KALABO 46
Zɛɓɛi E Kɛɛ Manɛɛ E Ɓɔɔ Ʋe Jehova Ya E Bataizei Maa Zɔlɔwo?
Ya ɓɔɔ ʋeena Jehova ya a kɛ tii ya bosu ma Gala-feliai zu ga tɔ ɣilekpu nɔɣa ya feli. Na ɣa ɣɛɛna ya feli ʋai lo faa pɛ tuo ya ŋeteai zu. (Psalm 40:8) Na ɣa wulona ba, ta sa ta bataize ɣɛ ga yiɛ. Ta bataize ɣɛɛna ga yiɛ a kɛ tii ya dɛɛzu ga nu ɓɔgapɛ ga e ɓɔɔ ʋea sa Jehova ya. Deʋei da bo ga de ɓɔɔ ʋe Jehova ya tɔ ga faa ɓi e leve deʋe nɛpɛ ba da bo. Zɛɓɛi ya ɓɔ e va ga e deʋei nii wo?
1. Zɛɓɛi ya kɛ nu ɓɔɔ ʋe Jehova ya?
Ani wõila ɣa ɣɛna de ya Jehova ʋaa ma towa kɛ de ɓɔɔ ʋe zeea. (1 Jɔ̃ 4:10, 19) Gala Kɔlɔi bogɛ de ma ga: “Wõi ga è maliɣii Gala ga yii ɣaazɔ ta è ɣigi ɣaazɔ é vɛɛ yà ɣi-gaa-ziɛi ɣaazɔ va ta yà ɣaa-ɓai ɣaazɔ.” (Maki 12:30) Ga de dɛ ga wõila ɣa de ya Gala faa ma lɛ nɔ ga niitiɛ da bo kɛ niitiɛ ɓalaa da kɛ. Wõilai e numaa ya ɣiini faa ma towa ya kɛ te ɣii ʋulu. Da ɓalaa ani wõila ɣa de ya Jehova ʋaa ma towa ya kɛ de ɓɔɔ ʋe zeea na ɣa ɣɛɛna de bataizei maa zɔlɔwo.
2. Jehova Na Seelei niitiɛ te bataizei maa zɔlɔ woga kulo su-nu-ma zɛɓɛi ta maa zɔlɔwo
Ani ya bataizei maa zɔlɔ wona ya vɛɛ Jehova Na Seeleitiɛ va wo ɣɛ ga kaala ɣila, kuuzu nɛɛ ɣɛ wo ya. Ya kwɛ̃ɛ ga wõila ɣa Jehova ya e ʋaa ma pele lamaa zu. Ya zoo wɔnɔ e lɔtɔ ɓɔɔ ba ga pagɔ. (Malachi 3:16-18 lodo.) Jehova ɣa sa ya ɣɛ ga e Ɣeea. Ya vɛɛ sa Jehova ʋeli veai niitiɛ va wõila te ya Jehova ʋaa ma. (Maki 10:29, 30 lodo.) Gaama zu, kɛni e faa taniga ɣɛ ga e zoo e bataizei maa zɔlɔwo. Kɛni e faa maa woli e vile Jehova va, wõila ɣɛ e ya faa ma na ɣa ɣɛɛna zee-la-ma ɣɛ e ya e vile Dui Ziizɛ va. Ya na ɣɛɛna e ɓɔɔ ʋe sa Jehova ya. Ani ya fai niitiɛ ɓɔgapɛ kɛɛna e bataizei maa zɔlɔwo, ya ɣɛ pelei nii ma ga e zɛʋui zɔlɔwo kwɛ̃ɛ gɛ lɛ ba. Gala Kɔlɔi ɣɛ: ‘Bataizei . . . ɣa é wo valozu’—1 Pite 3:21.
FAA LAMAA MAA WOLI
Wɛlɛ nii va e kɛɛ e ga faa ɓi ga e ɓɔɔ ʋe Jehova ya na ɣa ɣɛɛna e bataizei maa zɔlɔwo.
3. Manɛɛ de ɓɔgapɛ de deʋe nui da feli
Wɔlɔ-wɔlɔi zu, Yezɔi numaa taniga tɔ ɣi-gaa-ziɛ ga tɔ ɣɛ Jehova ʋelizu na ɣa ɣɛɛna tiɛ zɛɛ ʋaa ɣalagi Beeya ʋeli wɔnɔ. Kɛ Jehova daa woo wo nui Yiilaija leveni ga e ɓɔ te va te ta ɣi-gaa-ziɛ yowũi na maa ʋeli bo. A 1 Kings 18:21 lodo, wo gaa-zaɣa-kɛɛ nii ɣaa wote:
Deʋe zɛɓɛi manɛɛ Yezɔitiɛ tɔ bo?
E ɣɛ velei Yezɔitiɛ te ɣɛni la, da ɓalaa manɛɛ de deʋe ga zɔi da feli. A Luki 16:13 lodo, wo gaa-zaɣa-kɛɛ niitiɛ ɣaa wote:
Zɛɓɛi e kɛɛ a dɛ lɛ ɣɛɛ Jehova ʋelizu dɔ ɣɛ dɛ wɔnɔ nui ta ɔɔ ŋɛni ta ɓalaa ʋelizu?
Da leve ɣɛ le de dɛ ga de daa ɣisu ga de Jehova ʋeli?
4. Ɣi-gaa-ziɛ wõilai ma e Jehova ya e ʋaa ma
Jehova faa-nɛɛ lamaa ɣɛɛ de vɛ. Zɛɓɛi sa manɛɛ de kɛ? ƲILIOGI nii lɛ ga.
Jehova vɛɛ dɛɛzu ga wõila ɣa zeea e ʋaa ma ɣɛ le? A Psalm 104:14, 15 ɓɔga 1 Jɔ̃ 4:9, 10 lodo, wo gaa-zaɣa-kɛɛ niitiɛ ɣaa wote:
Faa-nɛɛ zɛɓɛi Jehova kɛɛ e vɛ ga e e wuuzu nɛɛ ɓɔɔ ga ʋike?
Zɛɓɛi e ga ya ɣi-gaa-ziɛi e vile faa-nɛɛ niitiɛ va Jehova kɛɛ e vɛ?
Ani nu ɣa faa-nɛɛ ɣɛɛna de vɛ tɔwɔ e de wuuzu nɛɛ ɓɔɔ ga ʋike da wõi de dɛ ga de wuuzu nɛɛvɛ faa-nɛɛ na ʋaa ma. A Deuteronomy 16:17 lodo, wo gaa-zaɣa-kɛɛ nii ɣaa wote:
Ani ya ɣi-gaa-ziɛna e vile faa-nɛɛ niitiɛ ɓɔgapɛ ba Jehova kɛɛ e vɛ, zɛɓɛi ya ɣɛ wõini e kɛ?
5. Da ɓɔɔ ʋeena Jehova ya da kulo su-nu-ma lamaa maa zɔlɔwo
Tɔ numaa lamaa ɣisu ga ani numaa ta te wɛ̃ɛna, te tii lamaa maa woli ɔɔ te naʋolo lamaa maa zɔlɔwo towa va ga kuuzu nɛɛ te wɔ. Kɛ e ɣisu na ɣa ga gaama? ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.
Ʋiliogi nii zu velei ɓalaa zunui ɣɛni wõini ga bɔɔ lowa ʋai, zɛɓɛi e kɛɛni yiɛ ɓe ba?
E deʋeni ga e ɓe bɔɔ lowa ʋai va e ɓɔɔ ʋe Jehova ya. E ɣisu nii e kɛɛni e ɣɛni ga faa vagɔ? Zɛɓɛi e kɛɛ yiɛ na wo?
Pɔɔ ɔ vɛɛ ɣɛɛzu ga Kolai Maa Veaitiɛ te ta, e ɣaa ɓaani ga e kɔlɔ lamaa wɛ̃ɛ. E Dusiitiɛ ta lɔgitiɛ maa wolini kala-mɔ walai ta wu. Kɛ e wulu ɣaa ʋeni natiɛ ɓɔgapɛ ba ga e ɣɛ ga Kolai Maa Veaitiɛ te ta. E ɣisu Pɔɔ yii zuulini e vile nii va e kɛɛni? A Felepaitiɛ 3:8 lodo, wo gaa-zaɣa-kɛɛ niitiɛ ɣaa wote:
Zɛɓɛi e kɛɛ Pɔɔ boni ga nii ɓɔgapɛ e maa zɔlɔwoni ɔ vɛɛ ɣɛɛzu ga Kolai Maa Veaitiɛ te ta, te maʋaa wuloai e ɣɛni e ɣɛ “tulu-ga ŋɛni” ɔɔ kava?
Kulo su-nu-ma zɛɓɛi e maa zɔlɔwoni?
Zɛɓɛi e kɛɛ da ɣɛ tiɛ Jehova ʋeli ʋai ʋize wogɛ e leve faa ta nɛpɛ ba ya kɛ ya ŋeteai zu?
Tei Pɔɔ ɣɛni ga Kolai Maa Veaitiɛ te ta e kulo su-nu-ma lamaa maa zɔlɔwoni e leve nii va e zɛni naa wulu
NUMAA TANIGA TA ƔƐ TEA: “Gè kwɛ̃ni ɓɔɔ ga gaamai ɣaa, kɛ gɛ lɛ ziɛa na wu.”
E ɣisu tɔ ga faa vagɔ ga nu ɓɔɔ ʋe Jehova ya?
NII SA È MAA WOLIA
Wõilai e de ya Jehova ʋaa ma towa kɛ de ɓɔɔ ʋe zeea de bataizei maa zɔlɔwo.
Ma-ɓigitiɛ
Zɛɓɛi e kɛɛ manɛɛ de wõi ga Jehova ga ɣii ɣaazɔ na ɣa ɣɛɛna diɛ feli?
Jehova ʋeli veai niitiɛ te bataizei maa zɔlɔ woga kulo su-nu-ma zɛɓɛi te maa zɔlɔ wosu?
E wõini e ɓɔɔ ʋe Jehova ya?
WƐLƐ FAA LAMAA VA
Wɛlɛ nii va e ɓɔni gui loo nui nii ɓɔga bɔɔ lowa nui nii va ga te ɓɔɔ ʋe Jehova ya.
Wɛlɛ wɔnɔ zaɓui taniga va e kɛɛ manɛɛ e ɓɔɔ ʋe Jehova ya.
“Zɛɓɛi E Kɛɛ Manɛɛ E Ɓɔɔ Ʋe Jehova Ya?” (The Watchtower, January 15, 2010)
Wɛlɛ kuuzu nɛɛ va e niitiɛ ya te ɓɔɔ ʋea Jehova ya ʋiliogi nii zu.
Po-kɔ̃ɔ-mai nii zu “Kwena Tamaa Wuuzu Ge Vɛɛ Ɣi-Gaa-Ziɛzu Gaa-Zaɣa-Kɛɛ Nii Ma, ‘Zɛɓɛi De Ma Ŋetea?’” Wɛlɛ nii va e ɓɔni ŋaza nui nii va ga e ɣi-gaa-ziɛ nii ma fize wogɛi e ɣɛni.
“Gala Kɔlɔi Ɣa Da Ŋeteai Maa Ʋeli Bo” (The Watchtower, November 1, 2012)