Dɛ Ga E Wuuzu Nɛɛvɛ Zɛʋui Ʋaa Ma Jehova Fea De Ya

Ŋeteai maɣaa-nɛɛ ɣa ɓɔɔ ba. Ani ɓalaa da ɣɛna faa ɓaa su, da zoo dɛ de kuuzu nɛɛ maa zɔlɔwo da ŋeteai zu. Da dɛ ɣɛ le ga de wuuzu nɛɛvɛ zɛʋui ʋaa ma Jehova fea de ya? Tɔwɔ zɛɓɛi e kɛɛ e ga faa ɓi ga de nii ɣɛ?

1. Zɛɓɛi e kɛɛ manɛɛ de dɛ ga de wuuzu nɛɛvɛ zɛʋui ʋaa ma?

Manɛɛ de dɛ ga de wuuzu nɛɛvɛ zɛʋui ʋaa ma, ɓɔvɛlaale kulovɛ de ɓɛtɛ Ɣalagi Jehova ya. Towa “zɛʋu wuloai zeea”​—towa e ŋɛni ɓɔgapɛ kpɛtɛɛ. (Psalm 36:9) ‘Tɔ ɓɔɔ ɣa wɔnɔ é ŋeteai ʋeezu nu ɣaazɔ ya ta zɛʋui e vɛɛ sa ŋɛni ɣaazɔ va.’ (Te Ɣɛɛ Ʋaitiɛ 17:​25, 28) Niitiɛ ɓɔgapɛ ya ɓɔ de va ga de ŋetea ɣɛ, Jehova feevɛ de ya. E wulo na wulu e ɓɔgɛ de va wɔnɔ ga de kuuzu nɛɛ wulo da ŋeteai zu.​—Te Ɣɛɛ Ʋaitiɛ 14:​17 lodo.

2. Da dɛ ɣɛ le ga de wuuzu nɛɛvɛ zɛʋui ʋaa ma Jehova fea de ya?

E ziɣi siɛgi ma te e mawo siɣini la, Jehova vɛɛ e maazu vɛtɛsu. Deeve na Gala-feliai gila su, nii e ɣɛni ga Jehova ʋeli nui ta e ɣɛni tea: “E pɛtɛni ɓalaa tei ge ɣɛni ga duuyɛ̃ dee wogi zu.” (Psalms 139:​16) E yɛʋui ʋize wogɛ ɓɔɔ Jehova ɣaazu. (Mafiyu 10:​29-31 lodo.) Towa Jehova yii zuuli ɓɔɔ ani nu nɛpɛ ka gaa ɣilina e nu vaa ɔɔ e ɓɔɔ vaa.a (Exodus 20:​13) Towa wãla Jehova ma wɔnɔ ani dɛ lɛ yɛʋui maazu vɛtɛni ɔɔ de ɓe de vaitiɛ yɛʋui maazu vɛtɛsu. Ani da de yɛʋui maazu vɛtɛna e vɛɛ de vaitiɛ va towa dɛ ga de wuuzu nɛɛvɛ zɛʋui ʋaa ma Jehova fea de ya.

FAA LAMAA MAA WOLI

3. Ɣaa-ɓaa ga dɔtɔ-zu-wodo ɣɛ e ya

Taitiɛ ta ɓɔɔ ʋe Jehova ya ta ɣaa-ɓaa ga te zii-mai ɣɛ ta ŋeteai zu. Maʋaa wulovɛ ga ta ɓɔɔ ʋe Jehova ya ga zalaɣa. A Loomɛitiɛ 12:​1, 2 lodo, wo gaa-zaɣa-kɛɛ niitiɛ ɣa wote:

• Zɛɓɛi e kɛɛ manɛɛ e ɣaa-ɓaa ga dɔtɔ-zu-wodo ɣɛ e ya?

• Pele taniga ta ga zɛɓɛ ya dɛɛ la ga ya ɣaa ɓaazu ga dɔtɔ-zu-wodo ɣɛ e ya?

4. E yɛʋui maazu vɛtɛ e vɛɛ e vaitiɛ va

Gala Kɔlɔ de lɛnɛgɛ ga de ɓɔɔ ɓetevɛ niitiɛ va ya kɛ faa yowũ ɣɛ ga diɛ. ƲILIOGI nii lɛ ga wo wɛlɛ faa taniga va da kɛ ga de yɛʋui maazu vɛtɛ.

ƲILIOGI: Ɣaa-Ɓaa E Yɛʋui Maazu Vɛtɛ (8:​34)

A Proverbs 22:3 lodo, wo yɛpɛ e vile velei va ya ɓɔɔ maazu vɛtɛ la e vɛɛ e vaitiɛ va . . .

• ya vɛlɛi la.

• ya lii ɣɛɛzu vɛ.

• ya ɣɛna ɣaa-wosu.

• ya ɣɛna kpize ŋɛni zu ɔɔ e maazu.

5. Wũfe duuyɛ̃gi yɛʋui ma ani ɓalaa tɛ lɛ dɛ kaani

Deeve dɛɛni ga Jehova ɓɛdɛvɛ duuyɛ̃gi niitiɛ ʋaa ma tɛ tɛ dɛ te ɣaani. A Psalms 139:​13-17 lodo, wo gaa-zaɣa-kɛɛ nii ɣaa wote:

• E ɣisu Jehova ɣaazu minɛɛ ɣa zɛʋui ɣa lɔɔ-zei na, ko siɣi ʋoloi ɔɔ duu ɣaa ʋoloi?

Jehova na tɔgi e feeni Yezɔitiɛ ya e ko ŋazaitiɛ ɓɔga duuyɛ̃gi niitiɛ tɛ lɛ dɛ te ɣaani te maazu vɛtɛni. A Exodus 21:​22, 23 lodo, wo gaa-zaɣa-kɛɛ niitiɛ ɣa wote:

• Jehova ɔ ɣi-gaa-ziɛ ɣɛ le ani nu ɔ kɛɛna ko ŋazai ta vala dui ma ani ɓala ɛ lɛ gaa ɣilini?

• Jehova ɣa ɣi-gaa-ziɛ ɣɛ le ani nu ɣa gaa ɣilina e nii maʋai ta ɣɛ?b

• Zɛɓɛi e ga ya ɣi-gaa-ziɛi e vile velei va Jehova ɣa ɣi-gaa-ziɛ la?

ƲILIOGI nii lɛ ga.

ƲILIOGI: Dɛ Ga Zɛʋui Ʋize Wogɛ E Ɣaazu E Ɣɛ Velei E La Jehova Ɣaazu (5:​00)

Ŋaza nui nii ɓalaa zɛʋu ʋize wogɛi gaazu, ta ɣɛ ɓoeizu da tanisu ga e ko kala-ŋala. A Isaiah 41:​10 lodo, wo gaa-zaɣa-kɛɛ niitiɛ ɣaa wote:

• Ani ta ɣɛna ɓoeizu ko ŋaza la ga e ko kala-ŋala ɓɛɛ ɣa manɛɛ e li pɔ ga e kpɔba zɔlɔwo? Zɛɓɛi e kɛɛ yiɛ na wo?

NII SA È MAA WOLIA

Gala Kɔlɔi de lɛnɛgɛ ga wõila ɓɔga wũfe-ma ɣɛ de ya zɛʋui ʋaa ma Jehova fea de ya na ɣa ɣɛɛna de ɣaa-ɓaa ga de maazu vɛtɛ. Na zu-wulo-zu ɣa ga de yɛʋui maazu vɛtɛ e vɛɛ de vaitiɛ va.

Ma-ɓigitiɛ

• Zɛɓɛi e kɛɛ zɛʋui ʋize wogɛi Jehova ɣaazu?

• Jehova ɣa ɣi-gaa-ziɛ ɣɛ le ani nu ɣa gaa ɣilina e nu vaa?

• Zɛɓɛi e e wuuzu nɛɛ e vile zɛʋui va Jehova fea?

WƐLƐ FAA LAMAA VA

Da Jehova mama ɣɛ le zɛʋui nii ʋaa ma e fea de ya?

Gui 141​—Zɛʋui Ɣa Ga Faa Maa Wɔlɔ-Wɔlɔ (2:41)

Wɛlɛ gaa-zaɣa-kɛɛ nii ɣaa wotegi va. E ɣisu Jehova ɣa ŋaza nui nii zu-ʋaa-yɛ e ko kala-ŋalaga?

“Zɛɓɛi Gala Kɔlɔi Boga E Vile Ko Kala-Ŋala Faa Va?” (Kɔlɔi nii ɣa fãga wɔlɔi ma)

Ani da zɛʋui ʋize wona e ɣɛ velei e la Jehova ɣaazu wɛlɛ velei va towa faa vɛɛ la ɣaa-wogi nii mazii va da bo.

“E Ɣisu Manɛɛ E Ɣaa-Wo Yowũ Wo?” (Awake!, October 8, 2000)

Ani nu ɣana wõini e ɓɔɔ vaa, wɛlɛ velei Gala Kɔlɔi ɣa ɓɔ la manui va.

“Ge Wõini Ge Za​—Gala Kɔlɔi Ɣa Ɓɔ Ba Ani Ga Ɣɛna Ɣi-Gaa-Ziɛzu Ga Ge Ɓɔɔ Vaa?” (Kɔlɔi nii ɣa fãga wɔlɔi ma)