Ngámbo ya kati ya ezipeli

Epai ya bilenge oyo tolingaka mingi,

Yehova Nzambe, tata na bino ya likoló, alingaka bino mingi. Alingi ete bózala na esengo. Kasi, okoki komituna boye: ‘Tokoki mpenza kozala na esengo lelo?’ Ezali motuna moko ya malamu. Tokutanaka na mikakatano ndenge na ndenge na bomoi na biso. Emonani ete mikolo nyonso mikakatano ezali kobakisama mpe yango ekoki kosilisa biso esengo. Kasi, Tata na biso ya bolingo akosalisa biso! Liloba na ye ezali na batoli oyo tosengeli na yango mpo tólonga mikakatano oyo tozali kokutana na yango na bomoi. Atako Biblia ekomamaki kala, toli na yango ezali kaka na ntina mingi lelo, kaka ndenge ezalaki liboso ntango ekomamaki.​—Nzembo 119:98, 99; 2 Timote 3:16, 17.

Tobongisaki buku oyo mpo tolingaka bino mingi. Tolingi ete bózala na esengo mpe bósala oyo eleki malamu na bomoi na bino. Mpo na yango, tolendisi bino bótánga buku oyo banda ebandeli tii nsuka, kasi mpe bótángaka yango mingi ntango mikakatano ebimi. Moko ya mikano ya buku oyo ezali ya kosalisa bino bósolola malamu na baboti na bino. Tozali na elikya ete bokobanda kotánga to mpe koyekola biteni na yango elongo. Zwá matomba na bwanya ya baboti na yo mpe na makambo mingi oyo bayebi!

Totombeli bino makambo nyonso ya malamu,

Lisangani ya Mikóló-Bakambi ya Batatoli ya Yehova