munodha ona ira munofuneela dhikondi-a vamwasa osakula vyosangalali-a thitho moda muna-indi-edha nyo basa horinyu. (Aef. 5:15, 16) Yohova unodha sangalala aona ira munaadhilimbi-edha dhowa vasogolo.

17. N’nga kami-a atu enango unaukami-eni a-vi?

¹⁷ Munokala Kristau olimba mwauzimu mwakami-anga atu enango. Yesu aongile ira: “Va-a unodhi-a imwerumweru yoinjiva kwaranya wachela.” (Mayir. 20:35) Munodha ganyali maningi mwa-indi-edhanga basa hora na kopolodhinyu vokami-a atu enango. Mwaifwanafwani-o, munokaana vifunelo vyoi mukami-enga atu oulula thitho obulela apingoni mwinyu. Venango munooda agulela vyongo venango akami-a mwemo muna-indi-edhe aliwa basa vyongo vyachineneeva. Akala muli bali, munooda kaana ifunelo yoi mukale rumiwi okami-a, ira mulabelenga abali naarongolinyu. (Afil. 2:4) Munooda thonyi-edha ira munodhiveliwana atu enao ta-ali pingoni voalaleela milanyu yapama ya Umwene. (Mat. 9:36, 37) Akala pyoodeya, munooda dhi-elela vifunelo ira muire urumiwi unango wahora dhothene.

18. N’nga ira urumiwi wahora dhothene unaukami-eni a-vi ira muulukule mwauzimu?

¹⁸ Ira urumiwi wahora dhothene unoukami-ani ira mudhowe vasogolo mwauzimu. Upainiya unoudhulelani ngari yovolowana xikola ya Makristau olaleela vya Umwene. Munooda thitho malaba va Beteli venango labanao mabasa avyomangamanga. Painiya unango dhinalee Kaitlyn aongile ira: “Ndangabadiziwile wene novolowa muurumiwini naabali naarongola oidhiwa vyongo vinjinji watondikami-a maningi ira ndiulukule mwauzimu. Ifwanafwani-edho yiwa yatondikami-a ira ndiidhiwe makundo manjinji a Bibilyani thitho wenjedhela dodoliso langa lofunji-a.”

19. N’nga munodha fwanya maraeli-o aavi mwadhowanave dhowa vasogolo mwauzimu?

¹⁹ Vevo vanodhowanavenyo dhowa vasogolo mwauzimu, munodha fwanya maraeli-o oinjiva. Munodha rambela i-ndi-edha basa kopolo dhinyu voira vyongo vyo-okami-a. (1 Ju. 2:17) Munodha rambela thitho vyo-arela vyopa vinodha namwasa osakula vyongo vyodaweya. Malomwee vyongo vinodha uwendelani paama thitho munodhakaana imwerumweru yaimbarimbari. (Sang. 16:3) Ifwanafwani-edho yinyu yapama inodha limbi-a Makristau afwinyu, aazombwe naandimuwene. (1 Timo. 4:12) Thitho yofuneya choi munodhakaana rendele thitho ingumi yokwakwanana vinanyo, inodha namwasa oi Yohova unosangalala na nyo thitho muli vauxamwali olimba na liye.—Sang. 23:15, 16.