Liñolo Lapili la Pitrosi
2 Cwale muzwise ku mina bumaswe kaufela,+ bupumi ni buipi ni muna ni lusebo kaufela. 2 Sina limbututu zesazo pepwa,+ mushukelwe mabisi aasika zwakwa* a linzwi, kuli ka ona mukone kuhula ni kupuluswa,+ 3 ibile feela muiponezi kuli Mulena unani sishemo.
4 Hamunze mutaha ku yena, yena licwe lelipila lelihanilwe ki batu,+ kono ki leliketilwe mi ki la butokwa ku Mulimu,+ 5 mina luli, sina macwe apila, musweli mwayahiwa kuli mube ndu ya kwa moya+ kuli mufetuhe buprisita bobukenile, ilikuli mufe matabelo a kwa moya+ aamuhelwa ku Mulimu ka Jesu Kreste.+ 6 Kakuli mwa Liñolo kuizwe: “Hamubone! Nibeya mwa Sione licwe leliketilwe, licwe la mutomo la mwa kona, la butokwa, mi hakuna yabonisa tumelo ku lona yakaswaba nikamuta.”+
7 Hakulicwalo, ki ku mina kwali wa butokwa, kakuli mu balumeli; kono ku babasa lumeli, “licwe lebahanile bayahi+ lifetuhile licwe la butokwa la mwa kona,”*+ 8 ni “licwe lelisitatalisa ni licwe leliwisa.”+ Basitatala kabakala kuli habautwi linzwi. Mi ki sona sebaketezwi ni bona. 9 Kono mina mu “batu babaketilwe, mu buprisita bwa silena, mu sicaba sesikenile,+ mu buswa bwahae bobuipitezi,+ kuli mushaele litaba zende kai ni kai”+ za yanaa mibizize kuzwa mwa lififi ni kukena mwa liseli lahae lelinde.+ 10 Kakuli sapili nemusi sicaba, kono cwale mu sicaba sa Mulimu;+ pili nemusika boniswa sishemo, kono cwale mushemubilwe.+
11 Balatiwa, namieleza ka kuba bazwahule ni baenyi mwa lifasi+ kuli muzwelepili kuikambusa kwa litakazo za nama,+ zemilwanisa.+ 12 Muzwelepili kuba ni muzamao omunde mwahalaa macaba,+ kuli haba mitameleza kuba lifosi, babe lipaki zeiponezi misebezi yamina yeminde,+ mi kabakaleo, bakanyise Mulimu mwa lizazi la kutatuba kwahae.
13 Kabakala Mulena, muutwe babazamaisa kaufela,+ ibe mulena+ kakuli wamifita 14 kamba babusisi kakuli balumilwe ki yena kuli bafe koto lifosi ni kulumba babaeza hande.+ 15 Kakuli tato ya Mulimu kikuli ka kueza hande, mukone kukuzisa batu babasina kutwisiso bababulela litaba za butoto.+ 16 Mube sina sicaba sesilukuluhile,+ musaitusisi tukuluho yamina sina kubo* ya kukwahela bufosi ka yona,+ kono mube sina batanga ba Mulimu.+ 17 Mukuteke batu ba mufuta kaufela,+ mulate kopano ya mizwale bamina kaufela,+ musabe Mulimu,+ mukuteke mulena.+
18 Haike batanga baipeye kwatasaa malenaa bona ka kubonisa likute leli baswanela,+ isiñi feela kwa malena babande ni babautwisisa, kono ni ku babataata. 19 Kakuli ki nto yende mutu haiba aitiisa mwa manyando* mi anyandiswa asina mulatu kabakala lizwalo lahae ku Mulimu.+ 20 Kakuli ki bunde bufi bomufumana ka kuitiisa hamunyandisezwa zemufosize?+ Kono haiba muitiisa hamunyandiswa kabakala kueza zende, yeo ki nto yende ku Mulimu.+
21 Mane bo ki bona bupilo bone mubizelizwe ku bona, kakuli nihaiba Kreste naanyandile bakeñisa mina,+ amisiyela mutala kuli muhate ka busepahali mwanaahatile.+ 22 Naasika eza sibi,+ mi bupumi nebusika fumanwa mwa mulomo wahae.+ 23 Hanaatapaulwa,+ naasika tapaula ni yena.+ Hanaanyandiswa,+ naasika fumbela, kono aipeya ku yaatula+ ka kuluka. 24 Naalwezi libi zaluna+ mwa mubili wahae fa kota,+ ilikuli lukone kulukululwa kwa libi mi lupilele kueza zelukile. Mi “ka mañiba ahae nemufolisizwe.”+ 25 Kakuli nemuswana sina lingu zelatehile,+ kono cwale mukutezi ku mulisana+ ni muokameli wa bupilo bwamina.