Ninooda kaana ingumi yodhowa nodhowa

1. N’nga thuulela yolanyedha ya Yohova ya ingumi yo-omala unonikami-a a-vi?

YOHOVA utolanyedha ira atu ovwela tanodha kaana “ingumi yo-omala.” (Aroma 6:23) Nathuulela vya yolanyedhai ninoroma mdhiveliwana maningi Yohova. Kathuulelanivi: Babi-u wadhulu unonidhiveliwana maningi moi kavali yongo inani-iyani-e na liye.

2. N’nga yolanyedha ya ingumi yo-omala inonikami-a a-vi?

² Yolanyedha ya Nlungu ya ingumi yo-omala, inonikami-a vilela vyowesedha vinogumanana i-yo va-eeni. Masiki amwidani-u tanituche ira tanonipa, kanino-iyachi mlabela Yohova. Mwasiwa ngwan’ni ninoonga e-no? Mwasa mbo-i ngoi ninoidhiwa ira akala ninokwa ningali ororomeleya wa Yohova, liye unodha nivenyathi-a thitho ninodha kaana idedi-edho yoi kaninodhakwa okoka. (Juwau 5:28, 29; 1 Akor. 15:55-58; Aeb. 2:15) Mwasiwa ngwani ninofwanela sikimizela ira pyoodeya dhakaana ingumi yo-omala modhowa nodhowa? Kathuulelani myasa yo-arelila.

YOHOVA UNODHA KALAO DHOWA NODHOWA

3. Mwasiwa ngwan’ni kaninokaikela ira Yohova unooda nikami-a ira nidhakaena ingumi modhowa nodhowa? (Salimo 102:12, 24, 27)

³ Ninoidhiwa ira Yohova unodha nikami-a kaana ingumi yodhowa nodhowa namwasa oi liye ngu Tipwati la ingumi thitho unodha kalao modhowa nodhowa. (Sal. 36:9) Kaonani maversu mangasi a Bibilyani anonisikimizela ira Yohova atokalao romela walelene thitho unodha kalao dhowa nodhowa. Lemba la Salimo 90:2 linoonga ira Yohova ngu Nlungu romela walelene “fiyedha dhowa nodhowa.” Lemba la Salimo 102 litoonga thitho likundo limbo-ive leli. (Muleri Salimo 102:12, 24, 27.) Thitho voonga vya Babi-u wadhulula, namaongela Abakuku atolemba ira: “Nyo Yohova, nyo mutokalao romela walelene. Nyo Nlungwanga, Nlungwanga ochena nyo kamunokwa.”—Habak. 1:12.

4. N’nga ninofwanela dhikumbanyedha namwasa oi kaninovwechecha likundo loi Yohova atokalao romela walelene? Muongemo.

⁴ N’nga munorucheya vwechecha likundo loi Yohova atookalao romela “walelene”? (Esaya 40:28) Vyevyo kai vyailendo. Voonga vya Nlungu, Elihu atoonga ira: “Vyawa vyee pyo-olengeseya.” (Yobo 36:26) Mbwenye akala kaninovwechecha yongo inangwee, kavinothapulela ira yongoyo kai yaimbarimbari kabe. Mofwanafwani-a, masiki na-avwechechenga vyongo vyothene vyoonga njeza, n’nga vyevi vinothapulela ira njeziyo kiliwo? Kabe kai-eno. Mofwanafwana na vyevi, i-yo atu kaninaode vwechecha pama likundo loi Yohova kana maromelo na magomelo. Mbwenye vyevi kavinothapulela ira Nlungu kanodha kaana ingumi yodhowa nodhowa kabe. Namapanducha kanadha imwanana irana vyongo namwasa oi i-yo kaninovivwechecha kabe. (Aroma 11:33-36) Ee-no liye atokalao vyongo vyothene vya-anapanduchiwe thangani-avo vyongo vinooni-a njeza ninga dhuwa vya-anakaleo. Yohova unonisikimizela ira: “Liye ngupanduchile ilambo yavathi na kopolodhee.” Liye atokalao “a-nathapule dhulu.” (Jer. 51:15; Mayir. 17:24) N’nga ngu mwasa unango uvi unanikami-e kala osikimizela ira pyoodeya kaana ingumi yodhowa nodhowa?

NATOOPANDUCHIWA IRA NIKAENA INGUMI YODHOWA NODHOWA

5. N’nga atu oroma tana idedi-edho yoi a-vi?

⁵ Yohova atoopanducha vyaingumi vyothene vailamboi, ira vikaena ingumi wahora yoyeva kumi-avo atu. Liye atoava-a atu idedi-edho yoi katinodhakwanga. Mbwenye Yohova atom’mwenjeli-a Adamu ira: “Kudye vyova-a vya mwiri oidhiwi-a yapama na yothakala. Namwasa oi vadambo linofunawee dhadya unodhakwa.” (Maro. 2:17) Adamu na Eva taakale ira tatomvwela Yohova, katakwe. Ee-no pyovweya onga ira vira wa hora Yohova angaarumeli-idhe udya yova-a ya “mwiri wa ingumi.” Vyevi vingathapulele ira liye unaasikimizela ira tangaodile kaana ingumi “yodhowa nodhowa.”b—Maro. 3:22.

6-7. (a) Chin’ni inothonyi-edha ira atu katipanduchiwile ira takwenga? (b) N’nga munofuna mudhairen’ni sogolou? (Muone viruthiruthi.)

⁶ Pyodabwi-a ira masiyentista enango tatofwanya umboni oi ugogwi-u unooda lokota vyongo vinjinji kwaranya vinoidhiwa i-yo vahora inokala i-yo aingumi. Revista n’nango la 2010 latoonga ira ugogwi-u uli ninga limburo lolokotedhamo vyongo vaduziduzi mamiliyau 2.5 GB oi mbofwanafwana na mahora mamiliyau 3 (kwaranya vyawa 300) amaprograma oira oni-iwa va TV. Mbwenye ugogwi-u unooda lokota vyongo vinjinji kwaranya vyevi. Vyevi vinothonyi-edha ira Yohova atopanducha ugogwi-u ira uodenga lokota vyongo vinjinji kwaranya vinolokota i-yo mwa vyawa 70 venango 80 vinokaana i-yo ingumi baa-i.—Sal. 90:10.

⁷ Yohova atonipanducha na rima ofunechecha ira nikaena ingumi yodhowa nodhowa. Voonga vyaatu, Bibilya linoonga ira Nlungu atoava-a atu “rima ofuna kalao dhowa nodhowa.” (Namal. 3:11) Wen’na ngumwasa umbo-i unoniiri-a ira nionenga ukwa kala mwidani. (1 Akor. 15:26) N’nga nabulela maningi, ninongo kaathi dedi-edhanga ira nikwe? Kabe. Hora dhinjinji ninodhowecha ximitari venango umwa makinino ira niile. Thitho ninoira vyothene vinooda i-yo ira na-akwe. Mbwenye mutu unomdhiveliwana i-yo akwa, akala ngu ndimuwa venango mwana, rimi-u unonipa maningi thitho ninokalecha osukwala vahora yolapela. (Juwau 11:32, 33) Pyoonelatu ira Namapanduchi-u waudhivela kaanipanduchile ira niodenga funjedha venango kaana rima ofunechecha dhakaana ingumi yodhowa nodhowa aakale ira kai ifunelwee ira atu takaengana ingumi yo-omala. Mbwenye nitokaana myasa minjinji yovweya yoniiri-a roromela ira ninodha kaana ingumi yodhowa nodhowa. Dhoweni nitapanyeni vyairile Yohova ndulimu thitho vinoira liye va-eeni vothonyi-edha ira ifunelwee yoroma kimadhi venango nionge ira itokalaove kichinjile.

IFUNELO YA YOHOVA KICHINJILE

8. Voonga vya ifunelo ya Yohova yoonga atu, n’nga lemba la Esaya 55:11 linonisikimizelan’ni?

⁸ Angalive ira Adamu na Eva tatoodawa thitho vyotoiri-a ira a-imiwa takwe, Yohova kachinjile mathuulelwee okuza ifunelwee. (Muleri Esaya 55:11.) Ifunelwee choi atu ororomeleya tadhakaena ingumi yo-omala. Ninoonga e-no vothuulela Yohova vikadhi liye aonganga thitho irana ira akwakwaneli-edhe ifunelwee.

9. N’nga Nlungu unolanyedhan’ni sogolou? (Danieli 12:2, 13)

⁹ Yohova unolanyedha ira unodha venyathi-a atu takwide noava-a ingumi yo-omala. (Mayir. 24:15; Tito 1:1, 2) Mutu ororomeleya Yobo kaakaikela ira Yohova unofunechecha dhavenyathi-a atu takwide. (Yobo 14:14,15) Namaongela Danieli anoidhiwa ira atu tatokaana idedi-edho yodhavenyathi-iwa nokaana ngari yodhakaana ingumi yodhowa nodhowa. (Sal. 37:29; muleri Danieli 12:2, 13.) Ayuda a hora ya Yesu, tanoidhiwa ira Yohova unodha velela “ingumi yo-omala” waarumiwee ororomeleya. (Luka 10:25; 18:18) Moweli-edha weli-edha Yesu anoonga vya yolanyedha yei thitho liye atovenyathi-iwa na Babee.—Mat. 19:29; 22:31, 32; Luka 18:30; Juwau 11:25.

10. N’nga venyathi-iwa waatu waireile ndulimu unothonyi-edhan’ni? (Muone iruthiruthi.)

¹⁰ Yohova ngova-a ingumi thitho utokaana kopolo yova-a ingumi waatu takwide. Liye atomva-a kopolo Eliya ira avenyathi-e mwana wa i-yana wau Zarefati. (1 Mam. 17:21-23) Vangavirile hora namaongela Elisa mokami-iwa na Nlungu atovenyathi-a mwana wa i-yana wau Sunemu. (2 Mam. 4:18-20, 34-37) Venyathi-iwa waatu enala na enango, watothonyi-edha ira Yohova utokaana kopolo yooda va-a ingumi. Yesu angali vailamboi atothonyi-edha ira Babee atomva-a kopolo dhedhi. (Juwau 11:23-25, 43, 44) Va-eeni Yesu uli dhulu, thitho atoova-iwa “utongi othene dhulu . . . na vailambo yavathi.” Ee-no liye unooda kwakwaneli-edha yolanyedha yoi atu othene tali “masiyeni aithuulelo” tanodha venyathi-iwa nokaana idedi-dho yokaana ingumi yodhowa nodhowa.—Mat. 28:18; Juwau 5:25-29.

11. N’nga kuto unokami-a a-vi ira nidhakaena ingumi yodhowa nodhowa?

¹¹ Mwasiwa ngwan’ni Yohova atorumeli-a ira Mwanee odhiveliwiwa akwe ukwa opa maningi? Yesu atoonga mwasee vevo vaongile liye ira: “Voi Nlungu atodhiveliwana maningi ilambo yavathi, moi atovelela Mwanee obaliwa ekene, ira mutu uliwethene unamroromele a-anongiwe, mbwenye akaena ingumi yo-omala.” (Juwau 3:16) Vovelela Mwanee ninga kuto okunela vyodawa vi-u, Nlungu atoiri-a ira vikale vyoodeya ira nidhafwanye ingumi yo-omala. (Mat. 20:28) Rumiwi Paulo atoonga pama likundo lofuneyali lokuza ifunelo ya Nlungu vevo valembile liye ira: “Mbwenye wukwa udhidhe mwamutu m’mbo-i, thitho venyathi-iwa muukwani udhidhe mwamutu mbo-i. Moi ee-no dhela mwa Adamu othene tatokwa, thitho mundhila imbo-ive dhela mwa Kristu othenene tanowachela ingumi yo-omala.”—1 Akor. 15:21, 22.

12. N’nga Umwene unodha kami-a a-vi ira ifunelo ya Yohova yoonga vya i-yo atu ikwakwaneli-edhiwe?

¹² Yesu atoofunji-a anama-arelee ira talobelenga ira Umwene wa Nlungu udhe thitho ifunelo ya Nlungu iireye vailambo yavathi. (Mat. 6:9, 10) Ikundu inango ya ifunelo ya Nlungu choi atu tadhakale vailamboi modhowa nodhowa. Ira vyevi viodeye Yohova utosakula Mwanee ira akale Mwene wa Umwene wa Mesiya. Nlungu ukadhi agumani-anga atu okwakwana 144.000 vailamboi ira tadha labe basa vambo-i na Yesu ira takwakwaneli-edhe ifunelo ya Nlungu.—Apok. 5:9, 10.

13. N’nga Yohova unoiran’ni va-eni, n’nga i-yo ninokami-a a-vi?

¹³ Va-eeni Yohova unaagumani-a “mwinji ulukulu” thitho afunji-a ira takale anarala a Umwenee. (Apok. 7:9, 10, Yak. 2:8) Angalive ira malamboano atu anjinji ilambonimu mbogaweya namwasa oidana thitho kondo, amwinji ulukulula tanovilimbi-edha kala mwarendele mo-otukulela ira tanokumela muvilambo venango mumitundu yo-iyana. Mopipirisa tatomala fula wale masarasadiwa ira dhikale i-mba. (Mik. 4:3) Malo movolowela kondo dhoi dhinopi-a atu anjinji, aliwa tanofunji-a atu fwanya “ingumi yaimbarimbari” voafunji-a vyoonga Nlungu waimbarimbari thitho ifuneloyee. (1 Timo. 6:19) Abaliwa aututuni tanooda aruni-a venango tanooda gumanana nyarwa dakobiri namwasa okala ikundu ya Umwene wa Nlungu, mbwenye Yohova unoonechecha ira aliwa tatokaana vyothene vinofuneela aliwa. (Mat. 6:25, 30-33, Luka 18:29, 30) Makundo enala anonisikimizela ira Umwene wa Nlungu ngwaimbarimbari thitho ira unodha dhowanave kwakwaneli-edha ifunelo ya Yohova.

SOGOLO LAPAMA MANINGI

14-15. N’nga yolanyedha ya Yohova yodhamali-a ukwa inodhakwakwaneli-edhiwa a-vi?

¹⁴ Va-eni Yesu ngumwene wa Umwene wa Nlungu dhulu thitho unodha kwakwaneli-edha vyolanyedha vyothene vya Yohova. (2 Akor. 1:20) Romela yawa ya 1914, Yesu ukadhi agonji-anga amwidanee. (Sal. 110:1, 2) Mo-odembuwa liye vambo-i na anamatonga afwee tanodhamari-a gonji-a thitho nonga atu othene othakala.—Apok. 6:2.

¹⁵ Vahora ya utongi wa Yesu vyawa 1000, atu takwide tanodha venyathi-iwa thitho atu ovwela tanodha kami-iwa ira takale olongomana. Vasogolo va vyowesedha vyomari-a, atu tanofuna dhatongiwa na Yohova ira mbolongomana, “tanodha wachela ilambo yavathi thitho tanodha kalanga mwemo modhowa nodhowa.” (Sal. 37:10, 11, 29) Pyosangalali-a ira “wukwa ninga mwidani omari-edha”, chineneeva “unodha nongiwa.”—1 Akor. 15:26.

16. N’nga mwasa ulukulu unoniiri-a ira nim’labelenga Yohova nguuvi?

¹⁶ Ninga muoni i-yo, idedi-edho yi-u yodhakaana ingumi yodhowa nodhowa chokumela M’madhu a Nlungu. Idedi-edho yei inonikami-a kalave ororomeleya malambo omari-a oruchala. Mbwenye ira nimsangalali-e Yohova, ninofwanela mlabela a-akala namwasa ofunechecha dhakaana ingumi baa-i. Mwasa ulukulu unoniiri-a kalave ororomeleya wa Yohova na Yesu ngoi ninoadhiveliwana maningi. (2 Akor. 5:14, 15) Udhivelula unonilimbi-a ira naasazi-edhenga thitho ira nikalenga athindhi vowandela atu enango vya idedi-edhwi-u. (Aroma 10:13-15) Navilimbi-edhanga kala ova-a mofewa mandha thitho rambela kala ovidhiveliwana, ninokala atu ale Yohova anofuna liye ira takale afwee modhowa nodhowa.—Aeb. 13:16.

17. N’nga uliwethene vaekene una izo yoi a-vi? (Mateu 7:13, 14)

¹⁷ N’nga ninodha kala mugulu laatu oi tanodha fwanya ingumi yo-omala? Yohova utoniva-a ngari yen’na. Vili na i-yo va-eeni sakula akala ninodhowanave wenda vandhila yodhowa uingumi yo-omala. (Muleri Mateu 7:13, 14.) N’nga vyongo vinodhakala a-vi vahora inofuna i-yo dhakaana ingumi yodhowa nodhowa? Ninodhatapanyani yowakula ya yofuka yei muyofunjedha yo-arela.