KALABO 12
Zɛɓɛi Ya Ɓɔ E Va E Ɣaa-Ɓaa Yiɛ Gala Kɔlɔi Maa Woli?
Yana Gala Kɔlɔi maa wolizu ya wulo ɓɔɔ su-nu-ma. Kɛ tanisu na ɣa ɓaa de ya. Tanisu ya vaazu ɣi-gaa-ziɛ zu ga, ani ya vaazu zoosu yiɛ Gala Kɔlɔi maa woli. Zɛɓɛi e kɛɛ manɛɛ e ɣaa-ɓaa yiɛ Gala Kɔlɔi maa woli? Zɛɓɛi ya ɓɔ e va yiɛ maa woli, ani ɓalaa na ɓaavɛ e yee ma?
1. Zɛɓɛi e kɛɛ manɛɛ diɛ Gala Kɔlɔi maa woli?
“Gala daa woi ɣa ga ŋɛnii kɛɛ-zu ma maʋaa maa wui-wuigɛi.” (Hiiɓuluitiɛ 4:12) Gala Kɔlɔi ʋize wogɛ ɓɔvɛlaale towa Gala na ki-gaa-ziɛi lɛ ga yiɛ, e dɛ wɔnɔ ga Gala ɓɛdɛvɛ e ʋaa ma. Towa kele-ɣele fe wɔnɔ de ya e vɛɛ ki-to ba. Maɓigii ɣa ga, towa ɓɔ e va e ɣɛ ga Jehova na siɛ-pulu. Ani ya Gala Kɔlɔi maa wolizu towa ɓɔ e va e ŋetea vagɔ ɣɛ.
2. Zɛɓɛi e kɛɛ manɛɛ de kwɛ̃ɛ ga Gala Kɔlɔi ʋize wogɛ?
Gaamai e Gala Kɔlɔi zu te maʋaa wulovɛ e ɣɛ tɔnɔ-ba ŋɛni. Na ɣa e kɛɛ Gala Kɔlɔi boga de ma ga “gaamai ɣeea na ɣa ɣɛɛna mɛlɛ sɔ̃wɔ wulo.” (Proverbs 23:23) Ani da kwɛ̃ɛna ga gaamai e Gala Kɔlɔi zu fize wogɛ, da ɣaa-ɓaa diɛ maa woli—ani ɓalaa na ɓaavɛ de yee ma.—Proverbs 2:4, 5 lodo.
3. Jehova ɣa ɓɔ e va ɣɛ le yi Daa Woi maa woli?
De ɓɛtɛ Ɣalagi Jehova, wõini e ɓɔ e va e faa maa woli e vile ba. ‘Towa gaa-ɓaa ʋe de ya ga de zii-mai ɣɛ.’ (Felepaitiɛ 2:13 lodo.) Kɛ ani na ɓaavɛ e yee ma ga e Gala Kɔlɔi maa woli, ɔɔ ga e ziɛ ga niitiɛ e maa wolia, Jehova ɣa ɓɔ e va. Ani kɔnɔ na ɓaavɛ ga e fai taniga yee maazu ɣale, ɔɔ ga e lo kpã, towa ɓɔ e va. Jehova ɣaa-zaɣa-kɛ siɛ nɛpɛ ma, ga e ɓɔ e va e ɣaa-ɓaa yiɛ Gala Kɔlɔi maa woli.—1 Tɛsɛlonaikaitiɛ 5:17.
FAA LAMAA MAA WOLI
Wɛlɛ velei ya ɣaa-ɓaa la yiɛ Gala Kɔlɔi maa woli, ani ɓalaa tii lamagɛ e ma ɔɔ ani faa ɓaa ka laazu e ma. Wɛlɛ kɔnɔ velei Jehova ɣa ɓɔ la e va ga e ɣaa-ɓaa yiɛ Daa Woi maa woli.
4. Gala Kɔlɔi maa woli ʋai ziɣi ga faa ɓi ya ŋeteai zu
Tanisu tii ɣa lama de ma, e kɛ na ɓaa ga de Gala Kɔlɔi maa woli. Kɛ zɛɓɛi ya ɓɔ de va? A Felepaitiɛ 1:10 lodo, wo gaa-zaɣa-kɛɛ niitiɛ ɣaa wote:
Zɛɓɛi ɓɔɔ fize wogɛi ya ŋeteai zu?
Ya leve ɣɛ le e Gala Kɔlɔ maa woliai lo faa pɛ tuo ya ŋeteai zu?
Ya kpɔlɔgi laa ʋena ga yãazegi e ɣɛ e kwɔti ɓaaza-kpaazagitiɛ wu su, ɛ lɛ vaazu zolo wosu.
Kɛ ani ya kwɔti ɓaaza-kpaazagitiɛ wuu na su ga ma maa wũ, ya dɛ ya zoo e yãazegi ta wu su. Vele ɣana nɔ e la, ani ya niitiɛ lo na na luo te ʋize wogɛi ya ŋeteai zu, ya dɛ ya zoo e faa ɓalaaga ɣɛ.
Da na Gala Kɔlɔi lodosu towa ɓɔ de va de Gala kwɛ̃ɛ, diɛ feli. A Mafiyu 5:3 lodo, wo gaa-zaɣa-kɛɛ nii ɣaa wote:
Ani da Gala Kɔlɔ maa woliai lo na naa luo, towa ɓɔ de va ɣɛ le?
5. Ɣaa-ɓaa yiɛ Gala Kɔlɔi maa woli ani ɓalaa numaa ta zilina ga yiɛ
Tanisu numaa ta vaazu ɣaa ɓaazu ga te e ʋii-ɓɛɛ Gala Kɔlɔ maa woliai zu. Wɛlɛ nii va e ɣɛɛni ga Francesco. ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote:
Ʋiliogi nii zu, zɛɓɛi Francesco na numaitiɛ ɓɔga na siɛ-puluitiɛ te kɛɛni, tei e yɛpɛni te wɔ e vile nii va e ɣɛni maa wolizu?
Kulo su-nu-ma zɛɓɛi e maa zɔlɔwoni, tei e ɣaa ɓaani yiɛ Gala Kɔlɔi maa woli?
A 2 Temete 2:24, 25 lodo, wo gaa-zaɣa-kɛɛ niitiɛ ɣaa wote:
Ya numaitiɛ ɓɔga ya ziɛ-puluitiɛ ta ɣi-gaa-ziɛ zu ɣɛ le e vile nii va e maa wolizu?
E ɣɛ velei Gala goi niitiɛ te boga la, ani ya numaitiɛ te wuuzu lɛ nɛɛni e vile nii va e maa wolizu, zɛɓɛi manɛɛ e kɛ?
6. Yee la Jehova ma ga e ɓɔ e va
Ani da lɔtɔ na Jehova va da wõi ga de zii-mai ɣɛ. Kɛ tanisu na ɣa ɓaa de yee ma ga de fai taniga maa ʋeli bo da ŋeteai zu, ga de ziɛ ga niitiɛ Jehova boga. Kɛ nii mɛlɛ e ʋii-ɓɛɛ. Jehova ɣa vaazu ɓɔsu e va. ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.
Ʋiliogi nii zu, zɛɓɛi Jim kɛɛni ga e Jehova yii-mai ɣɛ?
Zɛɓɛi ɓɔɔ e maa wolia na po-kɔ̃ɔ-mai zu?
A Hiiɓuluitiɛ 11:6 lodo, wo gaa-zaɣa-kɛɛ niitiɛ ɣaa wote:
Zɛɓɛi Jehova vaazu kɛɛzu niitiɛ vɛ ta “gaa ziɛ”—na ɣa ga taitiɛ te ɣaa ɓaazu ga te kwɛ̃ɛ tiɛ zii-mai ɣɛ?
Zɛɓɛi nii dɛɛzu ga yiɛ e vile velei va Jehova ɣa ɣi-gaa-ziɛ la, ani towa wɛlɛna e va yiɛ ɣaa-ɓaa ga e Gala Kɔlɔi maa woli?
NUMAA TANIGA TA E ƔAA-ZAƔA-KƐ GA: “Zɛɓɛi e kɛɛ yiɛ Gala Kɔlɔi maa woli?”
Zɛɓɛi ya bo te ma?
NII SA È MAA WOLIA
Velei ɓalaa na ɣa ɓaa la de yee ma, kɛ da na Gala Kɔlɔi maa wolizu towa ɓɔ de va de yii-ma ɣɛ wɔlɔ-wɔlɔ ta wɔlɔ-wɔlɔ. Jehova ɣa ɓɔ e va ani ya yee laana ma.
Ma-ɓigitiɛ
Zɛɓɛi e kɛɛ Gala Kɔlɔi ʋize wogɛi e ɣaazu?
Ya leve ɣɛ le e niitiɛ ɣɛ te ʋize wogɛi ya ŋeteai zu?
Zɛɓɛi e kɛɛ manɛɛ e Jehova ɣaa-zaɣa-kɛ ga e ɓɔ e va, yiɛ Gala Kɔlɔi maa woli?
WƐLƐ FAA LAMAA VA
Wɛlɛ velei faa naagɔi niitiɛ te ɓɔga la numaa lamaa va, ga te zoo te niitiɛ ɣɛ fize wogɛi ma ziɛ vagɔi ma.
“Ya Leve Ɣɛ Le E Niitiɛ Ɣɛ Solowogɛi Ma Ziɛ Vagɔi Ma?” (Awake!, February 2014)
Wɛlɛ velei Jehova ɓɔni la ŋaza nui nii va e ɣɛni ɣaa ɓaazu ga e zii-mai ɣɛ, velei ɓalaa pɔɔ nu lɛ ɣɛni siɣizu la ga zɔɓɛlɛ.
Jehova Gaa-Ɓaa Ʋeeni Ge Ya Ga Ge Niitiɛ Ɣɛ Manɛɛ Ge Kɛ (5:05)
Wɛlɛ velei ŋaza nui nii ɓɔni la pɔɔ nu va.
Tanisu numaa ta boga, Jehova Na Seeleitiɛ ta numaa ɣaa wɛɛ ma. Kɛ e ɣisu na ɣa ga gaama?