Mokanda ya liboso ya Samwele
29 Bafilistia+ bayanganisaki mampinga na bango nyonso na Afeke, kasi Bayisraele batyaki kaa na bango pene na liziba moko na Yizireele.+ 2 Mpe bankolo ya Bafilistia bazalaki koleka elongo na bituluku ya basoda nkama nkama mpe ya basoda nkóto nkóto, mpe Davidi ná basoda na ye bazalaki kolanda na nsima, elongo na Akishe.+ 3 Kasi bankumu ya Bafilistia balobaki boye: “Mpo na nini Baebre oyo bazali awa?” Akishe ayanolaki bankumu ya Bafilistia ete: “Oyo ezali Davidi, mosaleli ya Saulo mokonzi ya Yisraele. Afandi elongo na ngai mbula moko to koleka,+ mpe namoni ye na likambo ya mabe ata moko te banda mokolo oyo akimaki epai na ngai tii lelo.” 4 Kasi bankumu ya Bafilistia basilikelaki ye, mpe balobaki na ye: “Zongisá moto oyo.+ Tiká ye azonga na esika oyo otyaki ye. Asengeli te kokita elongo na biso na etumba, noki abalukela biso na etumba.+ Mpo eloko nini eleki malamu oyo akoki kopesa mpo mokonzi na ye andima ye? Ezali nde mitó ya bato na biso, boye te? 5 Oyo Davidi te moto bazalaki koyembela mpe kobinela, balobi:
‘Saulo abomi bankóto ya banguna,
Mpe Davidi abomi bankóto zomi zomi’?”+
6 Na yango Akishe+ abengaki Davidi mpe alobaki na ye: “Lokola Yehova azali solo na bomoi, ozali sembo, mpe nasepeli ndenge oyei na etumba elongo na basoda na ngai.+ Mpo namoni yo na likambo ya mabe ata moko te banda mokolo oyo oyaki epai na ngai tii lelo.+ Kasi, bankolo mosusu bazali kotyela yo motema te.+ 7 Sikoyo, zongá na kimya, mpe kosala likambo moko te oyo ekomonana mabe na miso ya bankolo ya Bafilistia.” 8 Kasi Davidi alobaki na Akishe: “Mpo na nini? Nasali nini? Likambo nini ya mabe omoni epai na ngai banda mokolo oyo nayaki epai na yo tii lelo? Mpo na nini nasengeli te kokende elongo na yo mpe kobundisa banguna ya nkolo na ngai mokonzi?” 9 Akishe ayanolaki Davidi ete: “Na miso na ngai, ozali malamu lokola anzelu ya Nzambe.+ Kasi bankumu ya Bafilistia balobi: ‘Asengeli te kokende elongo na biso na etumba.’ 10 Sikoyo, osengeli kolamuka ntɔngɔntɔngɔ elongo na basaleli ya nkolo na yo, oyo bayaki elongo na yo. Bosengeli kotɛlɛma na ntɔngɔntɔngɔ mpe kokende ntango kaka pole ekobima.”
11 Na yango Davidi ná bato na ye balamukaki ntɔngɔntɔngɔ mpe bazongaki na mokili ya Bafilistia, kasi basoda ya Bafilistia bamataki na Yizireele.+