Wachelani modhiyevi-a vyongo vya-anoidhiwanyo

1. N’nga Yohova univa-idhe dodoliso loi a-vi n’nga mwasiwa ngwan’ni?

YOHOVA utonipanducha ira niodenga thuulela, funjedha vyongo vipya novwechecha moda munavi-indi-edhele i-yo basa vyongo vifunjedhile i-yovyo. N’nga mwasiwa ngwan’ni liye unipanduchile mundhila yen’na? Ira mutu aodenga idhiwa mathuulelo a Nlungu nom’labela liye na moda munothuulela i-yo.—San. 2:1-5; Aro. 12:1.

2. (a) N’nga ninofuneela idhiwa n’ni? (Yobo 37:23, 24) (Muone thitho iruthiruthi.) (b) Mwasiwa ngwan’ni vyevi ndivyapama wa-iyo?

² Mwaimbarimbari Yohova unipanduchile mundhila yoi niodenga funjhedha. Mbwenye vatokala vyongo vya-anoidhiwa i-yo. (Muleri Yobo 37:23, 24.) Muthuulele ifwanafwani-o ya Yobu. Yohova atoom’fuka vyofuka vinjinji vyevyo vyaoni-a ira Yobu kaaidhiwa vyongo vinjinji. Tapanya weu watom’kami-a Yobu zindiyela ira khaaidhiwa vyongo vinjinji thitho chinja moda mwathuulela liye. (Yob. 42:3-6) Molandana na vyevyi ndi pama wa i-yo kala odhiyevi-a nothuulelanga ira kaninoidhiwa vyongo vyothene. Ee-no, nanyindelanga Yohova hora dhothene liye unongoniwandela vyongo vinofuneela i-yo ira nisakulenga vyongo vyapama.—San. 2:6.

3. N’nga ninafunjedhen’ni muyofunjedha yei?

³ Muyofunjedha ye-i, ninoona nyarwa dhinogumanana i-yo namwasa o-oidhiwa vyongo vyothene. Ninoona thitho ira ndi pama aidhiwa vyongo vyothene. “Funjedha mwasa wen’na unooda kami-a nyindela wi-u Yohova, wenuwo ndi ochena na wazelu” thitho wenuwo unoniva-a malangi-o ali ofwanelela.—Yob. 37:16.

KANINOIDHIWA IRA KOMONI UNODHA FIYA E-LINI

4. Movwelana na lemba la Mateu 24:36, n’nga ndivyongo vivi vya-anoidhiwa i-yo?

⁴ Muler Mateu 24:36. I-yo kaninoidhiwa ira komoni unodha fiya mo-odembuwa. Yesu angali vailambwila, kaaidhiwa, “dambo nahora.”a Vira wahora liye atoowandela anamafunjedhee ira Yohova, baba wahora, unoidhiwa vyongo vyothene vinofuna ireya “visakule liye muutongee.” (May. 1:6, 7) Yohova uto-ela hora yofwanelela ya komoni wa ilambwila, mbwenye i-yo kaninoidhiwa dambo linofuna dhaireya vyongovyo.

5. Namwasa oi kaninoidhiwa dambo lomari-a, n’nga vyevi vinonikuza a-vi?

⁵ Movwelana na vyaongile Yasu, i-yo kaninoidhiwa hora inofuna i-yo dedi-edhela ira komoni ufiye. Namwasa wa vyevi vinooda kala vyorucha leva rima, simbwasimbwa akala ira niromile wale dedi-edhela dambo la Yohova. Vinooda kala vyorucha akala abali-u venango atu enango anaanitheya namwasa oi dambolo kalinofiya. (2 Pe. 3:3, 4) Venango ninooda thuulelanga ira vinooda kala vyo-orucha vilela vyowesedha vinoniirela atu enango aakale ira nitoidhiwa pama dambo lomari-a.

6. Mwasiwa ngwan’ni ndipama a-idhiwa dambo lomari-a?

⁶ Mwaimbarimbari, namwasa o-oidhiwa dambo lomari-a Yohova utoniva-a ngari yooni-a ira ninom’labela namwasa omdhiveliwana thitho mnyindela. I-yo kaninom’labela Yohova wahora yomala, venango ira iroromelo yi-u itokaana madile. Malo mothuulelanga maningi “dambo la Yohova” vanofuna aliwa udha, tipama thuulelanga maningi vyongo vinofuna dhaireya dambolo ladhafiya. Dhoweni nim’kwiveleni maningi Yohova, nowenjedhelanga iroromelo yi-u wa liye voira vyongo vyothene vinaode i-yo vom’sangalali-a.—2 Pe. 3:11, 12.

7. N’nga ninoidhiwan’ni?

⁷ Pyaimbarimbari ira nithuulelenga maningi viidhi i-yo vyoi malambo omari-a taromile yawa ya 1914. Yohova utoniva-a maulosi a Bibilyani oi anoniidhiwi-a hora yaimbarimbari, thitho anonioni-a moda munofuna dhaireela vyongo muilamboi romela muyawa ya 1914. I-yo, ninoidhiwa ira “dambo la Yohova nliduzi.” (Zef. 1:14) Basa iniva-idhe Yohova ira niilabe ndi laleela “milanyu yapama ya Umwene” wamaziza othene. (Mat. 24:14) Milanyu yen’na inolaleeliwa muvilambo vyokwakwana 240 matatamo thitho muviongelo vyokwaranya 1000. I-yo kaninofuneela idhiwa “dambo venango hora” ira nilabe mwathindhi basa yofuneila.

KANINOIDHIWA MODA MUNOFUNA IRELA YOHOVA

8. N’nga madhu oonga ira “basa la Nlungu waimbarimbari” anothapulelan’ni? (Namalaleya 11:5)

⁸ Kai hora dhothene vanoidhiwa i-yo “basa ya Nlungu waimbarimbari.” (Muleri Namalaleya 11:5.) Madhu enala anothapulela vyongo vinoira Yohova vorumeli-a ira vyongo viireye venango kwakwaneli-edha ifuneloyee. I-yo kaninoidhiwa vyongo vinoira Yohova vorumeli-a ira vyongo vinango viireye va vyongo vyothene vinoira liye vonikami-a. (Sal. 37:5) Bibilya linofwanafwani-a a-idhiwa “basa la Nlungu waimbarimbari” na a-vwechecha moda munoulukulela mwana akala mbani mwa m’mee. Thitho masiyentista, katinoidhiwa mwaimbarimbari moda munoireela vyongovyo. Molandana na vyevi, i-yo thitho kaninoidhiwa moda munolabela Yohova.

9. Voi kaninoidhiwa moda munairele Yohova vyongo, N’nga chini inofuna dhaireya?

⁹ Namwasa o-oidhiwa moda munonikami-edhela Yohova, ninooda roma kaikelanga. Venango ninooda roma ova vovelela ingumii-u vom’labela Yohova, mwaifwanafwani-o, a-funanga vyongo vinjinji vaingumii-u thitho vodhowa ulimburo unofuneela anamalaleela anjinji. Hora dhinango ninooda roma thuulelanga ira Yohova kanoniraeli-a akala kaninooda irana vyongo vinjinji vavyongo visakunle i-yo, na-aonengavo vyongo vyo-arelavo va urumiwi usakunle i-yo. Thitho navyowesedha vinogumanana i-yo vabasa iniva-idhe gulu ira niilabe.

10. N’nga ndimakalelo avi apama anakaena i-yo namwasa o-oidhiwa moda monofuna dhairela vyongo Yohova?

¹⁰ Aidhiwa moda munoirela Yohova vyongo unonikami-a kaana makalelo ninga dhiyevi-a, nopwaseya. Nithuulelenga ira Yohova hora dhothene, unoidhiwa vyongo vyapama. (Esa. 55:8, 9) Nanyindelanga Yohova thitho kala uikundoyee ninodha idhiwa ira vyongo vinodha niwendela pama. Vyongo vyaniwedhelanga pama muurumiwini venango mumabasa agulu, ninodha m’va-a lemezo mutu wenuo unofwanela wachela lemezo Yohova. (Sal. 127:1; 1 Ak. 3:7) Akala vyongo kavinowenda ninga moda mwadedi-edhela i-yo, ninofwanela thuulelanga ira Yohova ngunoing’anela vyongo vyothene. (Esa. 26:12) I-yo ninoiravo ikundo yi-u thitho ninonyindhela ira Yohova unoiravo ikunduyee. Nili osikimizela ira liye unodha nisogolela, angalive kavinoireya modabwi-a ninga moda mwairela liye ndulimu.—May. 16:6-10.

11. N’nga ndivyongo vivi vyapama viidhi i-yo vyokhuza Yohova?

¹¹ I-yo nithoidhiwa ira Yohova hora dhothene ngwaudhivela, walongomano thitho wazelu. Yongo inango inoidhiwa i-yo ira Yohova unosimba vyongo vinomuirela i-yo ndi vyongo vinoirela i-yo abali naarongoli-u. Thitho kaninokaikela ira Yohova unoraeli-a atu ali ororomeleya wa liye.—Aeb. 11:6.

KANINOIDHIWA VINOFUNA IREYA BEBE-I

12. N’nga ninofunjedhavon’ni valemba la Yakobo 4:13, 14?

¹² Muleri Yakobo 4:13, 14. Yongo imbo-i inosikimizela i-yo choi kaninoidhiwa vinofuna ireya bebe-i. Muilambo inokala i-yo ila hora dhinango ninogumana vyongo “vyo-odedi-edheleya.” (Nam. 9:11) Vamwasa wen’na, kaninoidhiwa akala vifunelo vi-u vinodha kwakwanela, venango akala ira ninodha kaana ingumi ira nikwakwaneli-edhe vifunelo vi-uvyo.

13. N’nga kaikela unakuze a-vi ingumii-u?

¹³ Limbanana vyongo vyokaikeli-a vaingumii-u vinodha kala vyorucha. Mwasiwa ngwan’ni ninoonga ee-no? Namwasa oi venango ninooda dhikhumbanyedhanga na vyongo vinaniireele bebe-i noimwanananga kala osangalala. Hora dhinango ingumii-u inoonda chinja, vyevi vinonda niiri-a ira nikalenga osukwala. Akala ira vyongo kavinoireya ninga moda mwadedi-edhela i-yo, ninooda kala osukwala venango ovikhumbanyedha.—San. 13:12.

14. N’nga imwerumweru yi-u inonyindelan’ni? (Muone thitho iruthiruthi.)

¹⁴ Nagumanangana nyarwa nitokaana ngari yooni-a ira ninonlabela Yohova namwasa wa udhivela, a-kala modhikanyi-edha. Bibilya kalinothonyi-edha ira Yohova unodha nikami-a va vyowesedha vyothene vinogumana i-yo ira vya-aireye vaingumii-u. Yohova unoidhiwa ira sangalala wi-u kunonyindhela vyongo vyothene vinofuna dhaireya sogolou. Mwaimbarimbari, sangalala wi-u unonyindhela malangi-o anowachela i-yo wa Yohova nowavwelanga. (Jer. 10:23) Navepanga kami-o wa Yohova ira nisakule vyoira, kaninokala osukwala maningi vothuulelanga vyongo vinofuna dhaireya sogolou. Venango ninodha kala ninga ninaaonga ira: “Yohova afuna ira nikaena ingumi, ninodha ira vyongovyo.”—Yak. 4:15.

15. N’nga ninoidhiwan’ni vyokhuza sogolou?

¹⁵ Pyaimbarimbari ira kaninoidhiwa vyongo vinofuna dhaireya songolou, mbwenye ninoidhiwa ira Yohova utonilanyedha ingumi yo-omala sogolou. Waatu enango ingumi yen’na inodha kala dhulu, voi waatu enango inodha kala vailambo yavathivano. I-yo ninoidhiwa ira Yohova kanonama thitho kavali yongo inam’mwimwanani-e kwakwaneli-edha vyolanyedhavyee. (Tit. 1:2) Liye ndi mutu mbo-i unoonga vya komoni, romela walelene wavyongo vyoi kavinaireye. Vyongo vyothene vyaongile Yohova ira vinodha ireya ndulimu, vitokwakwaneli-edhiwa. Thitho vyongo vyaongile liye vyothene vyokuza sogolou, vinodha ireya. (Esa. 46:10) I-yo nithoidhiwa thitho ira kavali yongo yothene inam’mwimwanani-e Yohova nidhiveliwana. (Aro. 8:35-39) Mo-obala vyongo vinagumanena i-yo vaingumii-u, liye unodha niva-a zelu, nididili-a thitho kopolo dhinofuneela i-yo ira niode vilela. Kaninokaikela ira Yohova unodha nikami-a thitho niraeli-a.—Jer. 17:7, 8.

KANINOODA VWECHECHA PAMA MODA YOHOVA MUNIIDHI LIYE

16. Movwelana na lemba la Salimo 139:1-6, n’nga chini inoidhiwa Yohova mwa i-yo vyoi kaninooda vivwechecha?

¹⁶ Muleri Salmo 139:1-6. Yohova unoidhiwa yongo inoira i-yo na mwasa oi nitokaana mathuulelo enango aututuni na auzimu. Liye unonivuruwana hora dhothene, wenjedhela vavyongo vinaonge i-yo, liye unovwechecha vyongo vinango vyafuna i-yo onga. Yohova unoona vyongo vinoira i-yo thitho unoidhiwa mwasa uiri-idhe ira niire vyongovyo. Mwene Davide atooni-a ira Yohova unoing’anechecha thitho uli okozeya ira anikami-e vanyarwa iliyothene. N’nga munodhivwa a-vi voidhiwa ira Mbwiye Mwene wa vyopanduchiwa vyothene, namapanducha wa dhulu nailambo yavathi, unosamalela maningi mutu uliwethene wa-iyo? Kai vyodabwi-a? Ndimwemo mwaongile Davide ira: “Wamiyo ndivyorucha maningi ira ndivwecheche vyongo vyevi. Ndivyavadhulu maningi moi kandinaode vifiyedhela.”—Sal. 139:6, madhu achindo.

17. N’nga mwasiwa ngwan’ni vinokala vyorucha rumela ira Yohova unoniidhiwa pama?

¹⁷ Namwasa wa tatamo iulukulele i-yo, ikalelo yi-u venango namwasa wa vyongo vyaroromela i-yo na-anafunjedhe imbarimbari, vinoonda kala vyorucha onanga ira Yohova ngu Baba waudhivela thitho akala unonisamalela. Venango ninoodha thuulelanga ira vyodawa vyairile i-yo ndulimu vitoiri-a ira Yohova a-afunenga kala fwi-u thitho kala undendai na i-yo. Hora dhinango Davide anoodhivwavo ee-no. (Sal. 38:18, 21) Venango vatokala mutu mwinango unodhilimbi-edha maningi ira akaena ingumi inom’sangalali-a Yohova nodhifunkanga ira: ‘Akala Nlungu unondiidhiwa, mwasiwa ngwan’ni liye unofuna ira ndi-iye ingumi inooneya kala yapama wamiyo?’

18. Mwasiwa ngwan’ni ndipama rumela ira Yohova aniidhiwe pama kwaranya moda munodhiidhiwela i-yo nokene? (Muone thitho viruthiruthi.)

¹⁸ Ndipama rumeli-a ira Yohova aniidhiwe i-yani-ana moda munodhiidhiwela i-yo namwasa oi liye unoona vyongo vyapama mwa i-yo. Angalive ira Yohova unoona vyodawa vinoira i-yo liye unoidhiwa umutu unodhilimbi-edha i-yo ira nikale thitho unonidhiveliwana maningi. (Aro. 7:15) Nazindiyela ira Yohova unoona vyongo vinofuna i-yo ira, unoniva-a kopolo inofuneela i-yo ira nim’labelenga mosangalala.

19. N’nga ninoidhiwan’ni vyokhuza Yohova?

¹⁹ Ninoidhiwa ira Yohova ndi udhivela. Kaninokaikela vyevyo. (1 Ju. 4:8) Ninoidhiwa ira vyongo vyothene vinonivepa liye unonivepa namwasa oi unonidhiveliwana thitho hora dhothene unofuna vyongo vyapama wa i-yo. Thitho ninoidhiwa ira Yohova unofuna ira nidhaganyali ingumi yo-omala. Ira vyevi viodeye liye atooniva-a khuto. Yotuva yen’na inonisikimizeli-a ira angalive ira nili atu o-olongomana, ninooda m’sangalali-a Yohova. (Aro. 7:24, 25) Ninoidhiwa ira “Nlungu ndi lukulu kwaranya rimi-u thitho unoidhiwa vyongo vyothene.” (1 Ju. 3:19, 20) Yohova unoidhiwa vyongo vyothene wa i-yo thitho kanokaikela ira ninoirana vyongo vinonivepa liye.

20. Mwaiwa ngwan’ni kaninofuneela kalanga osukwala maningi na vyongo vya-anoidhiwa i-yo?

²⁰ Yohova unoniwandela vyongo vyothene vinofwanela i-yo idhiwa. Nakala odhiyevi-a thitho narumela vyevi, kaninakalenga ovikumbanyedha na vyongo vya-anoidhiwa i-yo. Malomwee, ni-elenga mathuulelwi-u va vyongo vinoidhiwa i-yo. Ee-no, ninooda dioni-a ira nili odhiyevi-a thitho ninom’nyindela Yohova, “wenuo uli ologomana na wazelu.” (Yob. 36:4) Masiki va-eeni na-avwechechenga vyongo vinango, ninoidhiwa ira Yohova unodha dhowanave nifunji-a modhowa nodhowa. Vyevi ndivyapama maningi namwasa oi kaninodha i-ya funjedha vyongo vipya na namapanducha Nlungu odabwi-a.—Nam. 3:11.