Vyofuka Vyokumela Waalimbo Leri

N’nga Yesu angabaliwile, mwasiwa ngwan’ni Yosefe na Mariya tatookaathive wu Betelehemu malo mowelela waniwa wu Nazareti?

Bibilya kalinoonga mwasiwa vya-awelele aliwa waniwa. Mbwenye linoonga makundo enango ova-a ifunelo venango mbenao tairi-idhe ira ta-awelele wu Nazareti.

Ngelo atom’mwandela Mariya ira unokaana wise thitho unobala mwana wa lombwana. Vahora yeniyo ngelula vyaonga liye milanyu dhedhi, vyali Mariya na Yosefe takalanga cidadi lau Nazareti wu Galileya. (Luka 1:26-31; 2:4) Mbwenye vasogolovee, vahora yakuma aliwa wu Iguputu tawelele wu Nazareti. Yesu aulukulele weo thitho liye ali Nazareti. (Mat. 2:19-23) Ee-no pyovweya ira nathuulela vyau Nazareti, nakalelave uvwa vya Yesu, Yosefe na Mariya.

Mariya atookaana balee unango dhinalee Elizabeti wenuo akalecha wu Yuda. Elizabeti ali mwadhi Zakariya wenuo ali mulimbo velela sembe thitho ali m’mee wa Juwau Namabadiza. (Luka 1:5, 9, 13, 36) Mariya atoodhowa ma’mona Elizabeti wu Yuda thitho atookaathi weo wa myedi miraru. Adhamale liye welela wu Nazareti. (Luka 1:39, 40, 56) Mariya atoidhiwa vyongo vinjinji vyokuza wu Yuda.

Vangavirile hora, Yosefe atoovwela lamulo loi “tamalembi-e kazameto.” Ee-no Yosefe atookuma wu Nazareti nodhowa wu Betelehemu lelo lali “Sidadi la Davide,” thitho kuweo ulosi waro-edhele aliwa ira Mesiya unodha baliwela weo. (Luka 2:3, 4; 1 Sam. 17:15; 20:6; Mik. 5:2) Yesu angabaliwile, Yosefe kaaru meli-idhe ira Mariya awende ulendo undendai owelela wu Nazareti angana mwana tete. Aliwa tatookaathi wu Betelehemu, tatamo lelo lali undendai vaduzi duzi makilometuru 9 kumela wu Yerusalemu. Vyevi vingakami-idhe ira ta-arucheyenga mdhowanee mwanuo kachisini ira tamavelelenga sembe dhedho dhafuneeleya.—Lev. 12:2, 6-8; Luka 2:22-24.

Ngelule ali angamadhi m’mwandela ira mwanuo unodha kaathi “vapandoni wa umwene wa Davide” thitho “unodha tonganga ninga mwene.” N’nga pyooneelatu ira Yosefe na Mariya tatoona ira vyali vyodabwi-a Yesu baliwiwela sidadi la Davide? (Luka 1:32, 33; 2:11, 17) Venango thitho tatoona ira vingakadhi pama dhowanave kaathi weo nodedi-edhanga ira taone vyevyo vyafuna Nlungu ira tairena.

Kaninoidhiwa ira takaathidhewo hora yolapela moi a-vi wu Betelehemu vevo alimbo roromela nyenyedale vyadhidhe aliwa. Mbwenye fiyedha vahora yen’na, banjali lali likaathinga m’mba thitho “mwanuo,” kaali tete mbwenye atoulukula vang’ono. (Mat. 2:11) Vinooneya ira malo mowelela mavirelo adhuwa au Nazareti, aliwa takaatheile wu Betelehemu.

Herodi atootonga ira “a-ima othene aalombwana au Betelehemu . . . oromela vyawa vili dhowa chindo,” tapiwe. (Mat. 2:16) Movwelana na vyatongile liyevi, Yosefe na Mariya tatomtukula Yesu notawela wu Iguputu, tatookaathi weo fiyedha Herodi wukwa. Ee-no Yesefe atootukula banjalee no dhowa wu Nazareti. N’nga mwasiwa ngwan’ni tangakumile wu Iguputu katawelele wu Betelehemu? Namwasa oi Arikelao mwana wa Herodi, wenuo ali wa uwalanga maningi, ali atonganga wu Yudeya thitho vofuna vwela vyowenjeli-a vya Nlungu Yosefe atootukula banjalee aliwa dhowa wu Nazareti. Weo banja liwa latookala lovuneleya maningi thitho tangaodile msamalela pama Yesu ira amlambelenga Nlungu.—Mat. 2:19-22; 13:55; Luka 2:39, 52.

Vinooneya ira Yosefe akwide Yesu a-anadhule ndhila venango ngari yoi atu enango tadhadhowe dhulu. Ee-no Yosefe unodha venyathi-iwa nokalanga vailambo yavathi vano. Atu anjinji anodha kaana ngari yomgumanana Yosefe thitho mfuka myasa dhedho dhairi-idhe ira liye na Mariya takaathingave wu Betelehemu Yesu angabaliwile.