Dhowananive kozeela dambo la Yohova

1. N’nga ninofwanela iran’ni ira nidhavulumuwe vadambo la Yohova?

BIBILYA laonganga vya “dambo la Yohova,” linothapulela dambo lelo linofuna liye dhanonga amwidanee novulumucha atwee. Ndulimu vahora inango Yohova atoononga amwidanee. (Esaya 13:1, 6; Zakiy. 13:5; Zef. 1:8) Malamboano “dambo la Yohova” linodha roma nonongiwa wa Babulo nlukulu thitho linodha fiya vari va kondo ya Armagedo. Ira nidhavulumuwe “vadambo” leli, ninofwanela kozeela va-eni. Yesu atoofunji-a ira kaninofwanela kozeela “nyarwa ilukulu” mbwenye ninofwanela “dhowanave kala okozeyene.”—Mat. 24:21; Luka 12:40.

2. N’nga bukhu la 1 Tezalonika linanikami-e a-vi?

² Mukartalee lovudeleliwa loroma lalembele liye Makristau oroma au Tesalonika, rumiwi Paulo ato-indi-edha basa vifwanafwani-o vingasi vofuna akami-a ira tadhowenave kozeela dambo nlukulu la Yohova. Liye atoidhiwa ira dambolo kalali vakwikwi vahora yeniyo. (2 Atez. 2:1-3) Mbwenye atoalimbi-a abaleao ira takozeelenga dambolo ninga linofiya bebe-i thitho i-yo ninofwanela i-ndi-edha basa malagi-o enala. Dhoweni nitapanyeni mwemo mwaongele liye vyongo vyo-arelavi: (1) moda munofuna dhafiya dambo la Yohova, (2) atu a-anofuna dha vulumuwa va damboli thitho (3) mwemo munakozeele i-yo ira nidhavulumuwe va dambo leli.

N’NGA DAMBO LA YOHOVA LINODHA FIYA MOI A-VI?

3. N’nga dambo la Yohova linodha fiya a-vi ninga mbavwa nama-iyu? (Muone thitho iruthiruthi.)

³ “Ninga mbavwa nama-iyu.” (1 Atez. 5:2) Enala mbamadhu oroma mwamadhu mararu oongiwa muifwanafwani-o ya udha wa dambo la Yohova. Hora dhinjinji mambavwa tanoira vyongo mombaranya thitho nama-iyu, vahora yeniyo atu ya-anodedi-edhala aliwa. Mofwanafwana na vyevi, dambo la Yohova linodhadha mo-odedi-edhela thitho vinodhakala vyorurumucha waatu anjinji. Masiki Makristau aimbarimbari tanodha dabwa namwasa wa mwemo munofuna dhaireela vyongo mombaranya. Mbwenye mo-iyana naatu othakala, i-yo kaninodha nongiwa.

4. N’nga dambo la Yohova linofwanafwana a-vi na vyopa vya dambo lobala?

⁴ “Ninga upa wa vobala wa-iyana wawise.” (1 Atez. 5:3) I-yana wawise kanaode idhiwelatu hora ya imbarimbari yofuna bala mwana. Mbwenye liye kanokaikela ira hora yofuna bala inodha fiya. Horiyo inofiya morurumucha, ee-no unovwa upa ulukulu thitho kavali yongo iliyothene inaimwanani-e ira vyevyi viireye. Mofwanafwana na vyevi, i-yo thitho kaninoidhiwa hora ya imbarimbari yeniyo dambo la Yohova vanofuna aliwa roma. Mbwenye kaninokaikela ira dambolo, linodha fiya thitho ira tonga wa Nlungu waatu othakala unodhakala orurumuncha thitho o-otaweya.

5. N’nga nyarwa ilukulu inofwanafwana a-vi na mabingo ocha?

⁵ Ninga mabingo ocha. Ifwanafwani-o yaneraru ya rumiwi Paulo inoonga vya mbavwa abanga nama-iyu. Mbwenye vaikundu yei, liye unochinja mwemo munoongela liye ifwanafwani-o thitho unofwanafwani-edha dambo la Yohova namabingo ocha. (1 Atez. 5:4) Atu oba tanooda pingeya maningi na vinoira aliwa thitho undhe unooda achela morurumucha, vyevyo vinooda airi-a ira taoniwe naatu. Mofwanafwana na vyevi, va nyarwa ilukulu atu enao tali ninga mambavwa thitho tali muisini vodhowanave irangana vyongo vyoi Nlungu kanosangalalana, tanooda oneela. Mo-iyana naatu enala i-yo ninokala okozeya vorambela makalelo enao Yohova a-anosangalalana liye noiranga “yongo iliyothene yapama, yolongomana na yaimbarimbari.” (Aef. 5:8-12) Vasogolovee Paulo atoonga thitho vifwanafwani-o vinli vyolandana vyoonga vyaatu enao a-anofuna dha vulumuwa.

N’NGA MBAANI A-ANOFUNA DHA VULUMUWA VADAMBO LA YOHOVA?

6. N’nga atu anjinji tanogona mundhila iivi? (1 Atezalonika 5:6, 7)

⁶ “Atu ogona.” (Muleri 1 Atezalonika 5:6, 7.) Paulo atoafwanafwani-edha atu ta-anofuna dhavulumuwa vadambo la Yohova naatu enao tanogona. Aliwa katinoidiwa vyongo vinoireya venango hora yaviranga. Ee-no katinazindiyele vyongo vyofuneya vyevyo vinoireya venango iravo yongo. Malamboano atu anjinji tanaagona mwauzimu. (Aroma 11:8) Aliwa katinororomela umboni oi ninokala “mumalambo omari-a” thitho ira nyarwa ilukulu inodha roma vachineneeva. Vyoireya vilukulu vya vailamboi vinooda iri-a atu enango vyenyathi mwauzimu noroma oni-a ifunelo ya milanyu ya Umwene. Mbwenye atu anjinji tanoroma thitho gona malo mokala methove. Masiki atu enango enao tanororomela ira utokala tongiwa, tanoona ira vyevi vili undendai maningi. (2 Pe. 3:3, 4) Mbwenye i-yo dambo nlilothene ninozindiyela ira malangi-o oi nikale methove, mbofuneya maningi.

7. N’nga atu tanodedi-edhela thakaleliwa wa Nlungu tanofwanafwana a-vi naatu olezela?

⁷ “Atu enao tanolezela.” Rumiula atoofwanafwani-edha atu tanodedi-edhela thakaleliwa wa Nlungu naatu olezela. Mutu alezela unodembuwa zindiyela vyongo thitho kanosakula vyoira mwazelu. Mofwanafwana na vyevi, atu amakalelo othakala katinovwela vyowenjeli-a vya Nlungu. Aliwa tanosakula irana vyongo vinaairi-e ira tanongiwe. Mbwenye Makristau tanowandeliwa ira tanofwanela kala methove ira takale othuulela pama. (1 Atez. 5:6) Mutu unango wadodoliso vamwasa wa Bibilya atoonga ira thuulela pama weu ndi “kaana mathuulelo opwaseya, o-otekenyeya thitho fwanafwani-edha pama vyongo, ndi vyevyo vinomkami-a mutu sakula pama vyoira.” Mwasiwa ngwan’ni ninofwanela kaana mathuulelo opwaseya thitho o-otekenyeya? Kaana mathuulelo enala, unooda nikami-a ira na-avolowelenga vyandale venago vyoireya vya vailamboi. Vevo dambo la Yohova vanowandamela aliwa ninooda kanyi-edhiwa maningi ira niirengana vyongo ninga vyevi. Mbwenye kaninofwanela kumbanyanga ira ninaire a-vi nagumanana vyongo ninga vyevi. Zimu wa Nlungu unodha nikami-a kaana mathuulelo opwaseya thitho kala atu osakula vyongo mwazelu.—Luka 12:11, 12.

N’NGA NINAKOZEELE A-VI DAMBO LA YOHOVA?

8. N’nga lemba la 1 Atezalonika 5:8, linothonyi-edha a-vi makalelo enao ananikami-e kala methove thitho thuulela pama? (Muone thitho iruthiruthi.)

⁸ “Niware vyovibarelana varimani . . . na . . . ichapowa.” Paulo atoonifwanafwani-edha na anyakondo enao tali okozeya thitho wara vyowara vyau nyakondo. (Muleri 1 Atezalonika 5:8.) Nyakondo akala vabasanivee, hora dhothene unodedi-edheliwa kala okozeya koma kondo. Saasawa thitho na i-yo. Ninodhowanave kozeela dambo la Yohova vowara yovibarelana vamirimani yairoromelo, yaudhivela thitho ichapowa yaivulumucho. Makalelo enala anooda nikami-a maningi.

9. N’nga iroromelwi-u inonivunela a-vi?

⁹ Yovibalelana vamirimani yanoobarela rima wa nyakondo. Iroromelo na udhivela, unovunela rimi-u opipirisa. Makalelwala anonikami-a ira nidhowenave mlambela Nlungu thitho msazi-edha Yesu. Iroromelo inonikami-a kala osikimizela ira Yohova unodha niva-a yotuva namwasa omfunafuna na rima othene. (Aeb. 11:6) Unonikami-a thitho kalave ororomeleya wa namasogololi-u Yesu, angalive ira ninogumanana nyarwa. Ninooda limbi-a iroromelwi-u ira nivilelenga nagumanangana nyarwa. Vothuulela vifwanafwani-o vya malamboano vyaatu enao takanleve ororomeleya angalive ira tanooni-iwa nyarwa venango gumanana nyarwa dhafuma. Ninooda rambela ngo-i odhiveliwana kobiri vosazi-edha atu enao tasakunle kaana ingumi yo-ofuna vyongo vinjinji naifunelo yoi ta-elenga vyongo vya Umwene valimburo loroma.b

10. N’nga mdhiveliwana Nlungu thitho atu, unonikami-a a-vi ira nivilelenga nyarwa?

¹⁰ Udhivela ngofuneya maningi ira nikale methove thitho nithuulelenga pama. (Mat. 22:37-39) Mdhiveliwana Nlungu unonikami-a ira nivilelenga nalabanga basa lolaleela angalive ira irana vyevi unooda nidhi-edhela nyarwa. (2 Timo. 1:7, 8) Namwasa odhiveliwana atu ta-anomlambela Yohova, ninodhowanave laleela tatamoniwi-u angalive ira ninolaleela vatelefonini venango lemba makarta. Kaninofooka namwasa oi ninodedi-edhela ira dambo n’nango, atu enela tanodha chinja noroma irana vyongo vyapama.—Zakiy. 18:27, 28.

11. N’nga dhiveliwana Makristau afwi-u unonikami-a a-vi? (1 Atezalonika 5:11)

¹¹ Dhiveliwana atu unothangani-avo dhiveliwana Makristau afwi-u. Ninothonyi-edha udhivelula “vodidili-ana thitho limbi-ana.” (Muleri 1 Atezalonika 5:11.) Mofwanafwana na anyakondo enao tanokami-ana va hora ya kondo, i-yo thitho ninolimbi-ana unango nafwee. Pyaimbarimbari ira nyakondo unoodha mpei-a nyakondo fwee vahora ya kondo mbwenye kaiira unoira vyevi mofuna. Mofwanafwana na vyevi, i-yo thitho kaninodha sukwali-a abali naarongoli-u moira funa thitho aweli-edha yothakala. (1 Atez. 5:13, 15) Ninothonyi-edha udhivelula volemeza abali enao tanosogolela pingo. (1 Atez. 5:12) Vevo Paulo vyalemba liye kartali vali va-anavire vyawa romela vevo pingo wau Tezalonika vyakathei-iwile aliwa. Vinooneya ira Abali enao tasogolela tali ta-anaidhiwe vyongo vinjinji Venango tanoodawi-a vyongo vinango. Mbwenye aliwa tanoofuneya lemeziwa. Kwaranya wale nlilothene, nyarwa ilukulu yadharoma ninodha funeya manigni nyindela malangi-o enao andimuwa apingoni mwi-u anofuna aliwa dhaniva-a. Venango vahoriyo kavinodha kala vyoodeya wachela malangi-o okumela sede li-u venango ofesi ya tambi. Ee-no pyofuneya dhiveliwana thitho funjedha lemeza andimuwa avapingoni va-eeni. Mo-obala moda unofuna dakalela vyongo vahoriyo, ninofwanela dhowanave kala othuulela pama a-thuulelanga vyevyo vinodawi-a aliwavyo thitho nituulelenga ira Yohova dhela mwa Kristu unosogolela alombwana ororomeleyala.

12. N’nga idedi-edho inovunela a-vi mathuulelwi-u?

¹² Ninga mwemo ichapowa munobarela aliwa muru wa nyakondo, idedi-edho yi-u yaivulumucho inobarela mathuulelwi-u. Namwasa okaana idedi-edho yolimba, ninoidhiwa ira vyongo vinaniva-e ilamboi pyapezi. (Afil. 3:8) Idedi-edho yi-u inonikami-a kala okurudheya thitho o-otekenyeya. Mwemu pumwemo thitho mwakalele aliwa na Wallace na Laurinda, unolaba wu Afrika. Mwamasumana mararu nlilothene atowachela milanyu yoi namabalee utokwa. Mbwenye namwasa wa sau wa COVID-19, aliwa kataodile dhowa makala vambo-i naabaliwa vamakwelonivo. Wallace atoolemba ira: “Idedi-edho yoi atu okwa tanodha venyathi-iwa, inondikami-a ira ndithuulelenga a-kala mwemo mwakalele vyongo mumalambo omari-a aingumi yiwa, mbwenye mwemo munofuna dhakalela malambo oroma aingumi yiwa muilambo ipya. Idedi-edhoi inondididili-a rima ndakala osukwala.”

13. N’nga ninaire a-vi ira niwachelenga zimu ochena?

¹³ “Kamutimi-e mulo wa zimu.” (1 Atez. 5:19) Paulo atoofwanafwani-a zimu ochena na mulo wenuo unokala ninga uli warimwi-u. Nakaana zimu wa Nlungu ninokala athindhi thitho ofunechecha irana vyongo vyapama na vyongo vyofwanelela thitho ninokaana kopolo dhomlabela Yohova. (Aroma 12:11) N’nga ninaire a-vi ira niwachelenga zimu ochena? Niuvepenga, funjedha Madhu a Nlungu thitho kalave mugulu losogoleliwa na zimu wa Nlungu. Irana vyevi, unodha nikami-a kaana “makalelo enao zimu ochena anokumi-a aliwa.”—Agal. 5:22, 23.

14. N’nga ninofwanela rambelan’ni ira nidhowenave wachela zimu wa Nlungu? (Muone thitho iruthiruthi.)

¹⁴ Nlungu aniva-a zimwee ochena, ninofwanela ira polepole ira “na-atimi-e mulo wa zimu.” Nlungu unovelela zimwee waatu enao anodhowanave thuulela thitho kaana mathuulelo apama. Lliye unooda i-yachi niva-a zimwee ochena, akala ninodhowanave thuulela vyongo vyothakala noviirangana. (1 Atez. 4:7, 8) Thitho ira nidhowenave wachela zimu ochena, “kaninyozenga madhu a ulosi.” (1 Atez. 5:20) Va versoli madhu oi “ulosi,” tanoimelela milanyu yoveleliwa na zimu wa Nlungu thangani-avo vyoonga dambo la Yohova thitho dambolo nli vaduzi. Hora dhothene ninothuulela vyadamboli thitho kaninothuulela ira Armagedo kunofiya muhori-u. Malomwee, dambo nlilothene ninothonyi-edha ira ninolithuulela thitho dedi-edha ira lidhafiye vachineneeva, vodhowanave kaana makalelo apama thitho pingeya namabasa othonyi-edha ira nili “odhivelelela wa Nlungu.”—2 Pe. 3:11, 12.

“MUSIKIMIZELENGA VYONGO VYOTHENE”

15. N’nga ninarambele a-vi nami-iwa na makundo ainyengo thitho vyonama vya viwanda? (1 Atezalonika 5:21)

¹⁵ Vachineeva atu enao tanomruni-a Nlungu, mwandhila inangwee anodha mwadha milanyu yoonga ira: “Bata na rendele!” (1 Atez. 5:3) Vyonama vya viwanda vinodha kala valivothene vailamboi thitho vinodha dimeli-a atu anjinji. (Apok. 16:13, 14) N’nga a-vi wa i-yo vano? Kaninodha nami-iwa akala “ninosikimizela [venango “wesedha”] vyongo vyothene.” (Muleri 1 Atezalonika 5:21.) Madhu Aigiriki enao tathapuleliwile ira “sikimizela,” ano-indi-edhiwa basa voonga ndhila yeniyo atu ino-indi-edhela aliwa basa vofula mafero apereso yavadhulu. Ee-no ninofwanela wesedha vyongo vinovwa i-yo venango leri ira nisikimizele akala pyaimbarimbari. Irana vyevi, wali wofuneya maningi wa Makristau au Atesalonika thitho vinodha kala vyofuneya maningi wa i-yo vevo nyarwa ilukulu vanokwivela aliwa. Malo mororomelanga vilivyothene, nino-indi-edha basa dodoliso li-u lothuulela ira nifwanafwani-edhe na vileri i-yo venango uvwa na vyevyo Bibilya thitho gulu la Yohova vinoonga aliwa. Nairangana vyevi, kaninodha nami-iwa na vyonama vya viwanda.—Sang. 14:15; 1 Timo. 4:1.

16. N’nga nina idedi-edho yosikimizela iivi, n’nga nili osikimizela iran’ni?

¹⁶ Ninga gulu, arumiwi a Nlungu tanodha vulumuwa vanyarwa ilukulu. Mbwenye uliothene vaekene kanoidhiwa vya bebe-i. (Yak. 4:14) Akala ninodha kaana ingumi vahoriyo venango ninodha kala ningakwide, ninodha va-iwa yotuva ya ingumi yo-omala akala ninokalave ororomeleya. Ozoziwa tanodha kala vambo-i na Kristu dhulu. Amabila enango anodha kala paradaizoni wa vailambo yavathi. Dhoweni othene nithuulelenga maningi vya idedi-edho yi-u yosangalali-a thitho dhowanave kozeela dambo la Yohova!