N’nga ninaire a-vi ira niroromelenga maningi yolanyedha ya Yohova ya ilambo ipya?

1-2. N’nga vanodedi-edha i-yo ilambo ipya, ninofwanela irangan’ni?

NINOMSIMBA maningi Yohova namwasa wa yolanyedha yoonga ira unodha kumi-avo ilambo yothakalai nodhi-a ilambo ipya. (2 Pe. 3:13) Angalive ira kaninoidhiwa dambo linofuna liye dhana ilambo ipya, umboni othonyi-edha ira kavanovira hora injinji ira lifiye, utokalavo.—Mat. 24:32-34, 36; Mayir. 1:7.

² Mo-obala hora ikadhi i-yo imbarimbarini, i-yo othene ninofwanela roromela yolanyedha yei. Mwasiwa ngwan’ni? Mwasiwa ngoi masiki iroromelo yi-u ikale yolimba inooda fooka. Thitho rumiwi Paulo atoonga ira a-kaana iroromelo “ndi yodawa inanigwi-e mo-orucha.” (Aeb. 12:1) Ira iroromelo yi-u ya-afooke, hora dhothene ninofwanela thuulelanga maningi umboni othonyi-edhanga ira ilambo ipya ili vaduzi.—Aeb. 11:1.

3. N’nga ninofuna nitapanyenin’ni muyofunjedha yei?

³ Muyofunjedha yei, ninotapanyani ndhila dhiraru dhinanikami-e ira niroromelenga maningi yolanyedha ya Yohova yoonga ilambo ipya dhedho dhili: (1) thuulela modi-a vyoonga kuto, (2) thuulela kopolo dha Yohova thitho (3) iranga vyongo vyokuza lambela. Namala ninotapanyani mwemo milanyu yodhowa wa Abakuku munanikami-edhe aliwa limbi-a iroromelo yi-u malamboano. Yoroma, dhoweni nioneni vinango mwa vyevyo vinaireye vaingumi yi-u malamboano, vinaniiri-e ira nikaena iroromelo yolimba va yolanyedha ya ilambo ipya.

VYOIREYA VYOFUNEYA KAANA IROROMELO YOLIMBA

4. N’nga pyosakula viivi vyevyo vinofuna iroromelo yolimba?

⁴ Dambo nlilothene ninofuneela kaana iroromelo yolimba ira nisakule vyongo vamyasa yo-iyana-iyana ninga mafunji-edho, vyosangalali-a, atu owaredhana, banja, a-ima thitho basa. Vinokala pama vifuka ira: ‘N’nga vyongo vinosakula miyo vinothonyi-edha ira kandinokaikela ira ilambo yothakalai njo-odimbela, thitho vachineneeva inodha volowiwa malo na ilambo ipya ya Nlungu? N’nga ndinosakula vyongo molandana naatu anoona ira wukwa ndi komoni wa vyongo vyothene?’ (Mat. 6:19, 20; Luka 12:16-21) Ninongo ooda sakula vyongo mwazelu akala ninororomela ira ilambo ipya ili vaduzi maningi.

5-6. Mwasiwa ngwan’ni ninofuneela kaana iroromelo yolimba nagumanangana nyarwa? Muonge ifwanafwani-o.

⁵ Ninofuneela kaana iroromelo yolimba nagumanangana vyowesedha. Ninooda oni-iwa nyarwa, bulela marenda malukulu venango gumanana vyongo vinanifooki-e. Venango voroma vene ninooda onanga ira ninovilela nyarwa dhi-udho. Mbwenye hora dhinjinji vyowesedha vinotukula hora indendai, ee-no ninooda funeela iroromelo yolimba ira nivilele thitho nidhowenave mlabela Yohova mosangalala.—Aroma 12:12; 1 Pe. 1:6, 7.

⁶ Vanogumanana i-yo vyowesedha venango ninooda roma ona ira ilambo ipya ya Yohova kinodha dhave. N’nga vyevi vinothapulela ira iroromelo yi-u chofooka? Kabe kai maningi. Kathuulelani ifwanfwani-oyi: Akala muli muhora yodidila maningi venango munoroma ona ira hora yoka-a kinofiya tai. Mbwenye vasogolovee hora yoka-iyo inodhecha. Mofwanafwana na vyevi, akala iroromelo yi-u itofooka maningi, venango ninooda roma ona ira ilambo ipya kinodha dhave. Mbwenye akala ira iroromelo yi-u cholimba ninoidhiwa ira vyolanyedha vya Nlungu vinodha kwakwaneli-edhiwa. (Sal. 94:3, 14, 15; Aeb. 6:17-19) Iroromelwiyo inooda nikami-a ira nidhowenave e-la lambela Yohova valimburo loroma vaingumi yi-u.

7. N’nga ninofwanela ira polepole na mathuulelo avi?

⁷ Ninofuneela kaana iroromelo yolimba ira nilabenga basa li-u lolaleela. Anjinji mwaatu anoalaleela i-yo, anooda onga ira, “milanyu yapama “ yoonga ilambo ipya ya Nlungu, ndi vyongo vyoi kavinaodeye ireya venango ira kai vyaimbarimbari. (Mat. 24:14; Zakiy. 33:32) Kaninofwanela landela mathuulelo okaikela. Ninofwanela dhowanave limbi-a iroromelo yi-u. Dhoweni nioneni ndhila dhiraru dhinairelena i-yo vyevi.

NITHUULELENGA MODI-A VYOONGA KUTO

8-9. N’nga thuulela modi-a yoombolana unalimbi-e a-vi iroromelwi-u?

⁸ Ndhila imbo-i inalimbi-edhelena i-yo iroromelwi-u, kuthuulela modi-a vyoonga kuto. Kuto unonisikimizeli-a ira vyolanyedha vya Nlungu vinodha kwakwaneli-edhiwa. Nathuulelanga mwapolepole vyairi-idhe ira kuto uode veleliwa thitho thangani-avo vyongo vinango, ninoroma roromela maningi yolanyedha ya Nlungu yoi ninodha kaana ingumi yo-omala muilambo yapama vidha kwakwaneli-edhiwa. Mwasiwa ngwan’ni ninoonga e-no?

⁹ N’nga vafuneelan’ni ira yoombolana iode veleliwa? Yohova atomtumiza Mwanee odhiveliwiwa oroma baliwa thitho fwee wavarima ira adhabaliwe ninga mutu olongomana vailamboi. Angali vailamboi Yesu atoovilela nyarwa dho-iyana i-yana. Vasogolovee atookwa mooni-iwa nyarwa. Veva Yohova atoopagali pereso yavadhulu maningi. Nlungwi-u waudhivela kaarumeli-e ira Mwanee arucheye nokwa ira nikaena ingumi yapama mbwenye ingali yokwivela. (Ju. 3:16; 1 Pe. 1:18, 19) Namwasa oi atoovelela pereso yavadhulu ee-ni Yohova unodha onechecha ira nidhakaena imgumi yo-omala muilambo ipya.

MUTHUULELENGA KOPOLO DHA YOHOVA

10. Movwelana na lemba la Aefeso 3:20, n’nga Yohova unodha iranan’ni?

¹⁰ Ndhila yanambili inalimbi-edhena i-yo iroromelwi-u, ndi thuulela modi-a kopolo dha Yohova. Liye utokaana kopolo dhokwakwaneli-edha iliyothene ilanyedhile liye. Pyaimbarimbari ira waatu yolanyedha yoonga vya ingumi yo-omala muilambo ipya, inooda oneya ninga pyoodeya. Mbwenye hora dhinjinji Yohova unolanyedha vyongo vyoi atu katinaviode irana. Liye ndi Nlungu wa kopolo dhothene. (Yobo 42:2; Marku 10:27) N’nga kaninadedi-edhenga ira alanyedhe vyongo vyodabwi-a?—Muleri Aefeso 3:20.

11. Muonge ifwanafwani-i imbo-i ya vyolanyedha vyodabwi-a vya Nlungu. (Muone kwadru loi, “Vinango mwa vyolanyedha vyodabwi-a vyevyo vyakwakwaneli-edhiwe.”)

¹¹ Kathuulelani vinango mwavyongo vyooneya ninga vyo-odeya, vya lanyedhile Yohova waatwee ndulimu. Liye atomsikimizeli-edha Abrahamu na Sara ira tanodha kaana mwana angalive ira tali tangamadhi ulula. (Maro. 17:15-17) Atom’mwandela thitho Abrahamu ira a-imee tanodha va-iwa ilambo ya Akanani. Muvyawa vinjinji vyevyo a-ima a Abrahamu na Aisraeli vyali aliwa udhaari Uiguputo, vyaoneya ira yolanyedhai kinodha kwakwaneli-edhiwa. Vangavirile vyawa vinjinji, Yohova atoonga ira Elizabeti wenuo ali oulula, angakaena mwana. Atom’mwandela thitho Mariya wenuo ali namwali ira unodha bala mwana wa lombwana. Yohova ali angamadhi lanyedha udha wa Mwaneula wa vyawa mamiliau ndulimu mundani mwa Edeni thitho vyolanyedha vyevyi vyatookwakwaneli-edhiwa!—Maro. 3:15.

12. N’nga lemba la Yoswa 23:14; Esaya 55:10, 11 linonisikimizeli-a vyoi a-vi vyoonga kopolo dha Yohova?

¹² Nathuulelanga vyairile Yohova ndulimu volanyedha thitho kwakwaneli-edha vyolanyedhavyo, ninororomela maningi ira utokaana kopolo dhodhi-a ilambo ipya. (Muleri Yoswa 23:14; Esaya 55:10, 11.) Vyevi vinonikami-a ira niodenga kami-a atu enango ira yolanyedha ya ilambo ipya, kai vyoro-a baa-i. Voonga vya ilambo ya dhulu ipya na ilambo yavathi ipya, Yohova atoonga ira: “Madhwala mbonyindeleya na aimbarimbari.”—Apok. 21:1, 5.

MUKALENGA OPINGEYA NA VYONGO VYOKUZA LAMBELA

13. N’nga migumano yapingo inalimbi-e a-vi iroromelo yi-u? Muongemo.

¹³ Yongo yanerau inanikami-e limbi-a iroromelo yi-u, ndi irana vyongo vyokuza lambela. Mofwanfwani-a, kathuulelani mwemo migumano yapingo munonikami-edhela aliwa. Ana, wenuo ukadhi airanga urumiwi wa hora dhothene mwandhila dho-iyana-iyana, atoonga ira: “Migumano inondikami-a kaana iroromelo yolimba. Masiki ira mulimbo iri-a mwasa a-akaena dodoliso lofunji-a venango a-aonge likundo n’nango lipya, hora dhinjinji vanokalecha yongo inangoyee inondikami-a vwechecha likundo n’nango la imbarimbari thitho vyevi vinolimbi-a iroromelo yanga.”b Pyo-okaikeli-a ira ninosimba vyowakula vyolimbi-a iroromelo vya abali naarongola.—Aroma 1:11, 12; 10:17.

14. N’nga laba basa lolaleela unolimbi-a a-vi iroromelwi-u?

¹⁴ Thitho ninolimbi-a iroromelwi-u na labanga basa lolaleela. (Aeb. 10:23) Barbara wenuo ukadhi amlabelanga Yohova wa vyawa vyokwaranya 70 aongile ira: “Hora dhothene ndinoona ira laba basa lolaleela unondikami-a limbi-a iroromelo yanga. Ndawandelanga atu enango vyolanyedha vyosangalali-a vya Yohova, paevo iroromelwanga vanolimba aliwa maningi.”

15. N’nga funjedha wa vaokene unalimbi-e a-vi iroromelwi-u? (Muone thitho iruthiruthi.)

¹⁵ Vatokala yongo inango yokuza lambela yeyo inalimbi-e iroromelwi-u. Funjedha wa vaokene. Susan unoona ira kaana thandha ofunjedha kokami-a maningi. Liye atoonga ira: “Dimingu ndinokozeelecha yofunjedha ya Nsanja ya namaing’anela ya sumana lo-arela. Chiposi na Chipili ndinokozeelecha migumano ya vari va sumana. Va malambo o-alao ndinosakasakecha myasa inangwee yeniyo isakunle miyo.” Voi hora dhothene uno-arelecha thandhee ofunjedha, Susan unodhowanave limbi-a iroromeloyee. Irene wenuo ukadhi alabanga usede li-u wa vyawa vinjinji, unoona ira funjedha maulosi a Bibilyani unolimbi-a iroromelwee. Liye atoonga ira: “Vinondiiri-a chidwi ona ira masiki vikunduc ving’ono ving’ono vyokuza maulosi a Yohova, vinokwakwaneli-edhiwa.”

“ANODHA KWAKWANELI-EDHIWADI”

16. N’nga Yohova vyam’mwandenle liye Abakuku vinonilimbi-a a-vi malamboano? (Aebere 10:36, 37)

¹⁶ Anamalaba enango a Yohova takadhi tadedi-edhanga komoni wa malambo omari-ala wahora yolapela. Waatu yolanyedha ya Nlunguyi inooda oneya ninga inaadimbela maningi kwakwaneli-edhiwa. Yohova unoidhiwa mwemo atu anolambela munovwela aliwa. Thitho atomsimikizela Abakuku ira: “Wiirena vyevi neri-a masopenyao anodedi-edhela horee yo-eliwa thitho anotamangela komoni. Vili masopenyanimu kai vyonama. Masiki ira masopenyala tadimbele, waadedi-edhengave neri-a anodhakwakwaneli-edhiwadi. Katinodha dimbela!” (Habak. 2:3) N’nga aongile madhwala vofuna mlimbi-a Abakuku baa-i? N’nga anooda nilimbi-a thitho i-yo malamboano? Movudheleliwa rumiwi Paulo atoawandela madhu mambo-ive enala Makristau anodedi-edhela ilambo ipya. (Muleri Aebere 10:36, 37.) Masiki yolanyedha ya Nlungu yoonga ira unodha nivulumucha ioneyenga ninga inaadembuwa, “kaninakaikele inodha kwakwaneli-edhiwadi thitho kinodha dimbela!”

17. N’nga rongola unango uno-indi-edha a-vi basa malangi-o enao Yohova amva-idhe liye Abakuku?

¹⁷ Wa vyawa vinjinji anamalaba a Yohova takadhi ta-arelanga malangi-oee oi, “udedi-edhengave.” Mofwanafwani-a, rongola Louise uromile mlabela Yohova muyawa ya 1939. Liye atoonga ira: “Va horiyo ndathuulela ira Armagedo unofiya nda-anamari-e xikola. Mbwenye vyevi kavyaireile. Wa vyawa vyothene vyevi, nditoona ira yongo inondikami-a maningi kuleri myasa dhinoromola miyo ira atu ‘tadedi-edhele’ ninga mwasa wa Nowa, Abrahamu, Yosefe, naatu anjinji enao tafuneela dedi-edhela wa hora yolapela ta-anawachele vyongo vyadedi-edhela aliwa. Dhowanave dedi-edhela, utondikami-a miyo thitho atu enango ira na-akaikelenga navang’onovene ira ilambo ipya ili vaduzi.” Atu anjinji enao tamlabele Yohova wa hora yolapela tanooda rumelela vyevi.

18. N’nga kaana chidwi na vyopanduchiwa unanikami-e a-vi ira niroromelenga maningi vya ilambo ipya inodiyo?

¹⁸ Pyaimbarimbari ira ilambo ipya kinafiye. Mbwenye kathuulelani vyongo vinoona i-yo ninga nyenyedi, vimwiri, vinyama thitho atu afwinyu. Kavali unakaikele ira vyongovi ndi vyaimbarimbari angalive ira va hora inango kavyalio. Vyongovi vitokalavo namwasa oi Yohova nguvipanduchile. (Maro. 1:1, 26, 27) Thitho Nlungwi-u unofuna weli-edha ilambo ipya. Liye unodha kwakwaneli-edha vifunelo vyee. Muilambo ipya atu tanodha sangalala na ingumi yo-omala tangana manungo apama. Vahoree Nlungu unodha niva-a ilambo ipya thitho molandana na vyopanduchiwa vinoona i-yovi, ilambwiyo inodha kala yaimbarimbari.—Esaya 65:17; Apok. 21:3, 4.

19. N’nga munalimbi-e a-vi iroromelwinyu?

¹⁹ Va-eeni muirenga iliyothene inaode nyo ira mulimbi-e iroromelwinyu. Musimbenga maningi yoombolana. Muthuulelenga kopolo dha Yohova. Mukalenga opingeya na vyongo vyokuza lambela. Mwairangana vyevyo, munodha kala guluni laatu enao “mwairoromelo no leva rima, tanowachela vyongo vyevyo Nlungu vyaalanyedhile liye ninga yotuva yiwa.”—Aeb. 6:11, 12; Aroma 5:5.