Vyofuka Vyokumela Waalimbo Leri
N’nga Bibilya linoonga a-vi vamwasa olumbela?
Lumbela mbamadhu anothonyi-edha “lanyedha yongo jinango thitho hora dhinjinji malimbo lumbeluo unoongavo Nlungu kala ninga . . . mboni wa mutuo.” Lumbela unooda kala madhu oonga venango oira alemba.
Atu enango anooda thuulela ira lumbela kai ofwanelela namwasa oi Yesu aongile ira: “Kulumbulenga . . . Uirenga sikimizela ira wadhi ‘Ee’ akaledi ee, thitho waonga ira ‘Kabe’ akale kabe, voi madhu owenjedhela veva anokumela wa othakaluo.” (Mat. 5:33-37) Mbwenye Yesu anoidhiwa ira movwelanana lamulo la Mose hora dhinango atu tafuneela ira talumbele thitho arumiwi enango ororomeleya tatoromanga lumbela. (Maro. 14:22, 23; Ekis. 22:10, 11) Tanoidhiwa thitho ira Yohova atolumbela malumbelo o-iyana-iyana. (Aeb. 6:13-17) E-no, veva Yesu kaathapulela ira kaninafwanela lumbelanga kabe. Mo-iyana na vyevyo kaninofwanela lumbelanga vajongo jo-osimbwa funeya venango lumbelelanga vyongo vyo-okaana yothapulela. Nionenga ira, ira vyongo movwelana namadhwi-u ngumwasa lukulu maningi e-no ninofwanela iranga vyongo vinaonga i-yo.
N’nga munaire a-vi akala ira mutowandeliwa ira mulumbele? Joroma, musikimizelenga ira munodha iradi vinafunanyo lumbelavyo. Akala ira munokaikela vinokala pama ira mwa-alumbele. Madhu a Nlungu anowenjeli-a ira: “Tipama ira wa-amlanyedhe i-yani-ana lanyedha, mbwenye a-kwakwaneli-edha vilanyedhileweevyo.” (Namal. 5:5) Yanambili, muthuulelenga likundo lamalembani loonga lumbela thitho mwamala muirenga vyongo movwelanana na ithuulela rima yinyu. N’nga makundo enango amalemba enala mbaavi?
Lumbela unango kunaruni-ana na ifunelo ya Nlungu. Mofwanafwani-a, Mboni dha Yohova anooda lumbela vakazamentoni viwa. Lumbela weu vinalanyedha aatuvi vinokala moda olumbela. Lombwana unathela na-iyana unatheliwa anooda sikimizelana vamethoni va Nlungu na vaatu ira “anodha dhivelana, samalelana thitho lemezangana vahora yothene inofuna [aliwa] ira takaena ingumi am’mbinlene.” (Atu enango katinooda onga mokwakwanela madhwiwa tathelangana mbwenye anooda lumbela vamethoni va Nlungu.) Vyaira e-no aliwa anokala lombwana na-iyanee thitho anonfuneela kala banjanimo waingumi yiwa yothene. (Maro. 2:24; 1 Akor. 7:39) E-no tundu wen’na olumbela kofwanelela thitho kovwelana na ifunelo ya Nlungu.
Tundu unango olumbela o-ovwelanana na ifunelo ya Nlungu. Makristau aimbarimbari katinalumbela ira anodha koma kondo votetezela ilambo inokala aliwa venango lumbela oi anodha i-yachi mroromela Nlungu namwasa oi irana vyevi unodha kala uthwa malamulo a Nlungu. Makristau “katili ikundo yailambo,” e-no aliwa katinavolowela ndale thitho kondo dha vilambo.—Juwau 15:19; Esaya 2:4; Tiy. 1:27.
Tundu unango olumbela unowendelana ithuulela rima ji-u. Hora dhinango, ninofwanelela thuulela mopwasedha tundu unafuna i-yo lumbela vothuulelanga malangi-o a Yesu oonga ira: “Muvelele vyongo vya Kaisara wa Kaisara, mbwenye vya Nlungu wa Nlungu.”—Luka 20:25.
Mofwanafwani-a, nifwanafwani-edhe ira Kristau unosakanyi-a madukumento ofuna dhowana ilambo inango e-no utozindiyela ira, ira vyevyo viodeye unofuneela lumbela ira unodha kala ororomeleya ilamboni unaaliyewo. Akala ilamboyo lumbela tundu wenuo unothapulela ira mutu unodha irana vyongo mo-ovwelana na lamulo la Nlungu, ithuulela rima ya Kristauo kajinamlola ira alumbele, i-yavo akala ira anamatonga tam’rumeli-a ira achinje madhu enango na enango wari molumbelamo ira avwelanena ithuulela rimejeejo.
Lumbela ira unodha kala ororomeleya, oi madhu enango atochinjiwa unodha kala ovwelana na likundo nli va Aroma 13:1, linoonga ira: “Mutu uliwethene avwelenga anamatonga alukulu alukulu.” E-no Kristau unooda ona ira kavali jodaweya vajilumbele liyejo namwasa oi vyevyo piyevyo vinofuna Nlungu ira Makristau tairengana.
Ithuulela rima inooda i-nda basa thitho akala Kristau awandeliwa ira a-indi-edhe basa jongo jinango venango a-indi-edhe basa mandhee mwandila inango volumbela. Walelene, atu au Roma naatu Asukuti, tano-indi-edhecha basa masarasadiwa volumbela vothonyi-edha kopolo dha nlungwiwa wa kondo thitho sikimizela ira mutu unalumbeluo unodha kala ororomeleya. Agiriki tanoimeli-a mandhiwa volumbela. Voira vyevi tathonyi-edha ira anozindiyela ira vatokala mwinango wakopolo unavwa thitho unaona vinaireyavyo i atu anofwanela wakulela selu wa liye.
Pyaimbarimbari ira arumiwi a Yohova katinalumbela vo-indi-edha basa izindiyelo jilijothene jailambo yovwelanana na lambela onama. Mbwenye n’nga vinokala a-vi akala ira thiribunale tauvepani ira mutukule Bibilya linyu volumbela ira munodha onga umboni waimbarimbari? Vevo munooda sakula ira e-no voi malembani mutokala vifwanafwani-edho vyaarumiwi ororomeleya oi volumbela tatoira vyongo vinango vyene. (Maro. 24:2, 3, 9; 47:29-31) Pofuneya thuulela ira mwalumbelanga mwatundu wenuo, munosikimizela vamethoni va Nlungu ira munaonga vyaimbarimbari baa-i. Munofwanelela kozeela wakula moona rima yofuka iliyothene inofuna nyo fukiwa.
Voi ninoona uxamwali-u na Yohova kala wa pereso yavadhulu, ninofwanelela lobela thitho thuulela mopwasedha tundu unofuna i-yo lumbela mwamoda uliwethene navepiwa ira niire e-no, infuneloyee choi nisikimizele ira tundu olumbeluo kunaruni-ana na ithuulela rima ji-u venango runi-ana namakundo a Bibilyani. Mwasakula ira mulumbele vayolumbela iliyothene muonechechenga ira munoira vyongo movwelanana na vinalumbela nyoovyo.—1 Pe. 2:12.