1924​—⁠Vyawa 100 vivirile

LALEELA MOLIMBA RIMA DHELA VA RADIYONI

Wa yawa imbo-i na meya, abali ava Beteli tatoolaba basa yosaka-edha limburo ira vakale radiyo wa WBBR wu Staten Island, cidade ya Nova York. Tangakakatilevo vimiri valimburonivo, tatoomangavo manyumba ira anolabao takaathinga mwemo thitho nyumba inango ira ikale yovwei-elamo madhu. Tangamari-idhe laba basila, tatooroma gumani-a mafwaramento ofuna i-ndi-edhela basa “vovwei-ana madhu.” Mbwenye vatookala vyorucha vinango.

Basa yorucha maningi yalabile abali, yali yomanga atena. Tafuneela manga atena olapa mametru 91 wu matabwa menli olapa mametru 61. Fendo yoroma vyawesedhile aliwa irana vyevi vyatooimwananeya. Mbwenye namwasa onyindela Yohova tatooda laba basali. Bali Calvin Prosser wenuo alabile basa vambo-i naaliwa aongile ira: “Aakale ira vyatoodeya fendo yoroma, ningavititimi-idhenga noonganga ira, ‘Kaonani vyongo viodile i-yo irana!’” Vyevyo vyatooiri-a ira abalala tam’titimi-e Yohova. Mbwenye nyarwa dhiwa kadhamalele vevo.

Onga va radiyoni wali uiranga roma wene thitho mafwarameto oongana katafwanyeya wiliwili. Ee-no, abali tatoogula fwaramento yoongana yeniyo ya-indi-edheliwa basa naatu enango. Malo mogula mikoro, ta-indi-edha basa telefoni. Dambo n’nango na ma-iyu abali tatoothuulela vyowesedha makinao. Aliwa tanoofuneela porograma yoi tamwadhe, ee-no tatoomba nyumbo dha Umwene. Bali Ernest Lowe unothuulela vyongo vyothei-a vyaireile vahora abalala vyaomba aliwa nyumbodho. Tatooligareliwa na bali Rutherfordb wenuo akala wu Brooklini, weo wali olapela wa makilometru 25. Balula atoovwa abali taombanga nyumbo va radiyoni.

Bali Rutherford aongile ira: “I-yani vyevyo. Vinovweya ninga ula wa mapaka.” Abalao tatookaana manyadho notimi-a radiuo, mbwenye tatooidhiwa ira tali okozeya onga va radiyoni.

Va 24 wa Fevereiro wa 1924, tatooroma onga va radiyoni, thitho Bali Rutherfod aongile ira radiula ungakami-idhe va vyongo vyokuza Umwene wa Mesiya. Liye aongile ira “ifunelo ya radiula, ndi kami-a atu vwechecha makundo a Bibilyani okuza hora ili i-yoi, vo-otukulela vyongo vinororomela aliwa venango religiau liwa.”

Vyongo vyaireile va dambo leli, vyatokaana vyo-arelavo vyee vya pama. Radiyo wa WBBR wali ulabanga wa vyawa 33 vyo-arela.

RUNI-A MOLIMBA RIMA ANAMASOGOLELA AMARELIGIAU

Mu Julho wa 1924 anamafunjedha Bibilya tatokaana gumano wu Columbus wu Ohio. Alendo okumela mumatatomo o-iyana i-yana vailambo yothene tatoovuruwana myasa yeniyo yaongiwile mu Iyaramu, Ingeles, Ifranses, Ijeremani, Igiriki, Ihangare, Italiyano, Ilituwaniya, Ipolishi, Irasha, Isikandinaviya na Iyukaraniya. Vikundu vinango vya porogramila vyatoongiwa va radiyoni thitho vatoiriwa masaka-edho oi majornalista ailambwiyo (Ohio State Journal) talembenga vyongo vyothene vyaireya va dambo nlilothene la gumanuo.

Chinai va 24 wa Julho abali naarongola okwaranya 5.000 enao tagumaneile vagumanuo tatoodhowa malaleela musidadili. Aliwa tatoogawela mabukhu owandamela 30.000 thitho tatokaana anamafunjedha Bibilya anjinji. Nsanja ya Namaing’anela yaongile ira leli lali “dambo losangalali-a maningi va gumanula.”

Yongo inango yavakundu yaireile Xixanu va 25 wa Julho, vevo bali Rutherford valerile liye molimba rima milanyu yeniyo yaruni-a anamasogolela amareligiau. Liye aongile ira: “Anamasogolela andale, amareligiau na agoso tanookondi-a atu idhiwa imbarimbari yokuza Umwene wa Nlungu unofuna liye dha u-indi-edha basa voraeli-a atu. Atoonga thitho ira atwala tanoodawi-a vyongo maningi namwasa oi tanookami-a gurupu la Liga das Nações noonganga ira, ‘ndi ndhila ino-indi-edha basa Nlungu votonga ilambo yothene yavathi.’” Anamafunjedha Bibilya tanoofuneela kala olimba rima ira talaleele milanyu yen’na waatu.

Voonga vya gumanula, muru wa Nsanja ya Namaing’anela yaongile ira: “Atu adhidhe vagumanula wu Columbus, tatoowelela waniwa tangana iroromelo yolimba . . . , kataova yongo iliyothene thitho tali okozeya laleela molimba rima masiki taruni-iwenga.” Bali Leo Claus wenuo adhidhe vagumanula aongile ira: “Natoodhowa mamidhi mwi-u ningali okozeya gawela mataratado okaana milanyu yen’na waatu atatomoni wi-u.”

Mu Outubro, anamafunjedha Bibilya tatooroma laba basa yogawela mataratado mamilyau, okaana milanyu yaongile bali Rutherford mu mwasee. Mu sidadi ya Cleveland wu Oklahona, Frank Johanson atoomari-a gawela mataratadwala mutatamo lava-iwile liye, unga-adhi maminutu 20 ira anamalaleya afwee tadham‘tukule. Vahora yadedi-edhela liye afweao, kaaodile imela valimburo looneela namwasa oi atu asidadinimo enao tathakaleliwile namwasa wa basa yolaleelila tanom’sakasaka. Ee-no balula atoothuulela vyodhowa mavithala mu igreja inangwee yeniyo yali vaduzi. Angafwaidhe ira kamuli atu, liye atoo-iya mataratadwale Bibilyani mwa Pastore wa igrejiyo na vapandoni uliwethene. Adhaire e-no atookuma mombaranya. Voi hora yali inga-adhivove, atooira thitho saasawa na maigreja enango menli.

Voi e-no atoodhowa mombaranya va limburo lavwelane liye na afwee ira amagumane na anamalaleyale. Liye atoovithala konde wa limburo loguli-amo makura a karo ira atu am’sakale ta-am’mone. Atwao tatooviradi valimburonivo tangali karoni mbwenye kataodile m’mona. Atwale tangadhowile, anamalaleya afwee enao talaleela vambo-i na liye tatoodha dham’tukula na karo.

Bali mwinango aongile ira “nikumanga sidadinimo, navirilena wu magreja mararwale. Va igreja iliyothene natoofwanya vangaimenle atu okwaranya 50. Atu enango tanooleri mataratadwao voi enango tam’thonyi-edha pastoriwa. Natookumamo mombaranya tatamonimo ira na-agumanena nyarwa. Mbwenye ninosimba Nlungwi-u Yohova namwasa onibarela thitho niva-a zelu ira amwidani a Umwene katiniimwanani-e gawela mataratadwala.”

ANAMAFUNJEDHA BIBILYA TANOOLALEELA MOLIMBA RIMA WU LIMBURO NLILOTHENE

Muvilambo vinango, anamafunjedha Bibilya tanoolaleela thitho molimba rima. Norte wa ilambo ya Fransa, Bali Józef Krett anoolaleela wa atu okumela wu ilambo ya Polish enao talaba basa yothimba oro. Vatooiriwa masaka-edho oi amaonge mwasa wa muru oi “Vachineneeva atu okwa anodha venyathi-iwa.” Abali naarongola tangagawele mataratado oitenala atu va mwasuo, wasembe mwinango atoowandela atu agrejanimwee ira katidhoweo. Mbwenye kai vyevyo vyaireile. Atu okwaranya 5.000, tatoovuruwana mwasuo thangani-avo thitho wasembuo. Bali Krett atoom’vepa wasembuo ira aonge vinororomela liye mbwenye atookonda. Bali Krett atoogawela atwao mabukhu othene ana liye angaoni ira aliwa tanoofuna idhiwa vyongo vinjinji vyokuza madhu a Nlungu.—Amo. 8:11.

Wu Afrika, bali Claude Brown, ngwenuo adhowilena milanyu yapama wu Gold Coast oi va-eeni unoidhiweya na dhina loi Gana. Myasa na mabukhu agawela liye tatookami-a ira imbarimbari imwadheye mombaranya muilambwiyo. Jhone Blankson wenuo afunjedha vya mirombwe atoovuruwana m’mbo-i mwa mwasa waongile bali Brown. Vahora yeniyene atoozindiyela ira utofwanya imbarimbari. Liye atoonga ira: “Imbarimbarila itondisangalali-a maningi moi ndanoowandela mutu uliwethene vya imbarimbarila xikolani.”

Dambo n’nango Jhon atoodhowa gerejani ya Anglicana ira amafuke wasembe vyokuza uraru, namwasa oi ali angavwide pama ira likundo leli kai lokumela malembani. Wasembuo atoom’tamangi-a wu akuwanga ira: “Kumavo vano! Weyo kuli Kristau mbwenye wa Namanami-a.”

Angafiile mudhi, Jhon atoolembela karta wasembule yom’vepa ira adhatapanye na liye vyokuza uraru va mwinjini waatu. Wasembuo atoorumela mbwenye voira m’mwitana ira amatapanye na liye skritoriyoni wa ndimuwa nlukulu wa xikola yofunji-a vya mirombwe wa funjedha liye ule. Ndimuwa wa xikoliyo atoom’fuka akala atom’lembeladi karta wasembuo.

John atoowakula ira “Ee ndatoom’lembadi.”

Namafunji-uo atom’mwandela John ira am’lembele karta wasembuo yopepesa. Voi ee-no John atoolemba ira:

“Purusoranga utondiwandela ira ndoolembeleni karta youpepesani thitho ndili okozeya lemba kartila akala munorumela ira munofunji-echa vyongo vyonama.”

Modabwa maningi purusoruo atom’fuka John ira, “Blakson, pyaimbarimbari unofuna ulembedi vyevyo?”

Liye atoowakula ira: “Ee ndi vyevyo vinofuna miyo lembadi.”

“Unokumi-iwamo xikolani. Kunokala va xikolani yen’na nonyozanga wasembe wa gereja yoidhiweya na guverno.”

Voi ee-no John atoom’fuka ira, “N’nga purusori . . . Mwafunji-anga akala vatokala makundo enango akondile i-yo a-vwechecha pama, kaninoufukechani vyofuka-i?”

Purusoruo atoowakula ira “munondifukecha.”

John atoom’mwakula ira: “Vyevi ndi vyaireile. Aliwa anofunji-a Bibilya mbwenye miyo ndatoawafuka yofuka. Aliwa tatooimwanana wakula yofukiyo. N’nga mwasiwa ngwan’ni ndinofwanela lemba karta yopepesa?”

Vamamari-edhovee Blankson kaakumi-iwilemo xikolanimo thitho kaalembileve karta yopepesa.

ANAMAFUNJEDHA BIBILYA TALI OFUNECHECHA IRANA VYONGO VINJINJI

Voonga vyongo vyaireile yawa yen’na, Nsanja ya Namaing’anela yaongile ira: “Va-eeni ninooda onga ninga Davide ira: ‘Nyo munodha ndiva-a kopolo ira ndiode wana khondo. Munodha iri-a ira amwidananga tagonje.’ (Sal. 18:39) Vyongo vyaireile mu yawa yen’na, pyolimbi-a maningi namwasa oi nikadhi nionanga dhandha la Mbwiye linikami-anga. . . . Arumiwee ororomeleya . . . Takadhi tairelanga umboni mosangalala.”

Komoni wa yawa yeyo abali tatooira masaka-edho ira vakale radiyo mwinango. Nyumba ya radiula yamangiwile wu Chicago. Radiyo m’pyula waidhiweyana dhina loi MADHU. Radiula wanoo-indi-edha basa mafwaramento akopolo. Voi atu tali undendai masiki wu Norte wa ilambo ya Canada, tanooda uvwa milanyu ya Umwene.

Mu yawa ya 1925 watooireya thitho vyongo vinango vyosangalali-a namwasa oi anamafunjedha Bibilya tatoovwechecha pama likundo lofwanyeya mu bukhu la Apokalipse kapitulo 12. Wa atu enango vyevyo vyatoiri-a ira ta-iye m’labela Yohova. Mbwenye atu anjinji tatoosangalala namwasa ovwechecha pama makundo afunjedhile aliwa, okuza vyongo vyaireile dhulu na mwemo vyevyo mwakuzele aliwa atu vailambo yavathila.