Iroromelo na mabasee inooda niiri-a khala atu olongomana

1. N’nga nathuulelanga vya iroromelo ya Abrahamu, ninofwanela vifuka yofuka iivi?

ANGALIVE ira atu anjinji tatoovwavo vyokuza Abrahamu, anoidhiwa vyongo vyoyeva baa-i. Mbwenye nyo munoidhiwa vyongo vinjinji vyokuza Abrahamu. Mofwanafwani-a, munoidhiwa ira liye unoromoliwa ira “Baba waatu othene ana iroromelo.” (Aroma 4:11) Venango munooda dhifuka ira, ‘N’nga miyo ndinooda m’roromelanga Yohova ninga mwemo mwairile Abrahamu?’ Ee pyoodeya m’roromela.

2. Mwasiwa ngwan’ni pyofuneya funjedhanga ifwanafwani-o ya Abrahamu? (Yakobo 2:22, 23)

² Ndhila imbo-i inanikhami-e ira nikhaena iroromelo ninga yana Abrahamu, khufunjedha ifwanafwani-oyee. Nlungu angam’mwandele Abrahamu ira athame Abrahamu atoovwela nothamela ilambo indendai na waniwa. Liye akhala mathendhani thitho ali ofunechecha m’velela mwanee Isaki ninga sembe. Vyairile Abrahamu vyatoothonyi-edha ira anom’roromela maningi Yohova. Iroromelo na mabasee vyatom’muiri-a Abrahamu khala orumeleya wa Yohova nokhala fwee. (Muleri Yakobo 2:22, 23.) Yohova unofuna ira i-yo othene thangani-avo nyo, nikhale vauxamwali waphama na liye. Liye atom’mwandela Paulo ira alembe Bibilyani ifwanafwani-o ya Abrahamu. Dhoweni nitapanyeni ifwanafwani-o ya Abrahamu movwelana na vinoleri i-yo va Aroma kapitulu 4 na Yakobo kapitulu 2. Makapitulu melala mutokhala makhundo ofuneya maningi oonga vya Abrahamu.

3. N’nga Paulo na Yakobo talembile vyolandana na vili va lemba liivi?

³ Atu ambilala Paulo na Yakobo, tatoolemba vyongo vyolandana na vinoleri i-yo va lemba la Maromelo 15:6, vevo vanoonga ira: “[Abrahamu] atoororomela vyam’mwandele Yohova thitho Yohovuo atom’mona ira ngumutu olongomana.” Yohova unom’mona mutu ira ngolongomana venango nionge ira o-okhaana vyodawa, akhala mutuo unodhilimbi-edha m’sangalali-a Yohova. Pyosangalali-a idhiwa ira mutu odawa venango o-olongomana unooda oniwa na Nlungu ninga mutu o-odawa. Pyooneelatu ira nyo thitho munofuna ira Nlungu auonengani e-no. Vyevyo pyoodeya. Va-eeni dhoweni nioneni vyam’muiri-idhe Nlungu ira am’monenga Abrahamu kala mutu olongomana na vinofwanela i-yo irana ira Nlungu anionenga ira nili atu olongomana.

IROROMELO CHOFUNEYA MANINGI IRA NIKHALE OLONGOMANA

4. N’nga chini inoiri-a ira atu ta-akhale olongomana?

⁴ Karta lalembile Pauo lembela Makristau awu Roma, Paulo atoonga ira atu othene mbodawa. (Aroma 3:23) N’nga chini inaire mutu ira Nlungu asangalalenga na liye nom’monanga ira ngolongomana? Vofuna khami-a Makristau fwanya yowakula ya yofukha yei, Paulo atoonga ifwanafwani-o ya Abrahamu.

5. N’nga chini yam’muiri-idhe Yohova m’monanga Abrahamu khala mutu olongomana? (Aroma 4:2-4)

⁵ Abrahamu akhala wu Kanani vahora yaongile Yohova ira Abrahamu ali mutu olongomana. N’nga mwasiwa ngwan’ni Yohova atoonga ira Abrahamu ali mutu olongomana? N’nga ali namwasa oi anoo-arela malamulo enao tali muilamulo yava-iwele Mose na Nlungu? Kabe. (Aroma 4:13) Yohova avelele ilamulo wa Anaisraeli vangavirile vyawa vyokwaranya 400, khumela vahora yaongile Yohova ira Abrahamu ali mutu olongomana. N’nga chini yam’muiri-idhe Yohova m’monanga Abrahamu khala mutu olongomana? Namwasa oriyawee rima ulukhulu, Yohova atom’romola Abrahamu ira ngumutu olongomana namwasa wa iroromelwee.—Muleri Aroma 4:2-4.

6. N’nga chini inam’muiri-e Yohova m’monanga mutu odawa khala olongomana?

⁶ Paulo atoodhowanave onga ira mutu am’roromelanga Nlungu, “Nlunguo unom’mona thitho mutuo khala olongomana.” (Aroma 4:5) Paulo atoowenjedhela onga ira: “Davide atoonga vya mutu osangalala akhala Nlungu unom’mona ira ngolongomana angalive ira viirile liye kavinovwelana maningi na ilamulo. Liye aongile ira: ‘Osangalala mbaatu aleveleliwile vyoira viwa vyo-ovwela malamulo thitho vyodawa viwavyo vitoleveleliwa. Osangalala ngumutu oi Yohova khanom’lengesela vyodawavyee.’” (Aroma 4:6-8; Sal. 32:1, 2) Nlungu unolevelela venango vu-elela vyodawa vyaatu anom’roromela. Nlungu unoalevelela nomali-elatu voi khanothuuchave vyodawa viwa. Unoaona ira mbo-odawa thitho mbolongomana namwasa wa iroromelwiwa.

7. Mwasiwa ngwan’ni ninooda onga ira arumiwi ororomeleya awale tali olongomana?

⁷ Angalive ira Abrahamu, Davide na arumiwi enango ororomeleya taoniwa ira mbaatu olongomana, aliwa tali atu odawa. Mbwenye namwasa wa iroromelwiwa Nlungu aaona ira mbaatu o-okhaana vyodawa vofwanafwani-edha naatu enao ta-am’lambela. (Aef. 2:12) Ninga mwaongele Paulo mukartalee, iroromelo chofuneya maningi ira mutu akhale vauxamwali na Nlungu. Ndi mwemo thitho mwakalele aliwa na Abrahamu na Davide. Iroromelo inooda nikhami-a thitho i-yo vano, khala vauxamwali waphama na Nlungu.

N’NGA IROROMELO INOVWELANA A-VI NA BASA?

8-9. N’nga atu enango taongilen’ni vyokuza vyalembile Paulo na Yakobo? N’nga mwasiwa ngwan’ni?

⁸ Wa vyawa vinjinji anamasogolela amareligiau takhadhi taruni-angana vamwasa okhaana iroromelo nofuneya wa vyoira vya mutu. Anamasogolela enango anofunji-a ira, akhala mutu unofuna ira avulumuchiwe unofwanela m’roromelanga Mbwii-u Yesu Kristu. Venango mwatooroma vwavo taonganga ira “Mu’mroromelenga Yesu thitho munodha vulumuchiwa.” Anamasogolela amareligiawala anoonga ira vyevi ndi vyevyo vyafunji-a Paulo. Namwasa oi liye alembile ira: “Nlungu unom’mona mutu khala olongomana angalive ira vinoira liye khavinovwelana na malamulo.” (Aroma 4:6) Mbwenye anamasogolela amareligiau enango anoruni-a noonganga ira “mutu unodha vulumuwa” akhala unodhowa ulimburo lelo mareligiau linoona aliwa ira tochena thitho laba mabasa enao mareligiau anoona aliwa ira mbaphama. Venango aliwa ano-indi-edha basa madhu anofwaneya va lemba la Yakobo 2:24, vevo vanoonga ira: “Mutu unooda oniwa ira ngolongomana namwasa wa basalee a-khala namwasa wa iroromelo baa-i.”

⁹ I-yana weu watoiri-a ira atu adodoliso vamwasa wa Bibilya thuulelanga ira Paulo na Yakobo, tatoolemba vyongo moruni-ana vamwasa wa iroromelo na basa. Anamasogolela enango anoona ira Paulo aroromela ira mutu unooda khala olongomana akhala utokhaana iroromelo baa-i a-kala namwasa wa basa. Voi Yakobo aroromela ira basa tofuneya maningi ira mutu akhale olongomana. Mutu mwinango vamwasa wa mareligiau aongile ira: “Vyevi vyathapulela ira Yakobo khaavwechecha mwasiwa Paulo atoonga ira mutu unofuneela khaana iroromelo baa-i ira akhale olongomana thitho khaavwelana na vyevyo vyaongile Paulo.” Yohova atoavudhelela atu ambilene enala Paulo na Yakobo, ira talembe vyalembile aliwavi. (2 Timo. 3:16) Mbwenye vinooneya ira vatokhala ndhila yonikami-a ona vwelana ulivo vari vavyevyo vyalembile aliwavyo. Ndhiliwa khuona thitho vyongo vinango vyevyo atu ambilala vyalembile aliwa mumakartiwa.

10. N’nga “mbamabasa” avi aongile Paulo? (Aroma 3:21, 28) (Muone thitho iruthiruthi.)

¹⁰ N’nga “mbamabasa” aavi aongile Paulo va Aroma kapitulu 3 na 4? Liye aonga “vyaira atu vo-arela ilamulo” yava-iwile Mose na Nlungu, yavelenle liye wa Aisraeli vamwangoni wa Sinai. (Muleri Aroma 3:21, 28.) Vinooneya ira muhora ya Paulo, Makristau enango Aiyuda vyanowarucha rumela ilamulo yava-iwile Mose na Nlungu thitho vyevyo atu vyafuneela aliwa irana vo-arela vyongo vyevyo vyali vinga-iidhe i-ndi-edheliwa basa. Voi e-no Paulo atoo-indi-edha basa ifwanafwani-o ya Abrahamu vothonyi-edha ira khala olongomana khunonyindela vyevyo “vinoira mutu vo-arela ilamulo” mbwenye yofuneya maningi yali iroromelo. Idhiwa vyevi pyolimbi-a namwasa oi vinonikhami-a khala vauxamwali na Nlungu nodhowanganave iranga vyongo vyom’sangalali-a. Vinothapulela thitho ira pyoodeya m’roromelanga Nlungu na Kristu, namwasa oi vyevyo vinodha iri-a ira tasangalalenga na i-yo.

11. N’nga Yakobo aongile vya “mabasa” avi?

¹¹ “Mabasa” aongile Yakobo va kapitulu 2, kai vyevyo “vinoira mutu vo-arela ilamulo” yaongile Paulo. Mbwenye Yakobo aonga vya mabasa enao Kristau anolaba liye dambo nlilothene. Mabasao mbanooni-a ira mutuo ngu Kristau wa iroromelo yaimbarimbari venango kabe. Dhoweni nioneni vifwanafwani-o vinli vya-indi-edhe basa Yakobo.

12. N’nga Yakobo aongile ira iroromelo inovwelana a-vi na basa? (Muone thitho iruthiruthi.)

¹² Ifwanafwani-o yoroma, Yakobo atoonga funeya oi Kristau a-akhalenga wa sakulo airanga vyongo naatu enango. Yakobo a-indi-edhe basa ifwanafwani-o ya mutu ariyele rima mutu ofuma mbwenye liye imwanana riyela rima mutu osauwa. Voi e-no Yakobo atoonga ira, mutuo unooda onganga ira utokhaana iroromelo mbwenye vyoiravyee khavinothonyi-edha ira utokhaana iroromelo. (Yak. 2:1-5, 9) Ifwanafwani-o yanambili, Yakobo aongile vya mutu wenuo “unom’mona balee venango rongolee a-ana vyowara,” mbwenye liye imwanana m’khami-a. Masiki mutuo aongenga ira utokaana iroromelo, vinokala vyo-ovweya. Ninga muongele Yakobo “iroromelo vaokene, akala khina basa njokwa.”—Yak. 2:14-17.

13. N’nga Yakobo a-indi-edhile basa ifwanafwani-o iivi, vofuna thonyi-edha funeya wa iroromelo na mabasee? (Yakobo 2:25, 26)

¹³ Yakobo atom’monga Rahabi khala ifwanafwani-o ya mutu athonyi-edhe iroromelo mwa vyoiravyee. (Muleri Yakobo 2:25, 26.) Rahabi ali angavwide vyoonga Yohova thitho ira ngu Yohova aakami-idhe Anaisraeli. (Yoswa 2:9-11) Rahabi atoothonyi-edha iroromelo mwavyoiravyee, vobarela Anaisraeli ambili enao tadhowile mazondela ilambo ya Yeriko, voi ingumiwa yali vangovini. Vyevyo vyatoiri-a ira i-yana odaula wenuo a-ali Muisaraeli aoniwe ira ali mutu olongomana ninga mwemo mwakalele Abrahamu. Ifwanafwani-oi inothonyi-edha funeya okhaana iroromelo na mabasee.

14. Mwasiwa ngwan’ni ninooda onga ira vyalembile Paulo na Yakobo kavinoruni-ana?

¹⁴ Alimbo lemba Bibilya ambilala Paulo na Yakobo, tatoonga mwasa okhuza iroromelo na mabasee mundhila dho-iyana. Paulo awandela Makristau Aiyuda ira Yohova kaasangalalenga naaliwa namwasa o-arelanga ilamulo yava-iwile Mose na Nlungu baa-i. Voi Yakobo aonga funeya oi Makristau othene tathonyi-edhenga iroromelo voirela vyongo vyaphama atu enango.

15. N’nga ninathonyi-edhe mundhila dhinango dhiivi iroromelo yokhaana mabasee? (Muone thitho iruthiruthi.)

¹⁵ Yohova khanoniwandela ira akala ninofuna khala atu olongomana ninofwanela iranga vyongo mofwanafwana na mwemo mwairela Abrahamu kabe. Mbwenye vatokhala ndhila dhinjinji dhinathonyi-edhelena i-yo iroromelwi-u mwavyoira vi-u. Ninooda awachelanga namandha menli atu anodha pingoni mwi-u, khami-a abali naarongoli-u anogumanana nyara noairelanga vyongo vyaphama atu abanjani mwi-u. Vyongo vyothene vyevi, vinodha iri-a ira Yohova asangalalenga na i-yo thitho aniraeli-e. (Aroma 15:7; 1 Timo. 5:4, 8; 1 Ju. 3:18) Ndhila imbo-i inathonyi-edhele i-yo ira nitokhaana iroromelo, khulaba mwathindhi basa yolaleela vambo-i naabali naarongoli-u. (1 Timo. 4:16) I-yo othene ninooda thonyi-edha dhela mwavyoira vi-u ira ninororomela vilanyedhile Yohova ira vinodha kwakwaneli-edhiwa thitho unoira vyongo mundhila yaphama maningi. Nairangani vyevi, ninooda khala osikimiza ira Nlungu unodha niona ira nili atu olongomana thitho ninodha khala afwee.

IDEDI-EDHO CHOFUNEYA MANINGI IRA NIKHAENA IROROMELO

16. N’nga Abrahamu adedi-edhelan’ni? N’nga aroromela vyan’ni?

¹⁶ Va Aroma kapitulu 4, ninofunjedhavo likundo n’nango khumela wa Abrahamu, lelo nli funeya okhaana idedi-edho. Yohova atoolanyedha ira dhela wa Abrahamu, “maziza manjinji” anodha raeli-iwa. Mwaimbarimbari Abrahamu anoodedi-edhela vyongo vyosangalali-a maningi! (Maro. 12:3; 15:5; 17:4; Aroma 4:17) Angalive ira Abrahamu ana vyawa 100 Sara ana vyawa 90, mwana waalanyedhile Nlungu ali a-anabaliwe. Waatu vyevi vyali vyo-oodeya ira Abrahamu na i-yanee takaena mwana namwasa oi tali tangamadhi ulula. Veva Abrahamu atoowesedhiwa maningi. “Mbwenye liye atokaana idedi-edho na iroromelo yoi unodha khala baba wa maziza manjinji.” (Aroma 4:18, 19) Vyadedi-edhela liyevyo vyatoireyadi, tatoobala mwana walombwana dhinalee ali Isaki mwana wam’dedi-edhela aliwa wahora indendai.—Aroma 4:20-22.

17. N’nga ninoidhiwa a-vi ira Nlungu unooda nionanga ira nili olongomana thitho afwee?

¹⁷ Nlungu unooda sangalalanga na i-yo nonionanga ira nili olongomana thitho afwee ninga mwemo mwakhalele aliwa na Abrahamu. Paulo atoonga vyevi vevo valembile liye ira: “Madhu oi ‘Nlungu atom’monga Abrahamu ira ngumutu olongomana,’ katalembeliwile liye baa-i, mbwenye atoonilimbela thitho i-yo vano. Na-iyene thitho ninooniwa ira nili atu olongomana namwasa oi ninororomela ira Nlungu atom’venyathi-a Mbwii-u Yesu.” (Aroma 4:23, 24) Mofwanafwana na Abrahamu ninofwanela m’roromelanga Yohova, iranga vyongo vyaphama thitho dedi-edhanga ira vyongo vyothene vilanyedhile Yohova vinodha kwakwaneli-edhiwa. Paulo atoodhowanave onga vya idedi-edho va lemba la Aroma kapitulu 5. Muyofunjedha yo-arela ninodha tapanyani vyevyo.