Kwa Magalata
5 Kakuli Kreste naalulukuluzi kuli lube ni tukuluho yecwalo. Ka mukwa ocwalo, mutiye,+ mi musike mwalumela kukutela kwa coko ya butanga.+
2 Hamubone! Na Paulusi nimibulelela kuli haiba muya kwa mupato, Kreste haana kuba ni tuso ku mina.+ 3 Hape nihupulisa mutu kaufela yaya kwa mupato kuli utamehile kumamela Mulao kaufela.+ 4 Mukauhanyizwe ku Kreste, mina babalika kubeiwa babalukile ka kumamela mulao;+ mu kwande a sishemo sahae. 5 Haili luna, lulibelezi kuba babalukile ka moya okenile ni tumelo yaluna. 6 Kakuli ka kuswalisana ni Kreste Jesu, kuya kwa mupato kamba kusaya kwa mupato haki sesiñwi,+ kono sa butokwa ki tumelo yesebeza ka lilato.
7 Nemumata hande.+ Ki mañi yamitibezi kuli muzwelepili kuipeya kuutwa niti? 8 Kukolwiswa kokucwalo hakuzwi ku yamibiza. 9 Mumela omunyinyani utundulukisa bupi kaufela bobulubilwe.+ 10 Ninani buikolwiso bwa kuli mina babaswalisana ni Mulena+ hamuna kuba ni maikuto ashutana ni aka; kono mutu ufi kamba ufi yamifilikanya,+ ukaamuhela katulo yaswanela kufiwa. 11 Haili na mizwale, haiba nisakutaza mupato, kiñi senisa nyandisezwa? Haiba ki cwalo, sisitataliso, ili yona kota ya linyando,*+ sifelisizwe. 12 Nilakaza kuli kambe batu babalika kumifilikanya nebaka fahulwa.*
13 Mizwale, nemubizelizwe kutaha kwa tukuluho; musike mwaitusisa tukuluho yeo sina kolo ya kundongwama litakazo za nama,+ kono musebelezane ka lilato.+ 14 Kakuli Mulao kaufela utalelelizwe* mwa taelo iliñwi, yeli: “Ulukela kulata wahenu mouitatela.”+ 15 Kono haiba muzwelapili kulumana ni kumizana,+ mutokomele kuli hamuyundisani.+
16 Kono nili: Muzwelepili kuzamaya ka moya+ mi hamuna kuya ka litakazo za nama.+ 17 Kakuli nama ilwanisana ni moya mwa litakazo za yona, mi moya ulwanisana ni nama; zeo zalwanisana, ilikuli musike mwaeza lika luli zemubata kueza.+ 18 Mi hape haiba muzamaiswa ki moya, hamuyo mwatasaa mulao.
19 Cwale misebezi ya nama yaiponahalela fokusweu, mi ki muzamao wa buhule,*+ masila, muzamao wa kusaswabela bufosi,*+ 20 kulapela milimu ya maswaniso, tumelo ya mioya,*+ sitoyo, lifapahano, lifufa, buhali, likañi, likauhano, tukwata totulatelela batu, 21 muna, bucakolwa,+ mikiti yelilata, ni zeñwi zecwalo.+ Nimilemuseleza cimo lika ze, sina mone nimilemuselelize cimo, kuli babaeza lika zecwalo habana kuca saanda sa Mubuso wa Mulimu.+
22 Kono muselo wa moya ki lilato, tabo, kozo, pilu-telele, sishemo, bunde,+ tumelo, 23 bunolo, buiswalo.+ Hakuna mulao olwanisa zeo. 24 Hape babali ba Kreste Jesu nebakokotezi fa kota nama hamohocwalo ni litakazo zayona ni zelatwa ki yona.+
25 Haiba lupila ka moya, haluzweleñipili ni kuzamaya ka mukwa oswanela ka kuetelelwa ki moya.+ 26 Lusike lwainuneka,+ lunze lushamiliketa moya wa kukangisana ni babañwi,+ ni kushwelana muna.