Mwasiwa ngwan’ni malamboano kaninokoma kondo ninga mwemo mwairela Aisraeli?
“VAHORA yakondo yanambili yavailambo yothene, ndimuwa unango wa anyakondo a Nazi, atowandela gulu n’nango la Mboni dha Yohova mwauwali ira Akala uliwothene wa nyo unokonda koma kondo volimbanana ilambo ya Fransa venango Inglatera kuongela ira mwethene munopiwa!” Angalive ira anyakondo a Nazi tali vevo na mafarametwiwa oopi-a, kavali m’mbo-i mwaabali-uao arumenle koma kondwiyo. Wewo wali limba rima ulukulu. Yei ndi ifwanafwani-o yapama yothonyi-edha mwemo i-yo a Mboni dha Yohova munoonela i-yo vamwasa wa kondo. Angalive ira ninotuchiwa ira ninopiwa i-yo ninokonda koma kondo dhinoiriwa muilambwila.
Mbwenye kai atu othene anoonga ira mbamakristau anoona ee-no. Anjinji anororomela ira Kristau unokoma kondo ira avunele ilamboyee thitho anofwanela ira e-no. Aliwa anooda onga ira: ‘Aisraeli tali atu a Nlungu thitho tanookoma kondo. N’nga mwasiwa ngwan’ni Makristau malamboano katinofwanela ira e-no?’ Nyo munawakule a-vi yofuka yei? Munofwanela awandela ira ninga mwemo mwali aliwa na Aisraeli pyo-iyana maningi na moda uli atu a Nlungu malamboano. Dhoweni nitapanyeni vyongo 5 vyothonyi-edha i-yana wewu.
1. ATU OTHENE A NLUNGU TALI MUILAMBO IMBO-I
Walelene, Yohova atosakula tundu wa Anaisraeli ira takale atwee. Liye anoaona ninga “fumee yavakundu vari vaatu othene.” (Ekis. 19:5) Nlungu atoava-a thitho ilambwiwa. Ee-no Nlungu aatonga Aisraeli ira tamakome kondo na maziza enango, aliwa katapa anamalambela afwiwa.a
Malamboano, atu anolambela Yohova anokumela “muilambo iliyothene, ziza nlilothene, tundu uliothene na iongelo iliyothene.” (Apok. 7:9) Ee-no akala ira atu a Nlungu anokoma kondo, anooda komana venango panana naanamalambela afwiwa.
2. YOHOVA ANOTONGA AISRAELI IRA TAMAKOME KONDO
Walelene, Yohova ngwenuo asakula hora thitho mwasee Aisraeli wafunela aliwa makoma kondo. Mwaifwanafwani-o, vopa Akanani enao taidhiweya namwasa olambela mafwano, ira vyamararuo vyonyakavala maningi thitho velela sembe a-ima, Nlungu atotonga Aisraeli ira tamaawanena. Yohova atotonga Aisraeli ira vyevi, naifunelo yoi Aisraelao ta-atukulele makalelwiwa othakala tadhowa mavolowa ilambo yolanyedhiwa. (Lev. 18:24, 25) Tangavolowile muilambo yolanyedhiwa, hora dhinango Nlungu anoarumeli-a Aisraeli koma kondo, vofuna avunela wa amwidaniwa enao taanyingalela. (2 Sam. 5:17-25) Mbwenye kavali hora yarumeli-idhe Yohova Aisraeli makoma kondo mothuulela okene. Aliwa tadhowa makoma kondo vo-okala rumeli-iwa na Yohova, hora dhinjinji vyongo kavyaawendela pama.—Num. 14:41-45; 2 Limb. 35:20-24.
Malamboano, Yohova kanowandela atu ira takomenga kondo. Vilambo vinokomana vofuna limbi-a vyofuna vyaatu, a-kala vya Nlungu. Aliwa anokoma kondo namwasa ofuna malo manjinji, kobiri dhinjinji, i-yana vamwasa wandale, venango i-yana vamwasa wa makundo anowendela aliwa. N’nga a-vi vyaatu enao anoonga ira anokoma kondo mudhina la Nlungu ira tavunele religiau liwa, venango upa amwidani a Nlungu? Yohova unodha vunela atwee thitho nonga amwidanee sogolou vakondo ya Armagedo. (Apok. 16:14, 16) Vakondo yen’na, Nlungu unodha i-ndi-edha basa gululee lakondo ladhulu a-kala atwee.—Apok. 19:11-15.
3. AISRAELI KATAPA ATU ENAO TATHONYI-EDHE IROROMELO
N’nga malamboano Nlungu unokomela kondo ilambo inangwee ninga mwemo mwairela liye na Aisraeli wu Yeriko?
Walelene, anyakondo Aisraeli hora dhinjinji tanothonyi-edha tangaranga waatu enao taoni-idhe ira tanororomela Nlungu thitho atu enao Yohova aatongile liye ira mbofwanela piwa. Kaonani vifwanafwani-o vilivi: Angalive ira Yohova atotonga ira sidadi la Yeriko linongiwe, Aisraeli katapide Rahabi na banjalee, namwasa oi liye atothonyi-edha iroromelo. (Yoswa 2:9-16; 6:16, 17) Vangavirile hora sidadi lothene la Agibioni kalanongiwile namwasa oi Agibeonao tatothonyi-edha ira tanoova Nlungu.—Yoswa 9:3-9, 17-19.
Malamboano, vilambo vyakomangana vinopa thitho atu ale anororomela Nlungu. Thitho hora dhinango atu oi katidawile thitho kavinoakuza, tanopiwa.
4. AISRAELI TANOFWANELA A-RELA MALANGI-O A NLUNGU VOKOMA KONDO
Walelene, Yohova afuna ira anyakondo Aisraeli takomenga kondo vo-arela malangi-oe. Mwaifwanafwani-o, hora dhinango Nlungu anoawandela atweao ira tamaaidhiwi-e atu anofuna aliwa maawananao “makundo arendele.” (Dotor. 20:10) Yohova anoodedi-edhela thitho ira aliwa takaengana makalelo apama thitho misasani mwiwa mukalenga mwauyesa. (Dotor. 23:9-14) Anyakondo orungunuwa hora dhinjinji tanoo-indela a-iyana a matatamu agonji-a aliwa. Mbwenye Yohova kaarumeli-a Aisraeli irana vyevi. Thitho “Mwiisraeli anooda thela i-yana o-indiwa vakondoni vasogolo voi vatovira mwedi, romela vagonji-iwile sidadi.”—Dotor. 21:10-13.
Malamboano, vilambo vinjinji vinorumelelana vamalamulo anofwanela aliwa a-rela vokoma kondo. Angalive ira malamulwala ifuneloyee kuvunela atu oi kavinoakuza, pyovwi-a tangaranga ira hora dhinjinji katino-areliwa.
5. NLUNGU ANOKOMELA KONDO ATWEE
N’nga vakondo dha malamboano atu ororomeleya anovulumuchiwa ninga mwemo Rahabi na a banjalee mwavulumuchiwile aliwa vakondo wu Yeriko?
Walelene, Yohova anokomela kondo Aisraeli, thitho hora dhininji anoakami-a ganyali modabwi-a. Mwaifwanafwani-o, n’nga Yohova aakami-idhe a-vi Aisraeli gonji-a sidadi la Yeriko? Vo-arela malangi-o a Yohova, Aisraeli “tatoroma kuwa mwakopolo kuwela kondo thitho panda wa sidadi watoroma ugwa,” vyevi vyatoakami-a ira taungonji-e mo-orucha. (Yoswa 6:20) N’nga vyali a-vi ira taganyali va kondo yolimbanana Aamoni? “Yohova atoagwi-edha mabwe malukulu a matalala kumela dhulu. . . . Apiwile na matalalao tali anjinji kwaranya Aisraeli apide aliwa na sarasada.”—Yoswa 10:6-11.
Malamboano, Yohova kanakomela kondo ilambo iliyothene. Umwenee wenuo mwenee ngu Yesu Kristu, “kuli ikundu yailamboi.” (Juwau 18:36) Malomwee Satana ngwenuo uli namatonga wa anamatonga othene aatu. Kondo dhauwalanga dhinowaniwa muilamboi, dhinothonyi-edha ira liye ngothakala maningi.—Luka 4:5, 6; 1 Ju. 5:19.
MAKRISTAU AIMBARIMBARI MBAATU ODHIVELIWANA RENDELE
Ninga muonenle i-yo, malamboano vatokala i-yana ulukulu vari va Makristau na Aisraeli. Mbwenye yen’na kai myasa yeniyo baa-i inoiri-a ira na-akomenga kondo. Vatokala thitho myasa inango. Mwaifwanafwani-o, Nlungu atoongelatu ira malambo omari-a atu ofunji-iwa na liye, “katinodha funjedhave okoka kondo” venango koma kondo. (Esaya 2:2-4) Wenjedhela vevo Kristu atoonga ira anamafunjedhee katinodha kala “ikundu ya ilamboi.” Ee-no aliwa katinovolowela vya ndale venango runi-ana wa vilambo.—Juwau 15:19.
Kristu thitho atotonga anama-arelee irana vyokwaranya vyevi. Atoawandela rambela vinaairi-e lokota vyako-ini, thakaleliwa venango koma kondo. (Mat. 5:21, 22) Wenjedhela vevo atoawandela thitho ira takalenga atu “odhi-a rendele” thitho tadhiveliwengana amwidaniwa.—Mat. 5:9, 44.
N’nga a-vi wa i-yo vaoka? Pyooneelatu ira kaninafune koma kondo. N’nga pyoodeya ira rimani mwi-u nilokotedhenga enango myasa dhedho dhinairi-e ira pingoni mwa-akale vwelano venango gawaneya? Dhoweni nidhowenave oni-a thindhi ira nikumi-e mathuulelo ninga enala rimanimwi-u.—Tiy. 4:1, 11.
Malo movolowela mikangano ya vilambo, ninolimbi-a rendele thitho udhivela vari vi-u. (Juwau 13:34, 35) Dhoweni nikale osikimiza ira nidhowenave a-volowela ndale venango kondo, vevo vanodedi-edhela i-yo Yohova ira adhamali-e kondo modhowa nodhowa.—Sal. 46:9.
a Hora dhinango maziza Aisraeli tanookomana okene angalive ira kondodhi kadhasangalali-a Yohova. (1 Mam. 12:24) Mbwenye hora dhinango tanorumeli-a ira vyevi viireye namwasa oi maziza enango katimvwenle venango tatoira vyodawa vilukulu.—Anam. 20:3-35; 2 Limb. 13:3-18; 25:14-22; 28:1-8.