“Atu a Yohova anondiveliwana longomano”

1. N’nga Yosefe agumanena vyowesedhiwa vyoi a-vi, n’nga liye airile n’ni?

YOSEFE mwana Yakobo atokugumanana vyoyesendha vyorucha maningi. I-yana unango atom’mwandela ira: “Ugone na miyo.” I-yanuo ali mwadhi Potifara wenuo ali patrawee. Mbwenye Yosefe atookonda vyafuna i-yanuo. Venango mutu unango unoonda fuka ira, ‘Mwasiwa ngwan’ni Yosefe atokonda vyowesendhiwa vyevi?’ Potifara ali angakumilevo. Wenjendhela vevo Yosefe ali dhaari thitho i-yanuo angairi-idhe ira ingumi ya Yosefe ikale yorucha namwasa oi atokonda vyafuna liye. Mbwenye Yosefe atodhowanave konda angalive ira i-yanuo anokanyi-edha mowelelawelela. Mwasiwa n’ngwani? Liye aongile ira: “Ndinairelen’ni yothakala ilukulu ee-ni dawela Nlungu?”—Maro. 39:7-12.

2. N’nga Yosefe aidhi a-vi ira raruwa kudawela Nlungu?

² N’nga Yosefe aidhiwa a-vi ira Nlungwee unoona ira raruwa ndi yongo “yothakala ilukulu”? Lamulo la muilamulo ya Mose loonga ira “kuraruwe” lalembiwile vangavirile vyawa 200 kumela vahora yeniyo. (Ekis. 20:14) Mbwenye Yosefe atomwidiwa pama Yohova thitho anozindiyela moda wavwele liye, a-akale ira liye atoira mararuo. Mwaifwanafwani-o pyo-okaikela ira Yosefe anoidhiwa mwemo Yohova mwasaka-edhile liye va mwasa othela ira lombwana akaengana i-yana mbo-i. Vinooni-a ira atovwa mwemo Yohova mwavunelile liye fendo mbilidhene Mbwiyee Sara, vyaguman’nena liye vyongo vyoi vingamwiri-idhe ira a-kale ororomeleya wa manee. Nlungu atooira vimbo-ive vovunela Rabeka i-yana wa Isaki. (Maro. 2:24;12:14-20; 20:2-7; 26:6-11) Thuulela myasa dhedhi watomkami-a Yosefe zindiela vyofwanelela na vyo-ofwanelela vamethoni va Nlungu. Namwasa oi Yosefe anodhiveliwana Nlungu, anodhiveliwana thitho makundwee olongomana thitho atosikimiza rima a-arela.

3. N’nga ninofuna nitapanyen’ni muyofunjedha yei?

³ N’nga munodhiveliwana longomana? Pyo-oira fuka. Mbwenye i-yo othene kanili olongomana thitho na-aire polepole ninooda dodomi-iwa na mwemo ilamboi munoonela aliwa vamwasa olongomana. (Esaya 5:20; Aroma 12:2) Ee-no ninotapanya ira longomana chin’ni thitho mwemo munoganyalela i-yo namwasa olidhiveliwana. Namala ninotapanya vyongo viraru vinanikami-e ira nidhiveliwengana maningi makundo a Yohova.

N’NGA LONGOMANO CHINI?

4. N’nga ndimathuulelo a-vi odaweya ana atu anjinji vamwasa olongomana?

⁴ Atu anjinji anothuulela ira mutu olongomana ngu mutu ule uli ogaya odhiveliwana tonga atu anango venango unodhiona ira ngwapama kwaranya atu anango. Mbwenye Nlungu kanosangalala na makalelo enala navang’onovene. Yesu angali vailamboi atosumulula mwakopolo anamasogolela amareligiau a muhoree na mwasa okaathei-a makundwiwene va mwasa olongomana. (Namal. 7:16; Luka 16:15) Mutu olongomana kanothuulela ira ngwapama kwaranya atu anango.

5. Mowvelana na vinoonga Bibilya n’nga longomano chin’ni? Ongani ifwanafwani-o.

⁵ Longomana ndi kalelo lapama maningi. Mogwandela longomana unothapulela ira vyongo vinoona Yohova, kala vyofwanelela. Bibilyani madhu oi longomana anoonga vyo-arela makundo a Yohova enao ali avadhulu maningi. Mwaifwanafwani-o Yohova atotonga alimbo guli-a malonda ira ta-indi-edhenga basa “mwezo ofwanelela.” (Dotor. 25:15) Madhu Aebere anothapuleliwa ira “ofwanelela” anooda thapuleliwa thitho ira “olongomana.” Moi e-no kristau unofuna kala olongomana vamethoni va Nlungu, unoira vyongo vyothene moona rima vamwasa wamalonda. Mutu unodhiveliwana longomana, unoidanana aona mutu unango aireliwanga vyongo vyo-okala vyolongomana. Thitho “vofuna ira amdhiveliwi-e [Yohova] va iliyothene,” mutu olongomana unothuulela mwemo munoonela Yohova va visakunle liye.—Akol. 1:10.

6. Mwasiwa ngwan’ni kaninokaikela makundo a Yohova okuza yofwanelela na yo-ofwanelela? (Esaya 55:8, 9)

⁶ Bibilya linoonga ira Yohova ngumwinyaa longomano. Vamwasa wen’na, liye unoromoliwa ira “mamburo okalamo longomano.” (Jer. 50:7) Ninga namapanducha ngu Yohova ba-i unooda kaathei-a makundo okuza yofwanelela na yo-ofwanelela. Voi liye ngochena, mathuulelwe vamwasa okuza yofwanelela na yo-ofwanelela mbavadhulu maningi, kwaranya mathuulelwi-u namwasa oi hora dhinjinji anododomi-iwa na mwasa oi nili odawa. (Sang. 14:12; Muleri Esaya 55:8, 9.) Voi napandhuchiwile muifwanafwani-o ya Nlungu, ninooda arela makundwee olongomana. (Maro. 1:27) Thitho ninosangalala nairangana vyevi. Dhiveliwana babi-u unoniiri-a ira nisazi-edhenga mwemo munaodele i-yo.—Aef. 5:1.

7. Mwasiwa ngwan’ni ninofuneela makundo onyindeleya? Onganimo.

⁷ Ninoganyali na mwasa o-arela makundo a Yohova okuza yofwanelela na yo-ofwanelela. N’nga munoidhiwa mwasee unoongela i-yo e-no? kathuulelani vyaireye a-akale ira bako lilothene likaangana makundwee okuza kopolo ya kobiri venango a-akale ira impereza iliyothene ya vyomanga ikaangana makundwee vamyasa ya muyezo. Vyongo kavyakale pama. Thitho akala mahospitali atoimwanana arela makundo ofwanelela vosamalela arenda vinooda iri-a ira arenda anango takwe. Ee-no arela makundo onyindeleya unovunela. Mofwanafwana na vyevyi makundo a Nlungu vamwasa wa vyofwanelela na vyo-ofwanelela, anovunela.

8. N’nga atu anoira longomano tanodedi-edha marayeli-o avi?

⁸ Yohova unorayeli-a atu ale anodilimbi-edha arela makundwe. Liye utolanyedha ira: “Olongomana anodha wachela ilambo yavathi, thitho anodha kala mwemo dhowa nodhowa.” (Sal. 37:29) Kathuulelani mwemo atu munofuna aliwa dhakalela ovwelana arendele thitho osangalala thadha-arelanga makundo a Yohova. Yohova unofuna ira mudhasangalale na ingumi ninga yeniyo. Onga vyaimbarimbari i-yo othene nitokaana myasa yovweya yoniiri-a ira nidhiveliwengana longomana! N’nga ninaire a-vi ira nidhiveliwengana maningi kalelo leli? Dhoweni nioneni vyongo viraru vinofwanela i-yo ira.

MUDHIVELIWENGANA MANINGI MAKUNDO A YOHOVA

9. N’nga chini inofuna nikami-a ira nidhiveliwengana longomana?

⁹ 1: Nidhiveliwangana mwinya makundwao. Ira nindhiveliwengana longomano ninofwanela dhiveliwangana maningi akaathi-idhe makundo okuza vyapama na vyothakala. Nadhiveliwangana maningi Yohova paevo vanofunechecha i-yo arela makundwee olongomana. Mwaifwanafwani-o, a-akale ira Adamu na Eva tanodhiveliwana Yohova tangavwele lamulo lee lolongomana.—Maro. 3:1-6, 16-19.

10. N’nga Abrahamu airile a-vi ira aidhiwe pama mathuulelo a Yohova?

¹⁰ I-yo kaninofuna ndawi-a vyongo ninga mwairile Adamu na Eva. Ninooda rambela vyevi akala ninoodhowanave funjedha vyokuza Yohova simbanga makalelwe thitho dhilimbi-edhanga ira nivechechenga mwemo munothuulela liye. Naira e-no ninodaroma ndhiveliwana maningi. Kathuulelani vya Abrahamu. Liye anodhiveliwana maningi Yohova. Angalive ira anorucheya vwechecha vyasakuule Yohova, liye anovwela thitho anodhilibi-edha ira am’mwidhiwe Yohova. Mwaifwanafwani-o angaidhiwile ira Yohova unofuna nonga Sodoma na Gomora, yoroma Abrahamu anoova ira venango “namatonga wailambo yothene yavathi,” unononga othakala vambo-i na olongomanene. Abrahamu aona ira vyevi ndivyo-ofwanelela moi e-no modhiyevi-a atofuka Yohova vyofuka vingasi. Yohova atom’mwakula moleva rima. Vamagomelovee Abrahamu atozindiyela ira Yohova unosakasaka rima wa mutu uliothene thitho kanolanga atu othakala vambo-i na o-odawene.—Maro. 18:20-32.

11. N’nga Abrahamu athonyi-edhe a-vi ira anomdhiveliwana thitho mroromela Yohova?

¹¹ Vyatapanyile Abrahamu na Yohova vyokuza masidade a Sodoma na Gomora vyatomkami-a maningi. Pyo-okaikela ira liye atoroma mdhiveliwana thitho nlemeza maningi Babee kwaranya wale. Vangavirile vyawa roromeleyawee wa Yohova watoowesedhiwa maningi. Yohova atom’mwandela ira avelele sembe mwanee odhiveliwiwa Isaki. Namwasa oi Abrahamu ali angam’mwidhiwile pama Nlungu, vahora yen’na kaafukileve vyofuka. Abrahamu atokozeela vyamwandele Yohova ira aviire. N’nga Kathuulelani piwa rimani wate liye vokozeela maira vyam’mwandele Nlunguvyo! Vinooneya ira Abrahamu anothuulela maningi vyafunjedhile liye vyokuza Yohova. Liye atoidhiwa ira kanaire iliyothene mo-olongoma venango mo-okaana udhivela. Movwelana na vyaongile rumiwi Paulo Abrahamu anororomela ira Yohova unomvenyathi-a mwanee Isaki. (Aeb. 11:17-19) Thitho Yohova ali angamlanyedhile ira Isaki unodhakala baba wa ziza nlukulu, mbwenye vahora yeniyo Isaki ali a-anakaena a-ima, Abrahamu anomdhiveliwana Yohova ee-no anororomela ira Babee hora dhothene unoira vyongo molongomana. Mwairoromelo liye atovwela angalive ira vyali vyorucha.—Maro. 22:1-12.

12. N’nga ninamsazi-edhe a-vi Abrahamu? (Salimo 73:28)

¹² N’nga ninamsazi-edhe a-vi Abrahamu? Mofwanafwana na liye ninofwanela dhowanave funjedha vya Yohova. Naira vyevi, ninodhakala vauxamwali na liye thitho ninodha roma mdhiveliwana maningi. (Muleri Salimo 73:28.) Ninodha funji-a ithuulela rima yi-u ira inikami-enga thuulela ninga munothuulela Nlungu. (Aeb. 5:14) Vyo-arelavovyee pyoi, ninodha konda mutu uliwethene adhaniwesedha ira niire vyongo vyothaka. Kaninodha rumela ira iliyothene inamsukwali-e Babi-u, venango nonga uxamwali-u na liye. N’nga ndindhila inango iivi inathonyi-edhe i-yo ira ninomdhiveliwana?

13. N’nga ninaire a-vi ira niirenga vyongo molongomana?

¹³ 2: Dambo na dambo mudhilimbi-edhenga ira mudhiveliwengana maningi longomana. Ira nikaena tutu lakopolo ninofuneela kaana thindhi ira niirenga mawaredhelo olimbi-a manungo dambo nlilothene. Mofwanafwana na vyevi, ninofuneela thitho kaana thindhi ira nidhiveliwengana makundo a Yohova olongomana. Vyevi kai vyorucha ira niviirenga dambo na dambo. Yohova ngololela thitho liye kanodedi-edha ira niirenga vyongo vyokwaranya vinooda i-yo. (Sal. 103:14) Liye unonisikimizela ira “unodhiveliwana mutu oira vyongo molongomana.” (Muleri Sanganikho 15:9.) Nadhilimbi-edhanga ira nikwakwaneli-edhe ifunelo inango vomlabela Yohova, vanofuneela thindhi ira niikwakwaneli-edhe. Vyevi pinofuneya nafunanga ira vyongo molongomana. Thitho Yohova unodha nikami-a moleva rima ira vira wahora, nidhaire pama vamwasa wen’na.—Sal. 84:5, 7.

14. N’nga “yobarelana vamirimani yolongomana” chini, n’nga mwasiwa ngwan’ni ndi yofuneya?

¹⁴ Mwaudhivela Yohova unonithuucha ira irana vyongo molongomana, kai tolo onyemela. (1 Ju. 5:3) Malomwee ndi vuneliwa unofuneela i-yo dambo lililothene muvyothene. Thuulelani mafwarameto akondo aongile rumiwi Paulo. (Aef. 6:14-18) N’nga ndi fwarameto iivi yabarela vamirimani vaanyakondo? Yali yobarelana vamirimani yolongomana, yeyo inoimelela makundo olongomana a Yohova. Mofwanafwana na yobarelana vamirimani yeyo inobarela rima, makundo olongomana a Yohova anobarela rimi-u opipirisa wenuo uli umutwi-u wawari. Moi e-no hora dhothene muonechechenga ira vamafwarametwinyu akondo vatokala thitho yovibarelana vamirimani yolongomana!—Sang. 4:23.

15. N’nga ninaware a-vi yodhibarelana varimani yolongomana?

¹⁵ N’nga ninaware a-vi yovibarelana varimani yolongomana? Ninaire vyevi vothuulela Makundo a Nlungu nasakulanga vyoira dambo lililothene. Nasakulanga myasa ira nionge, nyumbo dhoi nivuruwane, vyosangalali-a vyoi nivionele venango mabukhwi-u oi nileri, yoroma nidhifukenga ira: ‘N’nga ndinokala ndivolochanga vyoi a-vi rimani mwanga? N’nga Yohova unorumeli-a vyevi? Venango vinolimbi-a vya mararuo, uwalaga, idyani thitho vidhiveliwana oi mbamakalelo anoona Yohova kala o-olongomana?’ (Afil. 4:8) Akala vinosakula nyo pyovwelana na Yohova monokala murumelanga ira makudwee olongomana abarele riminyu.

16-17. N’nga lemba la Esaya 48:18 linonisikimizela a-vi ira ninooda a-rela makundo a Yohova?

¹⁶ N’nga mutoroma dungunyavo ira venango kamunodhowanave a-rela makundo a Yohova dambo na dambo thitho yawa iliyothene? Kathuulelani ifwanafwani-o yeyo Yohova i-ndi-edhe liye basa ili valemba la Esaya 48:18. (Muleri.) Yohova unonisikimizela ira “longomana wi-u, unodha kala ninga mabimbi abara.” Kafwanafwani-edhani ira mutoimela chereerani mwabara lukulu thitho munoona mabimbi tadhanga mo-o-iyedhela. N’nga munokumbanya ira venango dambo n’nango mabimbao anodha i-ya? Kabe! Namwasa oi mutoidhiwa ira mabimbao takanle taireyanga baranimo wavyawa vinjinji thitho anongo dhowanave.

¹⁷ Longomana winyu unooda fwanafwana namabimbi abarani. Mwafunanga sakula vyoira vamwasa unangwee, muromenga thuulela vinofuna Yohova ira nyo muirenga. Mwamala muirenga vyevyo. Akala vinofunanyo sakula vikale vyorucha moi a-vi hora dhothene, Babinyu waudhivela unodha ukami-ani ira mwa-atekenyeye thitho ira dambo nlilothene muirenga vyongo movwelana na makudwee olongomana.—Esaya 40:29-31.

18. Mwasiwa ngwan’ni ninofwanela rambela tonga atu enango movwelana namakundwi-u?

¹⁸ 3: Mu-iyenga mandhani mwa Yohova mwasa otonga atu enango. Vanodhilimbi-edha i-yo ira ni-arelenga makundo a Yohova olongomana, ninofwanela rambela tonga atu enango venango dhionanga ira nili olongomana kwaranya atu enango. Malo Mofwanafwani-edhela vinoira i-yo na vinoira atu enango nodhionanga ira ninoira pama maningi, kalanga ninga nitokaana ufulu otonga atu enango movwelana namakudwi-u, nithuulelenga ira Yohova “ngunamatonga wavailambo yothene yavathi.” (Maro. 18:25) Yohova kaniva-idhe izo yeyo. Thitho Yesu atoonga ira: “Mu-iye tonga atu enango ira nyo thitho mwa-atongiwe.”—Mat. 7:1.b

19. N’nga Yosefe athonyi-edhe a-vi ira aona ira Yohova ngofwanelela tonga?

¹⁹ Kathuulelani ifwanafwani-edho ya Yosefe wenuo ali mutu olongomana. Liye atorambela tonga atu enango tangani-avo amwirele vyothakala. Abaleene tatom’moni-a nyarwa mguli-a wuudhaari thitho tatomsikimizeli-edha babiwa ira ali angapiwile. Vangavirile vyawa Yosefe atogumana thitho naatu a banjanimwee. Namwasa oi vahora yeniyo ali namatonga wakopolo, Yosefe angaodile atonga abalee mwauwalanga thitho aweli-edha. Abaleao taova ira venango ndi vinofuna liye ira angalive ira tanodhivwela tangaranga namwasa wa vyongo vyam’mwirele aliwa. Mbwenye Yosefe atoaongana moalimbi-a ira: “Kamuove. N’nga miyo nditotukula limburo la Nlungu?” (Maro. 37:18-20, 27, 28, 31-35; 50:15-21) Modhiyevi-a Yosefe atozindiyela ira ngu Yohova una izo yotonga abaleao.

20-21. N’nga ninaire a-vi ira na-adhionenga ira nili apama kwaranya atu enango?

²⁰ Mofwanafwana na Yosefe nino-iya mwasa otonga mandhani mwa Yohova. Ninorambela dhioneli-edha kala ninga nitomala idhiwelatu vyongo viiri-idhe abali naarongoli-u ira vyongo vinangovyee. I-yo kaninoidhiwa vili rimani mwamutu mbwenye Yohova ekene “ngunosakasaka vifunelo vya mutu.” (Sang. 16:2) Liye unodhiveliwana atu othene mo-ovwelani-a namakalelwiwa venango uulukulele aliwa. Thitho Yohova unonilimbi-a ira “nidhimbinuche rimi-u.” (2 Akor. 6:13) I-yo thitho ninofunechecha ira nidhiveliwengana abali naarongoli-u othene a-kala atonganga.

²¹ Vyevi vinothapulela thitho ira kaninofwanela tonga atu oi kai abali naarongoli-u. (1 Timo. 2:3, 4) N’nga nyo munomtonga balinyu a-ali wa Mboni ira “wen’na kanaroma imbarimbari?” Kabe! Ira vyevi ndidhiulukuli-a thitho dhiona ira muli wapama kwaranya liye. Yohova unodhowanave velela ngari “waatu othene” oi tachinyuwe. (Mayir. 17:30) Hora dhothene muthuulelenga ira kai longomana, dhionanga ira muli olongomana maningi kwaranya atu enango.

22. Mwasiwa ngwan’ni mutosikimizela rima ira mudhiveliwengana longomana?

²² Nadhiveliwangana makundo a Yohova olongomana ninokala osangalala thitho ninolimbi-a atu enango ira tanidhiveliwengana, namdhiveliwana Nlungwi-u. Dhoweni na-a-iye kaana “ndhala natona la longomana.” (Mat. 5:6) Kanikaikele ira Yohova unoona thindhi li-u thitho hora dhothene unosangalala aniona nidhowanganave ira vyongo vyofwanelela. Vyongo vyo-olongomana vanowenjedheleya aliwa muilamboi kanikumbanye. Hora dhothene nithuulelenga ira “Yohova unodhiveliwana atu olongomana.”—Sal. 146:8.