Liñolo Labubeli Kwa Makorinte
6 Haubona lusebeza hamoho ni Mulimu,+ hape lumisusueza kuli musike mwaamuhela sishemo sa Mulimu ni kusautwisisa mulelo wasona.+ 2 Kakuli uli: “Neni kuutwile mwa nako ya kushemubiwa, mi neni kutusize ka lizazi la kukupilisa.”+ Hakubone! Ye cwale sihulu ki yona nako ya kushemubiwa. Hakubone! Le cwale ki lona lizazi la kupiliswa.
3 Halufi mutu libaka la kusitatala ka lona, kuli bukombwa bwaluna busike bwanyaziwa;+ 4 kono mwa lika kaufela luipaka kuba likombwa za Mulimu,+ haluitiisa mwa manyando amañata, mwa liñalelwa, mwa linako za kusaba ni lika, mwa butata bobushutana-shutana,+ 5 halunatakiwa, haluli mwa litolongo,+ haluli mwa mifilifili, halusebeza ka taata, haluba ni masihu a kutokwa buloko, mwa linako za kutokwa lico;+ 6 ka bukeni, ka zibo, ka kuitiisa ka pilu-telele,+ ka sishemo,+ ka moya okenile, ka lilato lelisina buipi,+ 7 ka kubulela niti, ka maata a Mulimu;+ ka kuswala lilwaniso za kuluka+ mwa lizoho la bulyo* ni la nzohoto,* 8 ka nako ya kukanyiswa ni ya kushubulwa, haluamuhela lipiho zemaswe ni lipiho zende. Luungiwa kuli lupuma batu, kono lubulela niti, 9 luungiwa kuli lu batu babasa zibwi, kono lwazibahala, luungiwa sina babashwa,* kono hamubone! lwapila,+ niha lushapakiwa,* halubulaiwi,+ 10 luungiwa kuli luswabile kono lutabile kamita, luungiwa kuli lushebile kono lufumisa babañata, luungiwa kuli haluna sesiñwi kono luluwile lika kaufela.+
11 Luatamisize mulomo waluna kuli lubulele* ku mina Makorinte, mi lukwaluzi hahulu lipilu zaluna. 12 Halutibeli lilato laluna ku mina,+ kono mina mutibela lilato lamina ku luna. 13 Hakulicwalo—nibulela inge yabulela kwa bana baka—ni mina mukwalule hahulu lipilu zamina.+
14 Musike mwalwala coko iliñwi ni babasa lumeli, ili coko yesalikaneleli.+ Kakuli ki ifi swalisano ye mwahalaa kuluka ni kutula mulao?+ Kamba liseli ni lififi likakopana cwañi?+ 15 Hape ki ifi swalisano ye mwahalaa Kreste ni Beliale?*+ Kamba yalumela* uswalisana cwañi* ni yasalumeli?+ 16 Mi tempele ya Mulimu inani tumelelano ifi ni milimu ya maswaniso?+ Kakuli luna lu tempele ya Mulimu yapila;+ sina Mulimu hanaaize: “Nikaina mwahalaa bona+ ni kuzamaya mwahalaa bona, mi nikaba Mulimu wabona, mi bona bakaba sicaba saka.”+ 17 “‘Hakulicwalo, hamuzwe mwahalaa bona, mi muikauhanye ku bona,’ kubulela Jehova,* ‘mi mutuhele kuswala nto yesilafezi’”;+ “‘mi nika miamuhela.’”+ 18 “‘Mi nikaba ndataa mina,+ mi mina mukaba bana baka babashimani ni babasizana,’+ kubulela Jehova* Yamaata Kaufela.”