N’nga ninaire avi ira nikhale axamwali a Nlungu?

1. N’nga Nlungu unovuruwana malobelo othene?

Pyaphama vinjinji onganga na Nlungu. Liye unofuna ira atu othene tairenga malobelo ira takhale axamwalae. (Salimo 65:2) Mbwenye vyevi khavinothapulela ira liye unovuruwana venango rumela malobelo othene khabe. Mofwanafwani-a, Nlungu khanavuruwana malobelo aalombwana anoirela uwalanga a-iyaniwa. (1 Pedru 3:7) Titho Nlungu khanovuruwana malobelo aatu anoirana vyothakhala aliwa achinjanga. Vyevi titho vyatoireela atu a Nlungu ndulimo. Mbwenye, mutu achinja iya vyodawa vyae Nlungu unovuruwana malobelwae.—Muleri Esaya 1:15; 55:7.

2. N’nga nilobelenga avi?

Ninofwanela lobelanga wa Yohova, namapanduchi-u ekhave. Vyevyo vinooni-a ira ninororomela ira liye ngu Nlungwi-u ekha. (Mateu 4:10; 6:9) Titho, ninofwanela lobela mu dhina la Yesu na mwasa oi nguliye ukwele vyodawa vi-u. (Juwau 14:6) Yohova khanafuna ira malobelwi-u akhale owelelawelela venango oira lembiwa mabukhuni. Nalobelanga, niongenga khumela vathi va rima.—Muleri Mateu 6:7; Afilipi 4:6, 7.

Nlungu unofiyedha uvwa malobelo anoonga iyo amirimani mwi-u. (1 Samueli 1:12, 13) Ninooda lobela hora iliyothene: namaebe-i, hora yogona, na hora yodya titho naoneeliwa vyorucha.—Muleri Salimo 55:22; Mateu 15:36.

3. Mwasiwa ngwan’ni ninofwanela fwanyeanga vamigumanoni?

Axamwali a Nlungu khatinoomeliwa khala vambo-i na atu a-anororomela vinofuna Nlungu, na o-obala vinofuna dhaairela Nlungu sogolou. (2 Timoteo 3:1, 4; 2 Pedru 3:3, 13) Eno, ale anamdhiveliwana Nlungu na anofuna mlabela anofwanela gumaneanga vamigumanoni ira taodenga khami-ana mmbo-i na fwae.—Muleri Aebere 10:24, 25.

Pyaphama khalanga vambo-i naatu anadhivela Nlungu. Vyevyo vinoiri-a ira uxamwali-u na Nlungu ukhale olimba. Migumano ya Mboni dha Yohova inoniva-a ngari yogumaneela na atu anofuna nikhami-a ira niwenjedhele irororomelo yii-u.—Muleri Aroma 1:11, 12.

4. Nyo munakhale avi xamwali wa Nlungu?

Ira mukhale xamwali wa Yohova, munofwanela fwanya hora ira muthuulelenga vinofunji-a Bibilya. Nithuulelenga vyongo vipanduchile Yohova, zelu dhinoniva-a liye titho vinilanyedhile liye. Thuulela va vyongo vyevi na lobela, vinonikhami-a ira nione udhivela wa Nlungu na dodoliso lae.—Muleri Yoswa 1:8; Salimo 1:1-3.

Nyo titho munofwanela roromela Nlungu. Iroromelo ili ninga mbeu. Mbeu inoulukhula mwai-elelanga ma-inje. Iroromelo titho inoulukhula vinjinji nafunjedhanga vya Nlungu hora dhothene.—Muleri Mateu 4:4; Aebere 11:1, 6.

5. Mwasiwa ngwanni pyaphama khala xamwali wa Nlungu?

Yohova unodhiveliwana axamwalae. Liye unonivunelela va vyongo vyothene vyofuna mali-a iroromelo na idedi-edho ina iyo yodhakhaana ingumi yo-omala. (Salimo 91:1, 2, 7-10) Liye unoniwandela vyevyo vinaire iyo, ira nikhaena ingumi yaphama na imwerumweru. Yohova unonifunji-a makhalelo aingumi yaphama.—Muleri Salimo 73:27, 28; Tiyago 4:4, 8.